Ño ni raba ja töi mike jondron kwin nuainne konkrekasionte

“Jondron kwin ñaka nuain bä ni kräke akwa ni Dänkien Jesukristo tä nuainne ni kräke, ye tädre mun jökrä töi yebe” (FILI. 4:23, NM).

¿ÑO NI RABA JA TÖI MIKE JONDRON KWIN NUAINNE KONKREKASIONTE...

... ni tädre ja mräkätre kukwebätä yebe ngwane?

... ni tädre kukwe driere ye ngwane?

... ni mada kukwe käme nuaindre gare nie ye ngwane?

1. ¿Ñobätä konkrekasion Filipos aune Tiatira yei kukwe kwin niebare?

NITRE kristiano kirabe konkrekasion Filipos yekwe ngwian ñaka nämene krubäte, akwa ja mräkätre tarebare kwetre aune ja töi mikani mantiame kräke kwetre yebiti kukwe kwin bämikani kwe ni kräke (Fili. 1:3-5, 9; 4:15, 16). Ye medenbätä, apóstol Pablo tärä tikani ja mräkätre yei, ye mikani krüte kwe kukwe nebiti: “Jondron kwin ñaka nuain bä ni kräke akwa ni Dänkien Jesukristo tä nuainne ni kräke, ye tädre mun jökrä töi yebe” (Fili. 4:23, NM). Konkrekasion Tiatira töi nämene ye erere arato. Ye medenbätä Jesukristo mikani gobrane kä kwinbiti ye bitikäre, kukwe ne niebare kwe ietre: “Munta dre dre nuene, ye gare jökrä tie abko krörö: Munta Ngöbö tarere amne ni mda mda tarere amne, munta tödeke kwatibe Ngöböbti amne, munta sribire kuin amne munta ja tare nike tödekabtä tibti angwane, munta nünenkä dite jabtä, ye gare kuin tie. Mdakäre abko, [...] mun nämane jändrän kuinkuin nuene, akwa mtare munta nuene bäri kuin, ye abko gare kuin tie arato” (Apoc. 2:19, 20).

2. ¿Ni itire itire tä ja töi mike kwin ye raba ja mräkätre jökrä konkrekasionte töi mike ño?

² Konkrekasion kwatire kwatire nitre testiko Jehovakwe nüke gare töi kwin o jondron kwin nuainne yebätä. Ruäre tä nüke gare ni mada tarere aune ni mada kain ngäbiti kwin yebätä aune mada abokän tä kukwe drieta ye dimike aune sribi köbö täte Ngöbö kräke ye tä mike tuin ütiäte jai. ¿Ni itire itire raba dre nuainne ne kwe konkrekasion tädre keteitibe aune nirien ja üaire? Ni itire itire ja töi mikadre jondron kwin nuainne (1 Cor. 1:10). Nikwe ja töi mikadre käme angwane, kukwe kwin ñaka raba nemen bare: konkrekasion ñaka tädre dite aune raba kukwe käme ye tuenmetre nemen bare (1 Cor. 5:1; Apoc. 3:15, 16). Ye medenbätä, ¿konkrekasion  nikwe ye tä dre nuainne? ¿Nikwe dre nuaindre ne kwe konkrekasion töi rabadre jondron kwin nuainne?

ÑO NI RABA NI MADA TÖI MIKE JONDRON KWIN NUAINNE

3, 4. ¿Ño ni raba Jehová käikitekä konkrekasionte?

³ David kantabare Jehovai: “Tikwe mä käi ngwan nuäre jabätä konkrekasion kri yete; nitre kwati krubäte ye ngätäite tikwe mä käikitaikä” (Sal. 35:18). Salmista ñaka nämene kä juen ta Jehová käikitakakäre ja mräkätre kukwebätä yebe. ¿Aune ni? Nita nemen gätäbätä bämän kratire kratire ja mräkätre konkrekasionte yebe —ñodre Ja Tötikata Täräkwata Ni Mikaka Mokre yebätä angwane— nikwe blitadre o tödeka nikwe mikadre gare kukwe niedre yebiti. ¿Ja tötikata gätäte ye ngwane nita blite? ¿Nita ja tötike kwin gätä ye känenkri aune nita töbike kwin käne kukwe niekäre? Monso tärä nikwe angwane, ¿nita dimike ja tötike aune blite ja kukwei jeñebiti gätäte?

⁴ Salmo mada känti, David mikani gare: “Käre ti brukwä tä mäbe Ngöbö, käre ti brukwä tä mäbe. Erametre tikwe kantai aune musika ngö mikai” (Sal. 57:7). David kukwe niebare ye tä mike gare nita kantare yebiti nita bämike nita dite jankunu. Gätä nuainta yete ni raba kantare Jehovai brukwä tätebiti jankunu aune ni töi rabadre kwatibe niara mike täte. ¿Kantiko ruäre abokän kantai ñaka gare kwin nie? ¿Nita Ja Tötike ni Mräkä ben ye ngwane ni raba ja kite kantiko yebätä? Nikwe ja töi mikadre David ye erere, niarakwe tikabare: “Erametre ti täi nüne ye ngwane käre tikwe kantadi Jehová ie; erametre ti täi nire ye ngwane tikwe kantadi Ngöbö tikwe ie (Sal. 104:33).

5, 6. ¿Ni mantiame aune ni tö ni mada kain ngäbiti kwin ye ni raba bämike ño, aune nita jondron kwin nuainne ye tä mate ño konkrekasion yebätä?

⁵ Nikwe ja taredre konkrekasionte yekäre, ütiäte krubäte ni mada kadre ngäbiti töi kwinbiti. Pablo kukwe tikabare nitre Hebreo ie angwane kapitulo mrä yekänti niebare kwe: “Munta ja tarere, ye kwrere munkwe ja tare janknu [...], ni menteni rüka mun känti angwane, munkwe ka ngäbti kuin” (Heb. 13:1, 2). Kukwe ne mikakäre nemen bare nikwe ja töi mikadre ni konkrekasion tuabitikä aune muko kwe bätä ja mräkätre mada kukwebätä tätre sribire köbö täte te ye nübaire mröre jakänti. Nitre kän muko krütani, nitre rüne o meyere tä monso kwe ngübare kaibe ye nikwe ñaka käi kwitadrekä jabiti, arato ni raba  ja mräkätre mada nübaire nane nane mröre jabe o nita ja tötike ni mräkätre ben ye näire.

⁶ Timoteo kukwe ne niedre Pablo ribebare ie: “Ja mikadre riko siribi kwinbiti kwetre, mäkwe nie ietre. Niaratrekwe jondron biandre aune dräidre kwetre ja brukwä kwinbiti”. Ne erere nuaindi kwetre angwane niaratre, “tä jondron ütiäte kri ükökrö ja kräke, ne käkwe niaratre grä mikai, kä mräte, ni tä ja nirekrä käre ketaninte ngware” (1 Tim. 6:17-19, NGT). Apóstol Pablo tö namani ja mräkätre tuai ja mike mantiame. ¿Ruäre ngwian ñaka nikwe akwa ño ni raba ja mike mantiame? Ñodre, ja mräkätre tä ja di ribere ye ni raba niken ngwena gätäte aune kukwe driedre yekänti. Aune jondron kwin ne erere nuaindre ni kräke angwane, ¿ño ni raba käi ngwen juto jabätä aune jondron kwin nuainne konkrekasionte? Mantre jetebe gasolina ütiä bianta bäri kabre, yebätä ni raba nuainne angwane nikwe ngwian biandre ütiä biankäre. Ne madakäre, nita ja mräkätre tarere aune ütiäte ni kräke rabadre gare ietre, yekäre nikwe kä diandrekä jai rabakäre bäri bentre. Nita jondron kwin nuainne “ni mräkä tödekaka Jesubti” ye kräke aune nita kä denkä jai niaratre kräke bätä jondron nikwe ye nita bien ietre angwane, ¿dre kwin tä nemen bare? Kena, ja mräkätre ye tä nemen bäri tare nikwe, aune ketebukäre nita nitre töi mike kwin aune jäme konkrekasionte (Gál. 6:10).

7. ¿Kukwe bäin ni madakwe ñaka kädriedre ye köböire dre kwin raba nemen bare konkrekasionte?

⁷ Kukwe mada ketebu tä ni kristiano mike ja tarere bäri: ja ketata aune kukwe bäin ni madakwe ñaka kädriedre (ñäkädre Proverbios 18:24 yebätä). Nitre ja ketamuko metre ye tätre tö ngwen jai kwärikwäri. Ja mräkä kukwebätä käkwe kukwe kwe mikadre gare nie ye nikwe ñaka kädriei ni madabe rabai gare ie angwane, ni rabai ja kete bäri kwin ben. Ye medenbätä, ni rabadre tö ngwen ja ketamuko nikwe ie, aune ye köböire ni raba ja mräkätre konkrekasionte dimike nüne keteitibe ni ja mräkäre kwrere aune ja tarere kwärikwäri (Pro. 20:19).

NIKWE KUKWE DRIEDRE KÄ JUTOBITI

8. ¿Kukwe medenbiti mäträbare ja mräkätre Laodicea yebätä aune ñobätä niaratre nämene kukwe ye ribere jai?

⁸ Jesús kukwe ne niebare konkrekasion Laodicea ie: “Munta dre dre nuene, ye gare kuin jökrä tie. [...] akwa mun abko ñakare tibo amne mun ñakare ngire arato. ¡Mun ye rabadre tibo ni tödekaka ñakare tibti kwrere näre o mun rabadre ngire ni nünanka ja di ngöibti tikrä kwrere näre! Akwa mun abko ñakare tibo amne mun ñakare ngire. Mun krube jirekäbe, [...] ye dokwäre abko tikwe mun yaidi jirekäbe mentokwäre” (Apoc. 3:15, 16). Ja mräkätre Laodicea ye ñaka nämene kukwe driere kä jutobiti, ye medenbätä niaratre ñaka nämene ja mäke kwin. Yebätä Jesús kukwe ne niebare ietre: “Nire nire tareta tikwe abko btä tita mäträre töi diankäre. Ne aisete, munkwe ja di mikata  kri kärekäre nünakäre ja di ngöibti tikrä amne, munkwe kukwe käme kita jökrä temen amne munkwe ja mäkäta Ngöböbe amne tibe” (Apoc. 3:19).

9. ¿Nita ja töi mike kukwe driekäre ye köböire ja mräkätre konkrekasionte töi raba nemen ño?

⁹ Ni tö nitre töi mikai kwin bätä jäme konkrekasionte angwane, nikwe kukwe driedre kä jutobiti. Konkrekasion jökrä yete kukwe tä ükaninte, metrere ye nuainta nitre brukwä kwin känänkäre aune kukwe metre driekäre ietre. Ye medenbätä nikwe ja ngwandre Jesús erere aune ni mada tötikadre kä jutobiti (Mat. 28:19, 20; Luc. 4:43). Ni “siribikä gwaire Ngöbökwe”, aune nita kukwe driere kä jutobiti ye ngwane, nita bäri nüne keteitibe jabe (1 Cor. 3: 9, NGT). Nita ja mräkätre tuin tödeka kwe ye mike gare aune kukwe ja üaire mike ütiäte jai angwane, tä nemen bäri ütiäte ni kräke aune nita tarere bäri. Erametre, nikwe ‘sribidre gwaireʼ kukwe driekäre ye köböire konkrekasion rabai nüne keteitibe jabe (ñäkädre Sofonías 3:9 yebätä).

10. ¿Nita ja di ngwen kukwe driere bäri kwin ye raba ja mräkätre konkrekasionte dimike ño?

¹⁰ Nita ja di ngwen kukwe driekäre bäri kwin yebiti ni raba ni mada dimike töbike kwin arato. Nita ja töi mike bäri nitre madabätä aune nita ja di ngwen kukwe ye mike nemen mate niaratre brukwäte angwane, kä rabai bäri juto nibätä kukwe driekäre (Mat. 9:36, 37). Kä juto nibätä ye tä mate ni madabätä arato, aisete nire nire täi näin nibe ye töi raba nemen ni erere. Ani töbike: ¿ñobätä Jesukwe nitre ja tötikaka ben ye juani nibu nibu jabe kukwe driere? (Luc. 10:1). Niaratre ja dimikadre aune ja kitadre kwärikwäri kukwe driekäre ye ñaka aibe kräke juani kukwe driere jabe, ñakare aune niaratre kukwe driedre bäri kä jutobiti yekäre juani arato. Ye medenbätä, ni jökrä tö näin kukwe driere nitre kukwe driekä kä jutobiti yebe, ¿ñan ererea? Niaratre tä kukwe driere kä jutobiti ye tä ni dimike aune ni töi mike kukwe Gobran Ngöbökwe yebätä driere jankunu (Rom. 1:12).

ÑAN ÑÄKÄDRE NI MADA RÜERE AUNE ÑAN KUKWE BLO KADRE NGÄBITI

11. ¿Nitre Israel ja töi mikani ño Moisés näire aune ye köböite dre namani bare niaratrebätä?

¹¹ Ngöbökwe juta nitre Israelkwe ükaninte ye bitikäre bämän nikani krati ta angwane, niaratre namanina ñäke Ngöbö rüere. Kä ñaka namani juto bätätre yebätä ja mikani kwetre Jehová aune nitre ji ngwanka ye rüere (Éxo. 16:1, 2). Ye köböite, nitre kämikaninkä Egipto ye braibe namani nire, Ngöbökwe Kä Käbämikani ietre ye tuakäre. Nitre Israel ja ngwani blo ye köböite Moisés ñaka namani kä yekänti arato (Deu. 32:48-52). ¿Nikwe dre nuaindre ne kwe ni töi ñaka rabadre käme ye erere?

12. ¿Ño ni raba ja töi mike ñaka ñäke ni mada rüere?

¹² Nikwe ñaka ja töi mikadre ñäke nitre mada rüere. Yekäre ja töi mikadre bobre aune nitre ji ngwanka ye mikadre ütiäte jai, akwa nikwe ja ketamuko kwin känändre arato. Nikwe jondron ñaka kwin diandre jai ja näkwitakäre o nitre nänkä kwelate nibe o sribi muko ñaka kukwe Bibliabätä mike täte yebe nikwe kä diandrekä krubäte jai angwane, bengwaire o ja känenkäre kukwe tare rabai ni kisete. Aisete nitre töi ñaka kwin o töi ñaka ni mada mikabätä täte yebe ñaka ja ketadre (Pro. 13:20).

13. ¿Ñäkätä ni mada rüere ye raba kukwe meden tare mike nemen bare ja üairebiti konkrekasionte?

¹³ Ni tädre käre ñäke ni mada rüere ye raba kukwe tare krubäte mike nemen bare ja üairebiti konkrekasionte, raba ñaka mike nüne keteitibe aune jäme jabe. Nikwe ja mräkätre kukwebätä ye kädriedre käme angwane, ni raba kukwe tare mike niaratre kisete aune ni raba nemen ni kukwe ngwarbe niekä aune ñäkäkä taretare ni madabätä ye erere (Lev. 19:16; 1 Cor. 5:11). Siklo kena yete nitre ruäre namani ‘ñaka nitre ji dokwä  ngwanka ye mike ütiäte jai aune blite käme nitre kädekani ye rüere’, ye abokän nitre ji ngwanka konkrekasionte gärätä (Jud. 8, 16). Kukwe nuain nämene ye ñaka namani kwin Ngöbö kräke.

14, 15. a) ¿Kukwe käme nuaindre ye ñaka ükadrete angwane dre raba nemen bare konkrekasion yebätä? b) ¿Ni ruäre kukwe käme nuaindre akwa tädre üke rabadre gare nie angwane nikwe dre nuaindre?

¹⁴ Ne madakäre, ni ruäre kukwe käme nuainbare —ñodre, dö ñabare krubäte kwe, ni üai butiere tuani kwe o ja mikani gure gore kwe— akwa tä üke rabadre gare nie angwane, ¿nikwe dre nuaindre? (Efe. 5:11, 12.) Kukwe ñaka gare nie kwrere nikwe ja ngwandre angwane, Jehová üai deme ye ñaka tädre konkrekasion yebiti aune ñaka nünandre jäme jire chi (Gál. 5:19-23). Nitre kristiano Corinto käkwe kukwe nuainbare ye erere nikwe nuaindre ne kwe nikwe nünandre kwin aune jäme jabe: konkrekasion ye ngübadrebiti ne kwe kukwe blo ñaka tädre te. ¿Ni raba nuainne ño?

¹⁵ Kukwe bäin ni madakwe ñaka kädriedre yebätä nikwe blitani käne, metrere ja mräkä yei ja ruin ño aune tä töbike ño niedre kwe nie ye ngwane. Nikwe mikadre gare ni madai ye käme krubäte. Akwa, nikwe ngwandre törö jai kukwe käme nuainta ye nitre umbre konkrekasionte aibe raba ükete nieta Bibliakwe. Aisete kukwe ye mikadre gare ietre (ñäkädre Levítico 5:1 yebätä). Yebätä, ni ruäre käkwe kukwe käme nuaindre rabadre gare nie angwane, niaratre ja di kärädre nitre umbre yei nikwe niedre ie (Sant. 5:13-15). Niaratre ñaka nuaindre jötrö angwane, nikwe nuaindre.

16. Kukwe käme nuaindre ye mikadre gare, ¿ñobätä ye ütiäte krubäte ne kwe konkrekasion tädre kwin?

¹⁶ Konkrekasion ye gitia käi nie ja üairebiti, aune kriemikakäre kukwe käme nuainta ye nikwe mikadre gare. Ni kukwe käme nuainkä ye ja töi kwitadre bätä kukwe käme ye tuanemetre kwe angwane, ñaka rabaira konkrekasion ye töi juankäre ngwarbe. Akwa nitre umbre käkwe mäträdrebätä ye ñaka kadre ngäbiti kwe aune ñaka tö rabadre ja töi kwitai ye ngwane, diandrekä konkrekasionte. Ye erere kukwe käme raba ja mräkä mada töi juen ngwarbe ye “gaite o diainkä” konkrekasionte (ñäkädre 1 Corintios 5:5 yebätä). Konkrekasion mikakäre jondron kwin nuainne, ribedre nie angwane, nikwe nitre umbre dimikadre aune jondron kwin nuaindre ja mräkätre kräke.

JA TÖI MIKADRE “NI MADA DIMIKE NÜNE KETEITIBE”

17, 18. ¿Dre ribeta ne kwe ja mräkätre ja töi mikadre ‘nüne keteitibeʼ konkrekasionte?

¹⁷ Nitre kristiano kena käkwe “kukwe diribare nitre Jesu kukwei ngwiankakwe, yebtä niaratre namani ja kite” ye köböire konkrekasion dimikani nüne keteitibe kwe (Hech. 2:42). Erametre, nitre umbre nämene kukwe niere aune kukwe Bibliabätä yebiti mäträre ye niaratre nämene mike ütiäte krubäte jai. Kä nengwane, nitre umbre konkrekasionte tä sribire ngwaire nitre sribikä täte metre aune töbätä yebe; ye köböire, konkrekasion dimikata nüne keteitibe tätre ribere jai ye ererebätä (1 Cor. 1:10). Ne madakäre, juta Ngöbökwe tä kukwe Bibliabätä ükete nuaindre aune nitre umbre tä kukwe niere ni jie ngwankäre ye nitre kristiano jökrä tä mike ütiäte jai, aune ye erere tätre bämike niaratre tä “Ngöbö Üai Deme köböire [...] ja mäke ni itibe kwrere, [...] nüna[nkäre] jäme jabe kwärikwäri” (Efe. 4:3).

¹⁸ Nikwe ja di ngwandre ja mräkätre töi mike jondron kwin nuainne jankunu konkrekasionte. Ye köböire, kukwe ütiäte nieta ne nikwe nuaindi: “Jondron kwin ñaka nuain bä ni kräke akwa ni Dänkien Jesukristo tä nuainne ni kräke, ye tädre mun jökrä töi yebe” (Fili. 4:23, NM).

[Kukwe ngwantarita]

[Jondron üai bämikani página 19]

¿Jondron kwin nuainkäre nita ja tötike kukwe ütiäte niekäre gätäte?

[Jondron üai bämikani página 20]

Jondron kwin nuainkäre konkrekasionte ni raba ja kite kantiko yebätä ni mräkätre ben