Laip Long Taim Ol i Raitim Baibel​—Ol Musik Man na Ol Instramen

“Winim horn na litimapim nem bilong [God]. Paitim ol instramen i gat string na harp na litimapim nem bilong en. Paitim tambarin na mekim danis na litimapim nem bilong en. Paitim gita na winim flut na litimapim nem bilong en. Paitim ol simbol na litimapim nem bilong en. Paitim ol simbol strong moa na litimapim nem bilong en.”—SONG 150:3-5. a

INAP longpela taim pinis, musik na ol musik man i bin mekim bikpela wok insait long lotu bilong God Jehova. Olsem: Taim Jehova i wokim mirakel na kisim bek ol Israel long solwara Retsi, susa bilong Moses, em Miriam, i go pas long mekim singsing na danis bilong tenkyu long Jehova. Ol lain bilong danis i paitim tambarin na danis. Dispela samting i kamapim klia olsem musik em i bikpela samting long lain Israel—maski ol i ranawe nau tasol long ami bilong Isip, planti meri i holim ol instramen na ol i redi long pilaim. (Kisim Bek 15:20) Bihain, King Devit i stretim rot bambai planti tausen musik man i ken pilaim ol instramen olsem hap wok bilong lotu long haus lotu sel. Ol i bihainim wankain pasin long tempel em pikinini man bilong em Solomon i wokim.—1 Stori 23:5.

Ol i wokim ol dispela instramen long wanem samting? Ol i luk olsem wanem? Ol i kamapim wanem kain musik? Na ol i save yusim long wanem taim?

Ol Kain Kain Instramen

Ol instramen em Baibel i stori long en, ol i wokim long ol gutpela diwai tru, skin na bun bilong animal, na ain. Sampela ol i bilasim long tit bilong elefan. Na ol i yusim rop bilong plaua na diwai o bel rop bilong animal long wokim string. Klostu olgeta instramen bilong  bipo i no stap moa long nau, tasol piksa bilong ol i stap yet.

Yumi ken tilim ol instramen bilong bipo i go long 3-pela grup: ol instramen i gat string, olsem harp, lyre (1), na lute (2); ol instramen bilong winim long maus, olsem horn, o shofar (3), trampet (4), flut, o mambu (5); ol instramen bilong paitim long han, olsem tambarin (6), sistrum (7), simbol (8), na belo (9). Ol musik man i save pilaim ol dispela instramen long taim bilong mekim ol song na ol danis. (1 Samuel 18:6, 7) Na bikpela samting moa, ol i pilaim ol dispela instramen bilong lotuim God, em Man i bin givim dispela presen bilong pilaim musik long ol. (1 Stori 15:16) Yumi ken skelim gut moa wan wan grup bilong ol dispela instramen.

Ol Instramen i Gat String Harp na lyre i gat ol string ol i taitim long fran bilong en, na i no hevi tumas na ol inap karim raun. Devit i bin pilaim musik i gat string bilong mekim isi bel bilong King Sol taim bel bilong Sol i bagarap. (1 Samuel 16:23) Ol i bin pilaim ol dispela instramen long taim ol i dediketim tempel bilong Solomon na long ol narapela taim bilong amamas, olsem long ol bikpela de bilong lotu.—2 Stori 5:11, 12; 9:11.

Lute i kain olsem harp. Em i gat sampela string ol i taitim long fran bilong en. Ating ol string bilong en i kamapim naispela krai i wankain olsem klasikel gita bilong nau. Ol i wokim ol string long rop bilong plaua na diwai o bel rop bilong animal.

Ol Instramen Bilong Winim Long Maus Planti taim Baibel i stori long ol dispela instramen. Wanpela instramen olsem em horn bilong ol Juda, nem bilong en shofar. Ol i kisim kom bilong sipsip man na wokim hul long en, na krai bilong en i sap tru. Ol Israel i save winim shofar bilong bungim ami long pait na bilong stiaim ol long mekim wok.—Hetman 3:27, 28; 7:22.

Narapela instramen bilong winim long maus em trampet ol i wokim long ain. Wanpela rait bilong Ol Detsi Skrol i kamapim olsem taim ol musik man i winim trampet, ol inap kamapim kain kain krai long en. Jehova i tokim Moses long wokim tupela trampet long silva bilong yusim long haus lotu sel. (Namba 10:2-7) Bihain, long taim bilong dediketim tempel bilong Solomon, ol i bin winim 120 trampet wantaim ol narapela musik ol i bin pilaim. (2 Stori 5:11-13) Ol i  wokim ol trampet long kain kain sais. Longpela bilong sampela em inap 91 sentimita, kirap long hap bilong winim na i go inap long pinis bilong en.

Wanpela feiveret instramen bilong ol Israel em flut. Gutpela krai bilong en i save amamasim ol manmeri long taim ol famili i bung wantaim, long ol pati, na long ol weding. (1 King 1:40; Aisaia 30:29) Ol i save winim tu flut long taim bilong ol fiuneral, we ol man i mekim ol musik bilong krai sori (lukim pes 14).—Matyu 9:23.

Ol Instramen Bilong Paitim Long Han Taim ol Israel i wokim ol bung bilong amamas, ol i save yusim kain kain instramen bilong paitim long han. Krai bilong dispela musik i save kirapim tru bel bilong ol man. Ol i wokim tambarin olsem: Ol i kisim wanpela raunpela diwai freim na taitim skin bilong animal antap long en, na taim musik man o man bilong danis i paitim long han, krai bilong en i olsem bilong dram. Taim musik man i seksekim tambarin, ol liklik belo ol i pasim long en i save kamapim musik i gat naispela pairap.

Narapela instramen bilong paitim long han em sistrum. Freim bilong en i raunpela liklik na ol i wokim long ain. Em i gat handel na long namel bilong en i gat ol ain i holim ol liklik ain disk. Taim ol i seksekim sistrum em i save kamapim naispela musik.

Ol bras simbol i save kamapim musik i sap moa. I gat tupela kain simbol. Wanpela i bikpela na wanpela i liklik. Ol bikpela simbol i gat tupela raunpela disk ol i paitim strong wantaim. Ol liklik simbol i bilong paitim namel long tupela pinga. Tupela wantaim i save kamapim wankain musik, tasol krai bilong wanpela i bikpela na krai bilong narapela i liklik.—Song 150:5.

Bihainim Wankain Pasin

Long nau, ol Witnes Bilong Jehova i save kirapim na pinisim ol bung bilong lotu long rot bilong musik na singsing. Long ol bikpela bung, ol i save pilaim ol musik ol i bin rekodim, em musik bilong ol instramen bilong nau olsem ol instramen i gat string, ol instramen bilong winim long maus, na ol instramen bilong paitim long han.

Taim ol Witnes i mekim wok long musik na ol song long taim bilong lotu, ol i bihainim pasin bilong lain Israel bilong bipo na ol Kristen long taim bilong ol aposel. (Efesus 5:19) Olsem ol wokman bilong God long taim bilong raitim Baibel, ol Witnes Bilong Jehova long nau i save amamas long singim ol song wantaim musik bilong litimapim nem bilong Jehova.

[Futnot]

[Ol Piksa long pes 23]

(I no sais tru bilong ol)

(Lukim buk o magasin)