Yọrọ Emamọ Ẹzi Nọ Ọ Rrọ Ukoko Na
Yọrọ Emamọ Ẹzi Nọ Ọ Rrọ Ukoko Na
“Aruoriwo Olori na Jesu Kristi ọ jọ kugbe ẹzi nọ wha bi dhesẹ na.” —FIL. 4:23, NW.
ẸVẸ MA SAE RỌ YỌRỌ EMAMỌ ẸZI NỌ Ọ RRỌ UKOKO NA . . .
․․․․․
nọ ma te kuomagbe ibe Ileleikristi mai?
․․․․․
ẹkwoma ajọwha nọ ma re wo kẹ usiuwoma ota na?
․․․․․
nọ ma tẹ ta izieraha ilogbo kẹ ekpako na?
1. Fikieme a rọ ta ẹme ezi ukoko obọ Filipai gbe orọ obọ Thiatira?
ILELEIKRISTI ikpe-udhusoi ọsosuọ nọ e jọ obọ Filipai a fe he. Rekọ, a wo ẹzi ọghoruo gbe uvi uyoyou kẹ ibe Ileleikristi rai. (Fil. 1:3-5, 9; 4:15, 16) Nọ Pọl ukọ na o je ku ileta nọ o kere se ai họ, ọ ta nọ: “Aruoriwo Olori na Jesu Kristi ọ jọ kugbe ẹzi nọ wha bi dhesẹ na.” (Fil. 4:23, NW) Fikinọ Ileleikristi obọ Thiatira a dhesẹ ọkpọ ẹzi ọvona, Jesu Kristi ọ ta kẹ ae nọ: ‘Mẹ riẹ iruo rai, uyoyou rai gbe ẹrọwọ avọ odibo-ọgba gbe akothiho rai, iruo rai uwhremu na i woma vi erọ ọsosuọ.’—Evia. 2:19.
2. Eme ma re ru rọ zọhọ fihọ ẹzi nọ ọ rrọ ukoko mai?
2 Epọvo na re, ukoko Isẹri Jihova kpobi nẹnẹ u wo ẹzi hayo uruemu nọ a rrọ eva riẹ dhesẹ. A riẹ ikoko jọ rọkẹ uyoyou gbe amọfa nọ a rẹ whẹtiẹ h’oma. Ikoko efa i wo ọwhọ gaga kẹ iruo usiuwoma ota Uvie na je se iruo ọkobaro gboja ziezi. Nọ mai omomọvo ma te bi dhesẹ emamọ ẹzi, ma rẹ zọhọ fihọ okugbe nọ ọ rrọ ukoko na je ru nọ ukoko na u re ro wo ẹnyaharo evaọ iruo Uvie na. (1 Kọr. 1:10) Evaọ abọdekọ riẹ, nọ ma te bi dhesẹ ekpehre uruemu, u re fi oyẹlẹ họ amọfa oma evaọ ukoko na, u re je tube ru nọ a re ro gbolaro kẹ izieraha evaọ ukoko na. (1 Kọr. 5:1; Evia. 3:15, 16) Didi ẹzi ukoko ra o bi dhesẹ? Oghẹrẹ vẹ whọ sae rọ wha ẹzi owoma haro evaọ ukoko ra?
WHA EMAMỌ ẸZI HỌ AMỌFA
3, 4. Ẹvẹ ma sai ro jiri Jihova “evaọ udevie ogbotu” inievo mai?
3 Ọso-ilezi na ọ so nọ: “Evaọ udevie ogbotu na mẹ jẹ te kẹ owhẹ [Jihova] akpẹwẹ; me ti jiri owhẹ evaọ iraro ahwo buobu.” (Ol. 35:18) Ọso-ilezi na ọ jẹ hai jiri Jihova nọ o tẹ rrọ kugbe ibe eg’Ọghẹnẹ riẹ. Iwuhrẹ ukoko nọ ma re kpohọ k’oka k’oka, onọ u kugbe Uwuhrẹ Uwou-Eroro Na, o rẹ k’omai uvẹ nọ ma re ro dhesẹ ajọwha gbe ẹrọwọ mai via ẹkwoma iyo nọ ma rẹ kẹ. Mai omomọvo ma rẹ sae nọ omamai nọ: ‘Kọ mẹ be hae kẹ uyo ẹsikpobi nọ uvẹ u te rovie fihọ? Kọ mẹ be hae ruẹrẹ oma kpahe ziezi kẹ iwuhrẹ re mẹ ruẹse kẹ emamọ iyo? Wọhọ ọnọ o wuzou uviuwou, kọ me bi fi obọ họ kẹ emọ mẹ ruẹrẹ iyo kpahe je wuhrẹ ae epanọ a rẹ rọ eme obọrai kẹ iyo?’
4 Devidi o dhesẹ nọ udu nọ o ruẹrẹ oma kpahe kẹ oreva Ọghẹnẹ uruo o rẹ ghọghọ evaọ ilesuọ. Ọ ta nọ: “Udu mẹ o dọmu ẹtọvo no, O Ọghẹnẹ, udu mẹ o dọmu ẹtọvo no! Mẹ rẹ te suole, mẹ rẹ te suole ajiri!” (Ol. 57:7) Ile ukoko na nọ ma rẹ so yọ obọdẹ edhere nọ ma rẹ rọ rehọ “ajiri” kẹ Jihova avọ udu nọ o dọmu kẹ oreva riẹ uruo. Otẹrọnọ ma riẹ ile na jọ họ, kọ u gbe fo re ma hai wuhrẹ ae evaọ etoke Egagọ Uviuwou? Jọ o jọ ọtamuo mai re ma hae ‘suole kẹ ỌNOWO na nọ ma gbẹ rọ uzuazọ na; re ma suole ajiri kẹ Ọghẹnẹ evaọ oke nọ ma rẹ rria krite kpobi.’—Ol. 104:33.
5, 6. Ọghọ vẹ ma rẹ sai ru kẹ amọfa, kọ didi ẹzi onana o rẹ wha fihọ ukoko na?
5 Ọghọ nọ ma re ru kẹ inievo mai yọ edhere ọfa nọ ma rẹ rọ wha emamọ ẹzi haro evaọ ukoko na. Evaọ uzou urere orọ ilele nọ Pọl o kere se ahwo Hibru, ọ hrẹ rai inọ: “Wha se uyoyou inievo rai ba ha. Wha seri erara eghọ họ họ.” (Hib. 13:1, 2) Esẹro okogho gbe erọ ubrotọ avọ eyae rai gbe ekobaro nọ e rrọ ukoko mai nọ ma re zizie kẹ emuọriọ yọ obọdẹ edhere jọ nọ ma sai ro dhesẹ ẹzi ọghoruo. Ma rẹ sai je zizie eyae-uku, iviuwou ọyewọ ọvo, hayo inievo efa re a kuomagbe omai kẹ emuọriọ hayo egagọ uviuwou.
6 Pọl ọ ta kẹ Timoti inọ jọ ọ hrẹ inievo ukoko na “re a he ru ewoma re a fe eva iruo iwoma, eva efuafo avọ ọghọ-oruo; Ere oruo a re ro fi otọhotọ uwoma họ kẹ oma rai be hẹrẹ obaro, re uzuazọ nọ o ghine rọ uvi uzuazọ o ruẹse te ae obọ.” (1 Tim. 6:17-19) Pọl ọ be jọ etenẹ ta nọ jọ ibe Ileleikristi riẹ a wo ẹzi ọghoruo. Eware e tẹ make ga kẹ omai, ma rẹ sai wo ẹzi ọghoruo ghele. Edhere jọ nọ ma re ro ru ọghọ họ, obọ nọ ma re fihọ kẹ inievo nọ e gwọlọ obufihọ re a sai te oria uwuhrẹ. Kọ ẹvẹ enọ a fi obọ utioye họ kẹ? A rẹ sai fi obọ họ wha emamọ ẹzi haro ẹkwoma edẹro nọ a re dhesẹ. Obọ nọ a re fihọ evaọ ẹruorote omoto, imotosaikoro, hayo ẹdhighere nọ a rọ wọ ae kpohọ ewuhrẹ na yọ edhere jọ nọ a sai ro dhesẹ edẹro. Ofariẹ, nọ ma te bi ru uvẹ fihọ nọ ma rẹ rọ jọ kugbe inievo Ileleikristi mai, u re dhesẹ kẹ ae inọ ma gwọlọ usu rai gbe nnọ ma you rai. Ma tẹ be hai ru iruo ezi ẹsikpobi kẹ ‘otu nọ ma gbẹ rrọ ẹrọwọ na,’ jẹ be hai ru ai ọghọ jẹ raha oke kugbe ai, u re ru uyoyou nọ ma wo kẹ ae diwi viere je fi obọ họ wha ẹzi ọsasa haro evaọ ukoko na.—Gal. 6:10.
7. Ẹvẹ ẹme idhere omọfa nọ ma re mu ta kẹ ahwo ho u re ro fi obọ họ yọrọ emamọ ẹzi evaọ ukoko na?
7 Joma ta kpahe eware efa nọ i re ru uyoyou nọ ma wo kẹ ibe Ileleikristi mai ga: usu gbe ẹme nọ a rẹ ko dhere. (Se Itẹ 18:24.) Emamọ egbẹnyusu a re mu eme idhere rai ta kẹ amọfa ha. Nọ inievo mai a tẹ ta eme idhere rai kẹ omai je wo imuẹro inọ ma te vuẹ amọfa ha, u re ru uyoyou nọ ma wo kẹ ohwohwo ga viere. Joma daoma jọ egbẹnyusu nọ a re fievahọ nọ i re mu gu ẹme idhere ọrivẹ rai kẹ amọfa ha, re ma rọ ere wha ẹzi okugbe haro evaọ ukoko na.—Itẹ 20:19.
WO AJỌWHA KẸ IRUO USIUWOMA OTA NA
8. Ohrẹ vẹ Jesu ọ kẹ inievo obọ Laọdisia, kọ fikieme?
8 Jesu ọ ta kẹ ukoko obọ Laọdisia nọ: “Mẹ riẹ iruo ra: whọ roro hayo edhẹ hẹ. O hae were omẹ re whọ roro hayo re who dhẹ! Fiki epanọ wha rẹ ruọruọ, wha roro hayo edhẹ hẹ na, me re ti nwo owhai kufiẹ no unu mẹ.” (Evia. 3:15, 16) Inievo obọ Laọdisia a wo ajọwha kẹ usiuwoma ota na ha. O wọhọ nọ onana u je kpomahọ usu rai kugbe ohwohwo re. Fikiere Jesu ọ kẹ rae ohrẹ inọ: “E nọ me you, mẹ [rẹ] kẹ uye jẹ fa eviaviẹ fikiere wha kru-oma ga re wha kuevarẹriẹ.”—Evia. 3:19.
9. Ẹvẹ ọwhọ nọ ma re wo kẹ usiuwoma na u re ro kpomahọ emamọ ẹzi nọ ọ rrọ ukoko na?
9 Re ma sae wha emamọ ẹzi haro evaọ ukoko na, u fo nọ ma re wo ajọwha kẹ iruo usiuwoma ota na. Ẹjiroro nọ a rọ rehọ ukoko na mu họ, re ma jọ ẹkwotọ mai gwọlọ ahwo nọ a wo eva ezi, je fi obọ họ kẹ ai wo usu okpekpe kugbe Ọghẹnẹ. Fikiere, o gwọlọ nọ ma rẹ rọ ọwhọ ta usiuwoma na wọhọ epanọ Jesu o ru. (Mat. 28:19, 20; Luk 4:43) Epanọ ọwhọ nọ ma wo kẹ usiuwoma na ọ ga te, ere okugbe nọ ọ rrọ udevie mai wọhọ “otu nọ i bi ru iruo kẹ Ọghẹnẹ” ọ te ga te. (1 Kọr. 3:9) Nọ ma tẹ be hae ruẹ ibe Ileleikristi mai nọ a be ta ẹrọwọ rai via je bi dhesẹ evawere nọ a wo kpahe egagọ Ọghẹnẹ, oma o rẹ wọ omai you rai jẹ kẹ ae adhẹẹ vi epaọ ọsosuọ. Ofariẹ, nọ ma tẹ be hae rọ “evevo” ru iruo evaọ usiuwoma ota na, o rẹ wha ẹzi okugbe haro evaọ ukoko na.—Se Zefanaya 3:9.
10. Ẹvẹ onaa nọ ma rẹ daoma wo ziezi evaọ usiuwoma na u re ro kpomahọ amọfa evaọ ukoko na?
10 Nọ ma tẹ be daoma re ma wo onaa ziezi evaọ odibọgba na, u re je kpomahọ amọfa wowoma. Nọ ma be daoma wo ọdawẹ vi epaọ ọsosuọ kẹ ahwo nọ ma nyaku, jẹ be daoma rọ onaa duobọte ai udu evaọ usiuwoma ota na, ọwhọ nọ ma wo kẹ usiuwoma na o rẹ te ga vi epaọ ọsosuọ. (Mat. 9:36, 37) Nọ ma te wo ọwhọ, u re ru amọfa wo ọwhọ re. Jesu o vi ilele riẹ kpohọ usiuwoma ota imimava, orọnikọ omomọvo ho. (Luk 10:1) Onana u fi obọ họ kẹ ae bọ ohwohwo ga je wuhrẹ mi ohwohwo, u te je fi obọ họ kẹ ae wo ọwhọ ziezi kẹ iruo usiuwoma ota na. Kọ eva e gbẹ be hae were omai nọ a te dhe omai kugbe iniẹvo nọ i wo ọwhọ usiuwoma ota? Ọwhọ rai ọ rẹ kẹ omai uduotahawọ je ru nọ ma re ro w’obọ ziezi evaọ usiuwoma na.—Rom 1:12.
YỌROMA KẸ ẸGO GBE UZIORAHA NỌ A RẸ KO DHERE
11. Oghẹrẹ ẹzi vẹ emọ Izrẹl a je dhesẹ evaọ edẹ Mosis, kọ eme onana o wha se ai?
11 Nọ emọ Izrẹl a zihe ruọ orẹwho nọ Ọghẹnẹ ọ salọ no, nọ ekpoka jọ kakao e jẹ vrẹ no, a te muhọ ẹgo. A tẹ jẹ wọso Jihova gbe ahwo nọ o ro mu. (Ọny. 16:1, 2) Evaọ usu emọ Izrẹl nọ i no Ijipti ze, umutho ahwo jọ ọvo a ruọ Ẹkwotọ Eyaa na. Makọ Mosis dede ọ ruọ ẹkwotọ na ha fiki oghẹrẹ nọ o ru kpahe uruemu uyoma nọ emọ Izrẹl a dhesẹ ẹdẹjọ. (Izie. 32:48-52) Kọ ẹvẹ ma sae rọ whaha ekpehre uruemu?
12. Ẹvẹ ma sae rọ yọroma kpahe ẹgo?
12 Ma rẹ yọroma kpahe ẹgo. Dede nọ omaurokpotọ gbe adhẹẹ nọ ma re wo kẹ enọ i bi su omai u re fi obọ họ whaha uruemu ẹgo, oware ofa nọ u re fi obọ họ k’omai họ, ma rẹ yọroma kpahe ahwo nọ ma re lele nyusu. Nọ ma tẹ be hai rri ekpehre ighe hayo w’obọ evaọ eware ẹkeriotọ omawere nọ i fo ho hayo nọ ma tẹ be nyusu kugbe ahwo nọ a be gọ Jihova ha, o rẹ sai ru omai wo ekpehre uruemu na. Ma re siomano ahwo nọ a rẹ ruẹ eyoma evaọ oware kpobi hayo enọ e rẹ gwọlọ ru orọ eva rai ọvo.—Itẹ 13:20.
13. Eware iyoma efa vẹ ẹgo ọ rẹ sae wha fihọ ukoko na?
13 Nọ a te gbabọkẹ ẹzi ẹgo evaọ ukoko na, o rẹ sai su kpohọ eware iyoma efa. Wọhọ oriruo, ẹgo ọ rẹ sae raha udhedhẹ gbe okugbe nọ ọ rrọ ukoko na. Ofariẹ, nọ ma tẹ be hai gu iguẹgu kpahe ibe Ileleikristi mai, o rẹ sae kẹ ae uye nọ a te yo, yọ iguẹgu itieye na e rẹ sai su kpohọ ọtaraha. (Izerẹ 19:16; 1 Kọr. 5:11) Ahwo jọ nọ a jẹ hae go evaọ ukoko Ileleikristi ikpe-udhusoi ọsosuọ a jẹ “hẹ jẹ otu nọ uwuzou fiẹ, jẹ be rehọ otu ehru jijehwẹ.” (Jud 8, 16) Avro ọ riẹ hẹ, ahwo nọ a rẹ go kpahe inievo nọ i wo ewha-iruo evaọ ukoko na a re wo ọjẹrehọ Ọghẹnẹ hẹ.
14, 15. (a) Eme ọ rẹ via kẹ ukoko na nọ a tẹ be hae kẹ uzioraha ulogbo uvẹ? (b) Eme ma re ru nọ ma tẹ riẹ nọ ohwo jọ ọ raha uzi ulogbo?
14 Eme ma re ru nọ ma tẹ riẹ nọ ohwo jọ evaọ ukoko na ọ be hae lẹlẹ raha uzi, wọhọ oriruo, ọ be hae da idi thomawa, rri ifoto ẹbẹba, hayo yeri uzuazọ ọfariẹ-ogbe? (Ẹf. 5:11, 12) Nọ ma tẹ be hai gbolaro kẹ izieraha ilogbo itiena, o rẹ sai ru nọ ẹzi Jihova ọ rẹ rọ rehọ ẹmẹrera no ukoko na, o vẹ jẹ raha udhedhẹ nọ o rrọ ukoko na. (Gal. 5:19-23) Wọhọ epanọ a ta kẹ inievo obọ Kọrint inọ jọ a si ahwo oyoma no ukoko na, ere o gwọlọ nọ a re si ohwo kpobi nọ ọ rẹ wha ọraha fihọ ukoko na no nẹnẹ re emamọ ẹzi o ruẹse jọ ukoko na. Eme whọ rẹ sai ru rọ zọhọ fihọ udhedhẹ nọ o rrọ ukoko na?
15 Wọhọ epanọ ma ta no vẹre na, u fo ho re ma mu ta ẹme idhere omọfa lahwe, maero nọ oniọvo o te fievahọ omai te epanọ ọ rọ ta eva riẹ kẹ omai. U re yoma jẹ da gaga re ma ta eme idhere ohwo kẹ amọfa. O make rrọ ere na, nọ ohwo jọ evaọ ukoko na ọ tẹ raha uzi ulogbo jọ, u fo nọ ekpako na a rẹ riẹ kpahe iẹe. (Se Iruo-Izerẹ 5:1.) Fikiere, nọ ma tẹ riẹ nọ oniọvo jọ ọ raha uzi utioye, ma rẹ ta kẹe inọ jọ ọ nyae ta kẹ ekpako na re a fi obọ họ kẹe. (Jem. 5:13-15) Dede na, nọ edẹ jọ e tẹ ruemu no yo o ru ere he, ma vẹ nyae vuẹ ekpako na.
16. Ẹvẹ izieraha ilogbo nọ ma rẹ ta kẹ ekpako na u re ro fi obọ họ sẹro emamọ ẹzi nọ ọ rrọ ukoko na?
16 U fo nọ ukoko na o rẹ jọ oria ufuoma kẹ ohwo kpobi, yọ o gba omai họ nọ ma rẹ thọ ukoko na ẹkwoma ekpako na nọ ma rẹ ta kẹ otẹrọnọ ohwo jọ ọ raha uzi ulogbo. Nọ ekpako na a tẹ rọ ikereakere fi obọ họ kẹ oniọvo na, nọ ọ tẹ jẹ ọwhọkuo rehọ je kurẹriẹ, udhedhẹ ukoko na o gbẹ jọ ọza ha. Kọ otẹrọnọ oniọvo nọ ọ thuzi na o gbe kurẹriẹ hẹ, hayo nọ ọ tẹ siọ ohrẹ ekpako na? A re si ei no ukoko. Enẹ a re ro si egbegbe na no ukoko na jẹ sẹro emamọ ẹzi nọ ọ rrọ eva riẹ. (1 Ahwo Kọrint 5:5.) Ẹhẹ, ma rẹ ta kẹ ekpako na nọ ma tẹ riẹ nọ oniọvo jọ ọ thọ uzi ulogbo jọ, ma ve je ru onọ ekpako na a ta, ma vẹ rọ ere fi obọ họ kẹ ibe Ileleikristi mai.
ZỌHỌ FIHỌ ‘OKUGBE ỌVO ỌRỌ ẸZI NA’
17, 18. Eme o re fi obọ họ k’omai zọhọ fihọ ‘okugbe ọvo ọrọ ẹzi na’?
17 Ileleikristi ikpe-udhusoi ọsosuọ a ‘ruabọhọ uwuhrẹ ikọ na,’ jẹ rọ ere zọhọ fihọ okugbe nọ o jọ ukoko na. (Iruẹru 2:42) A rri ithubro Ikereakere na gbe ekpọvio nọ i no obọ ekpako na ze ghaghae. Fikinọ ekpako ukoko nẹnẹ a bi ru lele ithubro nọ i no obọ ọrigbo nọ o wo ẹrọwọ avọ areghẹ na ze, ohwo kpobi o bi wo uduotahawọ gbe obufihọ nọ a rẹ rọ yọrọ okugbe nọ ọ rrọ ukoko na. (1 Kọr. 1:10) Nọ ma te bi ru lele ehrẹ nọ ukoko Jihova o be kẹ omai no Ikereakere na ze je lele ithubro ekpako na, yọ ma bi dhesẹ nọ ma be zọhọ fihọ ‘okugbe ọvo ọrọ ẹzi na eva udhedhẹ.’—Ẹf. 4:3.
18 Fikiere, joma daoma gaga re ma yọrọ emamọ ẹzi nọ ọ rrọ ukoko na. Nọ ma te ru ere, ma wo imuẹro inọ ‘aruoriwo Olori na Jesu Kristi ọ te jọ kugbe ẹzi nọ ma bi dhesẹ.’—Fil. 4:23, NW.
[Enọ Uwuhrẹ]
[Uwoho nọ o rrọ ẹwẹ-obe avọ 19]
Kọ whọ be zọhọ fihọ emamọ ẹzi nọ ọ rrọ ukoko na ẹkwoma emamọ iyo nọ whọ rẹ ruẹrẹ kpahe?
[Uwoho nọ o rrọ ẹwẹ-obe avọ 20]
Zọhọ fihọ emamọ ẹzi nọ ọ rrọ ukoko na ẹkwoma ile ukoko na nọ who re wuhrẹ
