“Peñatende porãke ha peñemboʼe.” (MAT. 26:41, NM)

MBAʼÉPA REMBOHOVÁITA?

Mbaʼéichapa ñane ñemboʼére ojekuaa ñañatende porãha?

Mbaʼéichapa jahechauka ñañatende porãha japredika hag̃ua?

Mbaʼérepa ñañatende porã vaʼerã jahasa jave umi mbaʼe ijetuʼúva, ha mbaʼéichapa ikatu jajapo upéva?

1, 2. a) Mbaʼe mbaʼépa ikatu ñañeporandu jaikuaávo Jesús oñatende porã hague? b) Ikatu piko peteĩ tapicha imperfékto oiko peteĩ kuimbaʼe perfékto oiko haguéicha? Emoĩ peteĩ ehémplo.

 OIMÉNE oĩ oñeporandúva: “Ikatúne piko añatende porã Jesús ojapo haguéicha? Haʼe ningo perfektovaʼekue, upévare sapyʼánte heta tiémpo mboyve jepe oikuaáma mbaʼépa oikóta. Péro añetehápe piko haʼe tekotevẽraʼe oñatende porã?” (Mat. 24:37-39; Heb. 4:15). Ñambohovaimína koʼã mokõi porandu jaikuaa hag̃ua mbaʼérepa tekotevẽvéntema ñande ñañatende porã koʼág̃a.

² Ikatu piko peteĩ tapicha imperfékto oiko peteĩ kuimbaʼe perfékto oiko haguéicha? Ikatu. Pór ehémplo peteĩ mboʼehára ikatupyrývagui ñaaprendekuaa heta mbaʼe. Ñamoĩ chupe peteĩ mitãrusu ostudiaha ombopukuaa hag̃ua mbaraka. Ñepyrũrã nosẽi chupe mbaʼevete, upéicharõ jepe oñehaʼã ha oñensaja meme. Haʼe oñatende porã mbaʼéichapa imboʼehára ikatupyryetéva omoĩ ijyva ha ikuã ombopu hag̃ua pe mbaraka. Mbeguekatúpe pe mitãrusu oaprende ohóvo, upéi ikatupyrýma oñatõi hag̃ua pe mbaraka ha osẽ mimíma chupe umi nóta. Ojesareko porã rupi imboʼehárare, ombopukuaáma katu peteĩ músika. Upéicha avei opavave kristiáno ára ha ára ñañehaʼã jajapo porãve Jehová rembipota jasegívo Jesús ñanemboʼéva ha ñahaʼangávo chupe.

3. a) Mbaʼéichapa Jesús ohechauka tekotevẽ hague oñatende porã? b) Mbaʼépa jahecháta ko artíkulope?

³ Tekotevẽpa raʼe Jesús oñatende porã? Tekotevẽ vaʼekue. Pór ehémplo, pe pyhare ojejagarra mboyve ojejuka hag̃ua, heʼi ijapostolkuérape: “Pepyta koʼápe ha peñatende porã chendive”. Upéi heʼi: “Peñatende porãke ha peñemboʼe tapiaite ani hag̃ua peʼa mbaʼe vaípe” (Mat. 26:38, 41, NM). Jesús akóinte oñatende porã vaʼekue, péro  ohasárõ guare umi mbaʼe ivaietéva ko yvy ape ári, koʼýte oikotevẽ oñemoag̃ui Itúva yvagapeguáre ha ojesareko porã. Haʼe oikuaa hemimboʼekuéra tekotevẽha oñatende porã upérõ, ha avei upe rire. Jahechamína mbaʼérepa Jesús oipota ñañatende porã ha upéi ñahesaʼỹijo mbaʼéichapa ikatu ñahaʼanga chupe mbohapy mbaʼépe.

MBAʼÉREPA JESÚS OIPOTA ÑAÑATENDE PORÃ

4. Mbaʼérepa akóinte ñañatende porã vaʼerã?

⁴ Ñande ningo jaikuaa heta mbaʼe oikótava tenonderãme, péro oĩ avei heta mbaʼe ndajaikuaáiva, upévare Jesús oipota ñañatende porã. Haʼe jepe ndoikuaaivaʼekue opa mbaʼe oikótava oĩrõ guare ko yvy ape ári. Upéicha rupi heʼi: “Upe ára ha upe óra katu avave ndoikuaái, ni umi ánhel yvagapegua, ni pe Taʼýra. Pe Túva añoite oikuaa” (Mat. 24:36, NM). Upe tiémpope Jesús, “pe Taʼýra”, ndoikuaaivaʼekue arakaʼetépa oñehundíta ko múndo aña. Ñande avei ndajaikuaaporãi heta mbaʼe oikótava tenonderãme. Pór ehémplo ndajaikuaái arakaʼépa Jehová omboúta Itaʼýra ohundi hag̃ua umi hénte aña. Jaikuaárire natekotevẽivaʼerãmoʼã ñañatende porã. Jesús heʼi haguéicha, ko múndo oñehundíta ñahaʼarõʼỹve jave ha upévare tekotevẽ akóinte ñañatende porã (elee Mateo 24:43).

5, 6. a) Mbaʼérepa tekotevẽ ñañatende porã jaikuaáramo jepe mbaʼépa Ñandejára Rréino ha umi mbaʼe ojapótava? b) Mbaʼérepa la Biblia heʼi akóinte ñañatende porã vaʼerãha?

⁵ Jesús oikuaavaʼekue heta mbaʼe porã oikótava tenonderãme, péro umi hénte itiempopegua ndoikuaái umíva. Ndaikatúiramo jepe ñañembojoja hese, haʼe rupive ñande jaikuaa mbaʼépa hína Ñandejára Rréino ha umi mbaʼe oguerútava koʼẽrõite upe goviérno. Ñañatendéramo umi hénte oĩvare ñande jerére, tahaʼe eskuélape, ñande travahohápe térã predikasiónpe, jahechakuaáta haʼekuéra oikoha pytũmbýpe ha ndohechakuaaiha umi mbaʼe porãita omboʼéva la Biblia. Opa umívare, akóinte ñañatende porã vaʼerã Jesús ojapo haguéicha ha mamo ñaimehápe ñamombeʼu pe marandu porã oñeʼẽva Ñandejára Rréinore. Aníke jaheja ohasa ni peteĩ oportunida; upéicharõmante ikatúta avei ojesalva ñande rapichakuéra (1 Tim. 4:16).

⁶ Mbaʼéicha rupípa avei Jesús oñatende porã vaʼekue? Haʼe oikuaa Satanás oipotaha osẽ Jehová rapégui ha upévare oipyʼaraʼã ha opersegi mbarete chupe. Pe Aña ningo ipyʼahatãiterei ha oĩ voi omoñuhã hag̃uáicha chupe “ija vove” (Luc. 4:13, NM). Péro Jesús akóinte ojesareko porã ha oñembosakoʼi ombohovái hag̃ua Satanáspe, tahaʼe oipyʼaraʼã térã opersegírõ guare chupe. Ñande avei jahasa koʼág̃a heta mbaʼe Jesús ohasavaʼekue. Ha Satanás katu, ku ‘león pochýicha oikohína ñande jerére oheka mávapepa hoʼúta’. Upévare Ñandejára Ñeʼẽ heʼi porã ñandéve: “Peikokuaákena ha peñeñangareko” (1 Ped. 5:8, BNP). Mbaʼéichapa ikatu jajapo upéva?

ÑAÑEMBOʼE MEME VAʼERÃ

7, 8. Mbaʼépa Jesús heʼi hemimboʼekuérape ojapovaʼerãha, ha mbaʼe ehémplopa omoĩ ñandéve?

⁷ La Biblia ohechauka porã tekotevẽtereiha ñañemboʼe meme ikatu hag̃uáicha ñañatende porã (Col. 4:2; 1 Ped. 4:7). Jesús ojerure riremi hemimboʼekuérape oñatende porã hag̃ua hendive, heʼi: “Peñatende porãke ha peñemboʼe tapiaite ani hag̃ua peʼa mbaʼe vaípe” (Mat. 26:41, NM). Tekotevẽpa raʼe upérõnte ojapo hikuái Jesús heʼíva? Nahániri. Koʼag̃aite peve ára ha ára ñande avei jajapovaʼerã upéicha.

⁸ Jesús akóinte oñemboʼevaʼekue, ha upévare haʼe peteĩ ehémplo neporãva ñandéve g̃uarã. Oiméne ñanemanduʼa peteĩ jey oñemboʼe hague Itúvape pyhare guive koʼẽmba peve. Ñapensamíntena mbaʼépa oikóraʼe  (elee Lucas 6:12, 13). Upérõ primavéra ha amalisia Jesús oiko ag̃ui Capernáumgui, pe táva oĩhápe heta peskadór. Kaʼarupytũ haʼe ojupi peteĩ sérro ijyvatévape oĩva már de Galilea ypýpe. Upe guive oiméne ohecha mbaʼéichapa pytũ ohóvo, umi lampĩu hendyjoáma Capernáumpe ha ambue táva oĩvape ijerére. Upépe Jesús oñepyrũ oñemboʼe Jehovápe ipyʼaite guive. Ohasa ohóvo pe tiémpo ha pe jasy iñapysẽma oúvo, ojekuaa ogue peteĩteĩmaha umi lampĩu ha umi mymba kaʼaguy osẽjoáma okaru. Péro haʼe nopenaguasúi koʼã mbaʼére. Upérõ oiméne oñemboʼe odesidi porã hag̃ua peteĩ mbaʼe iñimportantetereíva: oiporavovaʼerã ijapostolkuerarã. Haʼete ku ñahendupáva chupe mbaʼéichapa oñemboʼe ipyʼa mbytete guive ha omombeʼu Itúvape opensáva hemimboʼekuérare ha mbaʼépa oipyʼapy chupe káda únore. Ojerure avei Jehovápe oisãmbyhy ha omoarandu hag̃ua chupe.

9. Mbaʼépa ñaaprende Jesúsgui jaikuaávo oñemboʼe hague peteĩ pyhare pukukue?

⁹ Mbaʼépa ñanemboʼe Jesús? Ohechaukasépa ñañemboʼe puku vaʼerãha? Nahániri. Haʼe imbaʼerechakuaa hemimboʼekuérandi ha heʼi voi: “Añetehápe ningo yvypóra ojapose iporãva, péro hete ikangy” (Mat. 26:41, NM). Upéicharõ jepe, ikatu ñaaprende chugui heta mbaʼe, pór ehémplo ñañemboʼevaʼerãha Jehovápe jadesidi mboyve peteĩ mbaʼe iñimportánteva. Mbaʼérepa? Umíva ikatuhína omombarete térã omokangy ñande jerovia ha umi ermáno térã ñande rogayguakuéra jerovia. Avei ñaaprende iporãha ñamombeʼu Jehovápe umi mbaʼe ñandepyʼapýva ñane ermanokuérare ha ñañemboʼevaʼerãha ñande pyʼaite guive, ani jarrepetipánte umi mbaʼe jaʼéva. Jahechakuaa Jesús pyʼỹinte oñemohaʼeño hague oñemboʼe hag̃ua ha omombeʼupaite Itúvape hemiandu. Koʼág̃a katu ñande jajapuraháre jaiko ha ndahasyiete ñanderesarái hag̃ua umi mbaʼe iñimportantevévagui. Péro ñañemotiémporamo ñañemboʼe hag̃ua ñande pyʼaite guive, katuete jajesareko porãta Jehová rembipotáre (Mat. 6:6, 7). Avei upéicha ñañemoag̃uivéta hese, ñamombaretevéta ñande jerovia ha ñanepytyvõta ñamboyke hag̃ua oimeraẽ mbaʼe ikatúva ñanemokangy (Sal. 25:14).

JAPREDIKA MEME VAʼERÃ

10. Mbaʼépa ohechauka Jesús oñatende hague ikatu hag̃uáicha opredika oimehápe?

¹⁰ Opavave jaikuaa sapyʼánte natekotevẽguasuiha jajesarekoiterei peteĩ mbaʼe jajapóvare, péro oĩ heta tembiapo tekotevẽhápe ñañatende porã, umíva apytépe pe predikasión. Upévare Jesús akóinte oñatende porã vaʼekue ojapo hag̃ua pe tembiapo Jehová omeʼẽva chupe, ha oaprovecha opredika hag̃ua mamo oĩháme. Peteĩ jey, haʼe ha hemimboʼekuéra heta oguata rire, og̃uahẽ táva Sicárpe. Jesús opyta opytuʼuʼimi peteĩ póso mátape hemimboʼekuéra oho aja ojogua hiʼupy. Upe jave, peteĩ kuña Samariaygua ou oguenohẽ y ha haʼe oaprovecha opredika hag̃ua chupe. Jesús ikatúkuri oñeno oke pe asajekue, téra opensa iporãveha noñeʼẽinte pe kuñáme, péro haʼe ndojapói upéva. Oñepyrũ oñemongeta hendive, opredika chupe ha upéicha rupi oipytyvõ heta tapicha upe tavayguápe (Juan 4:4-26, 39-42). Ikatúpa ñahaʼanga chupe ha ñañatende porã japredika hag̃ua? Jajapókena Jesús ojapo haguéicha ha ani jaheja ohasa rei ni peteĩ oportunida ñamombeʼu hag̃ua pe marandu porã opavave jatopávape upe jaikohárupi.

11, 12. a) Mbaʼépa heʼi Jesús umi tapicha ojerurévape chupe peteĩ mbaʼe hendapeʼỹ? b) Mbaʼéichapa Jesús ohechauka omohenda porã hague opa hembiapo?

¹¹ Heta tapicha ojapovaiseʼỹre ojerure Jesúspe peteĩ mbaʼe hendapeʼỹ. Pór ehémplo,  oĩrõ guare Capernáumpe, umi hénte ohecha mbaʼéichapa haʼe omonguera umi hasývape, upévare ndoipotavéi oho upégui ikatu hag̃uáicha oipytyvõve chupekuéra. Añetehápe ndaivaíri upe ojeruréva hikuái, péro Jesús ndouivaʼekue upearã ni opredika hag̃ua peteĩ távape añónte, síno opavave “Israelguápe, oikóva ovecha okañyvaʼekuéicha” (Mat. 15:24, NM). Upévare heʼi chupekuéra: “Ahavaʼerã ambue tavakuéra rupi amombeʼu hag̃ua umi mbaʼe porã Ñandejára Rréino ojapótava. Upearã ningo añembouvaʼekue” (Luc. 4:40-44, NM). Péicha jahecha mbaʼéichapa Jesús ojesareko meme hembiapóre ha ndohejái mbaʼeve ni avave ojoko chupe opredika hag̃ua.

¹² Ikatúpa jaʼe Jesús ifanatikoiterei hague predikasión rehe, oñemohaʼeño ha noñemotiempoiha voi ovyʼami hag̃ua? Ohechaukápa hembiapoiterei ha ndohechakuaaveimaha mbaʼépa oikotevẽ umi hénte? Nahániri. Jesús omohenda porã vaʼekue opa hembiapo. Haʼe ovyʼakuaa ha ohasa porã iñamigokuéra ndive, omombaʼeterei familiakuérape ha ojepyʼapy umi mbaʼe haʼekuéra oikotevẽvare. Avei ohechauka ohayhuetereiha umi mitãme (elee Marcos 10:13-16).

13. Mbaʼéichapa ikatu jahechauka ñañatende porã ha jajapoha opa mbaʼe hekópe Jesús ojapo haguéicha?

¹³ Mbaʼéichapa ikatu jahechauka ñañatende porã ha jajapoha hekópe opa mbaʼe Jesús ojapo haguéicha? Jajapo meme vaʼerã pe tembiapo Jehová omeʼẽva ñandéve ha ani jaheja ko múndo ñanderesarea. Avei nañapenaivaʼerã ñane amígo ni ñane hentekuéra imbaʼeporãségui heʼíramo ñandéve omeʼẽtereimaha jajapóva predikasiónpe, térã jaikónte hag̃ua opavave oikoháicha. Jesús heʼivaʼekue haʼeteha okarúva omombeʼúramo pe marandu porã, ha ñande avei jahechavaʼerã upéicha ko tembiapo. Mbaʼérepa? Pe predikasión ningo ñanemombarete ha ñanembovyʼa (Juan 4:34). Péro ñañatendevaʼerã ani ñañemofanátiko, nañañemotiempovéi jahasa porã hag̃ua ñande rapichakuérandi térã ñapensa ñaneimportanteveha ótrogui. Pe Mboʼehára Guasu ojapo haguéicha, akãguapy ha torypápe jaservise “Ñandejára ovyʼávape” (1 Tim. 1:11, NM).

JAHECHAUKA ÑAÑATENDE PORÃHA JAHASA ASY JAVE

14. Mbaʼe rehépa katuete ñanemanduʼavaʼerã jahasa jave umi mbaʼe ijetuʼúva, ha mbaʼéicha rupípa?

¹⁴ Jahecha haguéicha, Jesús ohasa asyve jave katuete heʼimivaʼekue hemimboʼekuérape tekotevẽha oñatende porã (elee Marcos 14:37). Upévare, koʼýte jajejopy vaíramo jajapovaʼerã Jesús ojapo haguéicha. Heta oĩ ohasa asy vove hesaráimava tekotevẽtereiha oñatende porã. Upévare Provérbiospe dos vése voi heʼi: “Oĩ tape ñaimoʼãva naikarẽiha, amo huʼãme katu jajuhu ñemano” (Pro. 14:12; 16:25). Ñanemanduʼákena, jajeroviáramo ñandejehénte, koʼýte jahasa jave peteĩ mbaʼe ijetuʼúva, ikatuha jajeperhudika ñande ha umi jahayhúvape.

15. Mbaʼépa ikatu ojopy peteĩ omoakãvape ogapy?

 ¹⁵ Pór ehémplo peteĩ omoakãva ogapy ikatu ojecha vai ha ijetuʼu chupe omantene hag̃ua ‘hogayguakuérape’ (1 Tim. 5:8, BNP). Ñamoĩ chupe ojuhuha peteĩ traváho hoʼupátava itiémpo ha ndaikatumoʼãvéi ojapo pe Aty ostudia hag̃ua hogayguándi, oho rreunionhápe térã osẽ predikasiónpe. Chupe g̃uarã ikatu ndaivaíri hína térã oimoʼã ojapomantevaʼerãha oikotevẽgui. Péro upéva ningo omokangýta ijerovia ha omomombyrykuaa chupe Jehovágui. Upévare iporãiteve jajapo Salomón heʼivaʼekue Proverbios 3:5, 6-pe: ‘Ejerovia Ñandejárare nde pyʼaite guive ha ani ndejehe añónte. Nemanduʼáke hese opaite mbaʼépe, ha haʼe omyesakãta ndéve nde raperã’.

16. a) Mbaʼéichapa Jesús ohechauka ñandéve jajeroviavaʼerãha Jehováre ha ndahaʼéi ñandejehénte? b) Mbaʼéichapa heta omoakãva ogapy ohechauka ojeroviaha Ñandejárare, Jesús ojapo haguéicha?

¹⁶ Jesús ohasáramo guare umi mbaʼe ijetuʼúva, ni mbaʼevéicharõ ndojeroviaivaʼekue ijehénte. Ñapensamíntena! Pe kuimbaʼe iñaranduvéva oikovaʼekue ko yvy ape ári ndojeroviaivaʼekue haʼe oikuaávarente. Pór ehémplo, Satanás oipyʼaraʼãrõ guare chupe, Jesús heta vése heʼi: “Ñandejára Kuatiañeʼẽme heʼi” (Mat. 4:4, 7, 10, NM). Haʼe oheja Itúva oipytyvõ chupe ombohovái hag̃ua Satanáspe, ohechauka oñemomirĩha ha ni michĩmi ndojoguaiha upe tekove añáme. Jajapópa avei ñande upéicha? Umi omoakãva ogapy ha oñatende porãva Jesús ojapo haguéicha, ojapo opa mbaʼe la Biblia heʼihaichaite, koʼýte ohasa jave umi mbaʼe ijetuʼúva. Hetaiterei ñane ermáno oparupigua oñehaʼãmbaite ojapo péicha. Haʼekuéra ndohecharamói umi mbaʼerepy, ha opa mbaʼe ári omotenonde Ñandejára Rréino ha umi mbaʼe Haʼe oipotáva jajapo. Péicha koʼã ermáno oñangareko porã hína hogayguakuérare. Jehová katu oipytyvõ chupekuéra omoĩ hag̃ua ifamíliape hemikotevẽ ha upéicha ohechauka ovendesiha koʼã ermánope, opromete haguéicha Iñeʼẽme (Mat. 6:33).

17. Mbaʼépa nemokyreʼỹ reñatende porã hag̃ua Jesús ojapo haguéicha?

¹⁷ Jahecha haguéicha, Jesús ojapo ikatúva guive oñatende porã hag̃ua. Iñehémplo ideprovécho ñandéve ha ikatu ñandesalva. Ani ñanderesarái Satanás ndoipotaiha jajesareko Ñandejára rembipotáre. Haʼe oikuaa oikóramo ñanderehe upéva ñande jerovia ikangytaha, mbeguekatúpe nañanekyreʼỹmoʼãvéima ñamombaʼeguasu hag̃ua Jehovápe ha ikatu voi ñañemomombyryete chugui (1 Tes. 5:6). Aníkena jaheja oiko ñanderehe upéva, jasegi uvei Jesús ehémplo. Haʼe ojapo haguéicha, akóinte ñañatende japredika hag̃ua, ñañemboʼe meme ha ñañatende avei jahasa asy jave. Upéicha jajapóramo, javyʼa ha ñañeñandu porãta, jepe ko múndo aña oñehundipotaitéma. Avei Jesús ou vove ohundi hag̃ua umi hénte añáme, ñandejuhúta ñañatende porãha ñaína ha jajapoha Itúva rembipota. Ajépa Jehová ovyʼaitéta omeʼẽvo ñandéve pe prémio ñaneñeʼẽrendu haguére chupe! (Rev. 16:15.)

[Porandu ñahesaʼỹijóva]

[Nóta oĩva taʼanga ndive páhina 6]

Jesús opredika peteĩ kuñáme póso mátape. Japredikápa avei ñande mamo jaikohárupi?

[Nóta oĩva taʼanga ndive páhina 7]

Reipytyvõramo ne famíliape omombarete hag̃ua ijerovia, rehechaukareína reñatende porãha