Vikʼiluk me jsatik jech kʼuchaʼal la spas Jesuse

«Jaʼ lec julovanic, cʼopanic Dios.» (MAT. 26:41)

¿KʼUSI CHATAKʼ?

¿Kʼuxi chkakʼtik ta ilel ti vikʼil noʼox jsatik kʼalal ta jpastik orasione?

¿Kʼuxitik xuʼ xkakʼtik ta ilel ti vikʼil noʼox jsatik ta sventa li cholmantale?

¿Kʼu yuʼun toj tsots skʼoplal skʼan lekuk vikʼil jsatik kʼalal chkiltik prevaetike, xchiʼuk kʼuxi xuʼ xkutik?

1, 2. 1) ¿Kʼusitik xuʼ jakʼbe jbatik ta sventa ti vikʼil noʼox sat li Jesuse? 2) Li jmulavil krixchanoutike, ¿mi oy van kʼusi xuʼ jchantik ta stojolal Jesús ti jaʼ tukʼil vinike? Albo junuk skʼelobil.

XUʼ VAN xijakʼbe jbatike: «¿Mi xuʼ van vikʼil-o jsat jech kʼuchaʼal la spas li Jesuse?». Pe xuʼ van xkaltik: «Jaʼ tukʼil krixchano li stuke, xchiʼuk ti bakʼintike snaʼoj lek kʼusi xuʼ chkʼot ta pasel ta jelavel. ¡Akʼo mi skʼan to jaymiluk jabil xkʼot ta pasel! Jaʼ yuʼun chaʼa, ¿mi persa van skʼan lek vikʼiluk-o sat li Jesuse?» (Mat. 24:37-39; Heb. 4:15). Mi laj xaʼox jtabetik stakʼobiltak taje chkaʼibetik smelolal ti toj tsots skʼoplal xchiʼuk ti ta ora xa noʼox skʼan vikʼiluk jsatike.

² Li jmulavil krixchanoutike, ¿mi oy van kʼusi xuʼ jchantik ta stojolal li jun tukʼil vinike? Oy, yuʼun oy kʼusi xuʼ jchantik ta stojolal li jun lekil jchanubtasvaneje. Sventa chkaʼibetik smelolale, jnoptik ti oy jun vinik ti chchan spikel stʼilesubil flechae. Ta slikebale, xuʼ van mu xkʼot yuʼun li ta mero oʼlol bu satioje, pe ta xchanilan-o skʼob. Sventa chchan leke, tskʼel lek kʼuyelan tspas li buchʼu chchanubtasate, ti chanem lek ta stʼilesel flechae. Ta skʼel ti kʼuyelan chvaʼie, ti kʼuyelan chakʼ li skʼobe xchiʼuk ti kʼuyelan tstsakbe li yakʼile. Ta kʼunkʼun tspas yuʼun ti lek xa tʼimil yakʼil li s-arkoe, jech xtok tstsak ta venta ti kʼuxi chbat li ikʼe o yan kʼusitik. Ti jech xa tspas kʼuchaʼal li yajchanubtasvaneje, jaʼ to chile jujutiʼ xa mu chkʼot yuʼun ta oʼlol ti bu chakʼ batele. Li yajtsʼaklomutik Cristo avi eke skʼan me xkakʼbetik yipal sventa masuk lek jujun kʼakʼal ti kʼuyelan ta jchʼunbetik smantaltak li Jesuse xchiʼuk ti jchanbetik li slekil talelale.

3. 1) ¿Kʼusi laj yal Jesús ta sventa ti tsots skʼoplal skʼan vikʼiluk sate? 2) ¿Kʼusi ta jchantik li ta xchanobil liʼe?

³ ¿Mi ta melel van skʼan vikʼil sat li Jesuse? Jech. Jech kʼuchaʼal liʼe, kʼalal jun xaʼox akʼobal skʼan xlaj li Jesuse, xi laj yalbe li tukʼil yajtakboltake: «Coʼol me viqʼuiluc jsatic». Xi to laj yal xtoke: «Jaʼ lec julovanic, cʼopanic Dios, yuʼun jech mu xalajic ta sujel ta mulil» (Mat. 26:38, 41).  Melel onoʼox ti vikʼil sat echʼ ta Balumil li Jesuse. Pe mas to tsots skʼoplal laj yaʼi ti vikʼiluk sat kʼalal jun chib xaʼox ora skʼan xchame xchiʼuk ti nopoluk oy ta stojolal li Stot ta vinajele. Snaʼoj ti skʼan jech vikʼiluk sat li yajtakboltak eke, maʼuk noʼox li vaʼ ora taje, moʼoj yuʼun skʼan jech spasik li ta mas tsʼakale. Jaʼ yuʼun, kalbetik batel mas smelolal ti kʼu yuʼun tskʼan vikʼiluk jsatik li Jesuse. Mi laje ta jkʼeltik oxtos kʼuxitik xuʼ xkakʼ ta jkuxlejaltik.

KʼU YUʼUN TSKʼAN VIKʼILUK JSATIK LI JESUSE

4. Ta skoj ti mu jnaʼtik li kʼusi chtal ta tsʼakale, ¿kʼu yuʼun skʼan vikʼiluk-o jsatik?

⁴ Oy chib srasonal ti kʼu yuʼun tskʼan Jesús ti vikʼiluk jsatike. Li baʼyele, jaʼ ti mu jnaʼtik kʼusi chkʼot ta pasel li ta tsʼakale. Kʼalal liʼ toʼox oy ta Balumil li Jesuse, ¿mi snaʼoj xa onoʼox li kʼusi chtal ta jelavele? Muʼyuk, yuʼun xi laj yale: «Li cʼusi ora chcʼot yoraile muʼyuc bochʼo snaʼ, me jaʼuc li jʼalmantaletic ta vinajele, me jaʼuc vuʼun li Nichʼonilune. Jaʼ noʼox snaʼ stuc li Totile» (Mat. 24:36). Li vaʼ kʼakʼal taje, li Jesuse, li Nichʼonile, mu toʼox snaʼ lek kʼusi ora chtal slajeb li chopol balumil liʼe. ¿Mi jnaʼojtik li voʼotike? ¿Mi mu oyuk spajeb li kʼusitik jnaʼtik ta sventa li kʼusi chtal ta tsʼakal eke? Jech. Mu jnaʼtik kʼusi ora tstak talel Xnichʼon Jeova sventa chtal yakʼbe slajeb li kʼusitik oy ta balumile. Ti jnaʼtikuke, ¿mi persa to van skʼan vikʼiluk jsatik? Jech kʼuchaʼal laj yal li Jesuse, muʼyuk albil yorail chtal li slajebal kʼakʼale, jaʼ yuʼun tsots skʼoplal skʼan vikʼiluk-o jsatik (kʼelo Mateo 24:43).

5, 6. 1) Ta skoj ti jnaʼojtik li kʼusi chtal ta tsʼakale xchiʼuk li kʼusi tskʼan tspas Diose, ¿kʼu yuʼun skʼan vikʼiluk jsatik? 2) Ta skoj ti jnaʼojtik li kʼusi tskʼan Satanase, ¿kʼu yuʼun mas xa toj tsots skʼoplal ti vikʼiluk jsatike?

⁵ Li yan srasonal xtok ti kʼu yuʼun tskʼan vikʼil jsatik li Jesuse, jaʼ ti ep kʼusitik jnaʼtik ta sventa li kʼusi chkʼot ta pasel ta tsʼakale. Kʼalal ay toʼox ta Balumil li Jesuse ep kʼusitik snaʼoj ta sventa li kʼusi chtal ta tsʼakale, pe jaʼuk li epal krixchanoetike mu toʼox snaʼik li kʼusitik melel taje. Li kʼusitik snaʼoj chkʼot ta pasel li Jesuse mu xuʼ jkoʼoltastik li ta kʼusitik jnaʼtike, yuʼun koliyal li stuke ep kʼusitik jnaʼtik ta sventa li Ajvalilal yuʼun Diose xchiʼuk li kʼusi tspas ta jelavele. Kʼalal chkiltik krixchanoetik ta jpat jxokontik, ta chanobvun, ta abtelal o jaʼo kʼalal ta jcholtik mantale, ¿mi mu jechuk ti oy epal krixchanoetik ti mu snaʼik ta sventa li kʼusitik labalik sba taje? Taje jaʼ yan srasonal xtok ti skʼan vikʼiluk jsatik jech kʼuchaʼal la spas li Jesuse, ti jsabetik yorail sventa xkalbetik krixchanoetik ta sventa li Ajvalilal yuʼun Diose. Kʼalal jech ta jpastike, toj echʼ noʼox me sbalil, yuʼun xuʼ sta skolebalik epal krixchanoetik o xuʼ xlajik, jaʼ yuʼun skʼan jcholilantik mantal (1 Tim. 4:16).

⁶ Yan ti kʼusi tijbat-o yoʼonton Jesús sventa vikʼil-o sate, jaʼ ti snaʼoj ti ta sjunul yoʼonton tskʼan Satanás ti mu tukʼuk xakʼ sba ta stojolal Jeovae, jaʼ yuʼun laj yakʼ ta preva o laj yakʼ ti akʼo xichʼ kontrainele. Li yajkontra ti muʼyuk xkʼuxul yoʼonton taje persa onoʼox vikʼil sat sventa «[t]smala cʼusi ora xuʼ ta sqʼuelbe yoʼnton yan velta» li Jesuse (Luc. 4:13). Pe li Jesuse vikʼil-o lek sat. Lek chapal-o sventa xkuch yuʼun kʼusiuk prevail o kontrainel. ¿Mi mu xuʼuk jech chkʼot ta jtojolaltik ek? Xuʼ. Yuʼun li Satanase «xjoyet noʼox jech chac cʼu chaʼal león ti xʼavet noʼox ta saʼel li bochʼo tscʼan tstiʼe». Jaʼ yuʼun xi chalbutik li Skʼop Diose: «Bijanic me, viqʼuiluc me asatic» (1 Ped. 5:8). ¿Kʼusi van xuʼ jpastik?

TI KʼUXI XUʼ VIKʼILUK JSATIK LI TA ORASIONE

7, 8. ¿Kʼusi mantal laj yal Jesús ta sventa li orasione, xchiʼuk kʼusi xuʼ jchantik ta sventa li orasion la spase?

⁷ Li ta Vivliae chalbutik ti tsots skʼoplal skʼan jpastik orasion mi ta jkʼantik vikʼiluk jsatik ta mantale (Col. 4:2; 1 Ped. 4:7). Kʼalal laj xaʼox yalbe yajtsʼaklomtak Jesús ti koʼoluk vikʼiluk satike, xi laj yalanbee: «Jaʼ lec julovanic, cʼopanic Dios, yuʼun jech mu xalajic ta  sujel ta mulil» (Mat. 26:41). ¿Mi jaʼ noʼox van tspasik orasion ta skoj ti tsots chil svokolike? Moʼoj. Li mantal taje skʼan jech xkakʼ ta jkuxlejaltik jujun kʼakʼal.

⁸ Li Jesuse jaʼ jun slekil kʼelobil kuʼuntik ta sventa ti kʼuyelan la spas orasione. Xuʼ van xvul ta joltik ti jun veltae sjunul akʼobal la skʼopon li Stote. Jnoptik noʼox avaʼi ti kʼuyelan kʼot ta pasele (kʼelo Lucas 6:12, 13). Jaʼ xa primavera. Li Jesuse te nopol oy ta jteklum Capernaum. Kʼalal ch-och xaʼox akʼobale, li Jesuse muy batel ta jun vits ti te nopol ta nab Galileae. Kʼalal tskʼel batel li osiltik ti kʼunkʼun ch-ikʼub batele, yikʼaluk van chil ti xvikʼvun yuni kasik li ta Capernaume xchiʼuk li ta yantik lumetik ti te nopajtike. Kʼalal tskʼopon li Jeovae, jaʼ bat ta yoʼonton spasel li orasione. Ch-echʼ li minutoetike, li oraetike. Li stuke mu xakʼ venta ti kʼunkʼun xa chtub batel li uni kasetik kʼalal yakal xa chtoy muyel li Ue. Jaʼo kʼalal xchajlajet xa chlokʼ saʼ sveʼelik li chonbolometike. Li s-orasione jaʼ ta sventa ti oy kʼusi tsots skʼoplal tsnop tspase: ti jaʼ sventa tstʼuj li lajchaʼvoʼ yajtakboltake. Jnoptik noʼox ti yakal chalbe Stot skotol li kʼusi tsnop xchiʼuk li kʼusi chat-o yoʼonton ta sventa li jujuntal yajtsʼaklomtake, jech xtok chalbe ti akʼo xbeiltasat xchiʼuk ti x-akʼbat spʼijile.

9. ¿Kʼusi chakʼ jchantik ti sjunul akʼobal la spas orasion li Jesuse?

⁹ ¿Mi jaʼ van chchanubtasutik ti skʼan jal tajek jpastik orasion li Jesuse? Moʼoj. Li Jesuse oy kʼusi laj yakʼ venta ta stojolal li yajtsʼaklomtake, jaʼ yuʼun xi laj yale: «Ta melel li avoʼntonique tscʼan tscʼopan Dios, pero li abecʼtalique muʼyuc stsatsal» (Mat. 26:41). Akʼo mi jech, xuʼ jchanbetik li Jesuse. Jech kʼuchaʼal liʼe, mi ta van xkalbetik baʼyel Jtotik ta vinajel kʼalal oy kʼusi tsots skʼoplal ta jpastike o ti xuʼ te tsakal skʼoplal li kutsʼ kalaltike xchiʼuk li kermanotaktike? Kʼalal ta jpastik orasione, ¿mi chkalbetik li kʼusi ta jvul-o koʼontontik ta stojolal li kermanotaktike? ¿Mi ta sjunul koʼonton ta jpastik o mi jaʼ ta jchaʼalilantik li kʼusi komem xa onoʼox ta joltike? Jech kʼuchaʼal chkiltike toj ep sbalil laj yil Jesús ti lek chchiʼin ta loʼil stuk li Stote. Li avi kʼakʼal kuxulutike toj kʼun ti jaʼuk jech jpastik li kʼusi nopem xaʼiik spasel yantike xchiʼuk ti jchʼay ta joltik li kʼusi mas tsots skʼoplale. Mas me lek vikʼil jsatik ta mantal mi jaʼ mas ta jchʼakbetik yorail sventa jpastik li orasion ta jtuktik xchiʼuk mi ta koʼontontik chlokʼe (Mat. 6:6, 7). Mas nopol chkaʼi jbatik ta stojolal Jeova, yuʼun oy ta koʼontontik ti mas lek xkil jbatik xchiʼuke, xchiʼuk ti mu xkakʼtik ti oy buchʼu o kʼusi xuʼ sokese (Sal. 25:14).

TI KʼUXI XUʼ VIKʼILUK JSATIK TA SVENTA LI CHOLMANTALE

10. ¿Kʼuxi laj yakʼ ta ilel Jesús ti lek vikʼil sat ta sventa li cholmantale?

¹⁰ Li Jesuse lek vikʼil sat ta sventa li abtelal akʼbat yuʼun Jeovae. Melel onoʼox ti oy abtelaletik ti mu persauk te oy tajek li jnopbentike, pe oy epal abtelaletik ti skʼan teuk li jnopbentike xchiʼuk ti skʼan lek jtsʼetanbetik xchikinale. Li cholmantale jaʼ me jun abtelal ti skʼan jech jpastike. Li Jesuse laj yal lekil aʼyej kʼalal jaʼo sta-o chile. Jun veltae kʼotik ta lum Sicar xchiʼuk li yajtsʼaklomtake, taje jal xaʼox xanavemik tal. Li yajtsʼaklomtake bat smanik tal veʼlil, li stuke kom sventa chkux yoʼonton te nopol ta jun poso li ta jteklum taje. Pe li Jesuse lik xcholbe mantal jun jsamaria ants ti bat slokʼes voʼ li ta posoe. Xuʼ van la snop ti jaʼ lek ti xvay uni jlikeluke o ti saʼ kʼusi spak-o skʼoplal sventa mu xchiʼin ta loʼil li antse, pe li Jesuse mu jechuk la spas. Lik xchiʼin ta loʼil xchiʼuk laj skolta epal krixchanoetik li ta jteklum taje (Juan 4:4-26, 39-42). Li Jesuse la xchol mantal ta buyuk noʼox, li voʼotik eke xuʼ jchanbetik kʼalal ta jcholbetik mantal krixchanoetik ta buyuk noʼox jtatike.

11, 12. 1) ¿Kʼusi laj yalbe Jesús li buchʼutik la smakik ox ta be sventa mu spas li yabtele? 2) ¿Kʼuxi laj yakʼ ta ilel Jesús ti oy noʼox smelolal la spas li yabtele?

¹¹ Li Jesuse la snuptan makel ta be ta  stojolal krixchanoetik sventa mu spas li yabtele, akʼo mi mu ta xchopolal yoʼonton la spasik. Kalbetik skʼoplal li kʼusi la spasik li jnaklejetik ta Capernaume. Kʼalal laj yilik ti la spas skʼelobiltak juʼelal li Jesuse, solel xmuyubajik noʼox, jaʼ yuʼun laj yalbeik ti mu xbate. Oy srasonal ti jech la spasike. Pe li yabtel Jesuse jaʼ ti chcholbe mantal skotol «li smomnichʼnab Israele yuʼun chʼayemic ta be jech chac cʼu chaʼal chijetic», yuʼun maʼuk noʼox ta jun jteklum ta xchol mantal (Mat. 15:24). Xi laj yalanbee: «Ta persa chibat ta yantic lumetic, yuʼun chbat jcholbe yaʼyic li Lequil Aʼyej ta sventa ventainel yuʼun Diose. Yuʼun jaʼ ta sventa ti tacbilun tale» (Luc. 4:40-44). Lek jamal xvinaj ti jaʼ laj yakʼ ta yoʼonton li cholmantale xchiʼuk muʼyuk laj yakʼ ti oyuk kʼusi o buchʼu xjelbat li kʼusi snopoj tspas li Jesuse.

¹² ¿Mi melel ti la smil sba ta yichʼel ta mukʼ Dios ti jaʼ la spʼaj skotol li kʼusitik xuʼ skʼupin liʼ ta Balumile? ¿Mi jaʼ van bat ta yoʼonton li cholmantale ti jaʼ xa muʼyuk laj yakʼ ta yoʼonton li kʼusi chtun yuʼun li krixchanoetike? Moʼoj. Li Jesuse oy noʼox smelolal ti kʼuyelan la spas li yabtele, taje lek me xuʼ jchanbetik. La skʼupin li kuxlejale xchiʼuk la xchʼak skʼakʼal sventa li yamigotake. Li stuke la xkʼuxubin li utsʼ alaliletike, yuʼun laj yakʼ ta yoʼonton li kʼusi chtun yuʼunike xchiʼuk li svokolike, jech xtok laj yakʼ ta ilel ti skʼanoj li ololetike (kʼelo Marcos 10:13-16).

13. ¿Kʼuxi xuʼ jchanbetik stalelal Jesús ti lek vikʼil sat xchiʼuk ti oy noʼox smelolal la xchol batel li aʼyej ta sventa Ajvalilal yuʼun Diose?

¹³ ¿Kʼuxi xuʼ jchanbetik Jesús ti lek vikʼil sate xchiʼuk ti ta smelol noʼox la spas li yabtele? Mu xkakʼtik ti akʼo xchʼay koʼontontik li kʼusitik oy ta balumil sventa jpastik li kabteltike, akʼo mi jaʼ kamigotik, kutsʼ kalaltik ti chalbutik ti akʼo mu toj masuk tajek xbat ta koʼontontik li cholmantale xchiʼuk ti jkʼupintik ta alel li kuxlejale. Jech kʼuchaʼal laj yil li Jesuse, skʼan xkoʼolaj kʼuchaʼal veʼlil chkiltik li cholmantal eke, yuʼun jaʼ chakʼ kipaltik xchiʼuk xijmuyubaj noʼox yuʼun (Juan 4:34). Pe ta yan xtoke, muʼyuk ta jmil jbatik ta spasbel yabtel Dios xchiʼuk ti toj tukʼ xa chkaʼi jbatike. Jech ta jpastik kʼuchaʼal li Jchanubtasvanej kuʼuntik ti oy noʼox smelolal xchiʼuk ti xmuyubaj noʼox la spase, yuʼun ta jkʼantik chijtun ta stojolal li «Dios ti echʼem slequile», jaʼ xkaltik, ti xmuyubaj noʼoxe (1 Tim. 1:11).

TI KʼUXI XUʼ VIKʼILUK JSATIK TA SVENTA LI PREVAETIKE

14. ¿Kʼusi skʼan mu xchʼay ta joltik kʼalal jaʼo tsots chkil jvokoltike, xchiʼuk kʼu yuʼun?

¹⁴ Jech kʼuchaʼal laj xa kiltike, jlom li pʼijubtaseletik laj yakʼbe li yajtsʼaklomtake jaʼ ti vikʼiluk satik kʼalal yakal chil ep svokol li Jesuse (kʼelo Marcos 14:37). Kʼalal tsots chkil jvokoltike, jaʼo me skʼan jvules ta joltik li pʼijubtasel laj yakʼ Jesuse. Ep buchʼutik chchʼay ta sjolik li kʼusi toj tsots skʼoplal taje, yuʼun li slivroal Proverbiose chib to velta xi chale: «Oy beetic ti toj tucʼ yilele, pero jaʼ sbelal lajebal» (Pro. 14:12; 16:25). Mi jaʼ noʼox ta jpat koʼontontik ta jpʼijil jtuktik kʼalal tsots chkil jvokoltike, xuʼ me xkil mas jvokoltik xchiʼuk chkakʼbetik svokol li kutsʼ kalaltike.

15. Kʼalal jaʼo oy vokolile, ¿kʼusi van xuʼ spas li jun jolil ta utsʼ alalile?

 ¹⁵ Li jun jolil ta utsʼ alalile xuʼ van tsots chaʼi ta yakʼbel kʼusi chtun yuʼun li «yutsʼ yalaltaque» (1 Tim. 5:8). Ta skoj taje, xuʼ van tskʼan chchʼam junuk abtelal ti oy xa bakʼintik mu xa xakʼ yorail xbat ta tsobajeletik, ti mu xa xetʼes li yichʼel ta mukʼ Jeova ta yutsʼ yalale o ti mu xa xlokʼ ta cholmantale. Xuʼ van tsnop ti oy lek srasonal li kʼusi tspase, ti toj leke, pe xuʼ x-ipaj-o yuʼun o x-cham-o ta mantal. Mas to lek mi jaʼ la jchʼuntik li tojobtasel laj yakʼ Salomón ta Proverbios 3:5, 6, ti xi chale: «Jaʼ noʼox pato avoʼnton ta stojol li Mucʼul Diose; mu me jaʼuc xapat avoʼnton yuʼun li abijil atuque. Acʼo sventain Mucʼul Dios scotol li cʼusi chapase, yuʼun jaʼ xuʼ chayicʼot batel ta tuqʼuil be».

16. 1) Li Jesuse la spat yoʼonton ta spʼijil li Jeovae, ¿kʼusi xuʼ jchantik ta sventa taje? 2) ¿Kʼuxi chchanbeik Jesús li joliletik ta utsʼ alalil kʼalal tspat yoʼontonik ta stojolal Jeova kʼalal tsots chil svokolike?

¹⁶ Kʼalal tsots laj yil svokol li Jesuse, mi jsetʼuk la spat yoʼonton ta spʼijil stuk. ¡Nopo noʼox avaʼi! Li vinik ti mas pʼij ti kuxi liʼ ta Balumile muʼyuk la spat yoʼonton ta spʼijil stuk kʼalal oy kʼusi la stakʼe. Jech kʼuchaʼal liʼe, kʼalaluk akʼat ta preva yuʼun li Satanase, li Jesuse ep ta velta la stunes li jpʼel kʼop liʼe: «Jech tsʼibabil» (Mat. 4:4, 7, 10). Jaʼ la spat yoʼonton ta spʼijilal Stot sventa stsal yuʼun li prevaetike, taje jech laj yakʼ ta ilel ti bikʼit yakʼoj sbae, li talelal taje solel spʼajoj li Satanase xchiʼuk muʼyuk onoʼox yuʼun mi jsetʼuk. ¿Mi bikʼit chkakʼ jbatik ek? Li joliletik ta utsʼ alalile ta xchanbeik Jesús ti vikʼil noʼox satike xchiʼuk chakʼ sbaik ta beiltasel ta Skʼop Dios, mas to mi tsots chil svokolike. Ta smilal noʼox jech yakal tspasik li ta spʼejel Balumile. Ta sjunul yoʼontonik jaʼ tsaʼik baʼyuk li ventainel yuʼun Diose xchiʼuk li melel yichʼel ta mukʼe, jaʼ tsʼakal to tsaʼik li kʼusitik chtun yuʼunike. Kʼalal jech tspasike, mas me lek xuʼ xchabiik li yutsʼ yalalike. Li Jeova eke ta me xakʼbe bendision li yip chakʼik sventa chakʼbeik kʼusitik chtun yuʼun li yutsʼ yalalike, jech kʼuchaʼal yaloj onoʼox ta Skʼope (Mat. 6:33).

17. ¿Kʼusi tstij avoʼonton ta xchanbel Jesús ti vikʼil noʼox sate?

¹⁷ Mu ta naʼeteluk, li Jesuse lek laj yakʼbutik ta ilel ti lek onoʼox vikʼil sate, taje xuʼ skoltautik sventa jtabetik sbalil xchiʼuk sventa jta jkolebaltik. Jvules ta joltik ti oy ta yoʼonton ti akʼo xijvayutik ta mantal li Satanase, yuʼun jaʼ jech xuʼ xkʼunib li xchʼunel koʼontontike, ti kʼuyelan chkichʼtik ta mukʼ li Jeovae chkʼunib batel xchiʼuk li stukʼil koʼontontik ta stojolale ta sok (1 Tes. 5:6). Mu jpastik li kʼusi tskʼan yoʼontone. Jaʼ yuʼun, vikʼiluk me jsatik jech kʼuchaʼal la spas li Jesuse: ti vikʼiluk jsatik ta sventa orasion, ta cholmantal xchiʼuk kʼalal ta jnuptantik prevaetike. Mi jech ta jpastike ta me jkʼupintik li kuxlejale, chijmuyubaj xchiʼuk jun noʼox koʼontontik li avie, ti oyutik xa ta yorail ti jutuk xa skʼan xlaj li kʼusitik chopol liʼ ta balumile. Vikʼil me jsatik chvul stautik li Kajvaltik mi tal yakʼbe slajeb li kʼusitik liʼe xchiʼuk yakalutik ta spasbel li kʼusi tskʼan Stot xtoke. ¡Solel xmuyubaj Jeova kʼalal mi laj yakʼbutik jmotontik ta skoj li stukʼil koʼontontike! (Apo. 16:15.)

[Sjakʼobiltak sventa xchanobil]

[Lokʼol ta pajina 6]

Li Jesuse la xcholbe mantal jun ants ti ay slup voʼ ta posoe. ¿Kʼusi xuʼ jpastik sventa jcholbetik mantal krixchanoetik ti ta buyuk noʼox jtatike?

[Lokʼol ta pajina 7]

Mi laj avakʼbe li kʼusi chtun yuʼun avutsʼ avalal ta mantale jaʼ sprevail ti lek vikʼil asate