Kontinyen veye parey Zezi

“Veye e priye.” ​—MAT. 26:41.

KI OU POU REPONN?

Ki mannyer nou lapriyer i montre ki nou pe veye?

Dan ki fason nou kapab montre ki nou pe veye dan nou minister?

Akoz i enportan ki nou kontinyen veye ler nou fer fas avek leprev e ki mannyer nou kapab fer sa?

1, 2. (a) Ki kestyon nou kapab demann nou lekor konsernan legzanp Zezi? (b) Eski legzanp parfe Zezi i kapab ed bann imen enparfe? Donn en legzanp.

PETET ou’n deza mazinen: ‘Eski i vreman posib pour kontinyen veye parey Zezi? Apre tou, Zezi ti parfe! An plis ki sa, parfwa Zezi ti kapab vwar klerman sa ki ti pou arive a lavenir, menm si i ti pou ariv plizyer milye lannen pli tar. Eski i ti vreman bezwen veye?’ (Mat. 24:37-39; Ebr. 4:15) Annou premyerman reponn sa bann kestyon, apre nou ava vwar akoz sa size i enportan dan sa letan ki nou pe viv.

² Eski legzanp en imen parfe i kapab ed bann imen enparfe? Wi, akoz i posib pour aprann atraver en bon ansenyan ek son legzanp. Meton en dimoun pe aprann tir fles. Premye kou, i pa pou arive tap son target avek en ros. Me pli i aprann e eseye, i pou arive fer li. Pour li amelyore, i bezwen byen gete ki mannyer son ansenyan ki konn byen tir fles i fer. Sa zelev pou gete ki mannyer son ansenyan i debout, lafason i tyonbo e redi sa lastik. Ptitapti, pli i kontinyen imit son ansenyan e fer zefor, sa zelev pou arive tap son target. Pareyman, nou kontinyen fer zefor pour amelyore konman Kretyen par swiv lenstriksyon Zezi e imit son legzanp parfe.

3. (a) Ki mannyer Zezi ti montre ki li osi i ti bezwen kontinyen veye? (b) Ki nou pou egzaminen dan sa lartik?

³ Eski Zezi ti vreman bezwen kontinyen veye? Wi. Pandan son dernyen lannwit lo later, Zezi ti dir son bann disip fidel: “Veye avek mwan.” I ti osi azoute: “Veye e priye pour zot pa tonm dan tantasyon.” (Mat. 26:38, 41, nou ki’n met an italik.) Menm si Zezi ti’n toultan veye, sa letan la i ti santi ki i ti pli enportan ankor pour li kontinyen veye e reste pros avek  son Papa ki dan lesyel otan ki posib. I ti konnen ki son bann disip ti pou bezwen fer parey li menm, pa zis sa zour me a lavenir osi. Alor, annou gete akoz Zezi i oule ki nou kontinyen veye. Apre nou pou vwar trwa fason ki nou kapab imit Zezi dan nou lavi tou le zour.

ZEZI I OULE KI NOU KONTINYEN VEYE

4. Akoz nou bezwen kontinyen veye?

⁴ An bref, Zezi i oule ki nou kontinyen veye akoz sa ki nou konnen e sa ki nou pa konnen. Ki savedir sa? Ler Zezi ti en zonm lo later, eski i ti konn tou sa ki ti pou arive a lavenir? Non. Avek limilite i ti dir: “Konsernan sa zour e sa ler personn pa konnen kan i pou arive, pa menm bann lanz dan lesyel, ni menm Garson Bondye, me Papa tousel ki konnen.” (Mat. 24:36) Ler i ti dir sa parol, Zezi “Garson Bondye” pa ti konnen kan lafen sa lemonn ti pou vini. Be nou, eski nou konnesans lo lavenir i limite? Wi parski nou pa konnen egzakteman kan Zeova pou anvoy son Garson pour met en lafen avek sa move lemonn. Si nou ti konnen, eski vreman nou ti pou kontinyen veye? Anfet, parey Zezi ti eksplike, lafen pou vin en sel kou, san ki nou ekspekte. Sanmenm rezon nou bezwen kontinyen veye plis ki zanmen oparavan. ​—Lir Matye 24:43.

5, 6. (a) Ki lefe sa ki nou konnen lo plan Bondye i annan lo nou determinasyon pour kontinyen veye? (b) Akoz sa ki nou konnen lo Satan i fer nou pli determinen pour kontinyen veye?

⁵ De lot kote, Zezi ti konn en kantite keksoz merveye ki ti pou arive a lavenir ki laplipar dimoun pa ti konnen. I vre ki nou pa konn otan ki Zezi, me gras a son bann lansennyman nou’n konn en bon pe lo Rwayonm Bondye e sa ki sa Rwayonm pou fer byento. Ler nou get bann dimoun ki otour nou, kot lekol, dan travay, dan kanton e kot nou al prese, pa i evidan ki laplipar dimoun pe viv dan en gran fernwanr konsernan sa bann laverite merveye? Sa i donn nou en lot rezon pour kontinyen veye. Parey Zezi, nou devret touzour reste vizilan e rod bann loportinite pour partaz sa ki nou konnen lo Rwayonm Bondye. Sak sa bann loportinite i presye e nou pa anvi les pase okenn sa bann sans. Lavi dimoun i an danze! ​—1 Tim. 4:16.

⁶ I annan en lot keksoz ki Zezi ti konnen ki ti fer li kontinyen veye. I ti konsyan ki Satan ti determinen pour tant li, persekit li e fer li kas son lentegrite. Sa lennmi visye ti toultan pe vey en “pli bon lokazyon” pour teste Zezi. (Lik 4:13) Me Zezi ti toultan reste vizilan. I ti determinen pour li pare pour okenn tes, ki swa tantasyon, lopozisyon ouswa persekisyon. Eski pa nou dan menm sityasyon ki li? Nou konn byen ki Satan i parey “en lyon ki kriye, pe rode ki i pou devore.” Sanmenm rezon ki Parol Bondye i konsey tou Kretyen pour “reste vizilan e vey byen.” (1 Pyer 5:8) Me, ki mannyer nou kapab fer sa?

KI MANNYER LAPRIYER I KAPAB ED NOU POUR KONTINYEN VEYE

7, 8. Ki konsey Zezi ti donnen konsernan lapriyer e ki legzanp i’n kite pour nou?

⁷ Souvandfwa Labib i montre ki kontinyen veye e reste vizilan i mars ansanm an rapor avek lapriyer. (Kol. 4:2; 1 Pyer 4:7) Rafal i ti demann son bann disip pour kontinyen veye avek li, Zezi ti dir zot: “Veye e priye pour zot pa tonm dan tantasyon.” (Mat. 26:41) Eski sa konsey ti aplikab zis akoz zot ti pe fer fas avek en sityasyon difisil sa moman? Non, anfet sa konsey i en prensip ki nou bezwen aplik dan nou lavi tou le zour.

⁸ Zezi ti kit en legzanp remarkab dan  domenn lapriyer. Kekfwa ou kapab rapel ki i ti’n deza arive ki i ti pas en lannwit antye pe priy son Papa. Esey imazin sa senn. (Lir Lik 6:12, 13.) Liver in fini e Zezi i Kapernaoum, en pti lavil dan rezyon Galile kot bann peser i reste. Soley in kouse e Zezi in mont lo en montanny o bor lanmer Galile. Anmezir ki fernwanr i fer, kekfwa i pe vwar bann pti lalimyer pe klate dan lwen dan Kapernaoum ek bann pti vilaz dan zalantour. Me ler Zezi i konmans koz avek Zeova, i konsantre dan son lapriyer. Minit, menm erdtan i pase. Zezi pa pe remarke ki letan pe pase e ki sa bann pti lalimyer i tennyen enn par enn, ki lalin pe marse dan lesyel e ki bann zannimo pe parwaze pour rod manze. I paret ki dan son lapriyer, i pe konsantre lo en gro desizyon, swazir son douz zapot. Mazin Zezi pe dir son Papa tou son bann panse ek lenkyetid lo sak sa bann disip, i sipliy son Papa pour donn li gidans ek lasazes.

9. Ki nou kapab aprann atraver legzanp Zezi konsernan lapriyer?

⁹ Ki nou kapab aprann avek legzanp Zezi? Eski sa i vedir ki nou devret fer bann gran gran lapriyer? Non, akoz i ti rekonnet konsernan son bann disip ki “lespri i dispoze, me laser i feb.” (Mat. 26:41) Toudmenm, nou kapab imit Zezi. Par egzanp, eski nou koz avek nou Papa dan lesyel avan nou fer en desizyon ki kapab annan en lefe lo nou, nou fanmir ouswa nou bann frer ek ser dan kongregasyon? Eski nou priy pour nou bann frer ek ser dan lafwa? Eski nou priy avek tou nou leker plito ki repet menm zafer tou lazournen? Pa bliye osi ki Zezi ti kontan sa bann konversasyon personnel avek son Papa. Dan sa lemonn difisil kot nou tou nou sitan okipe, i vreman fasil pour oubliy sa ki pli enportan dan nou lavi. Si nou fer letan pour bann lapriyer personnel o profon, sa pou fer nou pli vizilan spirityelman. (Mat. 6:6, 7) Nou pou vin pli pros avek Zeova, nou relasyon avek li pou vin deplizanpli pli for e nou pou evite fer okenn keksoz ki kapab gat sa relasyon. ​—Ps. 25:14.

KONMAN POUR KONTINYEN VEYE DAN PREDIKASYON

10. Ki legzanp ki montre nou ki Zezi ti sezi tou loportinite pour donn en temwannyaz?

¹⁰ Zezi ti osi kontinyen veye dan lafason i ti desarz bann responsabilite ki Zeova ti donn li. I annan serten louvraz kot en dimoun i kapab les son lespri vagabonde san ki sa i anmenn okenn move konsekans. Par kont, dan bokou louvraz, en dimoun i bezwen reste konsantre e vizilan. Sa i le ka avek nou minister Kretyen. Zezi ti toultan konsantre dan son travay e vey bann loportinite pour anons sa bon nouvel. Par egzanp, en zour Zezi ek son bann disip ti ariv dan lavil Sikar, apre ki zot ti’n marse bomaten antye. Kan son bann disip ti’n al rod manze, Zezi ti reste pour repoze kot pwi sa lavil, me i ti reste vizilan e sezi loportinite pour donn en temwannyaz. En madanm Samariten ti vin sers delo. Zezi ti’n kapab profite pour fer en pti sonm. I ti’n kapab annan en ta rezon pour pa koz avek sa madanm. Me toudmenm, i ti konmans en konversasyon avek li e donn en bon temwannyaz ki ti annan en gran lefe lo bokou dimoun dan sa lavil. (Zan 4:4-26, 39-42) Eski nou kapab pli byen imit legzanp Zezi pour reste vizilan e vey tou bann loportinite pour partaz sa bon nouvel avek tou dimoun ki nou rankontre tou le zour?

11, 12. (a) Ki mannyer Zezi ti reazir anver bann ki ti esey anpes li konsantre lo son travay? (b) Akoz nou kapab dir ki Zezi ti vreman ekilibre konsernan son travay?

¹¹ Par ler i ti arive ki bann dimoun ki  ti kapab annan bann bon lentansyon ti oule distrer li dan son travay. Dan lavil Kapernaoum, lafoul ti’n telman kontan bann mirak Zezi ki zot ti anvi i reste avek zot. Nou kapab konpran zot. Me selman, Zezi ti’n ganny anvoye pour bann “brebi perdi pep Izrael,” pa zis pour bann dimoun dan sa lavil. (Mat. 15:24) Pour sa rezon, i ti dir zot: “Mon bezwen anons Bonn Nouvel konsernan Rwayonm Bondye dan bann lezot lavil osi, parski se pour sa, ki Bondye in anvoy mwan.” (Lik 4:40-44) Dan son lavi, Zezi ti konsantre lo son minister e napa nanryen ki ti anpes li fer sa.

¹² Eski Zezi ti telman konsantre dan son travay ki i ti mazin zis sanmenm san pran kont lezot? Vi ki son minister ti sitan enportan pour li, eski sa ti anpes li konpran bezwen bann fanmir ki i ti rankontre? Ditou! Zezi ti vreman ekilibre. Son lavi ti gou e i ti kontan pour pas bann bon moman avek son bann zanmi. I ti annan lapresyasyon pour bann fanmir, i ti konsernen avek zot bann problenm ek bezwen e i ti santi li alez pour demontre lafeksyon anver bann zanfan. ​—Lir Mark 10:13-16.

13. Ki mannyer nou kapab imit legzanp Zezi pour kontinyen veye e reste ekilibre dan lafason nou konsider predikasyon?

¹³ Menm si nou kontinyen veye parey Zezi, ki mannyer nou kapab reste ekilibre nou osi? Nou pa les sa lemonn anpes nou konsantre lo nou travay. Nou bann zanmi ek fanmir ki paret annan bann bon lentansyon i kapab ankouraz nou pour ralanti dan nou minister oubyen viv en lavi swadizan normal. Par kont, si nou imit Zezi nou pou konsider nou minister konman en nouritir. (Zan 4:34) Sa travay i nouri nou spirityelman e i gou tou. Toudmenm, nou pa ti a voudre met tro bokou lanfaz lo nou pwennvi, izol nou lekor ouswa donn lenpresyon ki nou ki la. Parey Zezi, vi ki nou pe servi “sa Bondye ere,” nou bann adorater zwaye e ekilibre. ​—1 Tim. 1:11, NW.

KONTINYEN VEYE KAN NOU RANKONTRE LEPREV

14. Ler nou rankontre leprev, ki tandans nou bezwen evite e akoz?

¹⁴ Parey nou’n vwar pli boner, Zezi ti donn sa konsey pour kontinyen veye letan i ti dan leprev. (Lir Mark 14:37.) Se ler nou rankontre leprev ki nou devret swiv son legzanp. Ler nou dan leprev, nou tant pour oubliy sa laverite sitan enportan ki liv Proverb i koz de fwa lo la: “I annan en semen ki drwat devan zonm, me apre, semen lanmor i son lafen.” (Prov. 14:12; 16:25) Si nou depan lo nou prop fason panse, sirtou ler nou rankontre bann problenm grav, sa i kapab en danze pour nou lekor ek bann ki nou kontan.

15. Ki en sef fanmir i kapab ganny tante pour fer ler i rankontre bann problenm ekonomik?

¹⁵ Par egzanp, en sef fanmir i kapab anba en kantite presyon pour pran  swen avek bezwen materyel son fanmir. (1 Tim. 5:8) I ti kapab ganny tante pour aksepte en louvraz ki ti kapab fer li mank renyon kongregasyon tanzantan, mank ladorasyon fanmir ouswa pa partisip dan predikasyon. Si i depan lo son prop fason panse, en tel desizyon i kapab paret fer sans. Toudmenm, i kapab afeblir li ouswa fer li tonbe spirityelman. Pa i pli bon swiv sa konsey dan Proverb 3:5, 6 kot Salomon ti dir: “Met ou konfyans dan Zeova avek tou ou leker e pa apiy lo ou prop konprenezon. Dan tou ou semen pran li an konsiderasyon, e li i pou fer drwat ou bann santye.”

16. (a) Ki legzanp Zezi in kite an rapor avek met konfyans dan lasazes son Papa olye dan sa ki pour li? (b) Ki mannyer bokou sef fanmir i imit legzanp Zezi kot i konsern met konfyans dan Zeova dan moman difisil?

¹⁶ Ler Zezi ti rankontre leprev, i ti determinen pour pa depan lo son prop konprenezon. Zis mazinen! Sa zonm pli saz ki’n deza egziste lo later ti swazir pour pa depan lo son prop lasazes pour fer fas avek diferan sityasyon. Par egzanp, ler Satan ti tant li, Zezi ti dir: “I’n ekri” ouswa, “dan Lekritir in dir.” (Mat. 4:4, 7, 10) I ti depan lo lasazes son Papa pour reziste bann tantasyon e demontre sa limilite ki Satan pa’n zanmen anvi demontre. Eski nou fer parey nou osi? En sef fanmir i kapab imit lafason ki Zezi ti kontinyen veye par les Parol Bondye gid li, sirtou kan i rankontre bann difikilte. Sanmenm ki plizyer milye sef lafanmir i fer dan lemonn antye. Zot kontinyen met Rwayonm Bondye ek vre ladorasyon premye dan zot lavi avan bann keksoz materyel. Dan sa fason, zot fer zot mye pour pran byen swen avek zot fanmir. Pour sa rezon, Zeova i beni zot zefor pour pran swen materyelman avek zot fanmir, zis parey son Parol Labib i promet. ​—Mat. 6:33.

17. Kwa ki pous ou pour kontinyen veye parey Zezi?

¹⁷ San okenn dout, Zezi i sa pli bon legzanp an sa ki konsern kontinyen veye. Legzanp ki i’n kite i kapab ed nou dan nou lavi tou le zour, i benefisye nou e i kapab sov nou lavi. Pa oubliye osi ki Satan ti a byen kontan fer ou tonm dormi spirityelman, afeblir ou lafwa, fer ou ladorasyon vin zis en routin e pous ou pour fer konpromi dan ou lobeisans. (1 Tesa. 5:6) Pa les li reisi. Kontinyen veye parey Zezi. Reste vizilan atraver ou lapriyer, dan ou minister e dan lafason ou fer fas avek leprev. Si ou fer sa, la ki sa lemonn pros pour fini, ou pou annan en lavi gou, ere ki vo lapenn dan servis Zeova. Deplis, si ou kontinyen veye ou kapab asire ki kan ou Met i vini pour met en lafen avek sa move lemonn, i pou vwar ou vizilan e aktif pe akonplir lavolonte son Papa. I pou en plezir pour Zeova rekonpans ou akoz ou’n reste fidel avek li. ​—Rev. 16:15.

[Kestyon]

[Portre lo paz 16]

Zezi ti koz avek en madanm kot pwi. Eski ou sezi tou loportinite pour prese?

[Portre lo paz 17]

Ou pe kontinyen veye ler ou pran swen avek byennet spirityel ou fanmir