Por Lanen Me Kiyo Piny Pa Yecu
Por Lanen Me Kiyo Piny Pa Yecu
“Wuki [piny dok] wuleg Lubanga.”—MAT. 26:41.
IN IROMO GAMONE NINGO?
Legawa twero nyuto ni wan watye ka kiyo piny nining?
I yo mene mapat pat ma watwero nyuto ni wakiyo piny i ticwa me pwony?
Pingo pire tek ni wabed ma wakiyo piny ka watye i atematema, dok watimo man nining?
1, 2. (a) Lapeny ango ma romo bino ma lubbe ki kiyo piny pa Yecu? (b) Lanen maber pa Yecu mono konyo dano ma gitye ki roc? Mi lapor.
IROMO penye kekeni ni: ‘Tika twere me poro lanen me kiyo piny ma Yecu oweko? Yecu onongo obedo ngat ma pe ki roc! Medo i kom meno, Yecu onongo twero neno jami ma tye anyim kadi wa mwaki alip ki alip cakke i karegi ca! Onongo tika mitte ni en okii piny?’ (Mat. 24:37-39; Ibru 4:15) Mukwongo, kong wanyamu lagam me lapeny magi wek waniang kit ma lok man pire tek kwede.
2 Lanen pa ngat ma pe ki roc tika twero bedo me kony bot dano ma lubalo? Twero bedo, pien twere me nongo pwony ki bot lapwony maber kacel ki lanene. Me laporre, ket kong ni laco mo tye ka pwonyo kit me celo atero. Pe twero bayo atero maber wek atero ocel gin ma en mito-ni kikome, ento en medde ki pwonyone dok medde ki temo cinge. Wek ocel maber, en neno kit ma lapwonye celo kwede. Neno maber kit ma lapwonye cung kwede ki dok mako atum. Motmot, en pwonyo telo tol atum kit ma mitte kwede kun tamo pi kit ma kodo pa yamo romo tango wi aterone, ento en tiko yelle kumeno. Ka en poro kit ma lapwonye timo kwede, ci en bene cako pimo aterone kun celo cok ki dye gin ma en tye ka temo cinge i kome-ni. I yo acel-lu, wan bene wayelle me dongo macalo Lukricitayo ki lubo cik pa Yecu kun waporo lanene maber.
3. (a) Yecu onyuto nining ni kiyo piny mitte bote? (b) Ngo ma wabinenone ipwony man?
3 Ento lok i kom kiyo piny kono? Onongo tika mitte bot Yecu? Ki lok ada, onongo mitte. Me laporre, i dyewor me agikki me kwone i lobo, Yecu owaco bot lukwenane ma lugen ni: ‘Wubed ka kiyo piny kacel kweda.’ En omedo ni: “Wuki [piny dok] wuleg Lubanga, wek pe wudony i abita mo.” (Mat. 26:38, 41) Kadi bed ni en onongo obedo ka kiyo piny kare ducu, ento pinye onongo tye marac i kare meno mumiyo Yecu onongo mito ni ebed ma ekiyo piny kun ebedo cok adada ki Wonne me polo. En onongo ngeyo ni lulub kore bene myero gubed ma wanggi twolo—pe pi kare meno keken ento wa pi kare me anyim. Kong dong wanenu tyen lok mumiyo Yecu mito ni wabed ma wakiyo piny. I yo ngeye, wabineno yo adek kit ma watwero lubo kwede lanen me kiyo piny pa Yecu i kwowa me nino ducu.
GIN MUMIYO YECU MITO NI WABED MA WAKIYO PINY
4. Pingo mitte adada ni myero wabed ma wakiyo piny?
4 I yo macek, Yecu mito ni wabed ma wakiyo piny pi jami ma pe wangeyo ki ma wangeyo. I kare ma Yecu tye i lobo, en tika onongo ngeyo jami ducu ma tye anyim? Pe, en onongo pe ngeyo, pien en owaco ki mwolo ni: “Ento nino meno ki cawa meno, pe tye ngat mo ma ngeyo, kadi wa lumalaika ma i polo, kadi wa Wod, ento kono Lubanga Won keken aye ngeyo gire.” (Mat. 24:36) I kare meno, Yecu ma en aye ‘Wod-ni,’ onongo pe ngeyo awene kikome ma agikki me lobo man bibino iye. Ento wan i kare-ni kono? Tika wangeyo jami ducu ma tye anyim? Ngene kene ni pe wangeyo! Pe wangeyo awene ma Jehovah bicwalo iye Wode pi giko jami maraco me kare-ni. Ka onongo wangeyo awene ma agikki me lobo man bibino iye, onongo mono mitte ni myero wabed ma wakiyo piny? Kit ma Yecu otito kwede, agikki bibino atura calo bino pa lakwo, pi meno omyero wabed ma wakiyo piny kare ducu.—Kwan Matayo 24:43.
5, 6. (a) Ngecwa pi anyim kacel ki yub pa Lubanga konyowa me bedo ma wakiyo piny nining? (b) Pingo ngec ma watye kwede i kom Catan miyo wacung matek ma wakiyo piny?
5 Ki tungcel, Yecu onongo ngeyo jami mogo mabeco ma tye anyim—lok ada ma pol pa dano ma onongo gibedo kwede pe gingeyo matwal. Ngecwa pe o ka tyen pa Yecu, ento berre tye ni pi Yecu, wan wangeyo jami mapol i kom Ker pa Lubanga ki jami ma Ker-ri bicobone i anyim. Ka waneno jami ma timme i kabedo muromowa, kadi bed i cukul, i gang tic, i wang ticwa ka ma watito iye kwena, jami magi gimiyo wangeyo ni pol pa dano gitye i twon col piny madit ka odok i lok me ada. Man tye tyen lok mukene mumiyo omyero wabed ma wakiyo piny. Calo Yecu, omyero wabed ma wangwa twolo kare ducu, pi neno kare mo keken ma ngolle botwa me nywako jami ma wangeyo ma lubbe ki Ker pa Lubanga. Kare acel acel ma kit meno pire tek mada, dok pe myero wawek okat nono. Kwo pa dano tye ka mading!—1 Tem. 4:16.
6 Yecu onongo ngeyo tyen lok mukene mumiyo omyero ebed ma ekiyo piny. En onongo ngeyo ni Catan oketo cwinye me temme, unne, ki dong turo gennene. Lamone meno kare ducu onongo tye ka kiyo piny me “kuro kare maber” me temo Yecu. (Luka 4:13) Yecu pe obedo ata calo labul wic kadi matidi mo. En onongo mito ni ebed atera pi kit atematema mo keken, kadi obed abita, adegadega, nyo aunauna. Wan mono pe bene omyero wabed kumeno? Wangeyo ni Catan pud tye calo “labwor ma kok kun yenyo dano me amwoda.” Meno aye omiyo Lok pa Lubanga cuko cwiny Lukricitayo ducu ni: “Wugwokke, wuki piny.” (1 Pet. 5:8) I yo ango kono ma watwero timo ki man?
KIT MA LEGA KONYOWA KWEDE ME BEDO MA WAKIYO PINY
7, 8. Tira ango ma Yecu omiyo i lok kom lega, dok lanen ango ma en oweko?
7 Baibul wacciwa ni lega pire tek adada ka wamito ni wabed ma wangwa twolo nyo ma wakiyo piny wek wagwok watwa ki Jehovah. (Kol. 4:2; 1 Pet. 4:7) I nge cawa manok keken ma Yecu owacci lulub kore guki piny kacel kwede, Yecu owaco ni: “Wuki [piny dok] wuleg Lubanga, wek pe wudony i abita mo.” (Mat. 26:41) En mono onongo tye ka wacci omyero gileg pi peko ma okemogi-ni keken? Pe, lokke-ni obedo cik ma iye lac ma myero watii kwede nino ducu.
8 Yecu oweko lanen maber adada i lok madok i kom lega. Wi twero po ni i kare mo acel en olego dyewor lung bot Wonne. Kong watem goyo calle i wiwa. (Kwan Luka 6:12, 13.) Obedo i kare me poto kot, Yecu nen calo onongo tye cok ki Kapernaum boma ma kimako iye rec. I nge poto ceng, Yecu oyito i wi got ma tye cok ki nam me Galilaya. I kare ma tye ka neno kabedo ma tye piny i te got man i dyewor, romo bedo ni obedo ka neno mac tara ma tye ka lyel i Kapernaum ki gangi ma tye i ngete. I kare ma Yecu tye ka lega bot Jehovah, en oketo tamme ducu i legane. Dakika kato ci kato—cawa bene kato ci kato. En pe oketo tamme i kom kit ma mac tara ma gitye ka lyel-li giwoto ki too kwede ki acel acel, kit ma dwe poto kwede nyo kit ma lee giwire kwede i kin piny i dyewor ka yenyo cam. Legane nen calo ocung i kom tic madit ma onongo tye i nyimme—yero lukwenane 12. Waromo goyo cal Yecu i wiwa ma okulo wiye kun tito bot Wonne jami ducu ma tye i tamme ki par ma etye kwede pi lapwonnye acel acel dok lego pi nongo tira ki ryeko.
9. Ngo ma watwero pwonyone ki i lanen me lega ma Yecu olego dyewor benebene-ni?
9 Ngo ma watwero pwonyone ki i lanen pa Yecu? Mono te lokke ni omyero water cawa malac i lega? Pe kumeno, en onongo ngeyo goro pa lulub kore, mumiyo en owaco ni: ‘cwiny kikome mito ento kom aye goro.’ (Mat. 26:41) Kadi bed kit meno, wan watwero lubo lanen pa Yecu. Me laporre, tika walego bot Wonwa me polo mapeya wamoko tam i kom gin mo ma romo gudo niyewa ki genenewa, jo me odiwa, nyo luye luwotwa? Tika legawa kwako par ma watye kwede i kom omegiwa ki lumegiwa me kacokke? Tika walego kun a ki i cwinywa ma ka nwoyo lega ma dong wamako i wiwa? Kit ma waneno kwede, Yecu onongo maro lok ki Wonne gin aryo keken dok i kabedo muling mot. I lobo man ma tic odiyo dano tutwal-li, pe tek me lungo wiwa i yenyo kit me kwo, ma man weko wiwa wil woko pi jami ma pigi tego loyo. Ka wakwanyo kare me lega matut ci bimiyo wabedo ma wangwa twolo i yo me cwiny. (Mat. 6:6, 7) Bimiyo wanyikke cok ki Jehovah, ki dok wajingo watwa ki en kun wakwero timo kit gin mo keken ma romo balo wat man.—Jab. 25:14.
KIT ME BEDO MA WAKIYO PINY I YO ME TITO KWENA
10. Lanen ango ma nyuto ni Yecu obedo ma wange twolo pi kare ma ngolle me miyo caden?
10 Yecu onongo bedo ma kiyo piny i tic ma Jehovah omiye ni etim. Dog tic mogo giromo weko ngat moni bedo ka tamo gin mukene labongo kelle peko mo madit. Tye tic mapol mapat pat ma mito ciko wang ki bedo ma wang twolo, dok ticwa me tito kwena-ni bene tye kumeno. Yecu onongo kare ducu bedo ma wange twolo i ticce, kun ciko wange me neno kare mo keken ma romo ngolle me nywako kwena maber-ri. Me laporre, i kare ma en ki lupwonnyene guo i boma me Cukar i nge wot pi odiko lung, lukwena gucito ka wilo cam. Yecu obedo i nget wang it me boma meno ka yweyo, ento obedo ma wange twolo, en oneno kare ma ongolle me miyo caden. Dako mo me Camaria obino ka twomo pii. Yecu gire onongo romo yero me nino kong manok. En onongo romo tamo pi tyen lok mo me kwero lok ki dako meno. Ento en oloko kun weko dako-ni donyo i lok meno, ci omiyo caden mo magwar ma ogudo kwo pa jo mapol me boma meno. (Jon 4:4-26, 39-42) Tika wan bene waromo lubo lanen me kiyo piny pa Yecu-ni, kun wabedo ma wangwa twolo me neno kare mo keken ma romo ngolle me nywako kwena maber-ri ki dano ma warwatte kwedgi i kwowa me nino ducu?
11, 12. (a) Ngo ma Yecu owaco bot jo ma onongo gimito dwoyo tamme ki i ticce me pwony? (b) Yecu pe oweko ticce me pwony odiyo jami mukene-ni nining?
11 I kine mukene, jo mogo ma nongo cwinygi pe rac gutemo dwoyo tam pa Yecu ki i ticce. I Kapernaum, cwiny lwak obedo yom pi tango ma Yecu otimogi mumiyo onongo dong gimito ni gigwokke obed botgi. Meno gire pe onongo rac. Ento, tic pa Yecu onongo tye me tito kwena bot “jo Icrael [ducu], pien gitye calo romi murwenyo,” pe jo me boma acel keken. (Mat. 15:24) Pi meno en owaco bot jo magi ni: “Myero atit lok me kwena maber me ker pa Lubanga i gang mukene bene, pien giora pi lok man.” (Luka 4:40-44) Nen ka maleng ni kwo pa Yecu onongo cung i kom ticce me pwony. En pe oye gin mo me dwoyo tamme.
12 Yecu mono onongo dong olungo wiye tutwal i ticce me pwony ma omiyo pe mito gin mo keken ma kelo yomcwiny? Mono en onongo oketo tamme tutwal i ticce me pwony ma omiyo pe paro pi jo mukene? Pe, Yecu oweko lanen maber tutwal pe me timo gin moni mukato kare woko. En onongo mit pa kwo kun nongo yomcwiny kacel ki lureme. En otero jo me odi calo jo ma pigi tek kun paro pigi kacel ki pekogi dok bene onyuto ni emaro lutino.—Kwan Marako 10:13-16.
13. Wan watwero lubo lanen me kiyo piny pa Yecu nining kun pe waweko ticwa me pwony diyo jami mukene-ni?
13 Ka walubo lanen me kiyo piny pa Yecu, watwero weko ticwa me pwony pe diyo jami mukene-ni nining? Pe waweko lobo-ni dwoyo tamwa woko ki ticwa-ni. Kadi wa luremwa nyo wadiwa ma nongo gitye ki cwiny maber guromo diyowa me dwoko rwom me ticwa me pwony piny nyo ni omyero wakwo kwo ma nongo gineno ni pe dok pat ki pa jo mukene. Ka walubo lanen pa Yecu, ci wabineno ticwa me pwony-nyi calo obedo cam. (Jon 4:34) Ticwa-ni pitowa i yo me cwiny dok keliwa yomcwiny. Ento, pe wamito ni wati dok mukato kare woko ma weko pe wanongo mit pa kwo ki dong jami ducu mabeco. Calo Yecu, wamito ni wabed lutic pa “Lubanga ma layomcwiny,” ma kwowa pe dok lunge tungcel tutwal.—1 Tem. 1:11, NW.
KIT ME BEDO MA WAKIYO PINY KA WATYE I ATEMATEMA
14. Ka watye i atematema, gin ango ma myero wiwa pe owil iye dok pingo?
14 Kit ma waneno kwede, lok mogo ma Yecu owacogi ma lubbe ki bedo ma wakiyo piny obedo i kare ma en onongo tye i atematema magwar. (Kwan Marako 14:37.) Ka watye i atematema, ci lanene-ni mitte botwa makato ducu. Jo mapol ka gitye i atematema wigi wil woko i kom lok ada mo ma pire tek adada ma buk me Carolok onwoyo tyen kiryo ni: “Tye gin ma dano tamo ni en aye yo ma atir, kun nongo yo ma kit ennu tero en i to.” (Carolok 14:12; 16:25) Ka wajenge i tamwa, tutwalle ka watye i peko, ci waromo kelo peko i komwa ki i kom jo ma wamarogi.
15. Atematema ango ma lawi ot romo bedo iye ka can cente odiyo jo me ode?
15 Me laporre, lawi ot mo romo bedo i lyeto i lok me nongo jami me kom pi “jo me ode.” (1 Tem. 5:8) En romo bedo i atematema me ye tic ma miyo kare ki kare en keng cokke, nyo telo jo me ode i lok me woro, nyo tiyo tic me tito kwena. Ka en ojenge i kom tamme i kit pa dano, ci tic ma kit meno romo nen calo tye atir. Ento adwogine romo bedo two nyo to i yo me cwiny. Ber me lubo lok ma tye i Carolok 3:5, 6. Solomon owacci: “Gen Rwot [Jehovah] ki cwinyi ducu, pe ibed ka jengnge i kom niang ma itye kwede. I kit kwoni ducu wii myero opo i kom Rwot, ci en bitiro yo ma iwoto iye bedo atir.”
16. (a) Lanen ango ma Yecu oweko ma lubbe ki keto gen i kom ryeko pa Jehovah? (b) Luwi odi mapol gitye ka lubo lanen pa Yecu ki keto gengi i kom Jehovah nining ka kwo tek?
16 I kare ma Yecu tye i atematema, en okwero lajwac jenge i kom tamme kekene. Tam kong i iye! Laco ma pud dong ryek loyo ma okwo i lobo pe ojenge i kom ryekone kekene. Me laporre, i kare ma Catan otemo Yecu, en kare ducu ogamo kun tiyo ki lok ni: “Yam gicoyo ni.” (Mat. 4:4, 7, 10) En ojenge i kom ryeko pa Wonne me loyo atematema, onyuto mwolo ma Catan tero calo gin atata dok bene pe kwede-ni. Wan tika wajenge i kom Jehovah pi nongo ryeko? Latel wi ot ma lubo lanen me kiyo piny pa Yecu weko Lok pa Lubanga tiro en, tutwalle i kare me atematema. I wi lobo-ni, lutel wi odi alip ki alip gitye ka timo meno. Gitye ka medde ameda ki keto Ker pa Lubanga kacel ki woro me ada bedo mukwongo i kwogi makato jami me kom. I timo meno, gigwoko jo me odigi. Jehovah nyuto pwocce kun goyo laane i kom yellegi me yenyo jami ma mitte me kom, kit ma Lokke ociko kwede.—Mat. 6:33.
17. Ngo ma miyo ilubo lanen me kiyo piny pa Yecu?
17 Labongo pyem mo, Yecu oweko lanen maber loyo i lok me kiyo piny. Lanene-ni tiyo maber, konyo dok gwoko kwo. Po ni, Catan kome tye ka myel amyela me timo gin mo ma kelo nino i wangi i yo me cwiny, ma weko niyeni bedo goro, miyo woroni bedo nucu nucu, nyo turo genneni. (1 Tec. 5:6) Pe iwek en onong ka cungone! Bed ma ikiyo piny kit ma Yecu okiyo kwede—i legani, i ticci me tito kwena ki dong i lweny ki atematema. Ka itimo jami magi ducu, ci ibilimo kuc ki yomcwiny kacel ki yengo i kwoni kadi bed lobo man dong cok o i agikkine-ni. Ka ibedo ma ikiyo piny, Yecu binongi ma wangi twolo kun nongo itye ka tic matek i tic pa Lubanga ka en Yecu bibino ka tyeko lobo man marac-ci woko. Cwiny Jehovah bibedo yom adada me miyo boti mot pi bedo ngat ma lagen!—Yabo. 16:15.
[Peny me Kwan]
[Cal ma tye i pot karatac 16]
Yecu otito kwena bot dako me Camaria i wang it. Kare mene ma ngolle ci itiyo kwede me tito kwena nino ducu?
[Cal ma tye i pot karatac 17]
Gwoko jo me odi i yo me cwiny nyuto ni in itye ma ikiyo piny
