Posible an Kaogmahan sa Nababangang Pamilya
Posible an Kaogmahan sa Nababangang Pamilya
‘Paano mo naaaraman kun ikakaligtas mo an saimong agom?’—1 COR. 7:16.
MAKUKUA DAW NINDO AN SIMBAG?
Ano an magigibo nin mga Kristiano tanganing mapatalubo an katoninongan sa pamilyang nababanga huli sa relihion?
Paano matatabangan nin sarong Kristiano an bakong kapagtubod na mga kapamilya na akoon an tunay na pagsamba?
Ano an magigibo nin iba tanganing tabangan an mga kapagtubod na an pamilya nababanga huli sa relihion?
1. Ano an puedeng magin epekto sa pamilya kan pag-ako kan mensahe kan Kahadean?
SARONG beses, kan sugoon ni Jesus an saiyang mga apostol, sia nagsabi: ‘Sa pagduman nindo, maghulit kamo, na nagsasabi, “An kahadean kan kalangitan harani na.”’ (Mat. 10:1, 7) An maogmang baretang ini matao nin katoninongan asin kaogmahan sa mga nag-aako kaiyan na may tunay na pagpahalaga. Minsan siring, pinatanidan ni Jesus an saiyang mga apostol na dakol an makontra sa saindang paghuhulit kan Kahadean. (Mat. 10:16-23) An sarong nangorognang depisil na klase nin pagkontra iyo an pagsayuma nin mga kapamilya sa mensahe kan Kahadean.—Basahon an Mateo 10:34-36.
2. Taano ta an mga Kristiano na an pamilya nababanga huli sa relihion puedeng magin maogma?
2 Nangangahulogan daw ini na an mga parasunod ni Cristo na an pamilya nababanga huli sa relihion dai puedeng magin maogma? Dai nanggad! Minsan ngani puedeng magin grabe an pagkontra, bakong pirmeng arog kaiyan an kamugtakan. Dugang pa, an pagkontra nin pamilya dai man pirmeng nagdadanay. Nakadependeng marhay iyan sa mga nagtutubod—kun ano an saindang reaksion sa pagkontra o kawaran nin interes. Dugang pa, binebendisyonan ni Jehova an mga maimbod sa saiya, na tinatabangan sindang magin magayagaya sa ibong nin masakit na mga kamugtakan. Magigin mas maogma an mga nagtutubod paagi sa (1) paghihingoang pataluboon an katoninongan sa harong asin (2) sinserong pagmamaigot na tabangan an bakong kapagtubod na mga kapamilya na akoon an tunay na pagsamba.
PATALUBOON AN KATONINONGAN SA HARONG
3. Taano ta an katoninongan maninigong pataluboon nin sarong Kristiano na yaon sa nababangang pamilya?
3 Tanganing an banhi nin katanosan mamunga sa pamilya, mahalagang marhay an matoninong na kamugtakan sa harong. (Basahon an Santiago 3:18.) Dawa bako pang sararo sa dalisay na pagsamba an pamilya nin sarong Kristiano, dapat siang maigot na maghingoa na pataluboon an katoninongan sa harong. Paano ini magigibo?
4. Paano mapagdadanay nin mga Kristiano an saindang panglaog na katoninongan?
4 Dapat papagdanayon nin mga Kristiano an saindang panglaog na katoninongan. Ini nangangaipo nin odok sa pusong pamimibi, na puedeng magtao sa sato kan daing kaagid na ‘katoninongan nin Dios.’ (Fil. 4:6, 7) An pagkua nin kaaraman dapit ki Jehova asin pamumuhay kaoyon kan mga prinsipyong sono sa Kasuratan nagbubunga nin kaogmahan asin katoninongan. (Isa. 54:13) Mahalagang marhay man an pakikikabtang sa mga pagtiripon kan kongregasyon asin an kaigotan sa ministeryo sa langtad tanganing magkaigwa kita nin katoninongan asin kaogmahan. Sa pangkagabsan, an mga nagtutubod na yaon sa nababangang pamilya posibleng makapakikabtang sa Kristianong mga aktibidad. Halimbawa, isip-isipa an Kristianang si Enza, * na an agom grabe an pagkontra. Nakikikabtang sia sa paggibo nin mga disipulo pagkaasikaso nia kan mga paninimbagan sa harong. Si Enza nagsabi, “Abunda akong binebendisyonan ni Jehova nin mararahay na resulta kada maghingoa akong ipaabot sa iba an maogmang bareta.” An siring na mga bendisyon nagtatao nanggad nin katoninongan, satispaksion, asin kaogmahan.
5. Ano sa parate an kadepisilan na napapaatubang sa mga Kristiano na nababanga an pamilya, asin ano an makakatabang sa sainda?
5 Kaipuhan niatong maigot na maghingoa tanganing mapatalubo an matoninong na relasyon sa bakong kapagtubod na mga kapamilya. Tibaad depisil ini huling, kun beses, an gusto nindang gibohon niato kontra sa mga prinsipyo sa Biblia. Huli sa marigon na pangangapot niato sa tamang mga prinsipyo, tibaad may maanggot na bakong kapagtubod na mga kapamilya, alagad pag-abot nin panahon, an siring na paninindogan makakapatalubo nin katoninongan. Siempre, an pakikipagtabangan sa sarong bagay na bako man kontra sa mga prinsipyo sa Kasuratan tibaad makatabang na malikayan an dai kaipuhan na pagdiriskusyonan. (Basahon an Talinhaga 16:7.) Kun napapaatubang sa kadepisilan, mahalagang aramon an sono sa Kasuratan na konseho paagi sa mga publikasyon kan grupong maimbod asin mapagmansay na oripon asin sa tabang nin mga elder.—Tal. 11:14.
6, 7. (a) Taano ta kinokontra nin nagkapira an mga kapamilya ninda na nagpopoon na makipag-adal sa mga Saksi ni Jehova? (b) Ano an maninigong magin reaksion nin tinotokdoan sa Biblia o nin sarong Saksi sa pagkontra kan pamilya?
6 Kaipuhan an pagtitiwala ki Jehova asin an pakaaram sa saboot kan bakong kapagtubod na mga kapamilya tanganing mapatalubo an katoninongan sa pamilya. (Tal. 16:20) Magigibo ini dawa kan bagong mga tinotokdoan sa Biblia. May mga agom na bako niatong kapagtubod an tibaad dai man kontra na mag-adal sa Biblia an saindang agom. Tibaad admitiron pa ngani ninda na makakarahay ini sa saindang pamilya. Minsan siring, an iba tibaad magkontrang marhay. Inadmitir ni Esther, na Saksi na ngonyan, na anggoton sia kan an saiyang agom magpoon na makipag-adal sa Biblia sa mga Saksi ni Jehova. “Magsalang iinaapon ko an saiyang literatura o sinosolo ko iyan,” an sabi nia. Si Howard, na kan enot kontra sa pag-adal sa Biblia kan saiyang agom, nagsabi: “Dakol na agom na lalaki an natatakot na tibaad nadadaya an agom ninda na lumaog sa sarong relihiosong sekta. Tibaad dai aram nin agom na lalaki kun ano an gigibohon nia sa iniisip niang peligrong ini kaya tibaad magkontra siang marhay.”
7 An tinotokdoan sa Biblia na an agom nagkokontra maninigong tabangan na masabotan na dai man nia kaipuhan na pumondo sa pag-adal. Sa parate, mareresolberan nia an situwasyon paagi sa kahoyoan asin paggalang sa agom nia. (1 Ped. 3:15) Si Howard nagsabi, “Nagpapasalamat akong marhay na an agom ko nagdanay na kalmado asin bakong sobra an reaksion nia!” An saiyang agom nagpaliwanag: “Pinapapondo ako kaidto ni Howard sa pag-adal sa Biblia. Sinabi nia na pinipirit ninda akong patubodon sa doktrina ninda. Imbes na makidiskutiran, sinabi ko na tibaad tama sia, pero sinabi ko man sa saiya na dai ko talaga maheling kun paano. Kaya, pinakiolayan ko sia na basahon an librong pinag-aadalan ko. Ginibo nia iyan asin dai sia makakontra sa sinasabi kaiyan. Dakulaon an epekto kaiyan sa saiya.” Marahay na girumdomon na an bakong kapagtubod na mga agom tibaad makamate na sinda napapabayaan na o na an saindang pag-agoman namemeligro kun minahale an agom ninda tanganing makikabtang sa Kristianong mga aktibidad, pero dakula an magigibo nin mamomoton na pag-asegurar tanganing mahale an siring na saboot.
TABANGAN SINDANG AKOON AN TUNAY NA PAGSAMBA
8. Anong sadol an itinao ni apostol Pablo sa mga Kristiano na an agom bakong kapagtubod?
8 Sinadol ni apostol Pablo an mga Kristiano na dai pagbayaan an saindang agom huli sana ta bako ninda ining kapagtubod. * (Basahon an 1 Corinto 7:12-16.) Minsan ngani yaon sa nababangang pamilya, makakatabang sa sarong Kristiano na mapagdanay an saiyang kaogmahan kun gigirumdomon nia na posibleng magin Kristiano an bakong kapagtubod na agom. Pero, kaipuhan an pag-iingat sa paghihingoang ipaabot an mensahe kan katotoohan sa bakong kapagtubod na agom, arog kan ipinapaheling kan masunod na mga eksperyensia.
9. Kun iiniintrodusir an katotoohan sa Biblia sa bakong kapagtubod na mga kapamilya, anong pag-iingat an dapat gibohon?
9 Sa paggirumdom ni Jason sa reaksion nia kan manodan nia an katotoohan sa Biblia, sia nagsabi: “Gusto ko ining sabihon sa gabos!” Kun napapahalagahan nin sarong tinotokdoan sa Biblia an pagigin totoo kan itinotokdo sa saiya hale sa Kasuratan, tibaad ogmahon sia kaya haros iyan an pirme niang ipinapakipag-olay. Tibaad asahan nia na aakoon tolos kan bakong kapagtubod na mga kapamilya nia an mensahe kan Kahadean, alagad tibaad magin bakong paborable an pag-ako ninda kan maogmang bareta. Ano an epekto sa agom ni Jason kan entusiasmo kaini kan enot? “Naaburido ako,” an nagigirumdoman kan agom nia. Sarong babae na nag-ako kan katotoohan 18 taon pagkatapos na akoon iyan kan saiyang agom an nagsabi, “Para sa sako, kaipuhan kong manodan iyan nin luway-luway.” Kun may tinotokdoan ka ngonyan sa Biblia na an agom mayong kamawotan na makikabtang sa tunay na pagsamba, taano ta dai magkaigwa nin regular na mga sesyon sa pag-ensayo tanganing tabangan an tinotokdoan na mataktikang atubangon an masakit na mga situwasyon? Si Moises nagsabi: “An sakong tokdo maturo siring sa oran, an sakong tataramon madalihig siring sa ambon, siring sa maluyang oran sa kadootan.” (Deut. 32:2, NW) Sa parate, mas makakatabang an pira sanang turo o tagdo nin katotoohan imbes na paoranan sia nin espirituwal na mga katotoohan.
10-12. (a) Anong konseho an itinao ni apostol Pedro sa mga Kristiano na bakong kapagtubod an agom? (b) Paano nanodan nin sarong tinotokdoan sa Biblia na iaplikar an konseho sa 1 Pedro 3:1, 2?
10 Si apostol Pedro nagtao nin ipinasabong na konseho para sa Kristianang mga agom na an pamilya nababanga huli sa relihion. ‘Magpasakop sa saindong mga agom na lalaki,’ an isinurat nia, ‘tanganing, minsan kun may dai minatubod sa tataramon, sinda madara na dai nin tataramon huli kan pamumuhay nin saindang mga agom na babae, sa pagheling kan saindong mabining pamumuhay na may pagkatakot [“hararom na paggalang,” NW].’ (1 Ped. 3:1, 2) Tibaad madara nin agom na babae an saiyang agom sa tunay na pagsamba paagi sa pagpasakop asin pagpaheling nin hararom na paggalang sa agom nia, dawa maringis an pagtratar kaini sa saiya. Siring man, an may pagtubod na agom na lalaki maninigong gumawe sa diosnon na paagi asin magin mamomoton na payo kan pamilya sa ibong nin ano man na pagkontra na tibaad maeksperyensiahan nia sa saiyang agom.—1 Ped. 3:7-9.
11 Ipinapaheling kan dakol na halimbawa sa presenteng panahon an kahalagahan kan pag-aplikar kan konseho ni Pedro. Isip-isipa an halimbawa ni Selma. Kan makipag-adal sia sa Biblia sa mga Saksi ni Jehova, dai naogma an saiyang agom na si Steve. Inadmitir ni Steve na naanggot sia, nagselos, asin natakot. Sinabi ni Selma na dawa kan dai pa nia aram an katotoohan, an buhay nia kaiba si Steve garo pagtulay sa alambre. Sinabi pa nia: “Aranggoton sia. Kan magpoon na akong mag-adal sa Biblia, gruminabe pa an ugaleng ini.” Ano an nakatabang?
12 May nagigirumdoman si Selma na leksion na nanodan nia sa Saksi na nagtokdo sa saiya. “Sarong aldaw kaidto,” an sabi ni Selma, “habo kong mag-adal sa Biblia. Kan banggi bago idto, nagdiskusyon kami ni Steve asin kinolgan nia ako, kaya namondo ako asin naherak sa sadiri ko. Pagkatapos kong sabihon sa sister an nangyari asin an namatean ko, ipinabasa nia sa sako an 1 Corinto 13:4-7. Pagkabasa ko, nagpoon akong mangatanosan, ‘Dai man lamang ginigibo sako ni Steve an arin man sa mamomoton na mga bagay na ini.’ Alagad pinapag-isip ako kan sister kan hapoton nia ako, ‘Pira sa mga gibong iyan nin pagkamoot an ipinapaheling mo sa agom mo?’ An simbag ko, ‘Mayo, ta depisilon siang pakiibanan.’ Maboot na nagtaram an sister: ‘Selma, siisay digdi an naghihingoang magin Kristiano? Ika o si Steve?’ Huling narealisar ko na kaipuhan kong liwaton an kaisipan ko, namibi ako ki Jehova na tabangan akong magin mas mamomoton ki Steve. Luway-luway na nagbago an mga bagay-bagay.” Pakalihis nin 17 taon, inako ni Steve an katotoohan.
KUN PAANO MAKAKATABANG AN IBA
13, 14. Paano an iba sa kongregasyon makakatabang sa mga nasa pamilyang nababanga huli sa relihion?
13 Siring kan padikitdikit na mga turo nin oran na minasagom sa daga asin nakakatabang sa pananom na tumubo, dakol na indibiduwal sa kongregasyon an nakakakontribwir sa kaogmahan nin mga Kristianong nababanga an pamilya. “An pagkamoot kan mga tugang an nakatabang sa sako na manindogan sa katotoohan,” an sabi ni Elvina na taga Brazil.
14 Dakula an magigibo nin kabootan asin pagmakolog kan mga tugang sa kongregasyon tanganing mabago an saboot nin bakong kapagtubod na miembro nin pamilya. Sarong agom na lalaki na taga Nigeria, na nag-ako kan katotoohan 13 taon pagkatapos na akoon iyan kan saiyang agom, an nagsabi: “Mantang nagbibiahe ako kaiba an sarong Saksi, naraot an lunadan nia. Naghanap sia nin mga kapwa Saksi sa kataed na baryo, asin tinawan ninda kami nin madadagosan kan bangging idto. Inasikaso ninda kami na garo baga magkamiridbid na kami poon kan mga aki pa kami. Namatean ko tolos an Kristianong pagkamoot na pirmeng sinasabi kan agom ko.” Sa Inglatera, sarong agom na babae, na nag-ako kan katotoohan 18 taon pagkatapos na akoon iyan kan saiyang agom, an nagsabi: “Iniimbitaran kaming duwa kan mga Saksi na magkakan kaiba ninda. Pirme kong namamatean na maogma ninda akong inaako.” * Sa nasyon man sanang iyan, sarong agom na lalaki na nagin Saksi kan huri an nagsabi: “Dinadalaw kami nin mga tugang, o iniimbitaran ninda kami sa saindang harong, asin naheling ko na mapagmakolog sinda. Lalo ining narisa kan maospital ako asin dakol an nagdalaw sako.” Makakahanap daw kamo nin mga paagi na ikapaheling an kaagid na pagmakolog sa bakong kapagtubod na mga miembro nin pamilya?
15, 16. Ano an makakatabang sa sarong Kristiano na magin maogma pa man giraray dawa kun an iba sa pamilya magdanay na bakong kapagtubod?
15 Siempre, bakong gabos na agom, aki, magurang, o iba pang paryente na bakong kapagtubod maako kan tunay na pagsamba, dawa pa an kapamilyang Saksi maimbod na minagawe asin mataktikang nagpapatotoo sa laog nin dakol na taon. An nagkapira nagdadanay na daing interes o padagos na nagkokontra. (Mat. 10:35-37) Minsan siring, kun an mga Kristiano nagpapaheling nin diosnon na mga kualidad, puede iyan magkaigwa nin marahayon na epekto. Sarong dating bakong kapagtubod na agom an nagsabi: ‘Kun isinasabuhay na kan may pagtubod na agom an magayonon na mga kualidad na iyan, dai nindo aram kun ano an naglalaog sa isip asin puso kan bakong kapagtubod. Kaya, dai noarin man mawaran nin paglaom sa saindong agom.’
16 Dawa kun magdanay na bakong kapagtubod an kapamilya, puede pa man giraray magin maogma an sarong Kristiano. Sarong sister, na 21 taon nang nagmamaigot na magpatotoo sa saiyang agom na dai naghihimate sa mensahe kan Kahadean, an nagsabi: “Napapagdanay ko an kagayagayahan ko paagi sa pagmamaigot na paogmahon si Jehova, pagigin maimbod pirme sa saiya, asin paghihingoang pakosogon an sakong espirituwalidad. Paagi sa pagigin sibot ko sa espirituwal na mga aktibidad—personal na pag-adal, pag-atender sa mga pagtiripon, ministeryo sa langtad, asin pagtabang sa iba sa kongregasyon—nagigin mas dayupot ako ki Jehova asin naiingatan an puso ko.”—Tal. 4:23.
DAI MAWARAN NIN PAGLAOM!
17, 18. Ano an makakatabang sa sarong Kristiano na dai mawaran nin paglaom dawa an pamilya nia nababanga huli sa relihion?
17 Kun ika sarong maimbod na Kristiano na an pamilya nababanga huli sa relihion, dai ka mawaran nin paglaom. Girumdomon na ‘dai papabayaan ni Jehova an saiyang banwaan huli kan saiyang dakulang ngaran.’ (1 Sam. 12:22) Sia kaiba mo sagkod na nangangapot ka sa saiya. (Basahon an 2 Cronica 15:2.) Kaya, “magkaigwa nin labi-labi nanggad na kaogmahan ki Jehova.” Iyo, “ipamahala mo ki Jehova an saimong dalan, asin manarig ka sa saiya.” (Sal. 37:4, 5, NW) ‘Magmaigot sa pamimibi,’ asin magtubod na matatabangan ka kan satong Ama sa langit na matagalan an gabos na klase nin kasakitan.—Roma 12:12.
18 Makimaherak ki Jehova na tawan ka kan saiyang banal na espiritu tanganing tabangan kang mapatalubo an katoninongan sa harong. (Heb. 12:14) Iyo, posibleng makapatalubo nin katoninongan sa harong, na tibaad pag-abot nin panahon makapahiro sa bakong kapagtubod na mga kapamilya. Maeeksperyensiahan mo an kaogmahan asin an katoninongan nin puso asin isip mantang ‘ginigibo mo an gabos sa ikakamuraway nin Dios.’ (1 Cor. 10:31) Sa mga paghihingoang ini, nakakapakosog nanggad sa boot na maaraman na yaon an mamomoton na pagsuportar sa saimo kan saimong mga tugang sa Kristianong kongregasyon!
[Mga Nota sa Ibaba]
^ par. 4 Sinalidahan an mga ngaran.
^ par. 8 Dai ipinagbabawal sa sadol ni Pablo an legal na separasyon sa grabeng mga situwasyon. Iyan seryosong personal na desisyon. Helingon an pahina 220-221 kan librong “Magdanay Kamo sa Pagkamoot nin Dios.”
^ par. 14 Dai ipinagbabawal sa Kasuratan an pagkakan kaiba an mga bakong kapagtubod.—1 Cor. 10:27.
[Mga Hapot Para sa Pag-adal]
[Ritrato sa pahina 28]
Pilion an tamang panahon na ipaliwanag an saimong mga tinutubod
[Ritrato sa pahina 29]
Magpaheling nin interes sa bakong kapagtubod na agom
