Hembenu Yililu Yayiwahi Yachipompelu

‘Luwi lwaMwanta Yesu Kristu lwikali naspiritu yenu.’—FWI. 4:23.

TUNATELI KUHEMBA ÑAHI YILILU YAYIWAHI MUCHIPOMPELU . . .

․․․․․

neyi tunakuhanjeka nawamana kwetu?

․․․․․

kuhitila mukudikita mumudimu wakushimwina?

․․․․․

kuhitila mukushimuna nshidi yeneni yinakoñiyi muntu?

1. Indi yipompelu yakuFwilipi nikuTiyatira ayihamekelelidi?

 AKWAKRISTU amuyaaka nkulakaji yakusambila amuFwilipi adiña atuzweñi kumujimba. Hela chochu, ahanineña nawa emikilili akwawu akwakwitiya chakutalilahu munsañu yakukeña. (Fwi. 1:3-5, 9; 4:15, 16) Hakunkulula mukanda windi wonenawu wayisonekeleliyi, kapostolu Pawulu wasonekeli nindi: “Luwi lwaMwanta Yesu Kristu lwikali naspiritu yenu.” (Fwi. 4:23) Chineli akwaKristu amuTiyatira niwena amwekesheli chililu chochimu, Yesu Kristu alemesheluwu wayilejeli nindi: “Neluki nyidimu yeyi, nikukeña kweyi, nikukuhwelela kweyi, nikukalakala kweyi, nikutatakena kweyi, neluki nami nyidimu yeyi yakukuminina yinabadiki yakusambila.”—Chim. 2:19.

2. Chumanyi chitwelaña hakwila tumwekeshi yililu yamuchipompelu chetu?

² Chipompelu chidi chejima chawaYinsahu jaYehova makonu chamwekeshaña yililu yimu. Yipompelu yikwawu ayiluka nawu ekala namuzañalu nikukeña. Yikwawu ayiluka nawu yadikitaña chikupu mumudimu wakushimwina Wanta nikulemesha mudimu wampinji yejima. Neyi twikala nayililu yayiwahi hamuntu hamuntu, tukunuñañana muchipompelu nawa chipompelu chejima chikwikala nayililu yayiwahi. (1 Kor. 1:10) Ilaña neyi twikala nayililu yatama tukuleñela antu kunoñoka kuspiritu, kubula kuzata nañovu mumudimu wakushimwina nikwiteja antu anakukoña yiluwa muchipompelu. (1 Kor. 5:1; Chim. 3:15, 16) Indi chipompelu chenu chekala nayililu yamuchidinyi? Indenu munateli kukolesha ñahi antu muchipompelu kulonda ekali nayililu yayiwahi?

KOLESHENU ANTU EKALI NAYILILU YAYIWAHI

3, 4. Tunateli ‘kumusakilila ñahi Yehova muchipompelu cheneni’?

³ Ñimbi yamasamu wembili nindi: “Nukukusakilila  [Yehova] muchipompelu cheneni, nukukuhameka mukachi kawantu amavulu.” (Mas. 35:18) Ñimbi yamasamu halekeli kumuhameka Yehova hampinji yadiñi nawambuña Nzambi amakwawuku. Kupompa kwachipompelu kwamulungu nimulungu, kushilahu Kudiza Kaposhi Kakutalila, kwatuleñelaña kuhosha neyena hayuma yitwakuhwelela. Wejima wetu twatela kudihula netu: ‘Komana nazataña nañovu kulonda nakuleñahu hakupompa? Komana naloñeshaña chiwahi nikwakulahu chachiwahi? Hakwikala mutu wachisaka, komana nakwashaña anyanami kuloñeshela chadimu nikuyidizisha chakwakulahu mumazu awu?’

⁴ Ñimbi yamasamu Davidi wesekejeli kukolesha nyichima yetu nakwimba. Wahosheli nindi: “Nadikolesha dehi mumuchima wami mbe, eyi Nzambi, nadikolesha dehi mumuchima wami mbe; nukwimba tumina, mwalala nukukuseña.” (Mas. 57:7) Tumina tutwazatishaña hakupompa kwawakwaKristu twatukwashaña ‘kwimba nikumuseña’ Yehova nakukolesha muchima. Neyi mweluka wanyi tumina tukwawu, kwila mutachika kudiza hampinji yaKudifukula kwaChisaka kwamelela nehi? Tufwilenuña ‘kumwimbila Yehova tumina nyaka yetu yejima yituchidi kuhanda; nikumuseña nyaka yejima yituchidi hohu.’—Mas. 104:33.

5, 6. Tunateli kwikala ñahi nachisambu nikuhana kudi antu, nawa neyi twila mwenimu tukukolesha antu muchipompelu kwiladi?

⁵ Kumwekeshela amana kwetu niahela chisambu hinjila yikwawu yaleñelaña antu kwikala nakukeña muchipompelu. Mumukanda windi wakukumishaku wasonekeleliyi aHeberu, Pawulu wabombelelumu iku kukonkomwena nindi: “Kakelenu kukeñañana nawana kwenu. Bayi muvulamena kukeña enyuku.” (Heb. 13:1, 2) Kuloñeshela ankoñi endaña niañodijawu yakudya hela antu azataña mumudimu wampinji yejima muchipompelu diyi njila yabadika kuwaha yakumwekeshelamu chisambu. Toñojokenu cheñi hadi antuluwa, yisaka yawanvwali ajiki hela antu amakwawu anateli kuhetelamu neyi tuyitambika mpinji jikwawu kulonda tudiili hamu nawu yakudya hela hakudifukula kwachisaka.

⁶ Pawulu wamulejeli Timotewu kukonkomwena amakwawu nindi “ilenuña chachiwahi, swejenu kwila nyidimu yayiwahi kulonda mumonaña yakukwasha nachu akwenu, ikalenu nanyichima yakuhana; nakudilumbikila yakutuña nachu  kunyaka yakenza, kulonda mwakakwati kuwumi, wowu wumi walala chikupu.” (1 Tim. 6:17-19) Pawulu wakonkomweneni akwawu akwakudifukula nindi ahaneña. Hela chakwila, mali anakali twatela kwikala nachililu chakuhana. Tunateli kwila mwenimu kuhitila mukuloñeshela antu anakaankili ñendelu hakuya nihakufuma kukupompa nimumudimu wamwiha. Chumanyi chatela kwilawu antu akwashañawu muniyi njila? Anateli kukolesha antu kwikala nayililu yayiwahi muchipompelu kuhitila mukusakilila, anateli kuhana mali adi ejima kulonda ayikwashi kulanda manji amumotoka. Kubombelahu, neyi tuhanjekaña nawamana kwetu niahela akuspiritu hadi mpinji yeneni akwiluka nawu twayikeña. Neyi tusweja kwilila nyidimu yayiwahi “akwetala dakwitiya kwakukuhwelela” nikudikeñela kuyinka yuma yetu nimpinji yetu tukumwekesha netu twayikeña nawa tukukwasha antu muchipompelu kwikala nayililu yayiwahi.—Ŋal. 6:10.

7. Indi kwikala nakajindilu hansañu yawakwetu kwatukwashaña ñahi kuhemba yililu yayiwahi muchipompelu?

⁷ Shinshikenu yuma yikwawu yaleñelaña tukoleshi mpanda yetu yakukeña nawakwetu akwakwitiya: wubwambu nikajindilu. (Tañenu Yishimu 18:24.) Amabwambu alala ajindaña nsañu yawakwawu. Neyi amana kwetu atuleja nsañu yawu yakujinda nawa anakuhweleli nawu hitukuleja muntu wudi wejimaku, mpanda yakukeña yitukweti yikukolelaku. Tutwalekenuhu kuhemba yililu yayiwahi muchipompelu neyi muchisaka kuhitila mukwikala amabwambu amawahi anateli kuhemba nsañu yakujinda.—Yish. 20:19.

DIKITENUÑA MUMUDIMU WAKUSHIMWINA

8. Indi akwaLayodikeya ayifumbili nawudi, nawa muloñadi?

⁸ Hampinji yahosheleñayi nachipompelu chaLayodikeya Yesu welili nindi: “Neluki nyidimu yeyi nami hiwutuuta hela kutataku; nakeñi nami wikali wutuuta hela kutata. Chiwuneli wukanvuyenki hohu, hela kutuuta hela kutata nehi, nikukufwija kwami mukanwa.” (Chim. 3:15, 16) AkwaLayodikeya hiyadiña neyena damudimu wawakwaKristuku. Chakadi nikujina yililu yamuchidiwu yaluwañesheli wulunda wawu. Dichi Yesu wayifumbili mukukeña nindi: “Antu ami inakeña nayikonkololaña nakuyifumba; dichi shaku muchima wubalumuki.”—Chim. 3:19.

9. Indi yililu yitukweti kutalisha hamudimu wakushimwina yakwashaña ñahi antu muchipompelu?

⁹ Hakwila nawu tukoleshi antu kwikala nayililu yayiwahi muchipompelu, twatela kudikita nankashi mumudimu wakushimwina. Chipompelu chekalilaku kulonda chikeñeña antu adi neyi anyikoku mwiluña dakushimwina nikuyikolesha kuspiritu.  Dichi twatela kuzata mumudimu wakwilisha atumbanji neyena neyi cheliliyi Yesu. (Mat. 28:19, 20; Luka 4:43) Neyi tusweja kwikala neyena dakuzata mudimu wakushimwina tukusweja kunuñañana neyi ‘akwakukalakala hamu naNzambi.’ (1 Kor. 3:9) Chitwamona akwetu anakuhakwilaku yuma yakuhwelelawu mumudimu wakushimwina nikuhameka yuma yakuspiritu, tukusweja kuyikeña nikuyilemesha. Cheñi nawa ‘kukalakala namuchima wumu’ mumudimu wakushimwina kwaleñelaña antu muchipompelu kwikala anuñañana.—Tañenu Zefwaniya 3:9.

10. Indi kuwahishaku nzatilu yetu mumudimu wamwiha kwaleñelaña antu amuchipompelu kwikala nachililwinyi?

¹⁰ Neyi tuzataña nañovu kulonda tuwahishuku mudimu wetu wakushimwina, chumichi chakwashaña chikupu amakwawu. Neyi twakamena chikupu antu itwawanaña, nikuwahishaku ntañishilu yetu kulonda tushikeña hanyichima yawantiyilili jetu tukwikala neyena nankashi mumudimu wakushimwina. (Mat. 9:36, 37) Iyena dinateli kusambukila akwetu. Yesu wayitemesheli atumbanji twindi nakushimwina ayedi ayedi bayi wumu wumuku. (Luka 10:1) Chumichi chayikwashili nikuyidizisha hohu wanyi ilaña ekalili neyena dakuzata mudimu wakushimwina. Komana twasakililaña wanyi neyi tuzatila hamu nawakwakushimwina aWanta adikita? Iyena diyamwekeshañawu datukoleshaña nawa datusañumunaña kuzata mumudimu wakushimwina.—Rom. 1:12.

BAYI MUTOBAÑA NIKUKOÑA YILUWAKU

11. Chililwinyi chekalili nawaIsarela amakwawu mumafuku aMosi, nawa chumanyi chayimwekeneni?

¹¹ Mwahitili hohu nyilungu yantesha kufuma hekaliluwu aIsarela munza wawuha, atachikili kwikala nachililu chakusekesha nikutoba. Chumichi chayikojejeli kudinkaña naYehova niantu atondeliyi. (Kwid. 16:1, 2) A Isarela antesha hohu afumini muEjipitu diwu ashikili Mwituña daChikaninu. Mosi niyena amwitejeli wanyi kwiñila mudina ituña muloña wayuma yeliliyi kutalisha hayililu yatama yamwekesheli chipompelu chawaIsarela. (Kuhit. 32:48-52) Chumanyi chitwatela kwila makonu kulonda tubuli kufwa mumuhetu wakwikala nayililu yatama?

12. Tunateli kutondolwela ñahi kwikala nachililu chakutoba?

¹² Bayi twikala nachililu chakutobaku. Hela chakwila kudizoza nikulemesha anlomboli amuchipompelu kunateli kutukwasha, twatela cheñi kutonda chiwahi antu akudikunda nawu. Kutonda yisela yatama chili kuhanjeka hadi mpinji yeneni nawakwetu akwanyidimu hela akashikola abulaña kwovwahila nshimbi jaloña mwafumaña yuma yatama. Chikuwaha neyi tutondolwela kuhanjeka nawantu ahoshaña yuma yatama hela akweti yililu yakudikaña.—Yish. 13:20.

13. Chililu chatama chakutoba chinateli kuleñela antu kwikala nayililwinyi yikwawu yatama yakisañanaña wuspiritu muchipompelu?

¹³ Chililu chakutoba chatama chinateli kuleñela antu kwikala nayililu yikwawu yatama yakisañanaña wuspiritu. Chakutalilahu, kutoba kunateli kuleñela chipompelu kubula kwikala nakuwunda nikunuñañana. Kubombelahu, kutoba hadi akwetu akwakwitiya kunateli kuyikatisha kumuchima nawa kunateli kuleñela antu kutachika kuvulumuna kuhitila mukushimuna nsachi nikutukana. (Lev. 19:16; 1 Kor. 5:11) Akwakutoba amuchipompelu chamuyaaka nkulakaji yakusambila adiña ‘nakudiwula wanta nikuhosha yuma yakusawula akwakulema.’ (Yuda 8, 16) Antu adiña nakutoba kutalisha hadi antu atondawu muchipompelu hiyadiña nawuselewa waNzambuku.

14, 15. (a) Kujinda nshidi yamuntu kunateli kuleta kukalanyi muchipompelu chejima? (b) Chumanyi chitwatela kwila neyi twiluka netu muntu nakoñi nshidi yeneni?

 ¹⁴ Tunateli kwiladi neyi chakwila twiluka netu muntu nakukoña nshidi yakusweka, hadaha kusweja kusheta walwa, kutala nyivwimbimbi yanzekesi hela kwikala chivumbi mukuhanda kwindi? (Efwes. 5:11, 12) Neyi tujinda nshidi yamaneni tunateli kukañesha spiritu yajila yaYehova kuzatika chiwahi muchipompelu nawa mukwikala kuwunda wanyi. (Ŋal. 5:19-23) Neyi chochafumishiluwu akwaKristu akusambila amuKorinda antu elileña yuma yatama muchipompelu, nimakonu antu ejima elaña yuma yatama atela kuyifumisha muchipompelu kulonda ahembi yililu yayiwahi yekalamu. Chumanyi chimwatela kwila kulonda muleti kuwunda muchipompelu?

¹⁵ Neyi chashimunawu hakusambila, chalema nankashi kwikala nakajindilu munsañu jikwawu, sweje-e dinu neyi amakwawu atuleja nsañu yahalwawu. Chatama nankashi nawa chakatishaña kumuchima neyi tutandisha nsañu yakujinda yamuntu wacheñi. Hela chakwila muntu nakoñi nshidi yeneni twatela kuleja antu etejawu muNsona kuzatila haniyi nsañu, aeluda muchipompelu. (Tañenu Alevi 5:1.) Dichi neyi twiluka netu mana kwetu hela muhela nakoñi nshidi yamuchidiwu, twatela kumukolesha yayi nakuyileja aeluda kulonda amukwashi. (Yak. 5:13-15) Hela chochu, neyi muntu yeniwu yahitishamu mpinji chakubula kuyileja aeluda, twatela kumushimuna.

16. Neyi tushimuna nshidi yeneni yinakoñiyi muntu tukuhemba ñahi yililu yayiwahi yekala muchipompelu?

¹⁶ Antu atela kwikala akiñewa muchipompelu chawakwaKristu, nawa twatela kuchikiña kuhitila mukushimuna nshidi yeneni yinakoñiyi muntu. Neyi aeluda amukwasha muntu wakoña nshidi kwiluka yuma yineliyi, nawa yabalumuka mumuchima nakwiteja kufumba kwanamufumbuwu, wukuleta kukala muchipompelu wanyi. Chumanyi chatela kwilawu neyi muntu wunakoñi nshidi nabalumuki wanyi mumuchima nawa nakaani kufumba kwakuwahi kwawaeluda? Kumuhaña muntu muchipompelu kwamwekeshaña nawu ‘anamukisañani’ hela kufumisha yuma yatama mukachi ketu nawa chumichi chikuleñela kuhemba yililu yayiwahi yamuchipompelu. (Tañenu 1 Akorinda 5:5.) Eñañi, kuhemba yililu yayiwahi muchipompelu kwakeñekaña wejima wetu kwikala nayililu yayiwahi nikunuñañana nezanvu dawaeluda hakukiña chihandilu chawakwetu akwakwitiya.

KOLESHENU ANTU EKALI ‘NASPIRITU YAKUNUÑAÑANA’

17, 18. Chumanyi chikutukwasha kwikala ‘naspiritu yakunuñañana’?

¹⁷ Atumbanji twaYesu akusambila akwashili antu kwikala nachililu chakunuñañana muchipompelu kuhitila ‘mukukakela mbe mukuleja kwawapostolu.’ (Yil. 2:42) Alemesheli kufumba niwunlomboli watambwileñawu kudi akulumpi. Hamuloña wakwila aeluda makonu azatilaña hamu nanduñu wamaana nikashinshi, antu ejima muchipompelu ayikoleshaña nikuyikwasha kwikala anuñañana. (1 Kor. 1:10) Neyi twovwahilaña kufumba kwamunyikanda yashindamena haBayibolu yamukuloñesha kwaYehova nikulondela wunlomboli wawaeluda, tukumwekesha netu ‘tunakuhemba spiritu yakunuñañana, nawa tukudikasa mwonji wakuwunda.’—Efwes. 4:3.

¹⁸ Komana wejima wetu tuzateña nañovu kulonda tuhembi yililu yayiwahi yekala muchipompelu. Neyi twila mwenimu tukwiluka chikupu netu, ‘luwi lwasweja lwaMwanta Yesu Kristu lukwikala naspiritu yitwamwekeshaña.’—Fwi. 4:23.

[Malwihu aKuzatisha haKudiza]

[Mwevulu wudi hefu 19]

Komana mwahembaña yililu yayiwahi kuhitila mukuloñesha chiwahi nsañu yakuhoshahu?

[Mwevulu wudi hefu 20]

Koleshenu yililu yayiwahi kuhitila mukwiluka tumina twetu?