¿CHEQAQTAPUNICHU Dios munakun serviqninkunata? Chhayna kaqtinqa, ¿imaynatan munakun? Chayta yachanapaqqa Diospa nisqantan qhawarinanchis. Bibliapin Diospa imayna sientesqanqa qelqasqa kashan. Hukninmi Isaías 49:15 texto, chayta t’aqwirisun.

Serviqninkunata imayna munakusqanta rikuchinanpaqmi Jehová Diosqa Isaías libropi willakuyta qelqachirqan, chaypin rikunchis hatun munakuymanta. Chaymi paypuni nirqan: “¿Warmiqa ñuñusqan wawata qonqanmanchu? ¿Wachakusqan wawata mahipunmanchu [wikch’unmanchu]?”, nispa. Chay tapuyman kutichispan nisunman: “Huk mamaqa manan wawantaqa qonqanmanchu, wawaqa tuta p’unchaymi mamanta necesitan”, nispa. Jehová Diospa nisqanmi ichaqa aswan hatun munakuymantaraq rimashan.

¿Imanaqtinmi huk mama wawanta ñuñun, llapa necesitasqantapas qon? ¿Waqasqanraykullachu? Manan. Llapa mamakunapas khuyapayankun ‘wachakusqanku wawankutaqa’. Chhayna sienteyqa, pay kikinkumanta mana imatapas ruwakuy atiq runakunata munakuywan khuyapayaymi. Manan pipas huk warmiq wawanta khuyapayasqanta hinaqa khuyapayakunmanchu.

Ichaqa, Jehová Diospa nisqan hina, chay warmikunapas qonqapunkumanmi wawankuta. Arí, manan llapa mamakunachu ñuñuq wawankuta khuyapayanku. Kay tukukuy qaylla p’unchaykunapiqa yaqa llapa runakunan manaña munakuyniyoqchu kanku (2 Timoteo 3:1-5). Wakin mamakunaqa manan chayllaraq nacesqan wawankuta cuidankuchu, wakinqa maqankun otaq wikch’upunku. Isaías 49:15 textoq nisqanmantan huk yachaq runa nin: “Mamakunaqa pantaq runa kayninkupin mayninpiqa mana munakuywanchu wawankuta tratanku”, nispa. Nillantaqmi: “Runaq hatun munakuyninpas pantanmanmi”, nispa.

Jehová Diosmi ichaqa niwanchis: ‘Manan ñoqaqa qonqasqaykichu’, nispa. Kunanqa aswan allintan entiendekun Isaías 49:15 textopi Jehová Diospa nisqan. Chaypin allinta sut’inchawanchis pantaq mamakunaq munakuyninmantaqa Diospa munakuynin aswan hatun kasqanta. Pantaq mamaqa yaqapaschá wawanta qonqanman hinaspa mana cuidanmanchu, Jehová Diosmi ichaqa mana hayk’aqpas serviqninkunata qonqanchu, ima necesitasqankutapas khuyapayakuywanmi qon. Ñawpaqpi nikusqan hina, Isaías 49:15 textopin “Diospa ancha hatun munakuynin” qelqasqa kashan.

Anchatan kallpachawanchis Jehová Diospa munakuyninmanta ‘ancha khuyapayakuq’ kasqanmanta yachayqa (Lucas 1:78). Hinaspapas, Jehová Diosmi niwanchis: “Manan saqerparisqaykichu, manataqmi wikch’urparisqaykipaschu”, nispa (Hebreos 13:5). ¿Munawaqchu yachayta imaynatan Diosman asuykuwaq chayta?