Awlo nga i nunfuɛ’m be ngba be suman Zoova’n be di nun alaje ɔ yo ye

“?Mmo, sɛ ɔ ti yɛ maan ɔ wun’n ɔ́ nyɛ́n i ti o, a wun i wlɛ sɛ? ?Nja, sɛ ɔ ti yɛ maan ɔ yi’n ɔ́ nyɛ́n i ti o, a wun i wlɛ sɛ?”​—1 KOR. 7:16.

?AMUN KWLA TƐ SU?

?Ngue yɛ Klistfuɛ nga be awlobofuɛ’m be ngba be suman Zoova’n, be kwla yo naan fɔundi w’a tran awlo’n nun ɔn?

?Ngue yɛ Klistfuɛ kun kwla yo naan i awlobofuɛ’m b’a sɔ ndɛ nanwlɛ’n nun ɔn?

?Wafa sɛ yɛ asɔnun’n nunfuɛ’m be kwla suan be nga be awlobofuɛ wie suman Zoova’n, be bo ɔ?

1. ?Kɛ sran kun sɔ Ɲanmiɛn Sielɛ’n i jasin fɛ’n nun’n, ngue yɛ i awlobofuɛ’m be kwla yo ɔ?

 LE KUN’N, kɛ Zezi sunmannin i akoto mun’n, ɔ seli be kɛ: “Kɛ amún kɔ́’n, wuun án kán klé sran’m be kɛ Nyanmiɛn i sielɛ blɛ’n w’a mantan.” (Mat. 10:1, 7) Be nga be sɔ jasin fɛ’n sɔ’n nun’n, be wun tɔ́ be fɔun yɛ bé dí aklunjuɛ. Sanngɛ Zezi seli i akoto’m be kɛ Ɲanmiɛn Sielɛ i jasin fɛ’n i bolɛ nun’n, sran kpanngban bé wá tánndan be ja nun. (Mat. 10:16-23) Be ɲrun tanndanlɛ i kekle kpafuɛ’n, i kun yɛle ng’ɔ fin sran kun i awlobofuɛ mun’n.​—An kanngan Matie 10:34-36 nun.

2. ?Ngue ti yɛ e kwla se kɛ be nga be awlobofuɛ’m be suman Zoova’n, be kwla di aklunjuɛ ɔ?

² ?I sɔ’n kle kɛ Klist i sɔnnzɔnfuɛ nga i awlobofuɛ’m be suman Zoova’n, ɔ kwlá diman aklunjuɛ? Ɔ kleman sɔ mlɔnmlɔn. Klistfuɛ wie’m be awlobofuɛ’m be kle be yalɛ kpa liɛ su. Sanngɛ wie’m be liɛ’n, ɔ ti sɔsɔ kan. Asa kusu’n, nán kɛ san fii bé klé be yalɛ sɔ dɔ kwlaa su ɔ. Kannzɛ Klistfuɛ kun i awlobofuɛ’m be kle i yalɛ sɛ’n, annzɛ ndɛ nanwlɛ’n ɔ yoman be nnana’n, sanngɛ sɛ ɔ tɛ be su amanniɛn su’n, ɔ kwla di aklunjuɛ. Kusu’n, Zoova yra be nga be jrɛn i sin titi’n be su. Ɔ yo maan kannzɛ lika’n ti kekle be su sɛ’n, sanngɛ be di aklunjuɛ. Like nɲɔn o lɛ mɔ Klistfuɛ nga i awlobofuɛ wie suman Zoova’n, ɔ kwla yo naan w’a di aklunjuɛ kpa ekun ɔn. I klikli’n, yɛle kɛ maan ɔ miɛn i ɲin yo like kwlaa ng’ɔ kwla yo naan fɔundi w’a trɛn i awlo’n nun’n. Yɛ i nɲɔn su’n, yɛle kɛ maan ɔ tu i klun uka be naan be fa nanwlɛ atin’n su.

MAAN AMUN MIAN AMUN ƝIN NAAN FƆUNDI TRAN AWLO’N NUN

3. ?Ngue ti yɛ ɔ fata kɛ Klistfuɛ nga i awlobofuɛ’m be suman Zoova’n, ɔ miɛn i ɲin yo naan fɔundi trɛn i awlo’n nun titi ɔ?

³ Kɛ fɔundi wo awlo’n nun’n, jasin fɛ’n i nun sɔlɛ’n kwla yo pɔpɔ man i nunfuɛ mun. (An Kanngan Zak 3:18  nun.) Kannzɛ kɛ é sé yɛ’n, Klistfuɛ kun i awlobofuɛ’m be suman Zoova wie’n, sanngɛ ɔ fata kɛ ɔ miɛn i ɲin kpa naan fɔundi trɛn i awlo’n nun titi. ?Wafa sɛ yɛ ɔ kwla yo i sɔ ɔ?

4. ?Ngue yɛ Klistfuɛ’m be kwla yo naan be wla w’a gua ase titi ɔ?

⁴ Ɔ fata kɛ Klistfuɛ’m be yo naan be bɔbɔ be wla gua ase titi. I ti’n, ɔ ti mɔ be srɛ Ɲanmiɛn tankaan kpa kɛ ɔ yo naan be “wun jɔ [be] fɔuun.” (Fil. 4:6, 7) Sɛ e waan é dí aklunjuɛ naan e wun jɔ e fɔun’n, ɔ fata kɛ e suan Zoova i su like yɛ e nanti ndɛ nga Biblu’n kan’n su. (Zan 6:45) Maan e tɛ kosan’m be su aɲia’m be bo lɔ, yɛ maan e bo jasin fɛ’n i juejue su. Be nga be awlobofuɛ’m be suman Zoova’n, be kwla ɲan atin be yo i sɔ ninnge liɛ mun. Maan e kan e niaan bla kun m’ɔ suan Ɛnza * i ndɛ. Zoova i sulɛ’n ti’n, i wun’n yoli i kpokokpoko kpa. Kɛ e niaan bla’n wie i awlo’n nun junman’m be di’n yɛ ɔ kɔ jasin fɛ’n i bolɛ ɔ. I ndɛ ng’ɔ kan’n yɛ: “Blɛ kwlaa nga n kplin min ɲin m bo jasin fɛ’n n kle sran mun’n, Zoova yo min ye maan i bo gua kpa.” Wafa nga Zoova yra e niaan’n i su sɔ’n, maan ɔ di ye, i wla gua ase, yɛ i klun jɔ kpa.

5. ?Ngue yɛ ɔ kwla yo kekle man sran nga i awlobofuɛ’m be suman Zoova’n niɔn? ?Yɛ nin yɛ ɔ kwla ɲan ukalɛ ɔ?

⁵ Ɔ fata kɛ e mian e ɲin kpa naan fɔundi tran e nin e awlobofuɛ nga be timan Zoova i sufuɛ’n e afiɛn. I sɔ yolɛ’n kwla yo kekle afin ɔ ju wie’n, be kwla kunndɛ kɛ e yo ninnge wie mɔ Biblu’n bu be fɔ’n. Kɛ e mian e ɲin e nanti Biblu’n nun mmla’m be su blɛ kwlaa nun’n, ɔ kwla yo be nun wie’m be ya. Sanngɛ ɔ fataman kɛ i sɔ’n ti’n e yaci like ng’ɔ ti kpa’n i yolɛ. Sɛ e mian e ɲin e yo sɔ’n, cɛn wie lele’n fɔundi kwla tran e nin be e afiɛn. Ninnge wie’m be o lɛ’n, Biblu’n buman be yolɛ’n i fɔ. Sɛ be se e kɛ e yo’n, i liɛ’n é yó. Afin kɛ e yo sɔ’n ndɛnngan baman. (An kanngan Nyanndra Mun 16:7 nun.) Sɛ e wunman ajalɛ nga é fá’n, ɔ ti cinnjin kpa kɛ e kunndɛ afɔtuɛ Biblu’n i akua nga sran kpa nanwlɛfuɛ b’ɔ si ngwlɛlɛ’n yi be’n be nun, ɔ nin asɔnun kpɛnngbɛn’m be sa nun.​—Nya. 11:14.

6, 7. (a) ?Kɛ sran wie’m be nin Zoova i Lalofuɛ’m be bo Biblu’n nun like suanlɛ bo’n, ngue ti yɛ be awlobofuɛ’m be tanndan be ɲrun ɔn? (b) ?Kɛ Biblu’n nun like suanfuɛ kun annzɛ aniaan kun i awlobofuɛ’m be tɛnndɛn i ɲrun’n, ngue yɛ ɔ fata kɛ ɔ yo ɔ?

⁶ Sɛ e lafi Zoova su naan e ninnge’m be yolɛ nun’n e bu e awlobofuɛ’m be akunndan’n, yɛ fɔundi kwla tran awlo’n nun ɔn. (Nya. 16:20) Be nga b’a bo Biblu’n nun like suanlɛ bo uflɛuflɛ bɔbɔ’n, be kwla yo sɔ wie. Be nga be lafiman Zoova su’n, be nun wie’m be o lɛ’n, sɛ be yi annzɛ be wun suan Biblu’n nun like’n, be tɛnndɛmɛn i ɲrun. I kpa bɔbɔ’n be kwla se kɛ i sɔ’n kwla yo be awlobo’n i ye. Sanngɛ wie’m be liɛ’n be tanndan be ɲrun kpa. Ɛstɛli mɔ siɛn’n ɔ ti Zoova i sufuɛ’n, i waan i nun nga i wun’n nin Zoova i Lalofuɛ’m be boli Biblu’n nun like suanlɛ bo’n, ɔ fali ya kpa. Ɔ seli kɛ: “N guɛ i fluwa’m be blo annzɛ n wɔ be nun.” I nun nga Oward i yi’n boli Biblu’n nun like suanlɛ bo’n, ɔ kleli i yalɛ. Oward se kɛ: “Yasua sunman be bu i kɛ sran’m be su laka be yi mun, naan be fa be wun wlɛ i Ɲanmiɛn sulɛ wafa tɛ wie nun. I sɔ’n ti’n, srɛ kun be. Kɛ mɔ be bu i kɛ sa su wa ɲan be yi mun mɔ be wunman like ng’ɔ fata kɛ be yo’n ti’n, be kan ndɛ tɛtɛ kle be annzɛ be yo be kpokokpoko.”

⁷ Ɔ fata kɛ e uka Biblu’n nun like suanfuɛ nga i yi annzɛ i wun’n kle i yalɛ’n, naan ɔ wun i wlɛ kɛ ɔ nunman nun kɛ ɔ yaci like suanlɛ’n. Sɛ ɔ yo wɛtɛɛ naan i ɲin yi i yi annzɛ i wun m’ɔ timan Zoova i sufuɛ’n, blɛ sunman nun’n ɔ kwla yaci i yalɛ klelɛ. (1 Piɛ. 3:15) Oward waan: “Min yi yoli wɛtɛɛ yɛ w’a yoman ninnge mun ya su. Nanwlɛ, i sɔ’n yo min fɛ dan!” I yi’n waan: “Oward seli min kɛ n yaci Biblu’n nun like suanlɛ. I waan be su saci min ti nun. Sanngɛ e nin i y’a simɛn i su akplowa. N seli i kɛ i ndɛ kwla yo fɛ. Sanngɛ kusu n seli i ekun kɛ n wunman like nga ti yɛ i waan be su laka  min’n. Ɔ maan n seli i kɛ ɔ kanngan fluwa nga n suan nun like’n i nun. Ɔ kanngannin nun yɛ ɔ wunnin kɛ min ndɛ’n ti nanwlɛ. I sɔ’n yoli maan ɔ yacili min diin.” Maan ɔ tran e klun kɛ sran ng’ɔ suman Zoova’n, sɛ i yi annzɛ i wun’n yaci i kɔ aɲia’m be bo annzɛ jasin fɛ’n bolɛ’n, ɔ kwla yo i kɛ i yi’n annzɛ i wun sɔ’n nin i mantanman kun sa. Annzɛ kusu be aja’n su wa saci. Sanngɛ Ɲanmiɛn sufuɛ’n kwla kan ndɛ kle i yi annzɛ i wun sɔ’n amanniɛn su nin klolɛ su naan w’a kokoman kun.

AMUN UKA BE NAAN BE SU ZOOVA

8. ?Afɔtuɛ benin yɛ akoto Pɔlu mannin Klistfuɛ nga be yi’n annzɛ be wun’n suman Zoova’n niɔn?

⁸ Akoto Pɔlu mannin Klistfuɛ’m be afɔtuɛ kɛ nán be nian kɛ be yi’n annzɛ be wun’n timan Klistfuɛ ti’n, bé yáci i. * (An kanngan  1 Korɛntfuɛ Mun 7:12-16 nun.) Sɛ Klistfuɛ’n bu akunndan kɛ cɛn kun’n, i yi’n annzɛ i wun’n kwla fa nanwlɛ atin’n su wie’n, ɔ kwla di aklunjuɛ. Sanngɛ kɛ ɔ́ úkɛ i naan ɔ sɔ jasin fɛ’n nun’n, ɔ fata kɛ ɔ niɛn i wun su. I sɔ yɛ sa nga é wá bó be su yɛ’n be kle ɔ.

9. ?Kɛ é kán Ɲanmiɛn ndɛ’n é klé e awlobofuɛ mun’n, ngue yɛ ɔ fataman kɛ e yo ɔ?

⁹ Kɛ Zazɔn tili nanwlɛ ndɛ’n i klikli nun’n, w’a yomɛn i fɛ aɔwi. I sɔ’n ti’n, ɔ seli kɛ: “N kunndɛli kɛ ń kán klé sran’m be kwlaa!” Kɛ Biblu’n nun like suanfuɛ kun wun i kɛ like ng’ɔ suɛn i Biblu’n nun ti nanwlɛ’n, aklunjuɛ’n m’ɔ di’n ti ɔ yacimɛn i ndɛ kanlɛ. Ɔ kwla kunndɛ kɛ i awlobofuɛ’m be ka lɛ be fa ndɛ sɔ’n su wie. Sanngɛ be kwla kpalo i. ?Wafa sɛ yɛ Zazɔn i wun m’ɔ bliblili i’n, ɔ yoli i yi’n niɔn? Bla’n waan: “Zazɔn kannin i ndɛ lele maan ɔ flannin min.” Bla kun liɛ’n, kɛ i wun’n kacili Zoova i Lalofuɛ’n, ɔ dili afuɛ 18 naan i kusu w’a su Zoova wie. Bla sɔ’n seli kɛ: “N liɛ’n, kɛ bé klé min like’n, n kunndɛman kɛ be kpli.” Atrɛkpa’n, amun su kle sran kun mɔ nanwlɛ’n timan i wun’n annzɛ i yi’n i cinnjin’n, i Biblu’n nun i like. Ɔ nin i fata kɛ amun kle i wafa ng’ɔ kwla fa akunndan ɔ kan like ng’ɔ suan’n i ndɛ kle i wun’n, annzɛ i yi’n naan w’a lomɛn i ngasi’n. Moizi seli kɛ: “Maan like nga n kle sran mun’n, ɔ yo kɛ nzue yɛ ɔ tɔ sa. Maan min ndɛ nga n kan be mun’n, be yo kɛ nglɛmun bɔlɛ’n b’ɔ gua’n sa. Maan be yo kɛ nzue b’ɔ gua nnya’m be su’n sa.” (Mml. 32:2) Blɛ sunman nun’n, kɛ Ɲanmiɛn ndɛ’n ju i kanlɛ mɔ be kɛn i kpe kan kɛ ɔ nin i fata’n sa’n be kle sran kun’n, ɔ wluwlu i wun tra ndɛ kpanngban mɔ be jran be ja nun lɛ be kan’n.

10-12. (a) ?Afɔtuɛ benin yɛ akoto Piɛli mannin be nga be wun’n nin be yi’m be timan Klistfuɛ’n niɔn? (b) ?Afɔtuɛ nga 1 Piɛr 3:1, 2 man’n, wafa sɛ yɛ Biblu’n nun like suanfuɛ kun fali su ɔ?

¹⁰ Ɲanmiɛn maan akoto Piɛli mannin bla nga be wun’m be suman Zoova’n, be afɔtuɛ kpa kun. Ɔ seli be kɛ: “Mmo mun, amun  kusu an bu amun wun’m be sran, nán an fa amun nyin wlawla be. I liɛ’n sɛ be nun wie’m be fa-man Nyanmiɛn ndɛ’n su’n, kɛ be wun amun nzuɛn kpa’n nin sran bɔ an bu be’n, an su kan-man ndɛ fi naan b’a yaci.” (1 Piɛ. 3:1, 2) Bla kun i wun’n kwla yo i kpokokpoko kpa. Sanngɛ sɛ ɔ lo i wun naan i ɲin yi i wun’n i kpa’n, i sɔ’n kwla yo maan bian’n fa Ɲanmiɛn ndɛ’n su. I wafa kunngba’n, sɛ yasua kun m’ɔ fa Ɲanmiɛn ndɛ’n su i yi’n kle i yalɛ’n, ɔ fata kɛ ɔ nanti kɛ nga Ɲanmiɛn klo’n sa. Yɛ maan ɔ nin i yi’n be tran klolɛ su.​—1 Piɛ. 3:7-9.

¹¹ E blɛ su sa sunman be kle kɛ ndɛ nga Piɛli kannin’n, ɔ ti kpa dan. Maan e fa e niaan kun m’ɔ suan Sɛlma’n, i su sa’n e yiyi nun kan e nian. Kɛ Zoova i Lalofuɛ’m be boli i Biblu’n nun like klelɛ bo’n, w’a yoman i wun Nɛlisɔnu i fɛ. Bian’n dili i nanwlɛ seli kɛ: “N fali ya. Ɔ yoli min kɛ be su wa de min yi’n sa. Asa kusu’n, srɛ kunnin min.” Sɛlma waan: “Ka naan m’an si nanwlɛ’n bɔbɔ’n, Nɛlisɔnu i like yolɛ yo ya kpa. Sɛ ndɛ wie yɛ ń kán’n, annzɛ like wie yɛ ń yó’n, ɔ fata kɛ n nian min wun kpa. Afin ɔ fa ya ndɛndɛ. Kɛ m boli Biblu’n nun like suanlɛ bo’n, laa li nn lomo nun w’a luman.” ?Ngue ti yɛ lika’n wa yoli sɔsɔ ɔ?

¹² Sɛlma i wla nin a fiman afɔtuɛ kun mɔ aniaan ng’ɔ kleli i like’n, ɔ mɛnnin i’n su. I waan: “Le kun liɛ’n, m’an kunndɛman kɛ be kle min Biblu’n nun like. Afin kɔnguɛ’n, min waan n su yiyi ndɛ kun nun ń klé Nɛlisɔnu, kpɛkun ɔ boli min. Min sa sin bubuli min. Kɛ n kannin sa sɔ’n i ndɛ’n, ɔ nin wafa nga min wun yo min’n n kleli aniaan bla’n, ɔ seli min kɛ n kanngan 1 Korɛntfuɛ Mun 13:4-7 nun. Kɛ ń kánngan nun ń kɔ́’n, n seli min klun lɔ kɛ ‘ndɛ fɛfɛ kɛ ng’ɔ o yɛ sa’n Nɛlisɔnu nantiman wie fi sa su.’ Sanngɛ aniaan bla’n ukali min maan n kacili min akunndan’n. Ɔ usali min kɛ: ‘?Klolɛ i su ndɛ nga be kɛn i yɛ’n, be nun nɲɛ yɛ a nin ɔ wun be tranlɛ nun’n, a fa su ɔ?’ N tɛli i su kɛ: ‘Be nun wie fi, afin i tranlɛ yo ya.’ Aniaan bla’n usali min amanniɛn su kɛ: ‘?Sɛlma, amun nɲɔn’n, amun nun benin yɛ ɔ su kplin i ɲin naan ɔ́ káci Klistfuɛ ɔ? ?Wɔ annzɛ Nɛlisɔnu ɔn?’ Kɛ n wunnin kɛ ɔ fata kɛ n kaci min akunndan’n, n srɛli Zoova kɛ ɔ uka min naan e nin Nɛlisɔnu e tran klolɛ su. Lika’n wa yoli kpa blɛblɛblɛ wɔli i ɲrun.” Kɛ ɔ dili afuɛ 17, Nɛlisɔnu wa sɔli ndɛ nanwlɛ’n nun.

LIKE NGA ASƆNUN’N NUNFUƐ’M BE KWLA YO’N

13, 14. ?Wafa sɛ yɛ asɔnun’n nunfuɛ’m be kwla suan be nga be awlobofuɛ wie suman Zoova’n, be bo ɔ?

¹³ Kɛ nga blɛblɛblɛ bɔlɛ’n fa lualua asiɛ’n mɔ waka mma’m be fifi klanman sa’n, e kwlaa nga e o asɔnun’n nun’n, e kwla uka be nga be wun’n nin be yi’m be timan Klistfuɛ’n naan b’a di aklunjuɛ. Ɛlvina m’ɔ fin Brezili’n seli kɛ: “Klolɛ mɔ min niaan Klistfuɛ’m be kloli min’n, yɛ ɔ ukali min naan m’an kwla jran klekle Zoova i sulɛ’n nun ɔn.”

 ¹⁴ Kɛ asɔnun’n nunfuɛ’m be yo aklunye’n mɔ be wiengu ndɛ lo be’n, i sɔ’n kwla kan e niaan kun i awlobofuɛ wie m’ɔ suman Zoova’n, i awlɛn. Ananngo bian kun mɔ kɛ i yi’n kacili Zoova i Lalofuɛ’n, ɔ dili afuɛ 13 naan w’a su Zoova wie’n, ɔ seli kɛ: “Le kun’n, kɛ e nin Zoova i Lalofuɛ kun é tú ajalɛ’n, i loto’n sacili. Ɔ ɔli klɔ ng’ɔ mantan koko lɛ’n i su, ɔ ko kunndɛli i niaan Zoova i Lalofuɛ mun. Yɛ be sikeli e ɔ. Wafa nga be fa niannin e lika’n, ɔ ti kɛ be si e laa sa. N kali lɛ n wunnin klolɛ ng’ɔ o Klistfuɛ’m be afiɛn mɔ min yi’n kɛn i ndɛ titi’n.” Angle mɛn nun lɔ’n, bla kun mɔ i wun’n suli Zoova ɔ dili afuɛ 18 naan w’a fa nanwlɛ atin su wie’n, ɔ seli kɛ: “Titi kɛ Zoova i Lalofuɛ’m bé yía min wun kɛ ɔ wɔ be awlo lɔ ko di like’n, be yia e nɲɔn’n. Kɛ e nin be e o’n, n timan kɛ aofuɛ sa.” * Nvle kunngba’n nun lɔ bian kun mɔ i kusu wa kacili Zoova i sufuɛ’n, ɔ kɛn i wie kɛ: “Aniaan’m be nian e osu. Asa kusu’n, be yia e be awlo lɔ. N wunnin kɛ be yɛyɛ e. Kɛ be lali min dɔɔtrɔ mɔ be bali min osu nianlɛ’n, yɛ n wunnin i sɔ liɛ’n i kpa bɔbɔ ɔ.” ?Amun wun wafa nga amun kwla nian i sɔ’n su wie be yo’n?

15, 16. ?Ngue yɛ be nga be awlobofuɛ’m be timan Klistfuɛ wie’n, be kwla yo naan b’a di aklunjuɛ titi ɔ?

¹⁵ I yo, kannzɛ bɔbɔ maan e yo sa ng’ɔ ti kpa’n sɛ, maan e kan Ɲanmiɛn ndɛ’n i amanniɛn su e kle e osufuɛ mun lele afuɛ ko ju wie, sanngɛ be ngba be su sɔman ndɛ nanwlɛ’n nun. Wie mun bɔbɔ’n bé yí i nglo titi kɛ ndɛ sɔ’n loman be annzɛ be kwla tanndan e ɲrun kpa. (Mat. 10:35-37) Sanngɛ kɛ e yi e Klistfuɛ nzuɛn’n i nglo’n, e kwla wun i nuan like kpa lelele. E niaan bla kun i wun m’ɔ wa kacili Klistfuɛ’n se kɛ: “Kɛ sran ng’ɔ ti Klistfuɛ’n yi i Klistfuɛ nzuɛn’n i nglo’n, akunndan ng’ɔ ba i wun annzɛ i yi m’ɔ timan Klistfuɛ’n i klun’n, sran fi simɛn i. I sɔ’n ti’n, maan ɔ tran e klun titi kɛ e nzuɛn kpa’n kwla yo naan cɛn wie lele’n sran sɔ’n, ɔ kaci.”

¹⁶ Kannzɛ Klistfuɛ kun i awlobofuɛ’m be sɔman ndɛ nanwlɛ’n nun bɔbɔ’n, sanngɛ ɔ kwla di aklunjuɛ. Aniaan bla kun kplinnin i ɲin boli jasin fɛ’n afuɛ lele 21 kleli i wun’n, sanngɛ bian’n w’a sɔman ndɛ nanwlɛ’n nun. Bla’n se kɛ: “Like nga ti yɛ n dili aklunjuɛ titi’n, yɛle kɛ n kplinnin min ɲin titi naan Zoova i klun jɔ min. Asa kusu’n, n nantili seiin. Yɛ n fali min wun m mantannin Zoova kpa. Asa ekun’n, n suannin Biblu’n nun like. N wɔli aɲia’m be bo titi. M boli jasin fɛ’n yɛ n ukali asɔnun’n nunfuɛ mun. I kwlaa sɔ’n yoli maan e nin Zoova e nantili klanman titi.”​—Nya. 4:23.

NÁN AMUN YACI BE UKALƐ!

17, 18. ?Ngue yɛ Klistfuɛ kun kwla yo naan w’a yacimɛn i awlobofuɛ nga be suman Zoova’n, be ukalɛ ɔ?

¹⁷ Sɛ amun su Zoova kpa naan amun awlobofuɛ’m be timan Klistfuɛ’n, nán amun yaci be ukalɛ. Nán amun wla fi mlɔnmlɔn kɛ Zoova su yimɛn i sran’m be ase le. (1 Sam. 12:22) Sɛ amun fa amun wun mantan i’n, i kusu fɛ́ i wun mántan amun. (An kanngan 2 Be Nyoliɛ 15:2 nun.) I ti’n, maan amun “fa Anannganman yo [amun] anwlɛn su like” yɛ amun ‘fa amun wun sa’n kwlaa wlɛ i sa nun.’ (Jue. 37:4, 5) “Amun nin Nyanmiɛn an koko yalɛ titi, nán amun kpɔnzɔ.” Kpɛkun, maan amun lafi su kɛ ɔ kwla uka amun naan sa kwlaa nun’n, amun a tra amun awlɛn.​—Rɔm. 12:12.

¹⁸ Maan amun srɛ Zoova kɛ ɔ fɛ i wawɛ’n man amun naan fɔundi tran amun nin amun awlobofuɛ’m be afiɛn. (Ebr. 12:14) Nanwlɛ, e kwla yo naan kɛ e nin e awlobofuɛ nga be suman Zoova’n e o’n, y’a di alaje. Kpɛkun i sɔ’n kwla yo naan cɛn wie lele’n, b’a su Zoova wie. Sɛ ‘an yo like kwlaa i nuan su naan Nyanmiɛn nyan nyrun’n,’ amún dí aklunjuɛ, yɛ amún wla gúa ase. (1 Kor. 10:31) Asa ekun’n, amun kwla lafi su kɛ amun niaan Klistfuɛ’m be su yaciman amun klolɛ yɛ bé súan amun bo.

[Ja ngua lɛ ndɛ mun]

[Kosan mun]

[Foto, bue 30]

Ɲanmiɛn ndɛ’n i kanlɛ’n ju yɛ be kan ɔn.

[Foto, bue 31]

Maan aniaan’m be yi annzɛ be wun mɔ be suman Zoova’n, be ndɛ lo e.