Jo Me Ot Ma Dinigi Opokke Gitwero Bedo Ki Yomcwiny

“Ingeyo nining ka ibilaro cwari [nyo dakoni]?”​—1 KOR. 7:16.

TIKA ITWERO NONGO LAGAM PI LAPENY MAGI?

Ngo ma Lakricitayo romo timone me kelo kuc ka ce dakone nyo cware pe i woro me ada?

Lakricitayo romo konyo jo me ode nining me jolo woro me ada?

Ngo ma jo mukene giromo timone me konyo luye luwotgi ma coggi nyo mongi dinigi opokke?

1. Ka ngat mo oye kwena me Ker-ri, man kelo adwogi ango i kom jo me pacone?

 ININO mo acel ma Yecu ocwalo lukwenane ka tito kwena, en owaco botgi ni ka “wutye ka wot wutit lok kun wuwaco ni, ‘Ker me polo dong onyiko cok.’” (Mat. 10:1, 7) Kwena man maber-ri bikelo kuc kacel ki yomcwiny bot jo ma gijolo ki cwinygi ducu. Ento, Yecu bene ociko lukwenane-ni jo mapol pe gibijolo kwena me Ker ma gibititone-ni. (Mat. 10:16-23) Aunauna ma dong lit loyo aye ma a ki bot dano me paco moni ma okwero Kwena me Ker-ri.​—Kwan Matayo 10:34-36.

2. Pingo twere pi jo me odi ma dinigi opokke me nongo yomcwiny?

² Man mono dong te lok ni jo me ot ma dinigi opokke pe gitwero nongo yomcwiny i odigi? Pe kumeno wacel! Kadi bed aunauna ma a ki bot jo me ot twero bedo gwa i kine mukene, meno pe timme kare ducu. Ma nyutti aunauna ma a ki bot jo me ot pe rii pi naka. Man cung i kom kit ma Lukricitayo gidok kwede i aunauna nyo cwiny manok ma dano gitye kwede. Kitungcel, Jehovah goyo laane i kom jo ma giketo gen i kome, kun weko gibedo ki yomcwiny kadi bed kwo tek. Lukricitayo gibedo ki yomcwiny ka (1) gitute matek me kelo kuc i pacigi ki dong (2) gitemme me konyo jo me odigi ma gin pe luye wek gudony i woro me ada.

TUTE MATEK ME KELO KUC I OTWU

3. Pingo laco ma Lakricitayo myero otute matek me kelo kuc i ode?

³ Kuc pire tek adada i paco moni wek kodi me kit ma atir onyak nyige. (Kwan Yakobo 3:18.) Kadi bed dako pa Lakricitayo moni peya oribbe ki cware i  woro me ada, cware myero otute matek me kelo kuc i otgi. En twero timo meno nining?

4. Lukricitayo giromo bedo ma cwiny opye mot nining?

⁴ Lukricitayo myero gubed ma cwinygi opye mot. Man te lokke ni myero guleg ki cwinygi ducu, dok man bikeligi “kuc pa Lubanga,” ma pe waromo porone ki gin mo keken. (Pil. 4:6, 7) Yomcwiny ki kuc bino ka wanongo ngec ma a ki bot Jehovah dok waketo cik ma igi lac ma wapwonyogi ki i Ginacoya i tic. (Ic. 54:13) Miyo lagam i cokke kacel ki tiyo ticwa me pwony-nyi ki mit kom gitye yo ma pigi tego me nongo kuc ki yomcwiny. Nywako i tic ma watimogi macalo Lukricitayo twere pi luye ma gibedo i odi ma jone dinigi opokke. Me laporre, tam kong i kom lamego ma nyinge Enza, * ma onongo cware ger adada i kome. En onongo tito kwena i nge tyeko ticce mogo matino tino me ot. Lamego-ni owaco ni, “I cawa ducu ma atute me nywako i tito kwena maber-ri ki jo mukene, Jehovah miya mot.” Mot ma kit meno kelo kuc, yengo i kwo ki dong yomcwiny.

5. Peko ango ma luye ma gibedo i odi ma jone dinigi opokke girwatte kwede, dok kony ango ma tye pigi?

⁵ Omyero watute ki kerowa ducu me kelo kuc i kinwa ki jo me odiwa ma gipe i woro me ada. Man twero bedo tek pien jami ma gimito ni watim i kine mukene nongo pe rwatte ki cik ma igi lac me Baibul. Jo mogo me odiwa ma pe giworo Jehovah cwinygi wang ka wacung matek me lubo cik ma atir, ento man bikelo kuc i nge kare mo. Ada, omyero wayelle matek pe me kelo tele mogo ma tere pe i odiwa ka gin moni pe turo cik me Baibul. (Kwan Carolok 16:7.) Ka wakemme ki peko, pire tek ni omyero wayeny tira ki i Ginacoya kun watiyo ki bukke ma a ki bot lagwok ot ma lagen dok maryek ki dong bot luelda.​—Car. 11:14.

6, 7. (a) Pingo jo mogo giger ka coggi nyo mongi ocako kwano Baibul ki Lucaden pa Jehovah? (b) Ka aunauna tye ka a ki bot jo me ot, latin kwan me Baibul nyo Lakricitayo myero otim gin ango?

⁶ Omyero wagen Jehovah dok waniang kit ma jo me ot ma gipe i woro me ada giwinyo kwede ka wamito kelo kuc i ot. (Car. 16:20) Kadi wa lutino kwan manyen me Baibul bene gitwero nyuto niango ma lubbe ki lok man. Co ki mon mogo ma gipe i woro me ada giromo ye ni luotgi okwan Baibul. Giromo wacone ni man bibedo ber pien bikonyo jo me odigi. Ento mukene giromo bedo ger aboka lam. Esta, ma dong kombeddi tye Lacaden-ni oye ni onongo “eger adada” i kom cware i kare ma ocako kwano Baibul ki Lucaden pa Jehovah. Lamego-ni omedde ni: “Onongo abolo bukke i bur yugi nyo awango woko.” Howard, ma i acakkine onongo pe mito ni dakone okwan Baibul-li otito-ni: “Co mapol gitamo ni nongo kitye ka bwolo mongi me donyo i dini mo matidi ma konye pe. Laco pol kare tamo ni kwo pa dakone nongo tye ka mading, man miyo laco tiyo ki gero me gengone.”

⁷ Ka ngat moni pe mito ni dako nyo cware okwan Baibul, ci omyero kicuk cwiny ngat ma kitye ka gengone-ni me medde ki kwanne. Laco bicobo kukukuku ma tye ka ce en nyuto cwiny me mwolo dok woro dakone. (1 Pet. 3:15) Howard owaco ni, “Atye ki pwoc madit atika pien dakona obedo ma cwinye opye mot dok pe okeco!” Dakone otito ni: “Howard ocika ni omyero awek kwano Baibul woko. En owacci kitye ka tuko ki wiya. Ma ka pyem kwede, awacci lokke-ni nen calo tye ada, ento awacce bene ni pe ageno ka kiromo tuko ki  wiya. Pi meno, acuko cwinye ni okwan buk ma atye ka kwanone-ni. En okwano ci onongo gin mo marac pe iye. Man ogudo cwinye adada.” Laco nyo dako moni ma pe i woro me ada-ni twero tamo ni pe kiparo pire nyo bedo ki akalakala ka lawote cito i cokke nyo ticwa me pwony, ento ka lawote cuko cwinye i yo me mar ci en bedo ki gen.

KONYGI ME JOLO WORO ME ADA

8. Tira ango ma lakwena Paulo omiyo bot Lukricitayo ma mongi nyo coggi pe i woro me ada?

⁸ Lakwena Paulo omiyo tam bot Lukricitayo ni myero pe guwek mongi nyo coggi pienni gipe i woro me ada. * (Kwan 1 Jo Korint 7:12-16.) Gin ma romo konyo laco nyo dako me bedo ki yomcwiny kadi bed ni en kwo i ot ma jone dinigi opokke aye ka en tye ki gen ni nino mo lawote ma pe i ada-ni bijolo woro me ada. Omyero kong i pim yamone maber ka imito tito kwena bot lawoti ma pe i woro me ada-ni, kit ma lanen ma gitye piny-nyi ginyuto kwede.

9. Ka imito cako kwano Baibul ki jo me ot ma gipe i woro me ada, gin ango ma myero pe itim?

⁹ Jason obedo ki mit kom i kare ma owinyo lok me ada pi tyen mukwongo, en owaco ni: “Onongo amito ni atit bot ngat mo keken!” Ka latin kwan me Baibul oniang ada ma tye i Ginacoya ma kipwonyo en kwede, en twero bedo ki yomcwiny me titone cawa ducu bot jo mukene. En romo bedo ki gen ni jo me ode ma gipe i woro me ada gibijolo cutcut kwena me Ker-ri, ento gin pe guromo jolone i cawa mukene. Mit kom pa Jason acakkine ogudo dakone nining? Dakone owacci “Anongo ni aol woko.” Lamego mo ma oye lok me ada i nge mwaka 18 ma cware ojolo kwede woro me ada, owaco ni: “An gira apwonyo lok me ada motmot.” Ka i kare-ni itye ka kwano Baibul ki latin kwan mo ma dakone nyo cware pe ki miti me ribbe kwede i woro me ada, pingo pe wupor kit ma en twero konyo kwede lawote kidiro wek ojol lok me ada? Moses owacci: “Lubanga omi pwonya ocwer macalo kot, omi lokka oton macalo toyo, macalo kot ma ngido i kom alita.” (Nwo. 32:2) Lok me ada manok nok ma kiwaco i yo matir dok i cawa mupore ber kato lok ma kiduro mapol.

10-12. (a) Lakwena Petero omiyo tira ango bot co ki mon ma luotgi pe i woro me ada? (b) I yo ango ma latin kwan mo acel me Baibul opwonyo kit me keto tira ma tye i 1 Petero 3:1, 2 i tic?

¹⁰ Lubanga otiyo ki lakwena Petero me miyo tira bot mon ma coggi pe Lukricitayo. En ocoyo ni: “Wumine me bedo i te loc pa cogwu, wek ka ce co  mogo i kingi pe gilubo lok pa Lubanga, ci gitwero lokke pi kit pa mongi, kadi bed gin ki komgi pe giloko lok mo ki doggi, ento ka guneno kitwu maleng ma nen me woro.” (1 Pet. 3:1, 2) Dako romo miyo cware jolo woro me ada ka ce en mine i te locce dok bene nyuto woro, kadi bed ni cware tere marac. I yo acel-lu, laco ma Lakricitayo bene myero okwo ma lubbe ki cik pa Lubanga dok obed lawi ot ma lamar kadi bed ni dakone tye ka yelo wiye.​—1 Pet. 3:7-9.

¹¹ Tye lanen mapol i kare-ni ma nyuto kit ma keto tira ma Petero omiyo-ni pire tek kwede. Tam kong i kom lanen pa Selma. I kare ma en ocako kwano Baibul ki Lucaden pa Jehovah, cwiny cware Steve, pe obedo yom. Cware owacci, “Akemo omaka, abedo ki nyeko, aburo dakona, dok abedo ki lworo ni kibibalo wi dakona.” Selma owaco ni: “Ma peya acako pwonyo lok me ada, kwo i ot ki Steve onongo pe yot. Akemo onongo make oyot tutwal. I kare ma acako kwano Baibul, gerone omedde ameda.” Ngo ma okonyo Selma?

¹² Wi Selma opo i kom gin mo ma en opwonyo ki bot Lacaden ma obedo ka kwan kwede-ni. Selma owaco ni: “I nino mo acel, onongo pe amito kwano Baibul. Pien Steve opwoda i dyewor i kare ma atemo tite lok mo pi meno onongo pud cwinya tye ka cwer. I kare ma atito gin mutimme bot lamego ma Lacaden-ni ki kit ma awinyo kwede ki i cwinya, en owacci kong akwan 1 Jo Korint 13:4-7. I nge kwanone, acako gengo ngeya ni, ‘Steve peya otimo bota jami magi ducu kadi wa acel.’ Ento lamego-ni omiyo acako bedo ki tam mapat kun penya ni, ‘I kin jami magi ducu ma kiryeyogi-ni, mene ma dong i timo bot cwari?’ Agamo ni ‘Peya atimo wa acel mo, kwo ki laco ni pe yot.’ Lacaden-ni oloko ki dwan mamwol ni, ‘Selma, anga ma tye ka temme me bedo Lakricitayo i otwu? In ya nyo Steve?’ I kare ma aniang ni myero alok kit ma atamo kwede, alego Jehovah me konya wek anyut mar bot Steve. Motmot jami ocako lokke.” I nge mwaki 17, Steve ojolo lok me ada.

KIT MA JO MUKENE GIROMO MIYO KONY

13, 14. Jo mukene i kacokke giromo konyo jo me odi ma dinigi opokke nining?

¹³ Kit macalo kot cwer dok romo ngom ci konyo ginacama me dongo-ni, jo mapol i kacokke pa Lukricitayo gikonyo jo me odi ma dinigi opokke me bedo ki yomcwiny. Elvina ma bedo i lobo Brazil owacci: “Mar ma omegina ki lumegina gunyuto aye okonya me cung matek ki tyena aryo i lok me ada.”

¹⁴ Kica ki miti ma jo ma i kacokke ginyuto i kom dano ma pe i woro me  ada romo konyo me gudo cwinye. Omego mo i lobo Nigeria ma odoko Lacaden i nge mwaka 13 ma dakone odoko Lacaden owacci: “I kare ma atye ka wot ki Lacaden mo, mutokane oballe woko. En ocako yenyo Lucaden luwote ma gibedo i caro meno, ci guminiwa kabuto pi dyewor acel. Gugwokowa calo iwacci onongo wadongo kwedgi kacel. Cutcut acako niang mar ma dakona kare ducu obedo ka wacci Lukricitayo myero gubed kwede-ni.” I lobo England, dako ot mo ma ojolo lok me ada i nge mwaka 18 ma cware odoko omego owaco ni: “Lucaden gulwongo an wan ki cwara ka cam tyen mapol. Kare ducu awinyo agonya ka atye kwedgi.” * Laco mo ma odoko Lacaden i lobo meno bene owacci: “Omege ki lumege onongo gilimowa, nyo gilwongowa i pacigi, dok anongo ni gin giparo pi dano adada. Man onen ka maleng i kare ma kigenga i ot yat dok Lucaden mapol gubino ka limma.” Tika iromo yenyo yo acel-lu me nyuto kica ki miti i kom jo me ot a gipe i woro me ada?

15, 16. Gin ango ma romo konyo Lakricitayo me bedo ki yomcwiny ka jo mukene ma i ode gukwero jolo lok me ada?

¹⁵ Ki lok ada, kadi bed watim jami mabeco nyo wami caden ki diro pi mwaki mapol, ento jo mogo munyomme, lutino, lunyodo, nyo wadi mogo pe gibijolo woro me ada. Mogo pud pe gibinyuto miti nyo gikwero lokwa. (Mat. 10:35-37) Ka wanyuto kit mabeco pa Lukricitayo, ci man bikelo adwogi maber. Laco mo ma onongo pe i woro me ada owaco ni: “Ka laco nyo dako ma tye i woro me ada ocako nyuto kit magi mabeco pa Lukricitayo-ni, pe ingeyo gin ma nongo laco nyo dako ma pe Lacaden-ni tye ka tamone nyo lwodo ki i cwinye. Pi meno, pe iil cingi me konyo lawoti ma pe i woro me ada-ni.”

¹⁶ Twero bedo ni dano me ot moni kwero jolo lok me ada, ento ngat ma tye i woro me ada-ni pud twero bedo ki yomcwiny. Kadi bed cware ojolo kwena me Ker-ri i nge mwaka 21, laminwa mo acel owacci: “Amedde ki bedo ki yomcwiny kun atute me yomo cwiny Jehovah, agwoko gennena, dok bene acung matek wek niyena pe otur woko. Dok bene aketo cwinya ka timo jami magi—kwan matut pira kena, bedo tye i cokke, wot i ticwa me pwony, ki dong konyo jo mukene ma i kacokke—magi ducu gukonya me nyikke cok bot Jehovah dok gugwoko cwinya.”​—Car. 4:23.

PE IIL CINGI!

17, 18. Lakricitayo twero bedo ki gen nining kadi bed tye i ot ma jone dinigi opokke?

¹⁷ Ka in Lakricitayo ma tye kabedo i ot ma jone dinigi opokke, pe iil cingi. Wi myero opo ni “Rwot [Jehovah] pe bibolo lwakke woko ata, pi nyinge madit-ti.” (1 Cam. 12:22) En pe bibwoti ata ka ce imoko i kome. (Kwan 2 Tekwaro 15:2.) Pi meno, “bed ki yomcwiny i Rwot [Jehovah].” Ada, “mi kwoni bot [Jehovah], gen en.” (Jab. 37:4, 5) ‘Mine keni i lega,’ dok ibed ki gen ni Wonwa me polo ma lamar-ri romo konyi me ciro pekki ducu ma irwatte kwede.​—Rom. 12:12.

¹⁸ Leg bot Jehovah pi cwiny mere maleng wek okonyi me kelo kuc i pacowu. (Ibru 12:14) Twere me kelo kuc ma ingeye lacen twero gudo cwiny ngat moni ma pe i woro me ada-ni. Ibinongo kuc ki yomcwiny kacel ki cwiny ma opye mot ka ‘itimo jami ducu pi miyo deyo bot Lubanga.’ (1 Kor. 10:31) Itute magi ducu, pud dong tye me yomcwiny me ngeyone ni itye ki cwak pa omege ki lumege ma i kacokke!

[Lok ma tye piny]

[Peny me Kwan]

[Cal ma tye i pot karatac 30]

Yer cawa mupore me tito tyen lok me niyeni

[Cal ma tye i pot karatac 31]

Nyut ni iparo pi laco nyo dako ma pe i woro me ada