Yumi Mas Folem Fasin Blong Jisas Blong Lukaot Gud
Yumi Mas Folem Fasin Blong Jisas Blong Lukaot Gud
“Yufala i mas lukaot gud, yufala i mas prea.”—MAT. 26:41.
?BAMBAE YU YU ANSA OLSEM WANEM?
․․․․․
?Ol prea blong yumi oli soemaot olsem wanem se yumi stap lukaot gud?
․․․․․
?Wanem sam samting we yumi save mekem, blong soemaot se yumi stap lukaot gud long fasin blong yumi blong prij?
․․․․․
?From wanem yumi mas lukaot gud taem ol samting oli traem yumi? ?Mo yumi save mekem samting ya olsem wanem?
1, 2. (a) ?Maet fasin blong Jisas blong lukaot gud i mekem yu tingbaot wanem kwestin? (b) ?Ol sinman oli save folem fasin blong Jisas we i stret gud olgeta? Yu talem wan eksampol.
MAET yu stap tingting se: ?I tru se yumi save folem fasin blong Jisas blong lukaot gud? Maet yu ting se yumi no save folem fasin blong Jisas from we Jisas i stret gud olgeta. Mo tu, samtaem Jisas i save wanem bambae i hapen plante taosen yia biaen. ?Olsem wanem? ?I tru se Jisas i mas lukaot gud? (Mat. 24:37-39; Hib. 4:15) I gud yumi ansa long tufala kwestin ya fastaem, olsem bambae yumi kasem save from wanem i impoten tumas we yumi lukaot gud naoia.
2 ?Olsem wanem? ?Fasin blong man we i stret gud olgeta, i save tijim ol sinman? Yes. I olsem wan studen we i lanem samting long wan gudfala tija. Yu traem tingbaot wan man we i stap lan blong sut long bonara. Fastaem hem i sutum ara be hem i no save kasem mak. Ale, hem i gohed blong lanem mo hem i traehad. Hem i wantem kam gud moa, taswe hem i lukluk gud olsem wanem tija blong hem i sutum ara, nao hem i traem mekem sem mak. Tija blong hem i gat gudhan blong yusum bonara. Studen i lukluk gud se tija i stanap olsem wanem, i mekem han blong hem olsem wanem, i holem string olsem wanem. Sloslo, studen i save se hem i mas pulum string i taet olsem wanem, mo hem i save se win bambae i mekem wanem long ara. Sipos hem i gohed blong tren mo hem i folem fasin blong tija blong hem, bambae hem i kam gud moa long fasin blong hem blong sutum ara. Bambae hem i sutum ara klosap moa long mak. Long sem fasin, yumi traehad blong kam gud moa long fasin blong Kristin man. Yumi mekem olsem taem yumi folem ol tok blong Jisas mo fasin blong hem we i stret gud olgeta.
3. (a) ?Jisas i talem wanem we i soemaot se hem tu i mas lukaot gud? (b) ?Bambae yumi tokbaot wanem long stadi ya?
3 ?I tru se Jisas i mas lukaot gud? Yes, hem i mas lukaot gud. Long naet bifo we Jisas i ded, hem i talem long ol gudfala aposol blong hem se: “Yufala i mas wekap [“lukaot gud,” NW] wetem mi.” Biaen hem i talem se: “Yufala i mas lukaot gud, yufala i mas prea, blong bambae i no gat wan samting i save traem yufala blong mekem yufala i foldaon.” (Mat. 26:38, 41) Taem Jisas i laef long wol, oltaem hem i lukaot gud. Be ol aoa bifo we hem i ded, hemia wan taem we i had, mo hem i wantem se hem i mas lukaot gud mo hem i mekem evri samting we hem i save mekem blong i stap klosap long Papa blong hem. Hem i save se ol man blong hem tu oli mas lukaot gud long taem ya, mo bambae oli mas lukaot gud biaen tu. Taswe, i gud yumi tokbaot from wanem Jisas i wantem se yumi lukaot gud. Biaen bambae yumi lanem tri samting we yumi save mekem blong yumi lukaot gud olsem Jisas.
RISEN FROM WANEM JISAS I WANTEM SE YUMI MAS LUKAOT GUD
4. ?From wanem yumi mas lukaot gud oltaem?
4 Jisas i wantem se yumi mas lukaot gud oltaem from we i gat sam samting we yumi no save mo i gat sam samting we yumi save. Taem Jisas i stap long wol, hem i no save olgeta samting we bambae i hapen long fiuja. Tingting blong Jisas i stap daon, nao hem i talemaot klia se: “Dei blong samting ya, mo taem blong hem, i no gat man i save. Ol enjel blong heven, mo mi tu we mi Pikinini blong God, be mifala i no save. Papa blong mi, hem nomo i save.” (Mat. 24:36) Long taem ya, Jisas we i “Pikinini blong God,” hem i no save stret taem we rabis wol ya bambae i lus. ?Olsem wanem long yumi tede? ?Yumi save olgeta samting we bambae oli hapen long fiuja? !Nogat! Yumi no save wetaem stret, Jehova bambae i sanem Pikinini blong hem blong spolem rabis wol ya. Sipos yumi save olgeta samting we bambae i hapen, bambae yumi no nid blong lukaot gud. Jisas i talem se en blong rabis wol ya bambae i kamtru wantaem nomo, long taem we yumi no tingbaot. Taswe, yumi mas lukaot gud oltaem.—Ridim Matiu 24:43.
5, 6. (a) ?Save we yumi gat long Kingdom blong God i givhan olsem wanem long yumi, blong yumi lukaot gud? (b) ?Yumi save wanem long saed blong Setan, we i mekem se yumi wantem lukaot gud moa?
5 Jisas i save plante gudgudfala samting we bambae oli kamtru long fiuja. Plante man raonabaot long hem, oli no save long ol samting ya nating. I tru, save blong yumi i no olsem save blong Jisas. Be hem i tijim plante samting long yumi long saed blong Kingdom blong God mo ol samting we Kingdom ya bambae i mekem i no longtaem. Plante man long skul, long wok, mo long teritori we yumi prij long hem, oli no save ol gudfala samting ya. Hemia wan narafala risen from wanem yumi mas lukaot gud oltaem. Olsem Jisas, oltaem yumi mas lukaot evri janis blong talemaot ol samting we yumi save long saed blong Kingdom blong God. Evri janis i impoten, mo yumi wantem meksua se yumi no mestem wan. !Laef blong ol man i stap long denja!—1 Tim. 4:16.
6 Jisas i save wan narafala samting we i givhan long hem blong lukaot gud oltaem. Jisas i save se Setan i gat strong tingting blong traem hem, blong mekem i nogud long hem, mo blong pulum hem blong lego God. Oltaem rabis enemi ya i stap lukaot “sam narafala taem we i stret” blong traem Jisas. (Luk 4:13, Nyutesteman wetem Ol Sam long Bislama [NTB]) Be oltaem Jisas i stap lukaot gud. Hem i wantem se hem i rere nomata wanem samting i traem hem, nating se Setan i traem pulum hem blong mekem samting we i no stret, i agensem hem, no i mekem i nogud long hem. I sem mak long yumi tede. Yumi save se Setan i “olsem wan laeon we i stap singaot bigwan, i stap lukaot man blong i kakae.” Hemia nao from wanem Baebol i talem long olgeta Kristin se: “Yufala i mas lukaot gud. Yufala i mas rere.” (1 Pita 5:8) ?Be bambae yumi mekem samting ya olsem wanem?
TAEM YUMI PREA
7, 8. ?Jisas i givim wanem advaes taem hem i tokbaot prea? ?Mo yumi lanem wanem from fasin blong hem blong prea?
7 Baebol i talem se prea i impoten blong givhan long yumi blong lukaot gud. Nao bambae yumi fren gud wetem Jehova oltaem. (Kol. 4:2; 1 Pita 4:7) Afta we Jisas i talem long ol man blong hem se oli mas lukaot gud wetem hem, hem i talem se: “Yufala i mas lukaot gud, yufala i mas prea, blong bambae i no gat wan samting i save traem yufala blong mekem yufala i foldaon.” (Mat. 26:41) ?Olsem wanem? ?Jisas i min se oli mas prea long taem ya nomo from we bigfala trabol i kasem olgeta? No, hem i no minim olsem. Yumi mas folem advaes ya evri dei long laef blong yumi.
8 Fasin blong Jisas i soemaot se prea i impoten tumas. Maet yu tingbaot se wan taem Jisas i prea long Papa blong hem wan fulnaet. (Ridim Luk 6:12, 13.) Yu traem tingbaot samting ya: Long taem we ol tri oli putum flaoa, Jisas i stap klosap long taon ya Kapaneam. Ples i stap tudak, nao Jisas i go antap long wan hil we i stap klosap long Lugun blong Galili. Hem i lukluk i godaon long taon ya Kapaneam mo ol vilej klosap, mo ating i luk ol smosmol laet oli stap laet long ol haos. Ale Jisas i stat blong prea, mo i no gat wan samting we i pulum tingting blong hem taem hem i stap toktok long Jehova. Ol aoa oli pas. Klosap hem i no luksave se ol laet wanwan oli stap ded, mun i stap krosem skae, mo i no harem ol anamol we oli mekem noes klosap long hem. Ating hem i stap tokbaot bigfala desisen we hem i mas mekem blong jusum 12 aposol blong hem. Ating Jisas i prea strong, i askem Papa blong hem blong lidim hem mo blong givim waes long hem. Hem i talemaot olgeta tingting mo wari blong hem long saed blong ol disaepol wanwan.
9. ?Yumi lanem wanem long fasin blong Jisas blong prea wan fulnaet?
9 ?Olsem wanem? ?Fasin blong Jisas i tijim yumi se yumi mas prea plante aoa? No, i no hemia. Jisas i talem long ol man blong hem long kaen fasin se: “Tingting blong yufala i strong, be bodi blong yufala i slak.” (Mat. 26:41) Yes, ol tok ya blong Jisas i tru. Be nating, yumi save folem fasin blong Jisas. ?Yu yu stap toktok wetem Papa blong yu long heven, bifo we yu mekem ol bigfala desisen? Maet hemia ol desisen we oli save jenisim fasin fren blong yu wetem Jehova, fasin fren blong famle blong yu wetem Jehova, mo fasin fren we ol Kristin brata sista oli gat wetem Jehova. ?Yu yu prea from ol Kristin brata sista? ?Ol toktok we yu talem taem yu prea i kamaot long hat blong yu? ?No yu yu stap talem ol sem toktok nomo bakegen mo bakegen? I gud blong makem tu se long tingting blong Jisas, i impoten we hem i stap hem wan blong toktok wetem Papa blong hem, mo talemaot ol samting we i stap long hat blong hem. Tede ol man oli bisi long plante samting, nao oli fogetem wanem we i impoten. Bambae yumi kam gud moa long fasin ya blong lukaot gud sipos yumi tekem taem blong stap yumi nomo, blong yumi prea long Jehova mo talemaot ol samting we i stap long hat blong yumi. (Mat. 6:6, 7) Bambae yumi kam klosap moa long Jehova, mo yumi mekem olgeta samting we yumi save mekem blong fren gud moa wetem hem. Mo bambae yumi no mekem wan samting we i save spolem fasin fren blong yumi wetem hem.—Sam 25:14.
TAEM YUMI PRIJ
10. ?Wanem stori i soemaot se Jisas i lukaot gud blong tekem janis blong prij?
10 Jisas i lukaot gud taem hem i mekem wok we Jehova i givim long hem. I gat sam wok we yumi no nid blong tingting tumas long olgeta, nao yumi save tingbaot sam narafala samting taem yumi stap wok. Be i gat plante wok we yumi mas lukaot gud taem yumi mekem olgeta, mo yumi no save tingbaot narafala samting. Wok we ol Kristin oli mekem blong prij long ol man, i olsem. Jisas i lukaot gud taem hem i mekem wok ya. Hem i stap lukaot gud blong tekem evri janis blong talemaot gud nius long narafala. Yu traem tingbaot wan taem we Jisas mo ol disaepol blong hem oli wokbaot ful moning, nao oli kasem taon ya Saeka. Ol disaepol oli go pem sam kakae. Jisas i sidaon klosap long wel blong i spel smol. Be hem i lukaot gud, i tekem janis blong prij. Wan woman Sameria i kam blong kasem wota. Jisas i no slip, mo hem i no tingbaot sam risen blong no toktok long woman ya. Hem nao i statem storian wetem woman ya, mo ol tok we hem i talem i givhan long plante man long taon ya. (Jon 4:4-26, 39-42) ?Yu yu save mekem wanem blong kam gud moa blong folem fasin blong Jisas? ?Yu save lukaot gud moa, blong tekem janis blong prij long ol man we yu stap luk olgeta evri dei?
11, 12. (a) ?Jisas i talem wanem long samfala we oli traem pulum tingting blong hem i gowe long wok blong hem? (b) ?Jisas i soemaot olsem wanem se hem i no bitim mak long wok blong hem?
11 Sam man oli traem pulum tingting blong Jisas i gowe long wok blong God. Be oli no minim blong mekem olsem. Long Kapaneam, sam man oli wantem se Jisas i stap wetem olgeta from we hem i mekem ol sikman oli gud bakegen. Yumi kasem save from wanem oli tingting olsem. Be wok we God i givim long Jisas blong mekem, i no blong prij long taon ya nomo. Hem i mas prij long olgeta ‘laen blong Isrel we oli olsem ol sipsip we oli lus.’ (Mat. 15:24) Jisas i talem long ol man ya se: “Mi mas go long ol narafala vilej tu, mi mas talemaot gud nius ya long olgeta, se God i stap kam King blong olgeta man long wol, from we God i sanem mi blong mi mekem olsem.” (Luk 4:40-44) Taswe, bigfala samting long laef blong Jisas hemia wok blong prij. Hem i no letem eni samting i pulum tingting blong hem i gowe long wok ya.
12 ?Be olsem wanem? ?Jisas i bitim mak long wok ya, we hem i no moa save tingbaot wan narafala samting nating? ?Hem i no moa tingbaot ol samting we ol narafala oli nidim? No, Jisas i no bitim mak long wok ya. Hem i harem gud long laef, mo i harem gud blong mekem sam samting wetem ol fren blong hem. Hem i tinghae long ol famle. Hem i tingbaot olgeta se oli harem olsem wanem, i tingbaot ol samting we oli nidim mo ol trabol we i kasem olgeta. Mo hem i soemaot se hem i laekem ol pikinini.—Ridim Mak 10:13-16.
13. ?Yumi save mekem wanem blong folem fasin blong Jisas, blong lukaot gud mo no bitim mak long wok blong prij?
13 Taem yumi folem fasin blong Jisas blong lukaot gud, ?yumi save mekem olsem wanem blong no bitim mak long wok ya? Yumi no letem wol ya i pulum tingting blong yumi i gowe long wok blong yumi. Maet sam fren mo famle oli no minim blong pulum tingting blong yumi i gowe long wok blong God, be oli mekem olsem taem oli talem long yumi se yumi no nid blong prij plante olsem we yumi stap mekem. Mo maet oli talem se i moa gud yumi mekem laef blong yumi i olsem ol narafala man. Be sipos yumi folem fasin blong Jisas, bambae yumi tinghevi long wok blong prij olsem se i kakae blong yumi. (Jon 4:34) Wok blong prij i givhan long yumi blong fren gud moa wetem Jehova mo i mekem yumi glad. Be yumi no mas bitim mak long wok ya, nao yumi mekem olsem se yumi stret man. Mo yumi no mas mekem i strong tumas long yumi wan, nao yumi no moa harem gud long ol narafala samting long laef. Olsem Jisas, yumi wantem se yumi glad, mo yumi mekem wok ya we yumi no bitim mak. Hemia wok blong God ya we “i stap harem gud oltaem.”—1 Tim. 1:11.
TAEM OL SAMTING OLI TRAEM YUMI
14. ?Taem trabol i kasem yumi, yumi no mas fogetem wanem, mo from wanem?
14 Taem ol samting oli traem Jisas, hemia nao taem we hem i givim ol advaes we ol man blong hem oli mas folem. (Ridim Mak 14:37.) Taem trabol i kasem yumi, yumi mas tingbaot fasin blong Jisas moa, i bitim ol narafala taem. Long taem olsem, plante man oli fogetem wan trutok we i impoten tumas. From we trutok ya i impoten tumas, buk blong Ol Proveb i talem trutok ya tu taem i se: “I gat rod i stap we man i ting se i stret gud, be hem i rod blong ded nomo.” (Prov. 14:12; 16:25) Sipos yumi folem prapa tingting blong yumi, speseli taem bigfala trabol i kasem yumi, ating bambae yumi harem nogud mo bambae olgeta we yumi laekem tumas oli harem nogud.
15. ?Wanem samting i save traem wan papa we i hadwok blong lukaot long famle blong hem?
15 Maet wan papa i stap hadwok blong kasem ol samting we “famle blong hem” i nidim. (1 Tim. 5:8) Maet hem i gat janis blong kasem wan gudfala wok, be bambae hem i mestem ol miting, bambae hem i no mekem famle wosip, mo bambae hem i no moa prij. Sipos hem i folem prapa tingting blong hem, maet hem i luk se i stret blong mekem wok ya. Be hem i save spolem fasin fren blong hem wetem Jehova mo maet i lego Jehova. I moa gud blong folem advaes blong Ol Proveb 3:5, 6. Long vas ya Solomon i talem se: “I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.”
16. (a) ?Yumi lanem wanem long fasin blong Jisas blong folem waes we i kamaot long Jehova? (b) ?Olsem Jisas, plante papa oli trastem Jehova olsem wanem, taem trabol i kasem olgeta?
16 Taem ol samting oli traem Jisas, tingting blong hem i strong se bambae hem i no folem prapa tingting blong hem. Yu traem tingbaot samting ya. I no gat wan man samtaem we i waes olsem Jisas. Be Jisas i jusum se bambae i no folem waes blong hem wan. Taem Setan i traem Jisas, Jisas i talem bakegen mo bakegen se: “Baebol i talem se.” (Mat. 4:4, 7, 10) Jisas i folem waes we i kamaot long Papa blong hem, blong winim ol samting we oli traem hem. Hemia i soemaot se tingting blong Jisas i stap daon. Setan i no gat fasin ya, mo hem i no laekem fasin ya nating. ?Olsem wanem long yumi? ?Yumi folem waes we i kamaot long Jehova? Wan papa we i gat fasin olsem Jisas blong lukaot gud, bambae hem i yusum Tok blong God blong i lidim hem, speseli taem trabol i kasem hem. Long olgeta ples long wol, plante taosen papa oli stap mekem olsem. Oli putum Kingdom blong God mo tru wosip i stap fastaem long ol samting we oli nidim long laef. Hemia nao bes rod blong oli lukaot long famle blong olgeta. Oli traehad blong kasem ol samting we famle blong olgeta i nidim, mo Jehova i blesem olgeta olsem we hem i promes blong mekem.—Mat. 6:33.
17. ?Wanem i mekem se yu yu wantem folem fasin blong Jisas blong lukaot gud?
17 Tru ya, eksampol blong Jisas blong lukaot gud i beswan. Fasin blong hem i givhan long man mo i sevem laef blong man. Yu mas tingbaot se Setan i wantem se yu yu slip, we yu no moa tingbaot fasin fren blong yu wetem Jehova. Hem i wantem se bilif blong yu i slak, tingting blong yu i no moa strong blong wosipim Jehova, mo yu lego Jehova. (1 Tes. 5:6) !Yu no mas letem Setan i winim yu! Yu mas lukaot gud oltaem, olsem Jisas. Yu mas tekem taem blong prea long Jehova mo talemaot ol samting we i stap long hat blong yu. Yu mas lukaot gud long fasin blong yu blong prij, mo yu mas trastem Jehova taem ol samting oli traem yu. Sipos yu mekem olsem, bambae yu no harem se laef blong yu i blong nating. Bambae yu glad mo yu harem gud long laef naoia, taem yu stap luk en blong olfala wol ya i kam klosap moa. Sipos yu stap lukaot gud, taem Jisas i kam blong spolem rabis wol ya, bambae hem i luk se yu yu wekap mo yu bisi long wok blong God. !Bambae Jehova i glad tumas blong givim pei long yu from we yu yu stap tru long hem!—Rev. 16:15.
[Kwestin]
[Tok blong pija long pej 16]
Jisas i prij long woman long wel. ?Yu yu tekem janis blong prij evri dei?
[Tok blong pija long pej 17]
Taem yu traehad blong mekem se famle blong yu i fren gud wetem Jehova, hemia i soemaot se yu yu stap lukaot gud
