“Namona be Lohiabada Iesu Keriso ena hebogahisi hereadaena be emui laloa dalana amo do umui hahedinaraia.”​—⁠FILI. 4:23.

EDENA DALA AI KARA NAMO ITA HAHEDINARAIA . . .

tadikaka taihu ita bamodia neganai?

haroro gaukara ita goadalaia neganai?

kerere badadia be elda taudia ita hadibaia neganai?

1. Dahaka dainai Paulo bona Iesu Keriso be Filipi bona Tuatira kongrigeisen idia hanamoa?

 APOSETOLO edia negai idia noho Filipi Keristani taudia be ogogami taudia. To, edia Keristani tadikaka taihu dekenai hariharibada bona lalokau karana idia hahedinaraia. (Fili. 1:3-5, 9; 4:15, 16) Unai dainai aposetolo Paulo ia gwau: “Namona be Lohiabada Iesu Keriso ena hebogahisi hereadaena be emui laloa dalana amo do umui hahedinaraia.” (Fili. 4:23) Tuatira Keristani taudia danu be unai bamona kara namodia idia hahedinaraia dainai, Iesu ia gwau: “Oiemu kara, emu lalokau, emu abidadama, emu hesiai gaukara, bona emu haheauka lau diba. Lau diba danu, hari oi karaia noho karadia ese guna oi karaia karadia idia hereaia.”​—⁠Apok. 2:19.

2. Dahaka dainai kongrigeisen ai kara namodia ita hahedinaraia be mai anina bada?

² Hari, Iehova ena Witnes taudia edia kongrigeisen ta ta edia kara be idauidau. Kongrigeisen haida be hebogahisi bona lalokau idia hahedinaraia, ma haida be haroro gaukara idia laloa bada bona painia taudia idia durua. Bema kongrigeisen lalonai ita ibounai ita hekwarahi unai bamona kara namodia ita hahedinaraia totona, mai lalotamona ida do ita gaukara hebou. (1 Kor. 1:10) To bema kara namodia ita hahedinaraia lasi, unai ese ma haida ia hamanokaia diba bona haroro gaukara do idia laloa bada lasi. Danu, ma haida edia kerere badadia do idia hunia. (1 Kor. 5:1; Apok. 3:15, 16) Emu kongrigeisen be edena bamona kara ia hahedinaraia? Edena dala ai tadikaka taihu oi durua diba kara namodia idia hahedinaraia totona?

KARA NAMODIA HAHEDINARAIA

3, 4. Edena dala ai hebou ai Iehova ita hanamoa diba?

³ Davida be ane lalonai Iehova dekenai ia gwau: “Hebou badana lalonai, oi do lau tanikiu henia. Taunimanima  momo edia vairana dekenai oi do lau hanamoa bada.” (Sal. 35:18) Ia be ma haida ida ia noho neganai, Iehova hanamoa anedia ia abia. Ita danu, pura ta ta ai ita karaia heboudia hegeregere, Gima Kohorona Stadi ai ita haere neganai, iseda abidadama ita hahedinaraia unai. Namona be sibona ita nanadaia: ‘Hebou dekenai lau haere momo, a? Haere namodia lau henia totona lau hegaegae namonamo, a? Lau be ruma bese kwarana dainai, hebou totona ai hegaegae neganai, egu natudia lau durua sibodia edia hereva amo idia haere totona, a?’

⁴ Hebou ai mai iseda kudouna ibounai ida ane ita abia neganai, ita hahedinaraia ita ura kara maoromaoro ita badinaia. Davida ia gwau: “Dirava e, egu kudouna lalonai, egu abidadama ia goada momokani. Egu abidadama ia goada momokani oi dekenai. Oi hanamoa totona ane do lau abia, ane namona do lau abia.” (Sal. 57:7) Hebou ai ita abia anedia amo Iehova ita “hanamoa” diba. Bema ane haida ita diba namonamo lasi, iseda Ruma Bese Ena Tomadiho negadiai ita tohoa loulou diba. Davida bamona, do ita gwau: “Lauegu mauri dinadia idia do noho neganai, lau ese Lohiabada dekenai ane do lau abia. Lau ese ane dekenai Lohiabada do lau hanamoa noho, ela bona lau mase.”​—⁠Sal. 104:33.

5, 6. Edena dala ai heabidae bona hariharibada karana ita hahedinaraia diba? Bona edena dala ai unai ese ma haida ia durua diba?

⁵ Iseda tadikaka taihu dekenai heabidae karana ita hahedinaraia neganai, unai ese ta ta lalokau henia karana ia hagoadaia. Paulo be Heberu taudia totona ia torea revareva ginigabena ai, ia gwau: “Namona be tadikaka bamona do umui lalokau heheni noho. Heabidae karana do umui laloaboio lasi.” (Heb. 13:1, 2) Heabidae karana ita hahedinaraia dalana ta be, sekit tauna bona ena adavana o ful-taim hesiai gaukara idia karaia taudia ida ita aniani hebou. Reana vabu, tama eiava sina sibona ruma besedia, o ma haida ida ita aniani hebou diba. Eiava iseda ruma bese ena tomadiho dekenai idia ita boiria.

⁶ Paulo ese Timoteo ia hamaoroa ma haida do ia hagoadaia “kara namodia bona gaukara namodia momo do idia karaia, hariharibada karana do idia hahedinaraia bona idia dekenai idia noho gaudia do idia haria, unai dala amo idia be vaira negana totona badina namona idia haginia, unai be dava bada kohuna bamona idia haboua, unai amo mauri korikorina idia dogoatao  auka” diba. (1 Tim. 6:17-19) Paulo ese ena tadikaka taihu ia hagoadaia hariharibada karana idia hahedinaraia totona. Ena be gau davadia idia bada, to dala ma haida ai hariharibada karana ita hahedinaraia diba. Hegeregere, bema oi be mai emu motuka, reana ma haida be haroro gabudia o hebou dekenai oi abidia lao diba. Bema tadikaka ta be unai dala amo ita ia durua, edena dala ai ia ita tanikiu henia diba? Petrol davana ia daekau dainai, reana iseda goada hegeregerena heduru monina ita henia diba. Dala ma ta be, iseda tadikaka taihu ita bamodia totona nega ita atoa, unai amo do idia mamia ita be idia ita lalokau henia. “Iseda abidadama tamona tadikaka bona taihu” durua totona iseda nega bona kohu ita gaukaralaia neganai, iseda hetura karana do ia goada, bona tadikaka taihu ma haida ita durua diba kara namodia idia hahedinaraia totona.​—⁠Gal. 6:10.

7. Edena dala ai hehuni herevadia gwauraia lasi karana ese kongrigeisen ai hetura karana ia hagoadaia?

⁷ Iseda hetura karana ia goada noho totona, eda tadikaka taihu edia hehuni herevadia be ma haida dekenai ita gwauraia lasi. (Aonega Herevadia 18:24 duahia.) Tadikaka o taihu ta be ita dekenai ena lalohekwarahi gaudia ia herevalaia, bona ita ese ma haida dekenai unai ita herevalaia lasi neganai, ita hahedinaraia ita be iena tura korikorina. Unai ese oi bona emu turana huanai ia noho hetura karana do ia hagoadaia. Oibe, bema kongrigeisen lalonai ma ta ena hunia herevadia ita gwauraia hedinarai lasi o ita udu mauri lasi, ita hahedinaraia ita be ruma bese badana ta bamona.​—⁠Aon. 20:19.

HARORO GAUKARA MOALELAIA

8. Laodikea taudia dekenai Iesu be dahaka ia gwau, bona dahaka dainai?

⁸ Iesu be Laodikea kongrigeisen ia hamaoroa: “Oiemu kara lau diba, oi be keru lasi bona siahu lasi. Lau ura oi keru, eiava oi siahu. To oi be siahu sisina, oibe, oi siahu lasi eiava oi keru lasi dainai, egu uduna amo oi do lau mumutaia.” (Apok. 3:15, 16) Laodikea Keristani taudia be edia hesiai gaukara idia moalelaia lasi. Reana unai ese idia huanai ia noho hetura karana namona ia hadikaia. Unai dainai Iesu ese ia hamaorodia: “Lau ura henia taudia ibounai lau sisiba henia bona lau matahakani henia. Unai dainai oi gaukara goada bona oi helalo-kerehai.”​—⁠Apok. 3:19.

9. Haroro gaukara ita goadalaia neganai, unai ese edena dala ai kongrigeisen ia durua?

⁹ Bema ita ese haroro gaukara ita goadalaia, kongrigeisen taudia danu be unai gaukara do idia moalelaia. Kongrigeisen ia noho ena badina ta be iseda teritori ai kudou-maoro taudia do ita  tahua bona hereva momokani ita hadibadia. Namona be Iesu ita tohotohoa bona hahediba taudia halaoa gaukarana ita goadalaia. (Mat. 28:19, 20; Luka 4:43) Iseda haroro gaukara ita goadalaia neganai, ita be mai lalotamona danu ‘Dirava ida ita gaukara hebou.’ (1 Kor. 3:9) Haroro ai ita bamoa tadikaka taihu be edia abidadama bona lalokau Iehova dekenai idia hahedinaraia neganai, unai ese eda lalokau bona hemataurai idia dekenai ia hagoadaia. Danu, mai lalotamona ida ita haroro hebou karana ese tadikaka taihu ia hatamonaia.​—⁠Sepanaia 3:9 duahia.

10. Bema iseda haroro dalana ita hanamoa, unai ese edena dala ai ma haida ia durua diba?

¹⁰ Ita ibounai ese iseda haroro dalana ita hanamoa neganai, ma haida ese edia haroro dalana do idia hanamoa danu. Bema kamonai taudia ita laloa bada bona ita gaukara goada idia ita durua totona, eda haroro gaukara do ita moalelaia. (Mat. 9:36, 37) Bona ita idia bamoa taudia danu be haroro gaukara do idia moalelaia. Haroro totona Iesu ese ena hahediba taudia be rua rua ia siaidia. (Luka 10:1) Unai dala amo ta ta idia hagoadaia, heduru heheni, bona edia haroro gaukara idia moalelaia. Haroro gaukara idia goadalaia pablisa ita bamodia be moale gauna! Edia haroro goadagoada karana ese ita ia durua ita haroro noho totona.​—⁠Roma 1:12.

MAUMAU LASI BONA KERERE HUNIA LASI

11. Mose ena negai Israela taudia be dahaka idia karaia, bona dahaka ia vara?

¹¹ Iehova ese Israela taudia be ena bese ai ia halaodia, to wiki haida murinai idia maumau. Iehova, Mose, bona Arona idia gwau-edeede henidia. (Eso. 16:1, 2) Unai dainai haida sibona be Gwauhamata Tanona ai idia vareai. Mose danu be gwauhamata tanona lalonai ia vareai lasi, badina Israela taudia edia kara dekenai ia badu. (Deu. 32:48-52) Maumau o gwau-edeede karana ita dadaraia totona, dahaka ita karaia be namo?

12. Maumau karana ita dadaraia totona, dahaka ese ita ia durua diba?

¹² Maumau karana ita dadaraia be gau badana. Bema ita manau bona eda hakaua taudia ita matauraia, unai ese ita do ia durua ita maumau lasi totona. Ita ia durua gauna ma ta be iseda turadia ita abia hidi namonamo. Bema moale karadia dikadia ita abia hidi, eiava gaukara o sikuli gabudiai Iehova idia matauraia lasi taudia ita bamoa, dika ita davaria diba. Unai dainai aonega karana be idia maumau momo taudia, o sibona edia lalohadai o ura karadia idia laloa bada taudia ita bamodia lasi.​—⁠Aon. 13:20.

13. Edena siri ese idia hahedinaraia maumau karana be kongrigeisen ia hadikaia diba?

¹³ Bema kongrigeisen taudia be hanaihanai idia maumau, metairametaira edia hetura karana Iehova ida be do ia dika ia lao. Unai bamona kara ese kongrigeisen ia hadikaia diba. Hegeregere, Keriso ese Tuatira kongrigeisen ia sisiba henidia “inai hahine Iesebele” ena kara dainai do idia naria namonamo. (Apokalupo 2:20-23 duahia.) Danu, aposetolo Paulo ia gwau lalohadai kereredia ese kongrigeisen ia hadikaia diba. Ia gwau lalohadai kereredia be paraoa mai hatubua muramurana bamona. Korinto tadikaka ia hamaorodia: “Umui diba lasi, a? Hatubua muramura sisina ese paraoa ibounai ia hatubua. Hatubua muramura gunana umui kokia, unai amo umui be paraoa matamata, oibe, umui dekenai hatubua gauna ia noho lasi.”​—⁠1 Kor. 5:1, 2, 6, 7.

14, 15. (a) Bema ta ena kerere ita hunia, dahaka ia vara diba? (b) Bema ita diba ta be kara dika badana ta ia karaia, dahaka ita karaia be namo?

 ¹⁴ Bema oi diba ta be kerere badana ta ia karaia, hegeregere ia kekero momo, ponografi laulau ia itaia o ia heudahanai, dahaka do oi karaia? (Efe. 5:11, 12) Bema kara dika badadia ita hunia, Iehova ese ena lauma helaga be kongrigeisen amo ia kokia diba. Bona unai ese kongrigeisen ena maino ia hadikaia diba. (Gal. 5:19-23) Paulo ese Korinto Keristani taudia ia hamaorodia namona be ‘hatubua muramura gunana do idia kokia.’ Iseda negai danu, kongrigeisen ita gimaia totona kara dika taudia be kongrigeisen amo ita kokia be namo. To, kongrigeisen ai maino ia noho totona, dahaka oi karaia diba?

¹⁵ Ita herevalaia vadaeni bamona, namona be ma haida edia hehuni herevadia be ma ta dekenai ita gwauraia lasi. Badina bema ma haida dekenai ita herevalaia, unai be hemataurai lasi karana! To, bema tadikaka o taihu ta be kara dika badana ta ia karaia, kongrigeisen elda taudia ita hadibaia be namo. Unai amo Baibel ena hereva hegeregerena unai hekwakwanai idia hamaoromaoroa diba. (Levitiko 5:1 duahia.) Unai dainai bema ita diba tadikaka o taihu ta be kara dika badana ta ia karaia, namona be ita hamaoroa elda taudia amo heduru do ia abia. (Iam. 5:13-15) Bema elda taudia dekenai ia lao lasi, ita ese elda taudia ita hadibaia be namo.

16. Kongrigeisen gimaia totona, dahaka ita karaia be namo?

¹⁶ Keristani kongrigeisen be dika idauidau amo ita ia gimaia gabuna. Unai dainai ta be kara dika badana ta ia karaia neganai, elda taudia ita hadibaia haraga be namo. Bema elda taudia ese ia idia durua bona ia helalo-kerehai, unai ese kongrigeisen ai ia noho maino do ia hadikaia lasi. To, dahaka do ia vara bema kerere tauna be ia helalo-kerehai lasi, bona elda taudia edia heduru ia abia dae lasi? Kongrigeisen amo do idia atoa siri. Unai amo ia ese kongrigeisen ena maino ia hadikaia lasi. (1 Korinto 5:5 duahia.) Oibe, bema ita diba ta be kara dika badana ta ia karaia, namona be elda taudia ita hadibaia bona edia hakaua dalana ita badinaia. Unai amo ita hahedinaraia eda tadikaka taihu ita laloa bada bona ita ura kongrigeisen ita gimaia.

“LALOTAMONA KARANA”

17, 18. Kongrigeisen ai lalotamona ia noho totona, dahaka ita karaia be namo?

¹⁷ Iesu ena murinai idia raka taudia be “aposetolo taudia edia hadibaia herevadia idia kamonai namonamo” dainai, kongrigeisen lalonai lalotamona ia noho. (Kara 2:42) Idia ese aposetolo taudia edia sisiba idia laloa bada. Hari iseda negai danu, elda taudia be igui hesiai tauna mai ena kamonai oreana ena sisiba idia badinaia, bona kongrigeisen taudia idia hagoadaia mai lalotamona ida idia gaukara hebou totona. (1 Kor. 1:10) Iehova ena orea amo ita abia hakaua herevadia, bona elda taudia edia hakaua dalana ita badinaia neganai, ita hahedinaraia ita be ‘lauma helaga ese ita ia henia lalotamona karana ita badinaia, bona maino ese ita ia hatamonaia.’​—⁠Efe. 4:3.

¹⁸ Namona be ita gaukara goada eda kongrigeisen ta ta lalonai kara namodia ita hahedinaraia noho totona. Bona “Lohiabada Iesu Keriso ena hebogahisi hereadaena” ese ita do ia durua kara namodia ita hahedinaraia totona.​—⁠Fili. 4:23.

[Study Questions]

[Picture on page 19]

Haere namodia hegaegaelaia karana amo ma haida oi hagoadaia diba

[Picture on page 20]

Ane matamatadia dibaia karana ese kongrigeisen ena lalotamona karana ia hagoadaia