XANA hakunene Yehovha wa khathala hi vanhu vakwe? Loko swi ri tano, xana u khathala ku fikela kwihi ha vona? Ku ni ndlela yin’we ntsena leyi ha yona hi nga kumaka tinhlamulo ta swivutiso sweswo—ku nga eRitweni ra Xikwembu. EBibeleni, Yehovha u yi paluxa erivaleni ndlela leyi a titwaka ha yona. Xiya marito lama kumekaka eka Esaya 49:15.

Hi ku tirhisa Esaya, Yehovha u tirhisa xin’wana xa swikombiso leswi khumbaka swinene leswi hi nga swi vonaka hi tihlo ra mianakanyo leswaku a kombisa ndlela leyi a titwaka ha yona hi vanhu vakwe. U sungula hi ku vutisa xivutiso lexi tlhontlhaka mianakanyo, lexi nge: “Xana wansati a nga rivala n’wana loyi a n’wi an’wisaka lerova a nga n’wi tweli vusiwana n’wana wa khwiri rakwe?” Loko u xi hlaya ro sungula xivutiso lexi, nhlamulo ya xona yi nga ha vonaka yi ri erivaleni. Xana manana la wundlaka a nga n’wi rivarisa ku yini n’wana wakwe loyi a an’waka? N’wana wakwe u titshege hi yena vusiku ni nhlikanhi—naswona u tivisa yena loko a lava swo karhi! Kambe ku katseka swo tala eka xivutiso lexi vutisiweke malunghana na Yehovha.

Ha yini manana a wundla n’wana wakwe ni ku khathalela xilaveko xakwe xin’wana ni xin’wana? Xana wo lava ku miyeta n’wana la rilaka ntsena? Doo! Hi ntumbuluko manana u ni ntwela-vusiwana eka “n’wana wa khwiri rakwe.” Riendli ra Xiheveru leri hundzuluxeriweke ri ku ‘ntwela-vusiwana’ laha ri hundzuluxeriwa va ku i ku “komba tintswalo.” (Eksoda 33:19; Esaya 54:10) Rito leri ra Xiheveru ri nga ha vula ntwela-vusiwana eka munhu loyi a nga kotiki ku tipfuna kumbe loyi a hlaselekaka hi ku olova. Ntwela-vusiwana wa manana eka n’wana wakwe loyi a an’waka i wun’wana wa mintlhaveko ya matimba leyi hi nga yi ehleketaka.

Kambe lexi twisaka ku vava hileswaku a hi manana un’wana ni un’wana loyi a nga ni ntwela-vusiwana eka n’wana wakwe loyi a lavaka ku an’wa eka vele rakwe. Yehovha u ri: “Vavasati lava va nga rivala.” Hi hanya emisaveni leyi eka yona vavanuna ni vavasati vo tala va “nga tshembekiki, [va] nga riki na xinakulobye xa ntumbuluko.” (2 Timotiya 3:1-5) Minkarhi yin’wana, hi twa hi ta vamanana lava honisaka vana va vona lava ha ku velekiwaka, va va khoma hi ndlela yo biha kumbe va va fularhela. Loko buku yin’wana ya tinhlamuselo ta Bibele yi hlamusela Esaya 49:15 yi ri: “Vamanana va ni xidyoho naswona minkarhi yin’wana rirhandzu ra vona ri hluriwa hi vuhomboloki. Hambi ku ri rirhandzu ra munhu ri nga ha hela.”

Yehovha u hi tiyisekisa a ku: “Kambe mina a ndzi nge ku rivali.” Sweswi hi nga sungula ku vona yinhla ya xivutiso lexi Yehovha a xi vutiseke, hilaha xi tsariweke hakona eka Esaya 49:15. Leswi a swi vulaka laha a swi talanga. Ku hambana ni vamanana lava nga hetisekangiki, lava nga ha tsandzekaka kumbe va rivala ku kombisa ntwela-vusiwana wa vona eka vana va vona lava nga kotiki ku tipfuna, Yehovha a nge tsandzeki kumbe a rivala ku kombisa ntwela-vusiwana wakwe eka vagandzeri vakwe lava lavaka mpfuno. Swa fanela leswi buku ya tinhlamuselo leyi boxiweke laha henhla yi vulaka leswi hi Esaya 49:15: “Lawa i marito yo enta swinene ku tlula hinkwawo lama kumekaka eka Testamente ya Khale, lama kombisaka rirhandzu leri Xikwembu xi nga na rona.”

Xana a swi chaveleli ku dyondza hi “ntsetselelo lowukulu wa Xikwembu xa hina”? (Luka 1:78) Ha yini u nga dyondzi ndlela leyi u nga tshinelaka eka Yehovha ha yona? Xikwembu lexi xa rirhandzu xi tiyisekisa vagandzeri va xona xi ku: “Ndzi nga ka ndzi nga ku tshiki naswona ndzi nga ka ndzi nga ku fularheli.”—Vaheveru 13:5.

Tindzimana ta Bibele leti u nga ti hlayaka hi February:

▪ Esaya 43-62