▪ Wakinmi yuyaykurqanku 2011 watapi 21 octubre p’unchaypi kay Pacha chinkapunanta. Ichaqa manan imapas sucederqanchu. Chaytan willarqan radiopi rimaq Harold Camping. Paypa nisqanman hinaqa taripay p’unchaymi kanan karqan 2011 watapi 21 mayo p’unchaypi. Chaypin hatun pacha chhaphchiy Hallp’antinta thuninan karqan, phisqa killakuna qhepatataq 21 octubre p’unchaypi chinkapunan karqan.

Kay Pachaqa manan hayk’aqpas chinkanqachu, Biblian nin: “Qanmi kay pachata allinta takyachirqanki, chaymi mana kuyurinchu”, nispa (Salmo 119:90).

Chaywanpas, Bibliata wakin leeqkunan ninku: “Kay Pachaqa ninawanmi ruphachisqa kanqa”, nispa. Chaypaqmi 2 Pedro 3:7, 10 textota rikuchinku, ninmi: “Kunan kashaq hanaq pachawan kay pachawanmi ichaqa Diospa kikin siminwan ninapaq waqaychasqa kashan, hinaspan hatun taripay p’unchaypi ninawan ruphaykachisqa kanqa, Diosta mana manchakuq runakunaq muchunan chayamuqtin. [...] Señorpa juzganan p’unchayqa qonqayllan chayamunqa, imaynan suwapas qonqaylla hamun hinata. Chay p’unchaymi hanaq pachaqa manchay kunununuywan tukukunqa, chaypi kaqkunapas lliw rawrarispa tukukunqa, kay pachapas chaypi lliw kaqkunapas ruphaykapunqa”, nispa. ¿Kay Pacha chinkapunanmantachu apóstol Pedro rimasharqan?

Manan. Chay textoq nisqanqa apóstol Pedroq wakin cartankunawanmi tupanan Bibliapi wakin librokunawanpas. Sichus chaypi nisqanman hina entiendesunman chayqa, millay runakunaq huchanraykun hanaq pachapi ch’askakunapas tukuy imaymana kaqkunapas ruphaykachisqa kankuman. Kayta tapukuy: ¿Kanaykuwaqchu llapa chakraykita huk choqllolla ismusqanmanta? Manapunichá. Chhaynallatataqmi Jehová Diospas mana millay runakunaq causanpiqa kay pachata nitaq hanaq pachatapas chinkachinqachu.

Hinaspapas, chay nisqankuqa manan tupanchu Jesucristoq nisqanwan, paymi nirqan: “Kusisamiyoqmi llamp’u sonqoyoqkunaqa, paykunaqa kay pacha hallp’atan herenciapaq chaskinqaku”, nispa (Mateo 5:5; Salmo 37:29). Huk munakuq tayta, ¿hatarichinmanchu sumaq wasita chay qhepaman kanaykunanpaq? (Salmo 115:16.) ¡Manan pipas chaytaqa ruwanmanchu! Kamaqninchis Jehová Diospas ancha munakuq Taytan (Salmo 103:13; 1 Juan 4:8).

2 Pedro 3:7, 10 textopi kay pacha nispaqa llapa millay runakunawanmi tupanachin. Chaytan reparasunman Noepa tiemponpi millp’uq para unuwan taripay p’unchayta tupanachisqanpi (2 Pedro 3:5, 6). Chay p’unchayqa millay runakunallan wañurqan. Noepas familianpas salvakurqankun, kay Pachapas manan chinkarqanchu. Hinallataq hanaq pacha nispaqa kay pachapi gobiernokunawan tupanachisharqan. Chaymi millay mana kasukuq runakunalla chinkachisqa kanqaku gobiernokunawan kuska, rantinkupitaq Diospa Gobiernon kamachikamunqa (Daniel 2:44).

Chhaynaqa, ¿chinkapunqachu kay pacha? Manan. Chinkapunqaqa millaykunata ruwaq runakunan. Kay hallp’anchisqa wiñaypaqmi kanqa, Diosta kasukuq runakunapas wiñaypaqmi kawsanqaku (Proverbios 2:21, 22).