Kwestin Blong Olgeta We Oli Ridim Magasin Ya . . .

?Bambae Wol i Lus?

▪ Samfala oli ting se wol bambae i lus long Oktoba 21, 2011. Be i no kamtru olsem. Taswe, profet tok blong Harold Camping, wan man we i toktok long radio long Yunaeted Stet, i no tru. Hem i talemaot se bambae Jajmen Dei i kamtru long Mei 21, 2011, mo bambae graon i seksek bigwan we bigwan long olgeta ples long wol. Mo hem i talem se faef manis biaen, long Oktoba 21, wol bambae i lus olgeta.

Be wol bambae i no save lus samtaem. God we i mekem wol bambae i no letem wan samting i spolem wol ya. Tok blong God i talem se: “Yu yu mekem wol ya blong i stap strong, mo oltaem bambae i stap long ples blong hem.”—Ol Sam 119:90, King James Version.

Maet sam man we oli ridim Baebol oli no agri long tingting ya. Oli talem se wol bambae i lus long faea. Oli stap tokbaot vas blong 2 Pita 3:7, 10 we i talem se: “Skae mo graon we i stap naoia, tok blong God i blokem tufala, tufala i stap wet blong bambae faea i kasem tufala. Tok ya bambae i stap holem tufala, gogo i kasem bigfala Dei ya we God bambae i jajem ol man we oli no obei long hem, nao bambae oli lus. . . . Be Dei blong Masta blong yumi bambae i kam olsem we man blong stil i kam, we i kam long taem we man i no save. Mo long Dei ya, bambae i gat bigfala noes, nao skae bambae i lus. Bigfala faea we i hot we i hot bambae i bonem ol sta gogo oli ronaot, mo wol tu, wetem evri samting blong hem bambae i lus.” ?Olsem wanem? ?Aposol Pita i stap tokbaot prapa skae mo graon?

Nogat, Pita i no stap tokbaot prapa skae mo graon. ?From wanem yumi talem olsem? From we ol tok blong ol vas ya oli mas laenap wetem ol narafala tok we Pita i talem long leta blong hem, mo oli mas laenap wetem ol narafala tok long Baebol. Sipos yumi ting se Pita i stap tokbaot prapa skae no yunives we yumi stap long hem, i min se ol bilian sta mo ol narafala samting long skae bambae oli lus long faea, from we wan smol planet long skae i gat ol rabis man i stap long hem. ?Olsem wanem? ?Bambae yu spolem olgeta tri long bus from we i gat wan smol tri we yu no laekem? Nogat. !Hemia i krangke nomo! Long sem fasin, Jehova bambae i no spolem olgeta samting we hem i mekem long skae, from we long wan smol kona blong hem i gat ol rabis man.

Tingting ya se wol bambae i lus, i agensem ol tok blong Jisas Kraes, we i talem se: “Olgeta we oli kwaet man oli save harem gud, from we God bambae i givim wol ya long olgeta.” (Matiu 5:5, futnot; Ol Sam 37:29) Yu ting se wan papa we i lavem famle blong hem, ?bambae hem i mekem wan naesfala haos blong famle blong hem, nao i bonem long faea? (Ol Sam 115:16) !Nogat! Jehova i God ya we i mekem olgeta samting, mo hem i wan Papa we i lavem famle blong hem.—Ol Sam 103:13; 1 Jon 4:8.

Pita i yusum tok ya “graon” blong tokbaot ol man long wol, speseli ol rabis man. Hem i tokbaot taem we wol bambae i lus se i olsem Bigfala Wota we i ron long taem blong Noa. (2 Pita 3:5, 6) Long taem blong Noa, ol rabis man nomo oli lus. Wol i stap, mo gudfala man ya Noa wetem famle blong hem, oli laef. Long sem fasin, taem Pita i tokbaot “skae” no heven, hem i minim ol gavman blong ol man we oli rulum ol man nogud. Ol rabis man we oli no wantem jenisim fasin blong olgeta bambae oli lus, wetem olgeta rabis gavman. Ale gavman no Kingdom blong God long heven, bambae i tekem ples blong ol rabis gavman ya.—Daniel 2:44.

?Taswe olsem wanem? ?Bambae wol ya we yumi stap long hem i lus? Nogat. Samting we bambae i lus, hemia ol rabis man. Wol mo ol stret man bambae oli stap gogo i no save finis.—Ol Proveb 2:21, 22.