Kogl-y yam-sõng ning sẽn be tigingã pʋgẽ wã
Kogl-y yam-sõng ning sẽn be tigingã pʋgẽ wã
“Bɩ Zusoab a Zezi Kirist ning yam ning yãmb sẽn tarã barka.”—FIL. 4:23, MN.
WÃN TO LA D TÕE N SÕNG TI YAM-SÕNG ZĨND TIGINGÃ PƲGẼ, . . .
․․․․․
d sã n wa be ne d tẽed-n-taasã?
․․․․․
d sã n moond koɛɛgã ne yẽesem?
․․․․․
d sã n bãng tɩ d tẽed-n-taag n maan yel-wẽn-kãseng tɩ d tɩ togse?
1. Bõe yĩng t’a Poll ne a Zezi pẽg Filip la Tiyatiir tigingã neba?
PIPI kiris-nebã wakatẽ, Filip tigingã neb nus ra pa zãad ye. La b ra yaa kõtba, n da wilgd b tẽed-n-taasã b nonglem ne b sũur fãa. (Fil. 1:3-5, 9; 4:15, 16) Tʋm-tʋmd a Poll lɛtr ning a sẽn tool-bã baasgẽ, a yeel-b-la woto: “Bɩ Zusoab a Zezi Kirist ning yam ning yãmb sẽn tarã barka.” (Fil. 4:23, MN) Tiyatiir tigingã neb me talla yam-sõng a woto buudu, t’a Zezi Kirist wa yeel-b woto: “Mam bãnga yãmb tʋʋmã la y nonglmã, la y tẽebã, la y tʋʋm-sõamyã, la y sũ-marã ne y yaoolem tʋʋmã sẽn yaa wʋsg n yɩɩd y pipi tʋʋmã.”—Wil. 2:19, Kãab-paalgã Koe-noogo.
2. Wãn to la yam ning tõnd ned kam fãa sẽn tarã tõe n tall pãng tigingã zugu?
2 Rũndã-rũndã me, a Zeova Kaset rãmbã tiging fãa tara a yam, bɩ zʋg a nebã wʋsg sẽn tare. Tigims kẽer yaa nonglmã. Sãnda moonda koɛɛgã ne yẽesem, tɩ b nebã wʋsg teend so-pakrã. Tõnd ned kam fãa sã n tar yam-sõngo, kɩtdame tɩ tigingã neb zemsd taaba, tɩ zood ning b fãa sẽn tar ne a Zeova wã pãng paasdẽ. (1 Kor. 1:10) La d sã n pa tar yam-sõngo, boogda d tẽebã la d yẽesmã, la tõe n kɩt meng tɩ d sak n bas neb sẽn maand yel-wẽn-kãsems tigingã pʋgẽ. (1 Kor. 5:1; Wil. 3:15, 16) Yam-bʋg la yãmb tigingã tara? Wãn to la y tõe n sõng tɩ yam-sõng zĩnd y tigingã pʋgẽ?
SÕNG-Y TƖ YAM-SÕNG ZĨND TIGINGÃ PƲGẼ
3, 4. Wãn to la d tõe n “pẽg [a Zeova] tigin-kãseng pʋgẽ”?
3 Yɩɩl-gʋlsd a Davɩɩd da yeela a Zeova woto: “Mam na n pẽga yãmb tigin-kãseng pʋgẽ, mam na n zẽka yãmb yʋʋr kʋʋn-kãseng sʋka.” (Yɩɩl 35:18) Yɩɩl-gʋlsdã sã n da wa be ne wẽn-tũudb a taaba, a ra pẽgda a Zeova. D tigissã d sẽn maand semen fãa wã yaa segb d sẽn tare, n tõe n wilg d tẽeb la d yẽesem ne d sẽn leokd sogsgã to-to wã maasem. Wala makre, Gũusg Gasgã zãmsgã sasa. Rẽnd yɩta sõma tɩ d sok d meng woto: ‘Rẽ yĩnga mam maanda m sẽn tõe fãa n kõt leoor tigissã sasa bɩ? Mam segenda tigissã neer sẽn na yɩl n tõogd n leokd sogsgã sõma bɩ? M sã n yaa zak soaba, m sõngda m kambã tɩ b segend sogsgã leoore, la m wilgd-b b sẽn tõe n leok ne b mens goam to-to bɩ?’
4 D tõe n wilga ne d sẽn yɩɩnd to-to d tigissã sasa wã tɩ d sũur keemame, rat n yeel tɩ d rata ne d sũur fãa n maan sẽn yaa tɩrga. A Davɩɩd yeela woto: “Mam Wẽnnaam, mam sũur kɛɛma, mam sũur kɛɛma. Mam na n yɩɩla ne yʋʋm-teed yãmb yĩnga.” (Yɩɩl 57:8) Sɩd me, d sã n wa yɩɩnd d tigissẽ wã, d tũuda “yʋʋm-teed” n yɩɩndẽ. D sã n nan pa mi yɩɩn-kãens sõma, d tõe n zãmsd-b-la d zak pʋgẽ zaabr Biibl zãmsgã sasa. D rat n dɩka yɩɩl-gʋlsdã naoore. A yeela woto: “Mam na n yɩɩla Zusoabã yĩng m vɩɩm wakate. Mam na n yɩɩla ne yʋʋm-teed m Wẽnnaam yĩng m vɩɩm tɛka.”—Yɩɩl 104:33.
5, 6. Wãn to la d tõe n maan taab sãand la d wilg tɩ d yaa kõtba, la wãn to la rẽ nafd tigingã?
5 D sã n maand d tẽed-n-taasã sãand me, tõe n kɩtame tɩ tigingã neb nonglem ne taab paase. A Poll lɛtr ning a sẽn tool kiris-neb nins sẽn da yaa hebre rãmbã yaoolem sakã pʋgẽ, a sagl-b-la woto: “Bɩ y kɩt tɩ ba-biis nonglem kell n zĩndi. Bɩ y ra yĩm tɩ maan sãambã sãand ye.” (Heb. 13:1, 2) D sã n segend n kõt tigims sul la distrik yel-gɛtbã ne b pagbã wall neb a taab me sẽn be wakat fãa tʋʋmdã pʋgẽ, d wilgdame tɩ d maanda d taabã sãando. D tõe n mi n boola pʋg-kõore, roagd sẽn wubd a kamb a yembre, wall neb a taab tɩ b naag-d n dɩ pa rẽ bɩ n maan d zak pʋgẽ zaabr Biibl zãmsgã.
6 Tʋm-tʋmd a Poll yeela a Tɩmote t’a sagl a taabã tɩ b ‘maan neere, la b yɩ neb sẽn maand tʋʋm-sõma wʋsgo, la b yɩ neb sẽn kõte, la sẽn nong n pʋɩ b sẽn tarã ne neb a taaba. Woto, bãmb na n bĩnga paoong wakat sẽn watã yĩnga, wa yẽbgr sẽn tar pãnga, tɩ b tõe n paam vɩɩm hakɩkã tɩ yɩ b pʋɩɩre.’ (1 Tɩm. 6:17-19, Kãab-paalgã Koe-noogo) A Poll yeela a tẽed-n-taasã woto n na n sagl-b tɩ b yɩ kõtba. Baa laog zu-loees sasa, d tõe n yɩɩ kõtba. Bũmb d sẽn tõe n maan zu-loe-kãens sasa n wilg tɩ d yaa kõta, yaa d sẽn na n dɩkd d tẽed-n-taas nins sẽn pa tar wiidi wall montɛyã n kẽnd koe-moonegã wall d tigissã. La wãn to la neb nins b sẽn sõngd woto wã yẽ tõe n wilg b mi-beoogo, la b teel tigingã neb yam-sõngã? B tõe n kõta ligd bilf esãensã ligd sẽn paasdã yĩnga. Bũmb a to d sẽn tõe n maan tɩ d tẽed-n-taasã bãng tɩ b tara yõod wʋsg d nifẽ, la tɩ d nong-b lame, yaa d sẽn na n nong b tũud-n-taare. D sã n maand “neb nins sẽn yaa tõnd ba-biis a Zezi tẽebã yĩngã” neere, n sakd n dɩkd d sẽk la d tarem n sõngd-ba, d paasda nonglem ning sẽn be d sʋkã pãnga. Rẽ kɩtdame me tɩ tigingã neb paamd yam-sõngo.—Gal. 6:10.
7. D sã n pa rɩkd d taabã yɛl n togsdẽ, wãn to la tõe n kɩt tɩ tigingã neb tall yam-sõngo?
7 Tigingã pʋgẽ, d sã n yõga zood ne d taaba, la d pa rɩkd b yɛlã n togsdẽ, paasda nonglem ning sẽn be-d sʋkã pãnga. (Karm-y Yelbũn 18:24.) Ned sã n yaa f zoa hakɩka, f sã n togsa f yelle, a pa rɩkd n togs ye. D tẽed-n-taag sã n togs-d a sũur gomde, n tõe n bas a yam tɩ d pa na n togs neda, zood ning sẽn be d sʋkã pãng na n paasame. Bɩ tõnd ned kam fãa mao n yɩ zoa sẽn lut a taab bãongo, tɩ tigingã neb nong taab wa zag-yɛng neba.—Yel. 20:19.
TALL-Y YẼESEM KOE-MOONEGÃ PƲGẼ
8. Sagl-bʋg la a Zezi kõ Laodise tigingã neba, la bõe yĩnga?
8 A Zezi sẽn wa n gomd ne Laodise tigingã nebã, a yeel-b-la woto: “Mam bãnga yãmb tʋʋmã. Mam miime tɩ yãmb ka maasga, la y ka tʋʋlg me ye. Mam nonga yãmb sã n da yaa maasg wall tʋʋlga. Woto yĩnga, yãmb sã n yaa zal-zal n ka maasg la y ka tʋʋlga, mam na n wʋka yãmb m noorẽ.” (Wil. 3:15, 16) Laodise tigingã neb ra pa moond koɛɛgã ne yẽesem ye. Tõe tɩ b manesem kãng ra sãamda b zĩid-n-taarã. Rẽ n so t’a Zezi yeel-b woto: “Mam lengda mam sẽn nong b rãmbã, la m sɩbgd bãmba. Woto yĩnga, bɩ y nang pãng la y tek yam n kos sugri.”—Wil. 3:19.
9. D sã n moond koe-noogã ne yẽesem, wãn to la nafd tigingã?
9 Sẽn na yɩl tɩ yam-sõng zĩnd tigingã pʋgẽ, d fãa segd n moonda koɛɛgã ne yẽesem. Tigingã tʋʋm-kãseng a ye yaa bao neb nins sẽn yaa sakdb wa piisã koe-moonegã zĩigẽ, n sõng-b tɩ b bãng Wẽnnaam la a raabã. Dẽnd d tog n dɩka a Zezi togs-n-taare, n sõngd nebã tɩ b lebg karen-biisi. (Mat. 28:19, 20; Luk 4:43) Yẽesem ning d sẽn tar koe-moonegã pʋgẽ wã sã n paasdẽ, d zems-n-taarã me pãng na n paasdame, bala koɛɛgã mooneg kɩtdame tɩ d yaa ‘Wẽnnaam tʋmd-n-taase.’ (1 Kor. 3:9) Koe-moonegã sasa, d sã n kelgd d taabã sẽn gomd b tẽebã yell to-to wã, la b sẽn wilgd tɩ b nonga a Zeova la sɩdã, d manegd n nong-b lame la d waoogd-ba. Sẽn paase, d sã n naagd taab n moond koɛɛgã ne “yam a yembre,” wata ne zems-n-taar tigingã pʋgẽ.—Karm-y Sofoni 3:9.
10. D sã n modgd n dat tɩ d sẽn moond to-to wã yɩ sõma n paase, wãn to la nafd d taabã?
10 D taabã sã n ne d sẽn modgd n dat tɩ d sẽn moond koɛɛgã to-to wã yɩ sõma n paasã me, sõngd-b lame. D sã n wilgdẽ tɩ d sẽn moond b rãmbã yell sɩd pak-d lame, la d modgd n dat tɩ d goamã kẽ-ba, d na n maneg n nonga koɛɛgã moonego. (Mat. 9:36, 37) D sã n tar yẽesem, tõe n kɩtame tɩ d tũud-n-taasã me yẽege. A Zezi sẽn wa n na n tʋm a karen-biisã tɩ b tɩ moonã, a pa tʋm-b yembr-yembr ye. A tʋm-b-la yiib-yiibu. (Luk 10:1) Woto pa keng b raood la paas b minimã bal ye. Kɩtame me tɩ b maneg n moon ne yẽesem. D sã n moond ne d tẽed-n-taag sẽn tar yẽesem, pa noom-d sɩda? A yẽesmã kengda d raoodo, tɩ d tʋll n ket n wɩngd ne tʋʋmdã.—Rom 1:12.
RA YẼGEM-Y WALL Y SOLG YEL-WẼN-KÃSENG YE
11. A Moiiz wakatẽ wã, yam-bʋg la Israyɛll neb kẽer tall-yã, la baasa wãna?
11 A Zeova sẽn yiis Israyɛll nebã Ezipt tɩ b lebg buud sẽn so a mengã poor bilf bala, b sɩnga yẽgengo. Rẽ yɩɩ sabab tɩ b wa tõdg a Zeova la a Moiiz ne a Aarõ sẽn da yaa neb nins a sẽn yãk n lʋɩɩs b taoorã. (Yik. 16:1, 2) Yaa Israyɛll neb nins sẽn yi Eziptã sõor bilf bal n paam n kẽ Kãabg Tẽngã pʋgẽ. Baa a Moiiz meng pa paam n kẽ ye! Bala, nin-buiidã wa n maana kɛgr t’a maan bũmb sẽn pa ta Wẽnnaam yam. (Tõo. 32:48-52) Rũndã-rũndã, bõe n tõe n sõng-d tɩ d ra wa tall yam sẽn pa zemse?
12. Bõe n tõe n sõng-d tɩ d ra wa nong yẽgengo?
12 D segd n gũusame n da wa nong yẽgeng ye. Yaa sɩd tɩ d sã n sikd d meng la d waoogd tigingã taoor-lʋɩtbã, sõng-d lame. La d tog n gũusa tũud-n-taarã wɛɛngẽ me. Bala, d sã n pa tũusd bũmb nins d sẽn maand n kokd pemsmã ne yam, pa rẽ bɩ d sã n wae n dɩkd sẽk wʋsg ne d tʋmd-n-taas wall d karen-bi-taas sẽn pa tũud a Zeova, d na n wa paama zu-loeese. Yɩta sõma tɩ d ra wae n tũud neb nins sẽn nong yẽgeng wall soog-m-mengã ye.—Yel. 13:20.
13. Yẽgeng tõe n waa ne zu-loe-bʋs me tiging pʋgẽ?
13 Yẽgeng tõe n waa ne zu-loees a taab tiging pʋgẽ. Wala makre, tõe n sãama zems-n-taar ning sẽn be tigingã pʋgẽ wã. Sẽn paase, d sã n yẽgemd d tẽed-n-taasã manesem sãnda poorẽ, sãamda b sũuri, la tõe n wa kɩtame tɩ d wɩt-b la kãnd-b me. (Maan. 19:16; 1 Kor. 5:11) Pipi kiris-nebã wakatẽ, tigingã neb nins sẽn da yẽgemdã ra ‘kɩɩsda neb nins sẽn tar noorã, la b gomd yĩngr pãens rãmbã wẽnga.’ (Ziid 8, 16) Yaa vẽeneg tɩ b sẽn da yẽgemd tigingã taoor dãmb poorẽ wã ra pa noom Wẽnnaam ye.
14, 15. a) Tigingã ned sã n maand yel-wẽn-kãseng tɩ d maand wa d pa ne, tõe n waa ne bõe? b) D sã n bãng tɩ d tẽed-n-taag n solgd n maand ye-wẽn-kãsenga, bõe la d segd n maane?
14 La d sã n wa bãng tɩ d tẽed-n-taag n maan yel-wẽn-kãseng yẽ? Wala makre, a sã n soosd n yũuda rãam tɩ loogdẽ, a sã n geta yoob yɛl wall a yoodame, d manesem segd n yɩɩ wãna? (Ef. 5:11, 12) D sã n maan wa d pa ne, tõe n kɩtame t’a Zeova pa le kõt tigingã neb a vʋʋsem sõngã, tɩ rẽ tõe n sãam zems-n-taar ning sẽn be tigingã pʋgẽ wã. (Gal. 5:19-23) Wa a Poll sẽn da sagl Korẽnt tigingã neb tɩ b “yiis rabɩl-kʋdgã,” rũndã-rũndã me, d segd n yiisa tʋʋm-wẽng soab fãa tigingã pʋgẽ, sẽn na yɩl tɩ yam-sõng kell n zĩndi. Bõe la y tõe n maan n sõng tɩ zems-n-taar ning sẽn be tigingã pʋgẽ wã pãng paase?
15 Wa d sẽn da zoe n wilgã, sasa ninga, pa segd tɩ ned sã n wa togs tõnd a yell bɩ d rɩk n togs neb a taab ye. Sẽn yɩɩd fãa, sã n yaa yɛl sẽn pak yẽ bala. D sã n dɩk yell a woto buud n togse, d maana a soabã wẽng wʋsgo! La sã n yaa yel-wẽn-kãsenga, segdame tɩ tigingã kãsem-dãmb bãnge. Gʋlsg Sõamyã wilgame tɩ yaa bãmb n segd n welg yellã. Traduction du monde nouveau wã pʋgẽ, Maankʋʋr 5:1 wã yeta woto: “Ned sã n wʋm kãab-wẽng zãma sʋka, n maan kaseto, wall a wa n wʋma rẽ kibare, a sã n pa togse, a maana yel-wẽnde, a tara taale.” Dẽnd d sã n bãng tɩ saam-biig wall saam-bi-poak n maan yel-wẽn-kãsenga, d segd n sagl-a lame t’a tɩ togs kãsem-dãmbã la a kos b sõngre. (Zak 5:13-15) La a sã n bas tɩ rat n kaoose, tõnd n segd n tɩ togse.
16. D sã n togs kãsem-dãmbã yel-wẽn-kãseng d tẽed-n-taag sẽn maane, wãn to la kogend tigingã?
16 Tigingã yaa koglg zĩiga. La sẽn na yɩl t’a kell n yɩ woto, d sã n bãng tɩ d tẽed-n-taag n maan yel-wẽn-kãsenga, d segd n togsa kãsem-dãmbã. B sã n sõng yellã soab t’a bãng t’a sẽn maanã sɩd yaa wẽng wʋsgo, t’a tek yam n kos sugr la a sak n deeg kiblgã, a pa le sãamd tigingã ye. La kãsem-dãmbã sã n sagl-a t’a pa sak n tek yam n kos sugr yẽ? B yiisd-a-la tigingã pʋgẽ. D sẽn pa le ‘maand tũud-n-taar ne ned’ a woto wã, wẽngã yi d sʋka, tɩ kogend tigingã yam-sõngã. (Karm-y 1 Korẽnt dãmb 5:11.) Dẽnd sẽn na yɩl n kogl yam-sõng ning sẽn be tigingã pʋgẽ wã, d sã n wa bãng tɩ d tẽed-n-taag n maan yel-wẽn-kãsenga, d ned kam fãa tog n maana sẽn segde, la a teel kãsem-dãmbã sull me. Woto la d wilgd tɩ d rata d tẽed-n-taasã neere.
MAO-Y TƖ D “FÃA SAK SƖƖG SÕNG RATEM”
17, 18. Bõe n na n sõng-d tɩ d tõog tɩ tigingã neb “fãa sak sɩɩg sõng ratem”?
17 A Zezi pipi karen-biisã sẽn ‘da sakd tẽn-tʋmdbã zãmsgã neerã’ yĩnga, tigingã neb ra vɩɩ zems-n-taar pʋgẽ. (Tʋʋ. 2:42, Kãab-paalgã Koe-noogo) B ra nanda sagls nins kãsem-dãmbã sẽn da tikd Gʋlsg Sõamyã n kõt-bã wʋsgo. Rũndã-rũndã me, tigingã neb fãa paamda raood kengr la sõngr ning b sẽn datã n tõogd n zemsd taaba, bala, kãsem-dãmbã sakda tʋm-tʋmd sẽn tũud sɩd la sẽn tar yamã saglsã. (1 Kor. 1:10) D sã n tũud sagls nins a Zeova siglgã sẽn kõt-dã la d sakd kãsem-dãmbã sor-wilgrã, d wilgdame tɩ d maoodame n dat tɩ d fãa “sak sɩɩg sõng ratem tɩ laafɩ zĩndi.”—Ef. 4:3.
18 Bɩ d fãa maan d sẽn tõe tɛk n sõng tɩ yam-sõng zĩnd tigingã pʋgẽ, la d kogl yam-kãnga. D sã n maand woto, d tõe n kɩsa sɩd tɩ ‘Zusoab a Zezi Kirist barkã na n zĩnda ne yam ning d sẽn tarã.’—Fil. 4:23.
[Zãmsgã sogsgã]
[Foto seb-neng 24]
Y segenda y mens n tõogd n leokd sõma sõssã sasa tɩ sõngdẽ tɩ yam-sõng be tigingã pʋgẽ bɩ?
[Foto seb-neng 25]
Modg-y n bãng-y yɩɩlã sõma, tɩ yam-sõng kell n zĩnd tigingã pʋgẽ
