Matan-moris bá hanesan Jesus
Matan-moris bá hanesan Jesus
“Matan-moris no harohan bá.”—MT 26:41.
OINSÁ ITA HATÁN?
Oinsá mak ita-nia orasaun bele hatudu katak ita matan-moris?
Iha dalan saida deʼit mak ita bele hatudu katak ita matan-moris kona-ba haklaken?
Tanbasá mak importante atu ita matan-moris nafatin iha susar laran? Oinsá mak ita bele halo ida-neʼe?
1, 2. (a) Kuandu ita hanoin oinsá Jesus matan-moris, ida-neʼe bele halo ita hanoin kona-ba pergunta saida deʼit? (b) Jesus nia ezemplu neʼebé perfeitu bele ajuda ita ka lae? Esplika toʼok.
DALA ruma ita hanoin: ‘Haʼu bele ka lae, matan-moris hanesan Jesus? Jesus mak ema neʼebé perfeitu! Liután neʼe, Jesus hatene buat barak neʼebé sei akontese iha tinan rihun ba rihun iha futuru! Se nuneʼe, Jesus presiza matan-moris ka lae?’ (Mt 24:37-39; Ebr 4:15) Mai ita koʼalia kona-ba pergunta sira-neʼe atu hatene tansá mak importante duni atu ita matan-moris.
2 Jesus nia ezemplu neʼebé perfeitu bele ajuda ita ema neʼebé sala-naʼin ka lae? Bele, tanba ita aprende husi mestre neʼebé diʼak nia ezemplu. Porezemplu, hanoin toʼok kona-ba joven ida neʼebé foin komesa aprende atu hana rama-oan. Foufoun, nia seidauk hatene oinsá atu hana didiʼak hodi bele kona fatin neʼebé nia hakarak, maibé nia kontinua treinu no hakaʼas an nafatin. Nia haree didiʼak oinsá ninia mestre hana. Nia haree oinsá mestre neʼe hamriik, no oinsá nia hasaʼe ninia liman no tau ninia liman atu dada tali hodi hana. Neineik-neineik, joven neʼe aprende dada tali ho diʼak atu hana, no oinsá atu haree didiʼak anin neʼebé huu antes atu hana. Hodi haree didiʼak no halo tuir ninia mestre nia ezemplu, neineik-neineik nia hatene hana ho loloos. Nuneʼe mós ho ita, ita presiza hakaʼas an nafatin atu halo tuir Jesus nia liafuan no ninia ezemplu neʼebé perfeitu.
3. (a) Saida mak hatudu katak Jesus presiza matan-moris? (b) Iha lisaun neʼe, ita sei koʼalia kona-ba saida?
3 Jesus presiza matan-moris ka lae? Sin, presiza duni. Porezemplu, iha kalan ikus antes Jesus mate, nia hatete ba ninia apóstolu sira: “Hadeer ho haʼu.” Depois, nia mós dehan: “Matan-moris no harohan bá atu imi keta monu ba babeur.” (Mt 26:38, 41) Maski Jesus sempre matan-moris, maibé liuliu iha tempu susar neʼe, nia hakarak matan-moris hodi besik liután ho ninia Aman iha lalehan. Jesus hatene katak ninia dixípulu sira mós presiza matan-moris hanesan nia, laʼós deʼit iha tempu neʼebá, maibé mós iha futuru. Tan neʼe, mai ita koʼalia kona-ba tansá mak Jesus hakarak ita atu matan-moris. Depois, ita sei haree dalan tolu neʼebé ita bele matan-moris hanesan Jesus iha ita-nia moris loroloron nian.
TANSÁ JESUS HAKARAK ITA ATU MATAN-MORIS
4. Tanbasá mak ita presiza matan-moris nafatin?
4 Jesus hakarak ita atu matan-moris nafatin tanba buat neʼebé ita hatene no mós la hatene. Kuandu Jesus iha rai, nia hatene buat hotu kona-ba futuru ka lae? Lae, tanba nia rasik hatete ho haraik-an: “Kona-ba loron no oras neʼe, ema ida la hatene: anju sira iha lalehan mós la hatene, Oan-Mane mós lae; Aman deʼit mak hatene.” (Mt 24:36) Iha tempu neʼebá, Jesus nuʼudar “Oan-Mane” la hatene bainhira loos mak mundu aat neʼe nia rohan sei toʼo mai. Oinsá ho ita ohin loron? Ita mós la hatene buat hotu kona-ba futuru, loos ka lae? Porezemplu, ita la hatene bainhira loos mak Jeová sei haruka ninia Oan atu halakon mundu aat neʼe. Se ita hatene karik, ita ladún presiza matan-moris. Hanesan Jesus hatete ona, mundu aat nia rohan sei toʼo mai derrepente deʼit, iha oras neʼebé ita la hatene. Tan neʼe, ita presiza duni matan-moris nafatin.—Lee Mateus 24:43.
5, 6. (a) Oinsá mak hatene kona-ba Maromak nia Ukun ajuda ita atu matan-moris? (b) Tanbasá mak buat neʼebé ita hatene kona-ba Satanás book ita atu matan-moris?
5 Jesus hatene duni buat barak neʼebé kapás kona-ba futuru, neʼebé ema seluk la hatene. Maski ita-nia koñesimentu la barak hanesan Jesus, maibé liuhusi nia, ita hatene buat barak kona-ba Maromak nia Reinu, ka ukun, no mós saida deʼit mak ukun neʼe sei halo iha futuru. Ema barak neʼebé haleʼu ita, hanesan iha eskola, iha serbisu-fatin, ka iha haklaken-fatin, sira moris hanesan iha nakukun laran tanba la hatene kona-ba lia-loos. Ida-neʼe mak razaun ida tan atu matan-moris. Tan neʼe hanesan Jesus, ita presiza buka oportunidade atu fó-hatene ba ema seluk kona-ba Maromak nia Ukun. Ita lakohi lakon oportunidade ida, tanba ida-neʼe envolve ema nia moris!—1 Tim 4:16.
6 Jesus mós hatene buat seluk tan neʼebé book nia atu matan-moris. Jesus hatene katak Satanás hakaʼas an atu intenta nia, fó-terus nia, no halakon ninia laran-metin. Diabu sempre matan-moris atu buka “tempu diʼak seluk” atu babeur Jesus. (Lc 4:13) Maibé Jesus nunka husik Diabu halo nia monu. Jesus sempre prontu atu tahan hasoru tentasaun no terus. Ita mós presiza halo hanesan Jesus, loos ka lae? Ita hatene katak Satanás nafatin “buka atu han ema ruma” hanesan leaun ida. Tan neʼe, Bíblia hatete ba ema kristaun hotu atu “matan-moris”. (1 Ped 5:8) Maibé, oinsá mak ita bele halo nuneʼe?
MATAN-MORIS HODI HALO ORASAUN
7, 8. Jesus fó konsellu saida kona-ba orasaun? Ezemplu saida mak nia fó mai ita?
7 Bíblia hatudu ho klaru katak atu ita bele matan-moris, ita presiza halo orasaun. (Kol 4:2; 1 Ped 4:7) Kuandu Jesus dehan ba ninia dixípulu sira atu matan-moris hamutuk ho nia, Jesus hatete: “Matan-moris no harohan bá atu imi keta monu ba babeur.” (Mt 26:41) Neʼe katak iha situasaun susar deʼit mak ita presiza halo tuir Jesus nia konsellu neʼe ka lae? Lae, ita presiza halo tuir ninia konsellu neʼe iha ita-nia moris loron-loron.
8 Jesus mós hatudu ezemplu diʼak kona-ba orasaun. Karik ita hanoin-hetan tempu neʼebé Jesus halo orasaun ba ninia Aman iha kalan tomak. Hanoin toʼok kona-ba neʼe. (Lee Lucas 6:12, 13.) Iha tempu neʼebá la malirin ona, karik Jesus besik Kafarnaum, sidade neʼebé nia haklaken beibeik. Jesus saʼe ba foho ida, iha fatin neʼebé nia bele hateke tun ba Tasi Galileia. Iha oras neʼebá atu besik kalan, karik nia haree ahi-oan barak lakan iha kraik iha Kafarnaum no mós iha aldeia seluk. Maski nuneʼe, Jesus koʼalia nafatin ba Jeová ho ninia neon tomak. Tempu liu daudaun. Nia ladún haree katak neineik-neineik sidade Kafarnaum sai nakukun tanba ema taka ahi-oan. Fulan saʼe ba lalehan depois komesa tun fali. Maski Jesus rona lian husi animál sira neʼebé book an iha ai-laran, maibé nia ho laran tomak halo orasaun nafatin kona-ba desizaun importante neʼebé nia atu halo, neʼe mak atu hili apóstolu naʼin-12. Jesus fó sai buat hotu neʼebé iha ninia laran kona-ba ninia dixípulu sira ida-idak no husu ninia Aman atu fó matadalan no matenek ba nia.
9. Ita aprende saida deʼit husi Jesus nia ezemplu kona-ba halo orasaun kalan tomak?
9 Ita aprende saida deʼit husi Jesus nia ezemplu kona-ba halo orasaun kalan tomak? Neʼe katak ita mós tenke halo orasaun ba tempu naruk ka lae? Lae, tanba Jesus hatete kona-ba ninia dixípulu sira: “Espíritu hakarak maibé isin kbiit-laek.” (Mt 26:41) Maibé, husi Jesus nia ezemplu, ita aprende katak antes atu halo desizaun ruma neʼebé kona ita rasik, ita-nia família, ka ita-nia maluk iha dalan espirituál, ita presiza halo orasaun uluk ba ita-nia Aman iha lalehan. Ita mós presiza halo orasaun kona-ba ita-nia irmaun-irmán sira. Ita mós aprende katak ita presiza koʼalia husi ita-nia laran duké repete beibeik liafuan neʼebé ita toman ona atu uza. Hanoin-hetan katak Jesus hafolin tebes tempu neʼebé nia koʼalia mesak ho ninia Aman. Tanba ita sempre iha buat barak atu halo, fasil ba ita atu haluha buat neʼebé importante liu. Maibé, se ita fó tempu atu halo orasaun mesak, ida-neʼe sei ajuda ita atu matan-moris liután. (Mt 6:6, 7) Sin, halo orasaun ajuda ita atu hakbesik liután ba Jeová hodi hametin ita-nia relasaun ho nia no hadook an husi hahalok naran deʼit neʼebé bele estraga ita-nia relasaun ho Jeová.—Sal 25:14.
MATAN-MORIS HODI HAKLAKEN
10. Jesus hatudu ezemplu saida kona-ba buka oportunidade atu haklaken?
10 Jesus matan-moris hodi halaʼo serbisu neʼebé Jeová fó ba nia. Iha serbisu balu, se ema ladún tau atensaun ba buat neʼebé sira halo hodi husik sira-nia neon halai bá-mai, karik ida-neʼe ladún lori rezultadu aat. Maibé iha serbisu seluk, ema tenke kuidadu no matan-moris. Hanesan neʼe mós ho serbisu haklaken. Jesus matan-moris nafatin iha ninia serbisu hodi buka oportunidade atu fahe lia-foun diʼak. Porezemplu, loron ida, nia ho ninia dixípulu sira laʼo rai ba oras barak no ikusmai toʼo sidade naran Sikar. Kuandu dixípulu sira bá hola ai-han, Jesus tuur besik bee-matan iha sidade neʼe atu deskansa, maibé nia matan-moris nafatin hodi buka oportunidade atu haklaken. Iha tempu neʼebá, feto samaritana ida mai atu kuru bee. Maski Jesus bele toba uitoan ka bele fó razaun oioin atu la koʼalia ho nia, maibé duké halo nuneʼe, nia komesa koʼalia ho feto neʼe, no hodi fó sasin ho didiʼak, ikusmai ema barak iha sidade neʼe mós fiar Jesus. (Joao 4:4-26, 39-42) Ita mós bele matan-moris hanesan Jesus, karik hodi buka didiʼak oportunidade atu fahe lia-foun diʼak ba ema neʼebé ita hasoru iha ita-nia moris loron-loron.
11, 12. (a) Kuandu ema hanetik Jesus atu halo ninia serbisu, saida mak nia halo? (b) Oinsá mak Jesus hatudu katak nia tetu didiʼak atividade sira?
11 Dala ruma, ema balu hanetik Jesus atu halo ninia serbisu maski sira la hanoin atu halo ida-neʼe. Porezemplu, kuandu Jesus halo milagre oioin hodi fó isin-diʼak ba ema iha sidade Kafarnaum, ema barak hakarak Jesus atu hela ho sira. Maski ita komprende sira-nia hanoin, maibé Jesus nia serbisu mak haklaken ba “bibi sira neʼebé lakon husi umakain Israel nian”, laʼós atu ajuda ema iha sidade ida deʼit. (Mt 15:24) Tan neʼe, Jesus hatete ba sira: “Haʼu sei haklaken mós lia-foun diʼak Maromak nia reinu nian ba rai seluseluk; tan neʼe mak haʼu mai.” (Lc 4:40-44) Ida-neʼe hatudu katak Jesus tau uluk serbisu haklaken iha ninia moris, no nia la husik buat ida atu hanetik nia hodi halo serbisu neʼe.
12 Se nuneʼe, Jesus hanoin deʼit kona-ba ninia serbisu no hadook an husi atividade hotu neʼebé lori haksolok ka lae? Nia hanoin deʼit kona-ba haklaken no la hanoin kona-ba ema seluk nia presiza ka lae? Lae, Jesus fó ezemplu neʼebé perfeitu kona-ba tetu didiʼak atividade hotu. Jesus moris kontente hodi haksolok hamutuk ho ninia kolega sira. Nia mós hafolin família sira, nia komprende kona-ba sira-nia presiza no problema sira, no nia mós hatudu domin ba labarik sira.—Lee Marcos 10:13-16.
13. Oinsá mak ita bele halo tuir Jesus nia ezemplu kona-ba tetu didiʼak ita-nia atividade sira?
13 Oinsá mak ita bele halo tuir Jesus nia ezemplu kona-ba tetu didiʼak ita-nia atividade sira? Hodi la husik mundu neʼe hanetik ita atu halo serbisu haklaken. Dala ruma, karik ita-nia kolega sira ka família hatete mai ita atu hamenus ita-nia serbisu haklaken ka atu buka moris baibain hanesan ema seluk. Maibé, se ita halo tuir Jesus nia ezemplu, ita sei haree ita-nia serbisu haklaken nuʼudar buat neʼebé importante mai ita hanesan ai-han. (Joao 4:34) Hodi halaʼo serbisu haklaken, ida-neʼe hametin ita-nia relasaun ho Jeová no lori haksolok mai ita. Maski nuneʼe, ita mós lakohi atu sai ema neʼebé sériu demais, ka hatudu katak ita mak ema neʼebé loos liu. Hanesan Jesus, ita hakarak tetu didiʼak ita-nia atividade sira, hodi haksolok atu serbí ita-nia “Maromak neʼebé kontente”.—1 Tim 1:11, MF.
MATAN-MORIS IHA TEMPU SUSAR
14. Kuandu ita hasoru susar ruma, ita presiza hanoin-hetan kona-ba saida? Tanbasá?
14 Hanesan ita haree ona, kuandu Jesus iha terus laran, nia husu ninia dixípulu sira atu matan-moris nafatin. (Lee Marcos 14:37.) Importante duni atu ita halo tuir Jesus nia ezemplu iha tempu susar. Baibain, kuandu ema hasoru susar ruma, sira barak haluha lia-loos importante neʼebé temi dala rua iha livru Provérbios, neʼebé dehan: “Iha dalan neʼebé loos iha ema nia haree, maibé dalan neʼe nia rohan mak lori ba mate.” (Prov 14:12; 16:25) Se ita sadere ba ita-nia matenek rasik, liuliu kuandu ita hasoru problema boot ruma, ida-neʼe bele lori perigu ba ita rasik no mós ba sira neʼebé ita hadomi.
15. Dala ruma, kuandu susar ba família nia ulun atu buka moris, karik nia hanoin katak nia bele halo saida?
15 Porezemplu, dala ruma susar ba família nia ulun atu buka moris. (1 Tim 5:8) Tan neʼe, karik nia hanoin diʼak liu atu halo serbisu naran deʼit, maski serbisu neʼe halo nia falta beibeik reuniaun ka hanetik nia atu la halaʼo adorasaun nuʼudar família ka la bá haklaken. Se nia sadere deʼit ba ninia hanoin rasik, ida-neʼe bele halo nia hanoin katak nia iha razaun loos atu halo serbisu neʼe. Maibé, hanoin hanesan neʼe ikusmai bele halo nia sai moras iha dalan espirituál ka bele halakon ninia relasaun diʼak ho Jeová. Tan neʼe, diʼak liu atu halo tuir konsellu iha Provérbios 3:5, 6. Salomão dehan: “Tau fiar ba Jeová ho ó-nia laran tomak no labele sadere ba ó-nia matenek rasik. Iha ó-nia dalan hotu fó atensaun ba nia, no nia rasik sei halo ó-nia dalan sai loos.”
16. (a) Jesus fó ezemplu diʼak saida kona-ba tau fiar ba Jeová nia matenek? (b) Iha tempu susar, oinsá mak família nia ulun barak halo tuir Jesus nia ezemplu?
16 Kuandu Jesus hasoru susar, nia lakohi sadere ba ninia matenek rasik. Hanoin toʼok! Maski Jesus matenek liu ema hotu neʼebé moris iha mundu, maibé nia la sadere ba ninia matenek rasik atu rezolve problema neʼebé nia hasoru. Porezemplu, kuandu Satanás babeur Jesus, Jesus hatán beibeik ho liafuan: “Hakerek nanis ona.” (Lc 4:4, 8, 10) Jesus tau fiar ba ninia Aman nia matenek atu hasoru tentasaun hodi hatudu hahalok haraik-an neʼebé Satanás la iha no odi. Ita halo tuir Jesus nia ezemplu ka lae? Família nia ulun neʼebé matan-moris hanesan Jesus, nia husik Maromak nia Liafuan atu hatudu dalan ba nia, liuliu iha tempu susar. Iha mundu tomak, família nia ulun rihun ba rihun halo ida-neʼe. Sira tau uluk Maromak nia hakarak iha sira-nia moris no halaʼo adorasaun ba Nia duké buka uluk rikusoin. Hodi halo nuneʼe, sira tau matan ba sira-nia família iha dalan neʼebé diʼak liu, no Jeová ajuda sira neʼebé hakaʼas an atu tau matan ba família nia presiza, hanesan nia promete iha ninia Liafuan.—Mt 6:33.
17. Saida mak book ita atu matan-moris hanesan Jesus?
17 Klaru katak Jesus fó ezemplu neʼebé diʼak liu hotu kona-ba matan-moris. Ninia ezemplu ajuda ita no bele salva ita. Hanoin-hetan, Satanás hakaʼas an atu halo ita toba-dukur iha dalan espirituál, hodi halo ita-nia fiar sai fraku, la badinas atu halaʼo adorasaun ba Jeová no ladún hatudu laran-metin ba Jeová. (1 Tes 5:6) Keta husik Satanás manán! Mai ita matan-moris nafatin hanesan Jesus, hodi halo orasaun, bá haklaken, no kuandu ita hasoru susar. Hodi halo nuneʼe, ita sei moris haksolok maski ita moris iha mundu aat neʼe nia rohan. Liután neʼe, se ita matan-moris nafatin, bainhira Jesus mai atu halakon mundu aat neʼe, nia sei haree ita serbí Jeová ho badinas. Sin, Jeová sei haksolok atu haraik bensaun mai ita ba ita-nia laran-metin!—Apok 16:15.
[Pergunta estudu nian]
[Dezeñu iha pájina 6]
Jesus haklaken ba feto ida besik bee-matan. Oportunidade saida deʼit mak ita iha atu haklaken?
[Dezeñu iha pájina 7]
Tau matan ba ita-nia família nia presiza iha dalan espirituál hatudu katak ita matan-moris
