Pathian Hnaih Rawh

“Kei Chuan Ka Theihnghilh Lo Vang Che”

JEHOVA chuan a mite chu a ngaihsak tak zet em? A ngaihsak a nih chuan, eng ang khawpin nge a ngaihsak? Chûng zawhnate chhânna hriat theih dân kawng khat chauh a awm a, chu chu Pathian ngei inpuanna aṭangin a ni. Bible-ah Jehova chuan a rilru vei zâwng chu chiang takin a târ lang a. Isaia 49:15 thute hi han ngaihtuah teh.

A mite a vei nasatzia târ lan nân, Jehova chuan Isaia kal tlangin, entîrna kan ngaihtuah chhuah theih azawnga rilru khawih ber tûr chu a hmang a ni. Ani chuan: “Hmeichhiain a fapa, a rîla rah chu, khawngaih lohna tûrin a nau a hnute hne lai chu a theihnghilh thei em ni?” tih zawhna rilru la tak hmangin a sawi ṭan a ni. Han en thuak chuan, a chhânna tûr chu a chiang nghâl angin a lang a. Engtin nge nu chuan a nau hnute hne lai chu a theihnghilh theih tehrêng ang? A fa sên chuan achhûn azânin amah a rinchhan a, ngaihsak a duh apiangin a hriattîr ṭhîn bawk si a! Mahse, Jehova zawhna chuan awmze thûk zâwk a nei a ni.

Engvângin nge nu chuan a fa sên chu a enkawl a, a mamawh apiang a ngaihsak ṭhin? A ṭap tihbân nân mai em ni? Ni lo ve. Nu chuan “a nau a hnute hne lai” chu a khawngaih vâng a ni. (Isaia 54:10) Chutianga nuin a nau hnute hne lai a khawngaihna chu rilru vei zâwng kan ngaihtuah theihte zînga thûk ber a ni.

Mahse, nu zawng zawngin an fa hnute hne lai an khawngaih vek lo hi a pawi hle. Jehova chuan: “Chûngte chuan an theihnghilh a ni thei e,” a ti. ‘Thianghlim lo leh hmangaihna pianpui nei lo’ ahmei apa tam tak awmna khawvêlah hian kan chêng a. (2 Timothea 3:1-5) Fa sên pianghlim ngaihthah leh kalsan a nih thu hriat châng kan nei ṭhîn a ni. Isaia 49:15 chungchângah, Bible hrilhfiahna lehkhabu pakhat chuan heti hian a hrilhfiah a ni: “Nute pawh pianpui sualna nei ve tho an ni a, chu sualna chuan an hmangaihna chu hneh châng a nei thei a. Mihring hmangaihna nasa ber pawh a dai thei a ni,” tiin.

“Nimahsela kei chuan ka theihnghilh lo vang che,” tiin Jehova chuan min tiam a ni. Tûnah chuan Isaia 49:15-a târ lan Jehova zawhna siam chu kan hre thiam ṭan thei ta a. A sawi tum ber chu a kalh zâwnga khaikhinna ngawr ngawr a ni lo. Ṭanpui ngai an fa sênte khawngaih loh châng nei mai thei nu ṭha famkim lote ang lo takin, Jehova chuan amah betu ṭanpui ngaite chungah khawngaihna a lantîr ngei ngei ang. Inâwm takin, kan sawi tâk hrilhfiahna lehkhabu chuan Isaia 49:15 chungchângah: “Hei hi Thuthlung Hlui-a Pathian hmangaihna târ lanna thûk ber a nih loh vêk pawhin, a thûk berte zînga mi a ni ngei ang,” tiin a sawi zawm a ni.

“Kan Pathian . . . khawngaihna” chungchâng hriat chu a thlamuan thlâk hle a ni lâwm ni? (Luka 1:77) Engvângin nge Jehova i hnaih lehzual theih dân chu i zir loh vang? He hmangaihna ngah Pathian hian amah betute chu heti hian a tiam a ni: “Engtikah mah ka thlahthlam tawp lo vang chia, kal pawh ka kalsan tawp lo vang che,” tiin.—Hebrai 13:5. (w12-E 02/01)