Ilawil a natsʼkaba tiʼ Dios

«Teneʼ maʼ bíin in tuʼubsechiʼ»

¿JACH wa tu jaajil u yaabiltmaj Dios le máaxoʼob meyajtikoʼ? Wa beyoʼ, ¿bukaʼaj u yaabiltmoʼob? Utiaʼal k-ojéeltikeʼ kʼaʼabéet k-ilik baʼax ku yaʼalik letiʼ. Teʼ Bibliaoʼ Jéeobaeʼ ku yaʼalik baʼax ku yuʼubik yoʼolal le máaxoʼob meyajtikoʼ. Jeʼex teʼ Isaías 49:15.

Utiaʼal u yeʼesik bukaʼaj u yaabiltmil máaxoʼob meyajtikeʼ, tu libroil Isaíaseʼ Jéeobaeʼ ku ketik u yaabilaj beyaʼ: «¿Jeʼel wa u tuʼubsaj juntúul maamatsileʼ[,] jeʼel wa u táabal u xúumpʼat juntúul u paaleʼ?». Maʼ xaaneʼ k-tuklikeʼ mix juntúul maamatsil jeʼel u pʼatik juntúul u chaambaleʼ. Baʼaleʼ le kʼáatchiʼ tu beetaj Jéeobaaʼ maas yaʼab baʼax ku kaʼansiktoʼon.

¿Baʼaxten juntúul maamatsileʼ ku tséentik yéetel ku tsʼáaik baʼax kʼaʼabéet tiʼ u chan hijo? ¿Chéen wa utiaʼal u xuʼulul u yokʼol? Maʼ. U suukileʼ mix juntúul maamatsil jeʼel u «táabal u xúumpʼat juntúul u paaleʼ». Le verbo hebreo ku meyaj teʼ Isaías 49:15, ku suʼutul xan «u chʼaʼabal óotsilil» (Éxodo 33:19; Isaías 54:10). Le baʼax ku yuʼubik le maamatsil tu yoʼolal u chaambaloʼ junpʼéel yaabilaj jach táaj nojoch maʼ tu páajtal u keʼetel yéetel mix baʼal.

Baʼaleʼ maʼ tuláakal le maamatsiloʼob ku chʼaʼikoʼob óotsilil ken u yiloʼob wiʼij u chaambaloʼoboʼ. Jéeobaeʼ ku yaʼalikeʼ tak juntúul maamatsil jeʼel u tuʼubsik u paaleʼ. Teʼ tu tsʼook kʼiinoʼobaʼ yaʼab xiiboʼob yéetel koʼoleloʼob maʼatech u yeʼeskoʼob yaabilaj (2 Timoteo 3:1-5). Yaan horaeʼ k-uʼuyik u yaʼalaʼaleʼ yaan maamatsiloʼob maʼatech u kanáantik u paalaloʼob, ku jaʼajatsʼkoʼob wa ku xúumpʼatkoʼob kex táant u síijloʼobeʼ. Yoʼolal Isaías 49:15, juntúul máax ku xakʼaltik u tʼaaniloʼob le Bibliaoʼ tu yaʼalaj: «Le maamatsiloʼoboʼ kʼebanoʼob, le oʼolal kex yaan u yaabilajoʼobeʼ yaan kʼiineʼ ku beetik u kʼasaʼaniloʼob. Kex jeʼel bukaʼaj nojchil u yaabilaj juntúul wíinikeʼ jeʼel u kʼuchul u kʼiinil u xuʼululeʼ».

Baʼaleʼ Jéeobaeʼ ku yaʼalik: «Teneʼ maʼ bíin in tuʼubsechiʼ». Beoraaʼ k-maas naʼatik le baʼax ku yaʼalik Jéeoba teʼ Isaías 49:15. Letiʼeʼ maʼ chéen táan u ketik le yaabilaj ku yuʼubikoʼ, baʼaxeʼ táan u yeʼesik u jelaʼanil tiʼ u yaabilaj wíinik. Juntúul maamatsil kʼebaneʼ jeʼel u kʼuchul u pʼat u chaambaleʼ, baʼaleʼ Jéeobaeʼ mix bikʼin kun xuʼulul u chʼaʼik óotsilil tiʼ le máaxoʼob meyajtikoʼ. Tu yoʼolal lelaʼ le máak táant k-aʼalik ku xakʼaltik u tʼaaniloʼob le Bibliaoʼ, tu yaʼaleʼ Isaías 49:15, «junpʼéel tuʼux ku jach ilaʼal u nojoch yaabilaj Dios ichil tuláakal le Úuchben Testamentooʼ, maʼ xaaneʼ letiʼe tuʼux ku maas ilaʼalaʼ».

Jach ku líiʼsik k-óol k-ojéeltik Jéeoba Dioseʼ jach yaan «u yaakunaj yéetel u chʼaʼ óotsilil» (Lucas 1:78). Tak letiʼ aʼalik: «Mix bikʼin kin in pʼatech mix kin in xúumpʼattech» (Hebreob 13:5). ¿Baʼaxten maʼ ta wilik bix jeʼel a maas natsʼkaba tu yiknaleʼ?