Kporom Hen Aôndo

“Mo Yô, Ú Hungur Mo Ga”

YEHOVA we ikyo sha kwagh u ior nav mimi je he? Aluer we ve ikyo yô, kwagh ve gba un ishima za kighir nan je? Se mba a gbenda môm tseegh u se kar ve se fatyô u zuan a mbamlumun sha mbampin mbara yô. Gbenda shon yô, ka u Aôndo iyolna a pase se la. Yehova pase se wang ken Bibilo er ishima i lu un ker yô. Time ase sha mkaanem ma ma lu ken Yesaia 49:15 la.

Shighe u Yehova soo u tesen er ior nav ve doo un ishima tsung la, a tese ikyav i hemban kôron ken ishima cii i se fatyô u henen sha mi yô. Yange er kwagh ne sha ikyev i Yesaia. A hii sha u pinen mpin u una wase se u henen sha kwagh ne yô, ér: “Wan u man atumba una hungur ngô na je kpa, mhôônom maa kôr un a wan u a dugh ken iyav nav la gaa?” Aluer u nenge sha mpin ne zevera yô, ka inja er mlumun u sha mi taver ga nahan. A hii nan je ve ngô una hungur wan na u man atumba sha wono? Wan u man atumba ngu a suur sha ngô na, tugh man atetan, shi kwagh u a gbe un cii ngu a vaa a ngô na. Kpa mpin u Yehova ne za shimi hemba nahan.

Ngô ngu a na wan na atumba shi a wa ikyo sha hanma mgbe na cii sha ci u nyi? Ngu a er kwagh ne sha u una kumbur wan na a de mliam tseegh di tsôô? Ei. Sha marami u ngô je, mhôônom ma ker un a “wan u a dugh ken iyav nav” la. Ishember i ken zwa Heberu i i gem ér “mhôônom” ne ngi ôron kwagh u eren kwagh kundu kundu man sha mhôôn a or u nan lu a or u wasen nan ga shin kwagh a hembe nan yô. Mhôônom ma ka ma kôr ngô a wan u nan u man atumba la ka môm ken akaa a hemban kôron or ken ishima cii.

Nahan kpa kwagh gema er vihi yô, ka hanma ngô cii mhôônom ma ker nan a wan u nan, u i sar un tsung u man atumba la ga. Yehova kaa ér, “ve [ungôôv mban] yô, á hungur ve.” Se mba ken tar u nomso man kasev kpishi ve lu “mbalun wang ga, man mbalun a dooshima ga” yô. (2 Timoteu 3:1-5) Ashighe agen, ka se ungwa kwagh u ungô mba ve te anikyundanev vev kera, shin ve nzughul a ve gayô ve kende ve yô. Takerada ugen pase kwagh u i er ken Yesaia 49:15 la ér: “Ungô ka mbaasorabo, nahan ashighe agen ieren i dang ka i na ve kera lu a dooshima sha ônov vev ga. Aluer or nan ngu a dooshima u hemban cii sha orgen je kpa, dooshima la una fatyô u va been.”

Yehova gema na se ibumun nahan ér, “kpa Mo yô, ú hungur Mo ga.” Hegen se hii u nengen a ityôkyaa i yange na ve Yehova pine mpin u i nger ken Yesaia 49:15 la ve. Kwagh u Yehova a lu pasen heen ne ka di u tôôn kwagh u ngô karen sha kwagh na sha u i nenge a mkposo u a lu hen ato ve la tsô ga. Shin er alaghga ungô mba yinan vea kera zungwe wan ve u una fatyô u wasen iyolna ga la mhôônom ga nahan kpa, Yehova yô, una gba inya shin una hungur u zungwen mbacivir un, mba kwagh a tser ve la, mhôônom mayange ga. Kwagh ne zua vough sha kwagh u takerada u i vande teren sha heen ne, u er sha kwagh u i nger ken Yesaia 49:15 la. Takerada la kaa ér: “Kwagh ne ka môm ken igbenda i hemban doon cii, shin ka gbenda u hemban doon cii, u Yehova a tese dooshima na hen a vese ken Ikyuryan i Tse la yô.”

Er se kav kwagh u “mhôônom ma zungwen tsung ma Aôndo wase” la nahan, kwagh ne sur se asema ga he? (Luka 1:78) Er nan u hen kwagh u u er ve u seer kporom ikyua a Yehova ga? Aôndo u lun a dooshima ne na mbacivir un ibumun ér: “Mayange Me undu u ga, Me kende u kpaa ga.”—Mbaheberu 13:5.