Kestyon sorti kot nou lekter . . .

Eski later pou ganny detrir?

▪ I annan serten dimoun ki ti krwar ki later ti pou ganny detrir le 21 Oktob 2011 me sa pa ti arive. Sa dat ti ganny profetize par Harold Camping, en prezantater lo radyo Leta-z-ini. I ti predir ki Zour Zizman ti pou ariv le 21 Me 2011 kot en gro tranblemandter ti pou ravaz later e senk mwan pli tar, le 21 Oktob, later ti pou ganny detrir konpletman.

Sepandan, later pa pou zanmen ganny detrir. Sa Enn ki’n kre li pa pou zanmen les sa arive. Son Parol i dir: “Ou’n solidman etablir later pour ki i reste stab.”​—Psonm 119:90.

Petet serten dimoun ki lir Labib pa pou dakor avek sa lide. Zot kapab dir ki nou plannet pou ganny detrir par dife e pour siport sa lide, zot servi 2 Pyer 3:7, 10 ki dir: “Me lesyel ek later in ganny prezerve par sa menm parol, pour ganny detri par dife. I’n ganny garde pour sa zour zizman kan bann move dimoun pou ganny detri. . . . E pourtan, Zour Senyer pou ariv konman en voler. Sa zour lesyel pou disparet avek en gran fraka; e bann eleman lesyel pou fonn avek dife. Later avek tou sa ki lo la pou ganny brile.” Eski parol zapot Pyer i devret ganny pran literalman?

Non. Akoz? Parski lafason ki sa bann verse i ganny enterprete i devret an armoni avek konteks ki Pyer ti pe koz lo la ek lezot parti Labib. Si nou pran son parol literalman, sa pou vedir ki lesyel, setadir liniver ek tou son plizyer bilyon zetwal pou ganny detrir avek dife zis akoz en ptipti bout ladan i annan bann move dimoun. Eski ou ti pou detrir en lans antye zis akoz ou pa’n kontan en gren disab ladan? Byen sir ki non. I pa ti pou fer sans! Be ni menm Zeova pa pou detrir son liniver ki i’n kree akoz in annan rebelyon lo zis enn son bann kreasyon.

Toutfason, sa fason panse i tou lekontrer avek parol Zezi Kri ki ti dir: “Byennere bann ki dous, akoz zot pou posed later.” (Matye 5:5; Psonm 37:29) Eski en papa ki kontan son fanmir ti pou konstri en lakaz byen konfortab zis pour bril li apre? (Psonm 115:16) I pa pou zanmen fer sa! Zeova i pa zis en Kreater me i en Papa ranpli avek lanmour.​—Psonm 103:13; 1 Zan 4:8.

Pyer i servi sa term “later” dan en sans senbolik pour refer avek move dimoun dan sosyete. Remarke ki Pyer ti fer en konparezon avek Deliz dan letan Noe. (2 Pyer 3:5, 6) Sa lepok, zis bann move dimoun ki ti ganny detrir me later, Noe ek son fanmir ti sirviv. Dan menm fason, Pyer ti servi sa term “lesyel” dan en sans senbolik. Dan sa enn ka “lesyel” i refer avek bann imen ki pe diriz lo bann move dimoun. Alor, bann move dimoun ki pa anvi sanze pou ganny detrir ansanm avek bann move gouvernman ki pou fonn konpletman e ganny ranplase avek Rwayonm oubyen Gouvernman Bondye.​—Danyel 2:44.

Alor, eski plannet later pou ganny detrir en zour? Non. Se later senbolik ki pou ganny detrir, setadir bann move dimoun dan sosyete. Later li menm ek bann dimoun ki kontan Bondye pou reste pour touzour.​—Proverb 2:21, 22.