Bɛmaa Asafo Ne Sunsum Kpalɛ Ne Ɛdɛnla Ɛkɛ
Bɛmaa Asafo Ne Sunsum Kpalɛ Ne Ɛdɛnla Ɛkɛ
“Awulae Gyisɛse Kelaese ɛlo bɛ na ɔ nee bɛ [sunsum ne] ɛdɛnla.”—FEL. 4:23.
KƐ ƆKƐYƐ NA YƐABOA YƐAMAA MENLI ANYIA SUNSUM KPALƐ WƆ ASAFO NE ANU . . .
wɔ mekɛ mɔɔ yɛ nee yɛ mediema ɛlɛbɔ la ɛ?
ɔlua wuluwuluyɛlɛ mɔɔ yɛfa yɛyɛ daselɛlilɛ gyima ne la azo ɛ?
ɔlua ɛtane mɔɔ yɛka yɛkile mgbanyima ne mɔ la azo ɛ?
1. Duzu ati a Pɔɔlo nee Gyisɛse Kelaese hanvole asafo mɔɔ ɛnee wɔ Felepae nee Tayataela la ɛ?
ƐNEE ɛvoya mɔɔ lumua la anu Keleseɛnema mɔɔ wɔ Felepae la ɛnlɛ bie. Noko, bɛlale nyele nee ɛlɔlɛ kpole ali bɛhilele bɛ mediema. (Fel. 1:3-5, 9; 4:15, 16) Yemɔti, Pɔɔlo hɛlɛle bɛ kɛ: “Awulae Gyisɛse Kelaese ɛlo bɛ na ɔ nee bɛ [sunsum ne] ɛdɛnla.” (Fel. 4:23) Kɛmɔ ɛnee Keleseɛnema mɔɔ wɔ Tayataela la lɛ sunsum, anzɛɛ subane ko ne ala bie la ati, Gyisɛse Kelaese zele bɛ kɛ: “Meze wɔ gyima. Meze wɔ ɛhulolɛ mɔɔ ɛlɛ ye, wɔ nɔhalɛ mɔɔ ɛdi, wɔ ɛzonlenlɛ mɔɔ ɛsonle, nee wɔ abotane mɔɔ ɛlɛ la amuala. Meze kɛ kɛkala ɛlɛbɔ mɔdenle wɔadɛla alumua ne.”—Yek. 2:19.
2. Kɛzi yɛ nyɛleɛ ka sunsum mɔɔ yɛ asafo ne da ye ali la ɛ?
2 Gyihova Alasevolɛ asafo mɔɔ wɔ ɛkɛ ɛnɛ la anu biala da sunsum, anzɛɛ subane fɔɔnwo bie ali. Bɛze asafo bie mɔ kɛ bɛda nyele nee ɛlɔlɛ ali. Bie mɔ noko bɔ mɔdenle kpalɛ wɔ edwɛkɛhanlɛ ne nee adekpakyelɛ gyima ne anu. Saa yɛ kɔsɔɔti yɛbɔ mɔdenle yɛda subane kpalɛ ali a, yɛboa yɛmaa koyɛlɛ nee sunsum kpalɛ mɔɔ ɔwɔ asafo ne anu la tɛnla ɛkɛ. (1 Kɔl. 1:10) Noko akee, saa yɛanla subane kpalɛ ali a, bie a ɛhye bahola amaa asafo ne anu amra mɔdenlebɔlɛ aha aze, bɛnrɛhɔ daselɛlilɛ kpalɛ, na bie a bɛamaa ɛtaneyɛlɛ nwo adenle. (1 Kɔl. 5:1; Yek. 3:15, 16) Sunsum anzɛɛ subane boni a wɔ asafo ne da ye ali a? Kɛ ɔkɛyɛ na wɔamaa subane kpalɛ nwo anwosesebɛ wɔ asafo ne anu ɛ?
MAA SUBANE KPALƐ NWO ANWOSESEBƐ
3, 4. Kɛzi yɛye Gyihova ayɛlɛ wɔ asafo ne anu ɛ?
3 Devidi dole edwɛne manle Gyihova kɛ: “Mebayɛ wɔ mo wɔ wɔ menli ne nyianu kpole ne anu; na meaye wɔ ayɛlɛ wɔ bɛ muala bɛ nyunlu ɛkɛ.” (Edw. 35:18) Edwɛndolɛnli ne yele Gyihova ayɛlɛ wɔ mekɛ mɔɔ ɛnee ɔwɔ Nyamenle azonvolɛ avinli la. Yɛ dapɛne biala asafo debiezukoalɛ ne mɔɔ bie a le Ɛzinzalɛ Arane Ɛzukoalɛ ne la, maa yɛdua yɛ mualɛ ɛmanlɛ zo yɛda yɛ mɔdenlebɔlɛ nee yɛ diedi ali. Ɔwɔ kɛ awie biala biza ɔ nwo kɛ: Asoo mebɔ mɔdenle memaa mualɛ dɔɔnwo wɔ debiezukoalɛ bo? Mesiezie me nwo kpalɛ amaa meahola meamaa mualɛ mɔɔ fɛta ɔ? Kɛ abusua tile la, kolaa na yɛahɔ debiezukoalɛ la asoo meboa me mra memaa bɛsiezie bɛ nwo na mekile bɛ kɛzi bɛbava bɛ edwɛkɛ bɛamaa mualɛ ɔ?
4 Yɛbahola yɛalua kɛzi yɛto edwɛne wɔ debiezukoalɛ bo la azo yɛahile kɛ yɛlɛ ahonle mɔɔ gyi kpundii, ahonle mɔɔ ɛsika ɔ bo kɛ ɔyɛ mɔɔ ɔtenrɛ la. Devidi hanle kɛ: “O Nyamenle, me ahonle gyi kpundii, me ahonle gyi kpundii! Mebado edwɛne meaye wɔ ayɛlɛ!” (Edw. 57:7) Edwɛne mɔɔ yɛto ye wɔ debiezukoalɛ bo la maa yɛnyia nwolɛ adenle yɛfa ahonle mɔɔ gyi kpundii la yɛye Gyihova “ayɛlɛ!” Saa yɛnze edwɛne ne bie mɔ to kpalɛ a, yɛbahola yɛazukoa ye wɔ yɛ abusua ɛzonlenlɛ ne abo. Yɛkpondɛ kɛ yɛyɛ mɔɔ edwɛndolɛnli ɛhye yɛle la bie: “Mekɛ tendenle mɔɔ mede aze la, mebado edwɛne meamaa [Gyihova]; mede ngoane nu la, mebado ayɛlɛyelɛ edwɛne meamaa me Nyamenle.”—Edw. 104:33.
5, 6. Kɛ ɔkɛyɛ na yɛala ɛyɛvolɛyɛlɛ nee nyeleyɛlɛ ali yɛahile awie mɔ ɛ? Kɛzi ɛhye baboa asafo ne ɛ?
5 Saa yɛda ɛyɛvolɛyɛlɛ ali yɛkile yɛ mediema a, yɛbamaa bɛanyia ɛlɔlɛ wɔ asafo ne anu. Pɔɔlo hanle ye wɔ ye kɛlata ne mɔɔ ɔhɛlɛle Hibuluma la tile mɔɔ li awieleɛ la anu kɛ: “Bɛhɔ zo bɛhulo bɛ nwo ngoko ngoko kɛ mediema . . . Bɛhakye kɛ bɛkɛlie nyɛvolɛ wɔ bɛ azua nu.” (Hib. 13:1, 2) Adenle kpalɛ mɔɔ yɛdua zo yɛda ɛyɛvolɛyɛlɛ ali la a le kɛ yɛbavɛlɛ neavolɛ adenduvo nee ɔ ye, anzɛɛ mediema mɔɔ yɛ dahuu ɛzonlenlɛ gyima ne wɔ asafo ne anu la yɛ nee bɛ ali debie. Ɔdwu mekɛ ne bie a yɛbahola yɛavɛlɛ ahunlanvolɛ, ɛrɛladane ko mbusua, anzɛɛ awie mɔ gyɛne yɛ nee bɛ ali aleɛ anzɛɛ yɛayɛ abusua ɛzonlenlɛ.
6 Pɔɔlo zele Temɔte kɛ ɔdendɛ ɔhile awie mɔ kɛ bɛyɛ nyele, bɛyɛ nyɛleɛ kpalɛ, na bɛva atiakunlukɛnlɛma nee ɛhulolɛ bɛhyɛ debie. “Ye zɛhae ɛnee bɛlɛkuohua bɛ agyadeɛ nloa mɔɔ bayɛ sua bo ɛdolɛ amaa bɛ wɔ kenle bie, amaa bɛ sa aha ngoane ne mɔɔ le nɔhalɛ ngoane ne la.” (1 Tem. 6:17-19) Ɛnee Pɔɔlo ɛlɛmaa ɔ mediema mrenya nee mraalɛ anwosesebɛ kɛ bɛzukoa nyeleyɛlɛ. Saa yɛ ɛzukoa gyinlabelɛ ɛnle kpalɛ bɔbɔ a, yɛbahola yɛayɛ nyele. Kɛ neazo la, saa yɛlɛ kale a, yɛbahola yɛava awie mɔ yɛahɔ daselɛlilɛ anzɛɛ debiezukoalɛ. Noko kɛ ɔkɛyɛ na mediema mɔɔ bɛboa bɛ wɔ adenle ɛhye azo la ahile anyezɔlɛ na bɛamaa awie mɔ ala subane kpalɛ ali wɔ asafo ne anu ɛ? Bɛbahola bɛamaa ye debie ekyi yeadua ye kakɛ ne bie. Debie bieko mɔɔ yɛbahola yɛayɛ yɛamaa yɛ mediema ade nganeɛ kɛ bɛ nwo hyia la a le kɛ yɛbanyia mekɛ yɛamaa bɛ. Saa yɛyɛ nyele yɛmaa “bɛdabɛ mɔɔ yɛ nee bɛ yɛ muala yɛlɛ diedi ko la” na yɛfa yɛ mekɛ nee ninyɛne mɔɔ yɛlɛ la yɛboa bɛ a, ɔbamaa ɛlɔlɛ mɔɔ yɛlɛ yɛmaa bɛ la ayɛ kpole na yɛamaa bɛdabɛ mɔɔ bɛwɔ asafo ne anu la ala sunsum kpalɛ ali.—Gal. 6:10.
7. Saa yɛanga yɛ gɔnwo mɔ fealera nu edwɛkɛ yɛangile a, kɛzi ɔmaa sunsum kpalɛ tɛnla asafo ne anu ɛ?
7 Agɔnwolɛvalɛ nee awie fealera nu edwɛkɛ mɔɔ yɛnla ye ali la noko boa maa ɛlɔlɛ mɔɔ yɛlɛ yɛmaa yɛ nwo la yɛ kpole. (Bɛgenga Mrɛlɛbulɛ 18:24.) Saa yɛ gɔnwo bie ka ye fealera nu edwɛkɛ kile yɛ na yɛanga yɛangile awie mɔ a, ɛnee ɔkile kɛ yɛle agɔnwolɛ kpalɛ. Yɛnga yɛ gɔnwo mɔ fealera nu edwɛkɛ yɛngile awie mɔ. Saa yɛ diema bie ka ye edwɛkɛ nee kɛzi ɔte nganeɛ la kile yɛ a ɛnee ɔlɛ diedi wɔ yɛ nu kɛ yɛnrɛha yɛnrɛhile awie mɔ la ati ɔ, na ɔmaa ɛlɔlɛ mɔɔ ɔwɔ yɛ nee ye avinli la yɛ kpole. Bɛmaa yɛyɛ agɔnwolɛma mɔɔ kola fa fealera nu edwɛkɛ sie na yɛboa yɛmaa asafo ne ɛyɛ kɛ abusua mɔɔ ɛlɔlɛ wɔ nu la.—Mrɛ. 20:19.
YƐ WULUWULU WƆ ƐZONLENLƐ GYIMA NE ANU
8. Edwɛkɛ boni a Gyisɛse hanle hilele Lawɔdesiama a? Duzu ati ɔ?
8 Gyisɛse hanle hilele Lawɔdesia asafo ne kɛ: “Meze mɔɔ wɔyɛ la; meze kɛ wɔmɔ, ɛnle yɔlɔkɔkɔ yɛɛ ɛnle wuluwulu. Me kunlu a anrɛɛ ɛnee ɛle wuluwulu anzɛɛ yɔlɔkɔkɔ. Na kɛmɔ ɛle adodɔlera, na ɛnle wuluwulu anzɛɛ yɔlɔkɔkɔ la, mebakpulu wɔ meagua.” (Yek. 3:15, 16) Ɛnee Lawɔdesiama ɛnle wuluwulu wɔ ɛzonlenlɛ ne anu. Ɔbayɛ kɛ subane ɛhye hanle nganeɛ mɔɔ ɛnee bɛte bɛmaa bɛ nwo wɔ asafo ne anu la. Yemɔti, Gyisɛse vi ɛlɔlɛ nu zele bɛ kɛ: “Bɛdabɛ mɔɔ mekulo bɛ la, metwi bɛ nyunlu na metea bɛ. Zɔhane ati bɔ mɔdenle nu ɛ nwo na yɛ gyima ɛsesebɛ.”—Yek. 3:19.
9. Kɛzi yɛ mɔdenlebɔlɛ wɔ daselɛlilɛ nu ka asafo ne ɛ?
9 Saa yɛkpondɛ kɛ asafo ne nyia sunsum kpalɛ a, ɛnee ɔwɔ kɛ yɛyɛ wuluwulu anzɛɛ yɛbɔ mɔdenle wɔ daselɛlilɛ nu. Asafo ne bodane ko a le kɛ yɛbanyia menli mɔɔ lɛ ahonle kpalɛ wɔ azɛlɛsinli ne anu la yɛahilehile bɛ nɔhalɛ ne. Yemɔti, ɔwɔ kɛ yɛsukoa Gyisɛse na yɛyɛ wuluwulu wɔ ɛdoavolɛyɛlɛ gyima ne anu. (Mat. 28:19, 20; Luku 4:43) Mekɛ mɔɔ yɛlɛbɔ mɔdenle kpalɛ wɔ ɛzonlenlɛ gyima ne anu la, ɛnee ko mɔɔ yɛyɛ kɛ “Nyamenle egyinli nu gyimayɛvoma” la anu ɛlɛmia. (1 Kɔl. 3:9) Saa yɛ nee awie mɔ kɔ daselɛlilɛ na yɛnwu kɛzi bɛkilehile bɛ diedi ne anu bɛfa bɛda ɛlɔlɛ mɔɔ bɛlɛ bɛmaa Gyihova nee nɔhalɛ ne la ali a, ɔmaa yɛnyia ɛlɔlɛ nee ɛbulɛ kpole yɛmaa bɛ. Bieko, saa yɛbɔ nu yɛyɛ gyima wɔ daselɛlilɛ nu a, ɔmaa koyɛlɛ ba asafo ne anu.—Bɛgenga Zɛfanaya 3:9.
10. Kɛzi mɔdenle mɔɔ yɛbɔ kɛ yɛbali daselɛ kpalɛ la ka asafo ne anu amra ɛ?
10 Mɔdenle mɔɔ yɛbɔ kɛ yɛbali daselɛ kpalɛ la noko boa awie mɔ. Saa yɛkile menli mɔɔ yɛyia bɛ wɔ daselɛlilɛ nu la anwo anyelielɛ kpalɛ na yɛbɔ mɔdenle kɛ yɛbamaa edwɛkɛ ne aha bɛ ahonle a, anyelielɛ mɔɔ yɛlɛ ye wɔ ɛzonlenlɛ gyima ne anwo la yɛ kpole. (Mat. 9:36, 37) Saa yɛ nye die a, menli mɔɔ nee yɛ lua la noko anye balie. Gyisɛse anzoa ye ɛdoavolɛ ne mɔ ngoko kɛ bɛhɔha edwɛkɛ ne, emomu, ɔzoanle bɛ nwiɔ nwiɔ. (Luku 10:1) Ɛhye manle bɛnyianle anwosesebɛ, ndetelɛ, na bɛ nye liele wɔ daselɛlilɛ nu. Nɔhalɛ nu, yɛ nye die kɛ yɛ nee nolobɔlɛma mɔɔ bɔ mɔdenle la bahɔ daselɛlilɛ! Bɛ mɔdenlebɔlɛ ne boa yɛ maa yɛkɔ zo yɛka edwɛkɛ ne.—Wulo. 1:12.
MMATENDƐ Ɛ NZO ABO YƐƐ MMAFEA ƐTANE ZO
11. Subane boni a Yizilayɛma bie mɔ lale ye ali wɔ Mosisi mekɛ zo a? Duzu a ɛhye manle bɛyɛle a?
11 Gyihova yɛle Yizilayɛma maanle la, yeangyɛ bɛbɔle ɔ bo bɛdendɛle bɛ nzo abo. Ɛhye manle bɛdwazole bɛtiale Gyihova nee Mosisi yɛɛ Aalɔn mɔɔ ɛnee bɛgyi ɔ gyakɛ anu la. (Ade. 16:1, 2) Yizilayɛma mɔɔ vile Yigyibiti la anu ekyi bie a hɔle Ɛwɔkɛ Azɛlɛ ne azo a. Mosisi bɔbɔ angɔ azɛlɛ ne azo bie ɔlua mɔɔ ɔyɛle ye wɔ subane ɛtane mɔɔ Yizilayɛma lale ye ali anwo la ati. (Mɛla 32:48-52) Duzu a yɛbahola yɛayɛ ye ɛnɛ amaa yɛahoati subane ɛtane a?
12. Duzu a baboa yɛ na yɛannyia bɛ nzo abo ɛdendɛlɛ subane a?
12 Ɔwɔ kɛ yɛnea boɛ na yɛannyia bɛ nzo abo ɛdendɛlɛ subane. Saa yɛbɛlɛ yɛ nwo aze yɛmaa mgbanyima ne mɔ na yɛbu bɛ a, ɔbamaa yɛahoati subane ɛhye. Debie bieko mɔɔ bahola aboa yɛ la a le boɛ mɔɔ yɛbanlea wɔ agɔnwolɛ ɛkpalɛ nwo la. Saa yɛfa ninyɛne mɔɔ ɛnle kpalɛ la yɛdielie yɛ nye anzɛɛ yɛ nee menli mɔɔ ɛndie Gyihova la fa mekɛ dɔɔnwo yɛ ninyɛne wɔ sukulu anzɛɛ gyima nu a, ninyɛndane bavi nu ara. Nrɛlɛbɛ wɔ nu kɛ yɛ nee menli mɔɔ tendɛ bɛ nzo abo anzɛɛ kpondɛ kɛ bɛdi bɛ ti anwo la ɛnrɛbɔ kyengye.—Mrɛ. 13:20.
13. Sunsum nu ngyegyelɛ boni a bɛ nzo abo ɛdendɛlɛ bahola ava ara asafo ne anu a?
13 Saa menli mɔɔ wɔ asafo ne anu la kɔ zo tendɛ bɛ nzo abo a, ngyikyi ngyikyi, ɔbamaa bɛava bɛ nwo bɛawula nyɛleɛ mɔɔ bazɛkye agɔnwolɛvalɛ mɔɔ bɛ nee Gyihova lɛ la anu. Kɛ neazo la, saa yɛtendɛ yɛ nzo abo a, ɔbazɛkye asafo ne anzondwolɛ nee koyɛlɛ. Bieko, saa yɛka yɛ mediema anwo edwɛkɛ ɛtane a ɔbamaa bɛali nyane na ɔkola ɔyɛ nzekuebɔlɛ nee ɛsokpalɛ. (Sɛlɛ. 19:16; 1 Kɔl. 5:11) Bɛhanle menli mɔɔ dendɛle bɛ nzo abo wɔ ɛvoya ne mɔɔ lumua anu la bie mɔ anwo edwɛkɛ kɛ, “bɛkpo Nyamenle tumi ne na bɛtendɛ bɛtia anyunlunyiama mɔɔ wɔ anwuma la.” (Dwu. 8, 16) Nɔhalɛ nu, Nyamenle anye anlie menli ɛhye mɔ anwo.
14, 15. (a) Saa yɛmaa ɛtane kɔ zo wɔ asafo ne anu a duzu a bahola azi a? (b) Saa yɛnwu kɛ awie ɛyɛ ɛtane ɛvea a duzu a ɔwɔ kɛ yɛyɛ a?
14 Na saa ɛnwu kɛ awie ɛyɛ ɛtane kpole bie, mɔɔ le kɛ nzabolɛ, nla nwo nvoninli ɛnleanlɛ, anzɛɛ ɛbɛlatane na yevea zo ɛ? Duzu a ɛbayɛ a? (Ɛfɛ. 5:11, 12) Saa yɛbu yɛ nye yɛgua ɛtane kpole zo a, Gyihova bahola aye ye sunsum ne avi asafo ne azo. Ɛhye bahola azɛkye asafo ne anu amra kɔsɔɔti anzondwolɛ. (Gal. 5:19-23) Pɔɔlo zele Keleseɛnema mɔɔ ɛnee wɔ Kɔlente la kɛ “bɛye fɛlɛ ne mɔɔ ɛlɔ azonlɛ la wɔ bɛ avinli.” Ɛnɛ noko, ɔwɔ kɛ yɛye ɛtane yɛfi asafo ne anu amaa asafo ne anwo ade. Duzu a ɛbahola wɔayɛ wɔaboa amaa anzondwolɛ adɛnla asafo ne anu a?
15 Kɛmɔ yɛlumua yɛha la, ɔnle kɛ yɛka yɛ gɔnwo mɔ fealera nu edwɛkɛ yɛkile awie mɔ, titile mekɛ mɔɔ bɛkɛla bɛ nganeɛdelɛ nee bɛ nzuzulɛ ali bɛkɛhile yɛ la. Ɔle nvonleɛ kpole kɛ yɛkɛha awie mɔ fealera nu edwɛkɛ yɛkɛhile menli gyɛne! Noko akee, saa awie yɛ ɛtane kpole a, ɔwɔ kɛ asafo ne anu mgbanyima te. Bɛdabɛ a ɛzonlelilɛ la bɛ nwo zo kɛ ɔwɔ kɛ bɛgyinla Ngɛlɛlera ne azo bɛdi edwɛkɛ ne anwo gyima a. (Bɛgenga Sɛlɛvolɛma 5:1.) Yemɔti, saa yɛze kɛ adiema bie ɛyɛ ɛtane kpole a, ɔwɔ kɛ yɛka yɛkile ye kɛ ɔhɔha ɔhile mgbanyima ne mɔ ɔmaa bɛboa ye. (Gye. 5:13-15) Noko akee, saa yɛmaa ye mekɛ ekyi na yeanga a, ɔwɔ kɛ yɛkɔka.
16. Kɛzi awie ɛtane mɔɔ yɛbaha yɛahile mgbanyima ne mɔ la maa yɛbɔ asafo ne anwo bane ɛ?
16 Ɔwɔ kɛ menli te nganeɛ kɛ bɛlɛ anwobanebɔlɛ wɔ Keleseɛne asafo ne anu, na yɛboa yɛmaa bɛbɔ nwolɛ bane ɔlua ɛtane kpole mɔɔ awie mɔ kɛyɛ mɔɔ yɛbaha yɛahile mgbanyima ne mɔ la azo. Saa mgbanyima ne mɔ boa ahenle mɔɔ ɛyɛ ɛtane la maa ɔte kɛzi anyebolo wɔ ye ɛtane ne anu la abo, na ɔnu ɔ nwo ɔmaa bɛboa ye a, asafo ne sunsum ɛnrɛzɛkye. Na saa ahenle mɔɔ ɛyɛ ɛtane la annu ɔ nwo yeammaa mgbanyima ne mɔ amboa ye ɛ? Yemɔ bɛbadu ye bɛavi asafo ne anu. Wɔ adenle ɛhye azo, mgbanyima ne mɔ baye ɛtane ne avi asafo ne anu na bɛabɔ sunsum mɔɔ wɔ nu la anwo bane. (Bɛgenga 1 Kɔlentema 5:5, NW. *) Yemɔti, yɛ kɔsɔɔti yɛdi ɛzonle kɛ saa yɛnwu kɛ awie ɛyɛ ɛtane a, ɔwɔ kɛ yɛbɔ mgbanyima ne mɔ amaneɛ na yɛdi bɛ adehilelɛ zo. Bɛmaa yɛyɛ ninyɛne mɔɔ baboa yɛ mediema la na yɛbɔ asafo ne anwo bane.
“KOYƐLƐ NE MƆƆ SUNSUM NE ƐVA ƐMAA” LA
17, 18. Duzu a baboa yɛ na yɛamaa koyɛlɛ adɛnla asafo ne anu a?
17 Gyisɛse ɛdoavolɛma mɔɔ lumua la boale manle koyɛlɛ rale asafo ne anu ɔluakɛ “bɛdule bɛ nwo bɛmanle ɛzoanvolɛma ne ngilehilelɛ ne.” (Gyi. 2:42) Bɛbule adehilelɛ mɔɔ mgbanyima ne mɔ gyinlanle Ngɛlɛlera ne azo vale manle bɛ la kɛ ɔsonle bolɛ. Ɛnɛ noko, ɔluakɛ mgbanyima ne mɔ di akɛlɛ nɔhavo nee nrɛlɛbɛvolɛ eku ne adehilelɛ nzi la ati, asafo ne nyia moalɛ nee anwosesebɛmanlɛ mɔɔ bɛhyia nwo na bɛava koyɛlɛ bɛazonle la. (1 Kɔl. 1:10) Saa yɛtie Baebolo ne anu folɛdulɛ mɔɔ Gyihova ahyehyɛdeɛ ne fa maa yɛ la na yɛdi mgbanyima ne mɔ adehilelɛ zo a, ɛnee yɛlɛdi edwɛkɛ ne mɔɔ se: “Bɛbɔ mɔdenle kɛ bɛkɛdɛnla [anzondwolɛ] nu na bɛmaa koyɛlɛ ne mɔɔ Sunsum ne ɛva ɛmaa bɛ la ɛwoa ɛkɛ ne dahuu” la azo.—Ɛfɛ. 4:3.
18 Bɛmaa yɛyɛ mɔɔ yɛbahola biala la yɛboa yɛmaa asafo ne ɛnyia sunsum kpalɛ na sunsum zɔhane ɛdɛnla ɛkɛ. Saa yɛyɛ ɛhye a, yɛbahola yɛanyia anwodozo kɛ “Awulae Gyisɛse Kelaese” ɛlolɛ ne baha sunsum ne mɔɔ yɛda ye ali la.—Fel. 4:23.
[Ɔ bo ɛkɛ ne edwɛkɛ]
^ ɛden. 16 1 Kɔlentema 5:5, (NW) kenga kɛ: “Bɛye sonla ɛhye bɛwula Seetan asa anu amaa ye nwonane ne azɛkye, na bɛalie ye sunsum ne ngoane wɔ Awulae kenle ne.”
[Debiezukoalɛ kpuyia ne mɔ]
[Nvoninli wɔ mukelɛ 24]
Ɛda sunsum kpalɛ ali wɔ asafo ne anu ɔlua mualɛ mɔɔ ɛmaa la azo ɔ?
[Nvoninli wɔ mukelɛ 25]
Da sunsum kpalɛ ali ɔlua yɛ edwɛne ne mɔ mɔɔ ɛbazukoa ye kpalɛ la azo
