Karemdbã Sogsgo . . .

Tẽngã na n wa sãama fasɩ bɩ?

▪ Neb kẽer da tagsdame tɩ tẽngã na n sãama yʋʋmd 2011 zĩ-likr kiuug rasem 21 wã. La pa yɩ sɩd ye. Yɩɩ a Harold Camping sẽn tʋmd Etazĩni radio a ye pʋgẽ wã n da yeel woto, la a gomdã lʋɩɩ vɩʋʋgẽ. A ra yeelame tɩ Wẽnnaam bʋ-kaoorã daar na n yɩɩ sig-noy kiuug rasem 21 wã, tɩ na n tũu ne tẽn-digimdg kãseng sẽn na n maan dũniyã gill zugu, la tɩ kiis a nu poore, rat n yeel tɩ zĩ-likr kiuug rasem 21 wã daare, tẽngã na n sãama fasɩ.

Tẽngã yaool n pa na n tol n sãam fasɩ ye. A Naandã pa na n sak tɩ yɩ woto ye. Ad a Gomdã sẽn yete: “Yãmb yẽbga dũniyã la a yalsda kãn-kãe.”—Yɩɩl Sõamyã 119:90.

La sãnda sẽn karemd Biiblã nong n tikda 2 Pɩɛɛr 3:7, 10, n yetẽ tɩ wilgdame tɩ b na n sãama tẽngã ne bugum. Vɛrse kãens yeta woto: “Yaa ne gom-kãng bala, yĩngri la dũniyã sẽn be masã wã bĩnga bugum yĩnga, bʋʋd kaoobo la wẽn-kɩɩsdbã sãoong daar sẽn na n ta wã. . . . Zusoabã daar na n waa wa wagdre. La baraare, saasã na n looga ne bʋrg kãsenga, la dũniyã bũmb fãa na n wɩnga wʋsg n yẽnege, la tẽngã ne tʋʋmã fãa sẽn be a zugã na n dɩɩ bugum.” Rẽ yĩnga tʋm-tʋmd a Pɩɛɛr gomdã wilgdame tɩ b na n sɩd sãama tẽngã ne bugum bɩ?

A gomdã võor pa woto ye. Bõe yĩnga? Bala sã n yaa woto, pa zems ne a Pɩɛɛr meng sẽn deng n yeel bũmb ningã ye. Leb n pa zems ne Biiblã goam a taabã ye. Sẽn paase, rat n yeelame tɩ ãds milyaar dãmbã la bũmb a taabã fãa sẽn be saasẽ wã, n paas tẽngã gill na n dɩɩ bugum, sẽn mik tɩ tẽngã sẽn pa baa fʋɩ bãmb fãa taoorã pida ne nin-wẽnsã yĩnga. Yãmb sã n sui kood rʋgd toor-toor pʋsẽ, n wa mik t’a ye n kẽ bugdu, y na pãb fãa n sãeeg sɩda? Na n yɩɩ yalemdo! A Zeova me pa na n sãam bũmb nins fãa a sẽn naanã, sẽn mik tɩ nin-wẽns n be tẽng zugã yĩng ye.

Tagsg a woto pʋd n pa zems ne bũmb a Zezi Kirist sẽn yeel ye. A yeelame tɩ “bark bee sũ-maasem dãmbã zutu, tɩ bõe, bãmb na soog dũniyã.” (Matɩe 5:5; Yɩɩl Sõamyã 37:29) Rẽ yĩnga rao sẽn nong a zak-rãmb na me ro-neer n kõ-ba, t’a sẽn dat bal yaa a wa yõog-a bugum sɩda? (Yɩɩl Sõamyã 115:16) A buud pa saagd ye! La tags-y n ges-y! Yaa a Zeova n naan bũmb fãa, la pa rẽ bal ye. A yaa d Ba sẽn nong tõnd wʋsgo.—Yɩɩl Sõamyã 103:13; 1 Zã 4:8.

A Pɩɛɛr sẽn bool tɩ “dũniyã” a gomdã pʋgẽ wã pa tẽn-gãongã ye. A tara võore. Yaa ãdem-biisã sẽn vɩ a zugã. La yaa nin-wẽnsã yell la a ra gomda. Bãng-y t’a Pɩɛɛr deng n goma a Nowe wakatẽ sa-kãsengã yelle. (2 Pɩɛɛr 3:5, 6) Sa-kãsengã sasa, yɩɩ nin-wẽnsã bal n sãame. Tẽn-gãongã pa sãam ye. A Nowe ne a zakã rãmb sẽn da yaa nin-tɩrsã me põsame. A Pɩɛɛr sẽn bool tɩ “yĩngrã” bɩ “saasã” me pa sa-gãongã ye. Tara võore. Yaa ninsaalbã naam toor-toorã. Dẽnd a rat n yeelame tɩ nin-wẽnsã na n sãamame, tɩ dũni-kãngã naam toor-toorã fãa me meneme, tɩ Wẽnnaam Rĩungã sẽn be saasẽ wã lede.—Daniɛll 2:44.

Woto wilgdame tɩ tẽngã pa na n wa sãam fasɩ ye. Yaa nin-wẽnsã sẽn vɩ a zugã n na n sãame. Tẽn-gãongã la nin-tɩrsã sẽn na n wa zĩnd a zugã na n paa wakat sẽn pa sate.—Yelbũna 2:21, 22.