▪ Ang pipila nagtuo nga ang yuta matapos sa Oktubre 21, 2011. Wala kana mahitabo. Busa, wala matuman ang panagna ni Harold Camping nga usa ka magsisibya sa radyo sa Amerika. Siya nagtagna nga ang Adlaw sa Paghukom moabot niadtong Mayo 21, 2011​—⁠usa ka dakong linog ang mahitabo sa tibuok yuta, ug lima ka bulan sa ulahi, sa Oktubre 21, ang yuta malaglag.

Apan ang yuta dili gayod matapos. Dili kana itugot sa Maglalalang niini. Ang iyang Pulong nag-ingon: “Ikaw lig-ong nagpahimutang sa yuta, aron kini magpadayon.”​—⁠Salmo 119:⁠90.

Hinunoa, ang pipila ka magbabasa sa Bibliya lagmit moingon nga kining planetaha masunog. Sila mokutlo sa 2 Pedro 3:​7, 10 aron pamatud-an kana: “Pinaagi sa mao gihapon nga pulong ang mga langit ug ang yuta nga naglungtad karon gitagana alang sa kalayo ug gigahin alang sa adlaw sa paghukom ug sa kalaglagan sa mga tawong dili-diyosnon. . . . Bisan pa niana ang adlaw ni Jehova moabot ingon sa usa ka kawatan, diin ang mga langit mahanaw uban ang nagsagitsit nga kabanha, apan ang mga elemento tungod sa hilabihang kainit mangatunaw, ug ang yuta ug ang mga buhat diha niana mahikyad.” Literal ba ang gipamulong ni apostol Pedro?

Dili. Ngano man? Kay ang pagsabot niini kinahanglang mahiuyon sa konteksto sa sulat ni Pedro ug sa ubang teksto sa Bibliya. Ang literal nga pagsabot niini magkahulogan nga ang mga langit, o uniberso​—⁠ang bilyonbilyong bituon ug ubang butang​—⁠sunogon kay ang usa ka gamay kaayong bahin niini gipuy-an sa daotang mga tawo. Imo bang daoton ang milya-milyang baybayon tungod lang kay wala ka ganahi sa usa ka buok balas niana? Dili gayod kana makataronganon! Busa, dili usab laglagon ni Jehova ang tibuok uniberso nga iyang gilalang tungod lang kay mitungha ang rebelyon diha sa usa ka bahin niana.

Gawas pa, ang maong panghunahuna supak sa giingon ni Jesu-Kristo: “Malipayon ang mga malumog-buot, sanglit sila magapanunod sa yuta.” (Mateo 5:5; Salmo 37:29) Ang usa ba ka mahigugmaong amahan magtukod ug komportableng balay alang sa iyang pamilya ug unya sunogon lang kana? (Salmo 115:16) Pagkadili-makataronganon! Si Jehova dili lamang Maglalalang kondili mahigugmaong Amahan usab.​—⁠Salmo 103:13; 1 Juan 4:⁠8.

Gigamit ni Pedro ang terminong “yuta” sa simbolikong diwa, nga nagtumong sa tawhanong katilingban​—⁠niining kahimtanga ang daotang katilingban. Matikdi nga gipakasama kini ni Pedro sa Lunop sa adlaw ni Noe. (2 Pedro 3:​5, 6) Nianang panahona, ang mga daotan lang ang nalaglag; ang yuta ug ang matarong nga si Noe ug ang iyang pamilya naluwas. Sa susama, simboliko usab ang paggamit ni Pedro sa “mga langit.” Niining kahimtanga, ang “mga langit” nagtumong sa tawhanong pagmando ibabaw sa mga dili diyosnon. Busa, ang mga daotan mawala na, maingon man ang tanang daotang gobyerno, nga mangahanaw ug pulihan sa langitnong pagmando, o Gingharian, sa Diyos.​—⁠Daniel 2:⁠44.

Busa, matapos ba ang planetang yuta? Dili. Ang matapos mao ang simbolikong yuta, o ang daotan nga tawhanong katilingban. Ang yuta mismo ug ang umaabot nga diyosnon nga tawhanong katilingban magpabilin hangtod sa hangtod.​—⁠Proverbio 2:​21, 22.