▪ Son sma ben e bribi taki grontapu ben o kon na wan kaba tapu 21 oktober 2011. Ma dati no pasa. Sobun, a profeititori fu Harold Camping, wan man di abi wan radio programa na ini Amerkankondre, no kon tru. A man disi ben taki dati a Krutudei ben o kon tapu 21 mei 2011. A ben taki dati wan bun bigi gronseki ben o pasa na heri grontapu, èn taki feifi mun baka dati, tapu 21 oktober, grontapu ben o kisi pori.

Ma grontapu noiti o kon na wan kaba. A Mekiman fu grontapu no o gi pasi taki a sani dati pasa. A Wortu fu en e taki: „Yu poti grontapu steifi na en presi, so taki a no degedege.”​—Psalm 119:90.

Ma son sma di e leisi Bijbel ben kan feni taki na faya o pori a planeiti disi. Den e sori taki a sani dati e kruderi nanga 2 Petrus 3:7, 10 pe skrifi: „Ma na a srefi fasi Gado taki tu, taki a libi den hemel nanga a grontapu fu now fu bron den nanga faya. A libi den teleki a dei doro taki a o krutu den ogri sma èn pori den. . . . Toku a dei fu Yehovah o kon neleki wan fufuruman. Na a dei dati den hemel o pasa gowe nanga bun bigi babari di o kon wantronso. Ma den sani na hemel nanga den sani na grontapu o kon faya so te, taki den o smèlter gowe. Grontapu nanga ala sani na en tapu o bron.” A de so taki Petrus ben e taki fu trutru faya?

Nôno, dati no de so. Fu san ede? We, fu man frustan den vers disi, dan wi musu luku den tra tekst tu na ini a brifi fu Petrus, èn wi musu luku tra pisi fu Bijbel tu. Te wi ben o denki taki na trutru faya Petrus ben abi na prakseri, dan dati ben o wani taki dati den hemel na loktu, noso den milyardmilyard stari nanga tra sani, ben o kisi pori soso fu di wan pikin toti presi na ini abi ogri sma na tapu. Yu ben o pori omeni kilometer fu a sesyoro, soso fu di wan-enkri ai santi na tapu no bun nofo gi yu? A no de fu taki dati yu no ben o du dati. Na so a de tu taki Yehovah no ben o pori ala den sani di a meki, soso fu di den sma na wan fu den presi di a ben meki, opo densrefi teige en.

Boiti dati, a denki dati no e kruderi kwetikweti nanga a sani disi di Yesus Krestes ben taki: „Koloku fu den safri-ati sma, bika den o kisi grontapu” (Mateyus 5:5; Psalm 37:29). Yu denki taki wan lobi-ati papa ben o teki en ten fu meki wan moi oso gi en osofamiri, soso fu bron en baka dati? (Psalm 115:16) A sani dati no kan! Boiti taki Yehovah na a Mekiman, a de sosrefi wan lobi-ati Tata.​—Psalm 103:13; 1 Yohanes 4:8.

Petrus e gebroiki a wortu „grontapu” na wan agersi fasi gi a libisma famiri. Na ini den vers disi a e taki fu ogri sma. Luku fa den sani di Petrus ben taki e kruderi nanga den sani di ben pasa na a Frudu na ini a ten fu Noa (2 Petrus 3:5, 6). Na ini a Frudu dati, soso ogri libisma kisi pori. Noti no pasa nanga a grontapu srefi èn nanga a reti-ati man Noa nanga en osofamiri. Na so a de tu taki Petrus e gebroiki a wortu „hemel” fu taki fu libisma di e tiri den wan di no e anbegi Gado. Sobun, den ogri sma di e weigri fu kenki den fasi fu den no sa de moro èn a srefi sani o pasa nanga ala den ogri tirimakti. Dan a hemel tirimakti, noso Kownukondre fu Gado, o kon na ini a presi fu den tirimakti dati.​—Danièl 2:44.

Sobun, a tru taki grontapu o kon na wan kaba? Nôno. A sani di o kon na wan kaba, na den ogri sma di e prenki a grontapu disi. Grontapu srefi nanga a libisma famiri di o saka ensrefi na ondro Gado na ini a ten di e kon, o tan fu ala ten.​—Odo 2:21, 22.