Katalakatsuwini Dios

«Akit putum kilhtamaku naklakapastakan»

¿XLIKANA kapaxki Dios xlakskujnin? Komo chuna, ¿la xlilhuwa kinkapaxkiyan? Nakatsiyaw uma komo naʼakxilhaw tuku wan Dios. Anta kBiblia wan la makgkatsi Jehová. Kaʼakxilhwi tuku wa Jehová kʼIsaías 49:15.

Xlakata xlimasiyalh la xlilhuwa kapaxki kskujnin, matsokgnilh Isaías akgtum liʼakxilhtit xlakata tlan naliaʼakgatekgskan, o makgachakgxikan tuku xwamputun Jehová. Jehová kgalhskininan: «¿Tlan chatum puskat nialh nalakapastaka kskgata, chu nialh nalakgalhaman xwi kxpan?». Nila nawanaw pi nialh nalakapastaka kskgata xlakata tantaku chu tantaskaka naputsa. Pero akxni Jehová chuna kgalhskininalh wi tuku lu xlakaskinka xkilhchanima.

¿Tuku xlakata chatum tse matsiki chu kuentajtlawa kskgata? ¿Kaj xlakata nialh natasa? Ni. Chuna tlawakgo xlakata “lakgalhaman tiku xwi kxpan”. Tachuwin «lakgalhamanankan» xahebreo wamputun tiku makgtaya achatum xlakata maklakaskin. Chuna la chatum tse paxki kskgata nitu tuku xtachuna.

Pero ni putum natsitni kalakgalhamankgo kskgatakan akxni tsinkskgo. Jehová wan pi «asta umakgolh lakpuskatin tlan nialh nakalakapastakkgo xkamanankan». Lamaw kkakilhtamaku niku lhuwa lakchixkuwin chu lakpuskatin nialh paxkinankgo (2 Timoteo 3:1-5). Min kilhtamaku kgaxmataw pi xatse ni kuentajtlawa kskgata, katuwa katlawanikgo o asta kaʼakgxtakgwilikgo tiku aku lakachinkgolh. Chatum tiku lakputsanani Biblia akxni lichuwinalh Isaías 49:15 wa: «Laktsitni lakgalhinanin chu min kilhtamaku nitlan likatsikgo chu nialh paxkikgo kskgatakan. Asta maski chatum tiku lu paxkinan min kilhtamaku talakgpali tuku makgkatsi».

Pero Jehová liwana kinkawaniyan: «Akit putum kilhtamaku naklakapastakan». Xlakata akxilhwa uma tlan akgatekgsaw tuku xwamputun Jehová akxni kgalhskininalh tuku wi kʼIsaías 49:15. Ni kaj tamalakxtumimaka wata kaj limasiyamaka la paxkinan Jehová. Chatum tse max nialh kuenta tlawa kskgata pero Jehová putum kilhtamaku kalakgalhaman xlakskujnin tiku lakaskinkgo nakamakgtayakan. Wa xlakata, tiku lakputsanani Biblia nema lichuwinawa, wan pi kaj anta kʼIsaías 49:15 kTatsokgni xaHebreo tatsokgnit niku «Dios wan pi lu paxkinan».

Lu tlan limakgkatsiyaw akxni katsiyaw pi Jehová lu xapaxkina, chu «kinkalakgalhamanan» (Lucas 1:78). Chu asta kinkawaniyan «ni kaktimakgaxtakgni» (Hebreos 13:5). Tlan xwa komo xkatsini la tlakg natalakatsuwiniya Jehová.

TEXTOS XALAK BIBLIA NEMA TLAN NALIKGALHTAWAKGAYA UMA PAPAʼ:

◼ Isaías 43 asta 62