“Ine Ntha Ndikuruwenge”
Sendelerani kwa Ciuta
“Ine Ntha Ndikuruwenge”
KASI Yehova wakuŵapwelelera nadi ŵanthu ŵake? Usange ni nthena, kasi wakuŵafipira mtima kufika mpha? Pali nthowa yimoza iyo tingamanyira mazgoro gha mafumbo agha. Nthowa iyi ndiyo kuŵazga uvumbuzi wa Ciuta. Mu Baibolo Ciuta wakavumbura makora umo wakujipulikira. Wonani mazgu agho ghali pa Yesaya 49:15.
Kuti walongosore umo wakutemwera ŵanthu ŵake, Yehova kwizira mwa Yesaya wakayowoya ciyelezgero cankhongono comene. Wakamba na kufumba fumbo lakuti: “Kasi mwanakazi wangamanya kuluwa mwana wake wakonkha, kuti waleke kuŵa naye na cisungusungu mwana wa nthumbo yake?” Para munthu wapulika waka fumbo ili, zgoro likuwonekerathu. Vingacitika yayi kuti mama wakonkheska waluwe mwana wake. Mwana wakugomezga mama wake pa vyose, ndipo mama wakumanya usange mwana wakukhumba wovwiri. Kweni Yehova wakucita vinandi.
Cifukwa wuli mama wakupwelelera mwana wake pa vyose ivyo wakukhumba? Kasi nchifukwa cakuti wakukhumba kumucetamiska waka? Yayi. Mwakawiro, mama wali na cisungusungu ku “mwana wa nthumbo yake.” Lizgu Lacihebere ilo lili kung’anamulika kuti “cisungusungu” lingang’anamulikaso kuti “kulongora lusungu.” (Exodus 33:19; Yesaya 54:10) Lizgu Lacihebere ili lingang’anamuraso kuŵa na ciwuravi ku awo ŵalije movwiri panji ŵambura civikiliro. Ciwuravi ico mama wali naco pa mwana wake uyo wakonkha nchikuru comene.
Cacitima nchakuti ni mama waliyose yayi uyo wali na cisungusungu pa mwana wake uyo wakukhumba konkha. Yehova wakuti mama “wangaruwa nadi.” Tikukhala mu nyengo iyo ŵanalume na ŵanakazi ‘mbambura kugomezgeka, na ŵambura citemwa cakawiro.’ (2 Timote 3:1-5) Nyengo zinyake tikupulika vya ŵamama awo ŵakusulako, kuyuzga na kusida ŵana ŵawo awo ŵababika waka. Pakuyowoyapo pa lemba la Yesaya 49:15, buku linyake lakuyowoya vya Baibolo likulongosora kuti: “Ŵamama mbakwananga ndipo citemwa cawo nyengo zinyake cikucepa cifukwa ca kusoŵa makhaliro ghawemi. Nanga munthu wangaŵa na citemwa cikuru wuli, cingatondeka.”
Kweni Yehova wakutisimikizgira kuti, “Ine ntha ndikuruwenge.” Sono tingamba kuwona cifukwa ico Yehova wakafumbira nthena, nga umo vili kulembekera pa Yesaya 49:15. Apa Yehova wakujiyaniska na mama yayi kweni wakuyowoya waka mphambano pakati pa iyo na umo mama wangacitira. Mwakupambana na ŵamama ŵambura kufikapo awo ŵangatondeka kulongora ciwuravi ku ŵana ŵawo awo ŵalije movwiri, Yehova wazamutondekapo yayi kulongora ciwuravi ku ŵateŵeti ŵake awo ŵakukhumbikwira wovwiri. Ntheura mphake kuti pakuyowoya za lemba la Yesaya 49:15, buku ilo tazunura kale likuti: “Apa Ciuta wakalongora citemwa cikuru comene kuluska ico cili kulembeka pa malo ghalighose mu Cipangano Cakale.”
Kasi nchakupembuzga yayi kumanya “mtima waciwuravi wa Ciuta withu”? (Luka 1:78) Mwalekeraci kusambira umo mungacitira kuti musendelere kwa Yehova? Ciuta wacitemwa uyu wakusimikizgira ŵateŵeti ŵake kuti: “Nikulekenge cara napacoko nesi kukutaya mu nthowa yiliyose.”—Ŵahebere 13:5.
Vipaturo vya mu Baibolo Ivyo Mungaŵazga mu Febuluwale:
