Batangi na Beto Keyula . . .

Keti Ntoto Tafwa?

▪ Bantu yankaka kwikilaka nde ntoto tafwa na Oktobri 21, 2011. Kansi, yo salamaka ve. Yo yina, mambu yina Harold Camping tubaka na radio mosi ya nsi États-Unis salamaka ve. Yandi tubaka nde Kilumbu ya Lusambisu tasalama na Mayi 21, 2011​—ntoto ya mvimba tanikana mpi bangonda tanu na nima disongidila na Oktobri 21, ntoto tafwa kimakulu.

Kansi, ntoto tafwaka ve ata fyoti. Ngangi ya ntoto tapesa ve nzila nde dyambu ya mutindu yina kusalama. Ndinga na yandi ketuba nde: “Nge me tulaka ntoto na kisika na yo, yo kele kaka pana.”​—Nkunga 119:90.

Kansi, bantu yankaka yina ketangaka Biblia lenda tuba nde ntoto tafwa na tiya. Bo kesadilaka 2 Piere 3:7, 10 sambu na kumonisa nde verse yai kendima dibanza na bo: ‘Mambu yina ya Nzambi tubaka yo me bumbaka zulu ti ntoto yai ke zingaka tii bubu yai, sambu na kufwa yo kimakulu na tiya, na kilumbu yina ya Nzambi ta sambisa bantu ya mbi ti kufwa bo. Kansi kilumbu ya Yehowa takwisa mutindu muyibi ke kwisaka. Na kilumbu yina zulu ta vila; ntangu yo ta vila, makelele mosi ya nene mpenza ta vanda, bima yonso ta fwa na tiya, ntoto ti bima yonso ke vandaka na yo ta fwa.’ Keti beto fwete baka bangogo yai ya ntumwa Piere na mutindu ya kyeleka?

Yo kele ve ya kubaka na mutindu ya kyeleka. Sambu na nki? Sambu ntendula ya baverse yai fwete wakana ti bangogo yina kele na ntwala mpi na nima ya verse yai mpi ti Biblia ya mvimba. Kutadila bangogo ya baverse yai na mutindu ya kyeleka tamonisa nde zulu to luyalanganu​—bamiliare ya bambwetete mpi bima yankaka yina kele na luyalanganu—​tafwa na tiya kaka sambu kitini mosi ya ntoto kele ti bantu ya mbi. Keti nge talosa zelo yonso ya nge mebaka na lweka ya masa sambu ka-dimbuma mosi ya nge kezolaka ve mekota na kati? Yo tavanda ve mbote! Mutindu mosi, Yehowa tafwa ve ata fyoti bingangwa yonso ya luyalanganu sambu kigangwa na yandi mosi kolamaka.

Dyaka, dibanza ya mutindu yina kewakana ve ti mambu yai ya Yezu Kristu tubaka: “Kiese na bantu yina kele pima, sambu bo ta baka ntoto yina ya Nzambi me silaka bo.” (Matayo 5:5; Nkunga 37:29) Keti tata mosi ya zola lenda tungila dibuta na yandi nzo mosi ya kitoko sambu yandi yoka yo tiya kilumbu mosi buna? (Nkunga 115:16) Dyambu ya mutindu yai lenda salama ve! Yehowa kele kaka ve ngangi kansi mpi Tata mosi ya zola.​—Nkunga 103:13; 1 Yoane 4:8.

Piere sadilaka ngogo “ntoto” na mutindu ya kifwani, ngogo yai ketendula bantu disongidila kimvuka ya bantu ya mbi. Yibuka nde Piere kefwanikisa yo ti Mvula ya Ngolo ya bilumbu ya Noa. (2 Piere 3:5, 6) Na dibaku yina, kaka bantu ya mbi fwaka. Ntoto mpi Noa muntu ya lunungu ti dibuta na yandi gulukaka. Kiteso mosi, Piere sadilaka mpi ngogo “zulu” na mutindu ya kifwani. Na ntubilu yai, ngogo “zulu” ketendula luyalu ya bantu ya mbi na zulu ya ngidika ya mbi. Yo yina, bantu ya mbi yina kebalula ve ntima tafwa mpi luyalu ya Nzambi to Kimfumu na yandi yina kele na zulu tayinga baluyalu yonso ya mbi.​—Daniele 2:44.

Na kutadila mambu yai, keti ntoto tafwa? Ve. Kaka ntoto ya kifwani tafwa disongidila kimvuka ya bantu ya mbi. Ntoto mpi kimvuka ya bantu ya mbote tazinga mvula na mvula.​—Bingana 2:21, 22.