▪ Algun hende a kere cu planeta Tera lo a ser destrui dia 21 di october 2011. Pero esey no a sosode. Pues, e profecia di Harold Camping, un locutor di radio na Merca, no a cumpli. Harold a pronostica cu e Dia di Huicio lo a tuma luga dia 21 di mei 2011. Segun e, riba e dia ey, un temblor devastador lo a sacudi henter mundo, y despues di cinco luna, riba 21 di october 2011, tera lo a ser destrui completamente.

Pero tera lo no ser destrui nunca. E Creador lo no permiti esey. Su Palabra ta bisa: “Bo a establece tera, y e ta keda para.”​—Salmo 119:90.

No obstante, algun lesado di Bijbel ta pretende cu Dios lo destrui tera cu candela. Pa apoya nan punto di bista, nan ta uza 2 Pedro 3:7 y 10, cu ta bisa: “E cielo y tera cu ta existi awor ta reserva pa candela y ta warda pa e dia di huicio y di destruccion di hende malbado. . . . Sinembargo, e dia di Jehova lo bini manera un ladron, den cua cielo lo pasa bay cu un boroto inmenso, anto e elementonan, siendo intensamente cayente, lo larga caba na nada, y tera y e cosnan riba dje lo keda expone.” Pero ta literalmente nos tin cu compronde e palabranan di apostel Pedro?

No! Dicon no? Pasobra e interpretacion di e versiculonan aki mester cuadra cu e resto di e carta di Pedro y cu e otro bukinan di Bijbel. Ademas, un comprondemento literal lo nifica cu cielo⁠—universo cu su miles di miyones di strea y otro materia⁠—lo dirti caba na nada djis pa motibo di dos pipita di hende malbado cu ta biba riba tera. Abo lo destrui henter un beach djis pasobra un grano di santo no ta na bo agrado? Esaki lo no tin sentido, no ta berdad? Jehova tampoco lo no destrui henter su creacion, esta henter e universo, djis pasobra algun hende riba tera a rebela contra dje.

Ademas, e punto di bista ey ta bay liña recto contra loke Hesucristo a bisa, esta, cu “feliz ta esnan cu tin un genio suave, ya cu nan lo haya e tera.” (Mateo 5:5; Salmo 37:29) Bo ta kere cu un tata amoroso lo construi un bunita cas pa su famia y despues peg’e na candela? (Salmo 115:16) Claro cu no; esey lo ta absurdo! Pues, Jehova, nos Creador y Tata amoroso, tampoco lo no haci algo asina.​—Salmo 103:13; 1 Juan 4:8.

Pedro a uza e termino “tera” den sentido figurativo pa referi na humanidad—den e caso aki, na hende malbado. Anto ripara cu Pedro ta compara e binidero destruccion cu e Diluvio di tempo di Noe. (2 Pedro 3:5, 6) E tempo ey, ta hende malbado so a ser destrui. Tera no a ser destrui, y e homber husto Noe y su famia a scapa. E termino “cielo” tambe a ser uza den sentido simbolico. Den e caso aki, “cielo” ta referi na gobernacion humano. Pues, ta hende malbado cu no kier cambia lo haya destruccion. Ademas, Dios lo destrui gobierno humano y lo reemplasa esakinan cu su gobierno, of Reino, selestial.​—Daniel 2:44.

Pues, tera lo ser destrui? No. Loke lo ser elimina ta e tera simbolico, esta hende malbado. Tera y hende husto den bista di Dios lo permanece pa semper.​—Proverbionan 2:21, 22.