Ababelenga Ino Magazini Balepusha Ukuti . . .

Bushe Isonde Likonaulwa?

▪ Abantu bamo basumine ukuti pa 21 October, 2011 isonde likonaulwa, lelo talyaonaike. Kanshi ifyasobele Harold Camping, uusabankanya ilyashi pa mulabasa wa ku America tafyacitike. Asobele ukuti Ubushiku bwa Bupingushi bukabako pa 21 May 2011, ilyo kukaba icinkukuma icikalamba isonde lyonse, kabili pa numa ya myeshi isano, pa 21 October, isonde likonaulwa.

Isonde, talyakonaulwe nakalya. Kabumba we sonde takaleke ica musango yu ukucitika. Icebo cakwe citila: “Mwalishimpa icalo, ukuti ciminine umuyayaya.”—Amalumbo 119:90.

Lelo ababelenga Baibolo bamo kuti bakaana, pantu baishiba ukuti isonde likapya ku mulilo. Pa kulanda ukuti isonde likapya ku mulilo, babomfya ilembo lya kwa 2 Petro 3:7, 10 ilitila: “Kwi shiwi limo line imyulu ne sonde ifya nomba fyasungilwa umulilo kabili fyasungilwa ubushiku bwa bupingushi kabili ubwa konaula abantu abashipepa. . . . Awe ubushiku bwa kwa Yehova bukesa ngo mupuupu, ilyo imyulu ikapita waa, lelo ifintu ilyo fikakaba se fikasunguluka, ne sonde ne milimo iyabamo fikasokoloka.” Bushe aya mashiwi umutumwa Petro alandile yalola mu kuti isonde ne myulu fikapya ku mulilo?

Awe, te mo yalola. Mulandu nshi twalandila ifi? Pa kuti mwishibe bwino ifyo aya mashiwi yapilibula, kano mwalinganya ifyo Petro alelandapo ku fyo Baibolo yonse ilanda. Nga twatila imyulu ne sonde fikapya ku mulilo, ninshi kuti calola mu kuti amabilioni na mabilioni aya ntanda ne fintu fimbi ifyaba mu muulu na pano isonde fikapya ku mulilo pa mulandu fye wa bantu abanono ababipa pe sonde. Bushe kuti mwaoca isaka lyonse ilya mbalala pa mulandu fye wa kutila muli ulubalala lumo ulubolele? Awe nakalya, te kuti mucite ica musango yu! Kanshi na Yehova te kuti onaule imyulu ne sonde na fyonse ifyabamo pa mulandu fye wa bucipondoka bwa bantunse bamo pe sonde.

Na kabili, ukutontonkanya ukuti isonde likonaulwa takumfwana na mashiwi Yesu Kristu alandile aya kuti: “Balipaalwa abafuuka, pantu bakapyana isonde.” (Mateo 5:5; Amalumbo 37:29) Bushe umufyashi uwaba no kutemwa kuti akuulila ulupwa lwakwe ing’anda iisuma, e lyo pa numa ayoca? (Amalumbo 115:16) Ica musango yu te kuti cilolemo! Yehova ni Kabumba wesu lelo na kabili ni Shifwe uwatutemwa.—Amalumbo 103:13; 1 Yohane 4:8.

Petro abomfeshe ishiwi lya kuti “isonde” mu nshila ya mampalanya kabili pali ili ilembo, ili ishiwi lilosha ku bantu ababipa. Nga mwamona, ilyo Petro alandile aya mashiwi alelinganya ku fyacitike pa Lyeshi mu nshiku sha kwa Noa. (2 Petro 3:5, 6) Ilyo Ilyeshi lyaishile, abantu fye ababipa e baonawilwe; isonde lyena talyaonawilwe, e lyo kabili Noa umulungami no lupwa lwakwe balipuswike. Ne shiwi lya kuti “imyulu” ilyo Petro abomfeshe na lyo line lya mampalanya. Pali ili ilembo, “imyulu” ipilibula imitekele ya bantunse pa bantu ababipa. E ico, abantu ababipa abashifwaya ukwaluka bakonaulwa, nga filya fine na mabufumu ayabipa yakonaulwa no kupyanikwapo no Bufumu bwa kwa Lesa ubwa ku muulu.—Daniele 2:44.

E ico bushe isonde likonaulwa? Awe nakalya. Ifikonaulwa lisonde lya mampalanya, nelyo abantunse ababipa. Isonde talyakonaulwe, na bantu abomfwila Lesa nabo tabakonaulwe.—Amapinda 2:21, 22.