WASWE, Jehovah tingim pipol bilong hem? Sapos olsem, hao nao bae olketa savve hem barava tingim olketa? Samting wea God talem nomoa bae helpem iumi for savve long ansa bilong tufala kwestin hia. Long Bible, Jehovah showimaot klia tingting bilong hem abaotem pipol bilong hem. Tingim toktok wea stap long Isaiah 49:15.

Jehovah iusim Isaiah for storyim wanfala nambawan example wea savve helpem iumi luksavve Jehovah barava tingim pipol bilong hem. Jehovah askem disfala kwestin: “Waswe, iu tingse mami savve forgetim nomoa baby bilong hem wea hem susum and nating sorre long pikinini bilong hem wea hem bornem?” Maet iumi tingse hem hard tumas for mami forgetim baby bilong hem wea hem susum. Baby barava needim mami evritaem and hem savve krae taem hem laekem mami bilong hem. Bat tingim nara samting wea iumi lanem from datfala kwestin wea Jehovah askem.

Why nao mami hem susum baby and lukaftarem evri need bilong hem? Waswe, hem for mekem baby bilong hem for stop krae nomoa? Nomoa. Hem wei bilong mami for “sorre long pikinini bilong hem wea hem bornem.” Datfala Hebrew word wea iumi transleitim “sorre” hem minim tu for “showimaot mercy.” (Exodus 33:19; Isaiah 54:10) Datfala Hebrew word savve minim for tingim man wea no savve duim samting for hemseleva or for tingim man wea wik. Mami savve tingim tumas baby bilong hem wea hem susum. Datfala feeling hem strong tumas.

Nomata olsem, samfala mami nating sorre long baby bilong olketa taem hem laek susu. Jehovah sei: “Olketa mami savve forgetim pikinini bilong olketa.” Staka man and woman long world distaem “no faithful, [and] no garem love insaed long famili.” (2 Timothy 3:1-5) Samfala taem iumi herem olketa mami no lukaftarem gud baby bilong olketa. Olketa spoelem or les for keepim baby bilong olketa tu. Wanfala research buk abaotem Bible sei olsem abaotem Isaiah 49:15: “Olketa mami savve forgetim baby bilong olketa bikos olketa sin and samfala taem olketa no lovem baby bilong olketa bikos olketa tingim olketa seleva nomoa. Nomata hem wei bilong mami for lovem baby bilong hem, samfala mami no duim diswan.”

Bat Jehovah sei: “Mi bae nating forgetim iu.” Iumi luksavve nao why Jehovah hem askem datfala kwestin long Isaiah 49:15. Jehovah laekem iumi for luksavve hem barava tingim pipol bilong hem winim wei wea mami tingim baby bilong hem. Nomata olketa mami savve forgetim baby bilong olketa, Jehovah bae nating forgetim pipol bilong hem wea needim help. Hem bae evritaem helpem olketa. Datfala research buk wea iumi storyim finis talem nara samting abaotem Isaiah 49:15. Hem sei: “Long Old Testament, disfala scripture nao showimaot bigfala love bilong God for pipol bilong hem.”

Iumi hapi tumas for lanem God bilong iumi “hem barava kaen tumas.” (Luke 1:78) So gohed for lanem wanem iu savve duim for fren gud witim Jehovah. Jehovah lovem olketa wea worshipim hem and hem promis olsem long olketa: “Bae mi nating lusim iu.”—Hebrews 13:5.