Kuti Mwaba ne Nsansa Nangu aba mu Ng’anda Yenu Tabatetekela
Kuti Mwaba ne Nsansa Nangu aba mu Ng’anda Yenu Tabatetekela
‘Waishiba shani, limbi ni we ukapususha [umwina mobe]?’—1 KOR. 7:16.
BUSHE KUTI MWASANGA IFYASUKO?
․․․․․
Bushe Abena Kristu abekala na bashatetekela kuti bacita shani pa kuti mu mayanda muleba umutende?
․․․․․
Cinshi Umwina Kristu engacita pa kuti aba mu ng’anda yakwe abashatetekela basambilile icine?
․․․․․
Finshi bambi bengacita ku kwafwa bamunyinefwe abekala na bashatetekela?
1. Ciba shani uwa mu ng’anda nga asumina ubukombe bwa Bufumu?
INSHITA imo ilyo Yesu atumine abatumwa bakwe atile: “Ilyo muleya, mulebila amuti, ‘Ubufumu bwa mu muulu nabupalama.’” (Mat. 10:1, 7) Imbila nsuma kuti yaleta umutende ne nsansa ku basumina ne mitima yonse. Lelo Yesu alisokele abatumwa bakwe ukuti abengi bakulabalwisha ilyo bakulabila imbila nsuma iya Bufumu. (Mat. 10:16-23) Cilakalipa sana nga ca kuti aba mu ng’anda bakaana ubukombe bwa Bufumu.—Belengeni Mateo 10:34-36.
2. Cinshi twingalandila ukuti Umwina Kristu kuti aba ne nsansa nangu umwina mwakwe tatetekela?
2 Bushe Abena Kristu abo abena mwabo bashatetekela te kuti bakwate insansa mu cupo? Kuti bakwata. Nangu ca kuti inshita shimo bamo kuti balelwisha sana aba mu ng’anda yabo, lelo te fyo lyonse ciba. E lyo te lyonse abantu batwalilila ukulwisha aba mu ng’anda yabo. Ilingi line, cishintilila pa fyo abatetekela bacita nga balebalwisha. Yehova alapaala aba cishinka kuli ena, kabili alabafwa ukuba ne nsansa nangu ca kuti balebalwisha. Abatetekela kuti babombesha ukuba ne nsansa (1) nga bale-esha na maka ukuba aba mutende (2) nga bale-esha na maka yonse ukwafwa abena mwabo abashatetekela ukusambilila icine.
BENI ABA MUTENDE MU NG’ANDA
3. Cinshi ico Umwina Kristu alingile ukubela uwa mutende nangu ca kuti aba mu ng’anda yakwe tabatetekela?
3 Pa kuti aba mu ng’anda abashatetekela basambilile icine, kano twaba aba mutende. (Belengeni Yakobo 3:18.) Aba mu ng’anda nga tabalasumina icine, umutwe wa ng’anda afwile ukubombesha pa kuti mu ng’anda mwaba umutende. Kuti acita shani?
4. Cinshi cingalenga Abena kristu ukulakwata umutende?
4 Abena Kristu balingile ukuba aba mutende. Kanshi balingile ukulapepa no mweo onse pantu ukupepa kulatulenga ukuba sana no “mutende wa kwa Lesa.” (Fil. 4:6, 7) Icilenga ukuti tukwate insansa no mutende, kusambilila Icebo ca kwa Lesa no kulakonka ifyo tulesambilila. (Esa. 54:13) Nga tulefwaya ukuba no mutende ne nsansa tulingile ukulalandapo pa kulongana e lyo no kuba abacincila mu kubila mbila nsuma. Nangu fye Bena Kristu abekala mu mayanda umwaba abashatetekela, kuti balebombako imilimo ya Bwina Kristu. Lekeni tulande pali ba Enza, * abo abena mwabo balwisha sana pa mulandu wa cine. Aba bankashi baya mu kushimikila nga bapwisha ukubomba imilimo pa ng’anda. Ba Enza batile, “Lyonse nga naya mu kushimikila, Yehova alampaala sana.” Ifyo ampaala filenga ndekwata umutende, ndomfwa bwino kabili ndaba ne nsansa.
5. Mafya nshi Abena Kristu bakwata abo abena mwabo bashatetekela kabili finshi fingabafwa?
5 Tulingile ukubombesha sana ukuba no mutende ku ba mu ng’anda yesu abashatetekela. Kwena kuti cileafya sana pantu ifyo limbi bengalafwaya ukuti tulecita kuti filepusana ne fyo Baibolo ilanda. Ukukonka ifyo Baibolo ilanda limbi kuti kwalenga aba mu ng’anda yesu abashatetekela ukulafulwa, lelo ukutwalilila aba cishinka kuti kwalenga mu ng’anda mwaba umutende ku ntanshi. Nomba nga tulekoselela fye pa kukaanya icintu icishilelwishanya na mafunde ya kwa Lesa, kuti twalapusana fye apabula no mulandu. (Belengeni Amapinda 16:7.) Nga natukwata amafya, kuti cawama ukukonka ukufunda ukwa mu mpapulo sha “musha wa cishinka kabili uwashilimuka” e lyo no kufunda kwa baeluda.—Amapi. 11:14.
6, 7. (a) Cinshi cilenga ukuti bamo balekaanya aba mu ng’anda yabo ukulasambilila ne Nte sha kwa Yehova? (b) Bushe uulesambilila Baibolo nelyo uwatetekela kuti acita shani nga aba mu ng’anda balemulwisha?
6 Ukucetekela Yehova no kwishiba ifyo aba mu ng’anda abashatetekela batontonkanya kuti kwalenga twaba no mutende mu ng’anda. (Amapi. 16:20) Nangu fye abalesambilila Baibolo nabo kuti baishiba ukuti ukucetekela Yehova kuti kwalenga mu ng’anda mwaba umutende. Bamo abashatetekela limbi te kuti bakaanye abena mwabo ukusambilila Baibolo. Limbi kuti batemwa no kusumina ukuti ukusambilila Baibolo kuti kwayafwa ulupwa lwabo. Na lyo line, bambi nabo te kuti babasuminishe. Ba Esther, abo pali ino nshita ni baNte batile balifulilwe “icine cine” ilyo abena mwabo batampile ukusambilila Baibolo na baNte. Batile “Nalepoosa ifitabo fyabo nangu fye ukufyoca.” Ba Howard abalekaanya abena mwabo ukusambilila Baibolo batile, “Abaume abengi balatiina ukuti abena mwabo balebafulunganya pa kuti bafume uko bapepa. Umwaume limo te kuti eshibe ifya kucita nga amona umwina mwakwe alesambilila Baibolo ica kutila limbi kuti amupata.”
7 Ulesambilila Baibolo uo umwina mwakwe ashifwaya talingile ukuleka ukusambilila Baibolo. Ilingi kuti alepwisha amafya nga ali uwatekanya kabili uwa mucinshi ku mwina mwakwe ushatetekela. (1 Pet. 3:15) Ba Howard batile, “Ndatasha pantu umwina mwandi ali uwatekanya kabili talefulwa!” Abena mwabo nabo batile: “Ba Howard balefwaya ndeke ukusambilila Baibolo. Balenjeba abati baNte balimfulunganya. Mu nshita ya kulakansana nabo, nalandile fye nati nalimo ca cine, kabili nabebele no kuti, kwena nshimona ukuti balimfulunganya. E co nalibapeele ibuuku nalesambililamo pa kuti babelengemo. Balibelengelemo kabili balisumine fyonse ifyo ibuku lyalelanda. Ifyo babelengele fyalibafikile pa mutima.” Kanshi tulingile lyonse ukulaibukisha ukuti abena mwesu abashatetekela kuti bamona kwati natubalekelesha e lyo limbi kuti balaumfwa umwenso nga tulebasha ilyo twaya mu kubombako imilimo ya Bwina Kristu, lelo ukulabeba ukuti twalibatemwa kuti kwabafwa ukukanasakamana.
BAFWENI UKUSAMBILILA ICINE
8. Finshi umutumwa Paulo afundile Abena Kristu abo abena mwabo bashatetekela?
8 Umutumwa Paulo afunda Abena Kristu ukukanaleka abena mwabo pa mulandu fye wa kuti tabatetekela. * (Belengeni 1 Korinti 7:12-16.) Ukwishiba ukuti umwina mwesu ushatetekela kuti aba Nte kuti kwatwafwa ukuba ne nsansa. Ilyo tule-esha ukusambilisha icine ushatetekela, kuli icintu ico tufwile ukwishiba nga fintu ica ifya kumwenako fyakonkapo filelangilila.
9. Nga tulefwaya ukusambilisha icine aba mu ng’anda yesu abashatetekela, finshi ifyo tulingile ukwishiba?
9 Nga batontonkanya pa fyo balecita ilyo basambilile icine, ba Jason batile, “Nalefwaya ukulashimikila fye onse uo namona!” Abalesambilila Baibolo nga baishiba ukuti ifyo basambilila mu Malembo fya cine, balatemwa sana ica kuti balafwaya lyonse fye ukulalandapo. Benekela aba mu ng’anda yabo ukusumina icine ilyo line fye, lelo limbi aba mu ng’anda te kuti batemwe ukumfwa icine. Bushe ifyo ba Jason balecita ilyo basambilile icine fyalengele abena mwabo ukulaumfwa shani? Abena mwabo batile, “Naleumfwa sana ububi.” Umwanakashi umo uwasambilile icine pa numa ya myaka 18 ukutula apo umwina mwakwe asambilile icine, atile, “Ine nalefwaya ukulasambilila panono panono.” Nga ca kuti mulesambilisha umuntu icine uo umwina mwakwe tafwaya ukusambilila, mulingile lyonse ukulamulanga ifya kucita pa kuti engalalanda no mwina mwakwe bwino bwino. Mose atile: “Ifyebo fyandi fyalakonkoloka ngo mume, Nge mfula iilemiima pa cani.” (Amala. 32:2) Ukusambilisha abena mwenu icine panono panono kuti kwalenga basambilila ukucila ukubasambilisha ifingi pa muku umo fye.
10-12. (a) Finshi umutumwa Petro afundile Abena Kristu abo abena mwabo bashatetekela? (b) Bushe umusambi wa Baibolo asambilile shani ukukonka ukufunda ukwaba pali 1 Petro 3:1, 2?
10 Umutumwa Petro afundile abanakashi Abena Kristu abaupwa ku bashatetekela ati: “Mulenakila abalume benu, pa kutila na balya abakaana ukumfwila icebo ca kwa Lesa, banashiwe apabula ishiwi nangu limo ilyo balemona imibele isuma iya bakashi babo, pantu abene bakulaimwena imyendele yenu iisuma e lyo ne fyo mwabakwatila akatiina.” (1 Pet. 3:1, 2) Umwanakashi kuti alenga umwina mwakwe ukusambilila icine nga ca kuti alenakila no kulanga sana umucinshi nangu umulume wakwe wa culukusu. Nangu fye mwaume, na o wine alingile ukuba ne mibele ya Bwina Kristu kabili afwile ukutemwa aba mu ng’anda yakwe nangu nga umwina mwakwe uushatetekela alamulwisha.—1 Pet. 3:7-9.
11 Ifya kumwenako ifingi ifya muno nshiku filangilila ukuti ukukonka ukufunda kwa kwa Petro kusuma nga nshi. Natulande pa fyacitikile ba Selma. Ilyo batendeke ukusambilila Baibolo ne Nte sha kwa Yehova, abena mwabo ba Steve tabatemenwe. Ba Steve batile, “nalifulilwe, nali no bufuba, nshalefwaya alefuma pa ng’anda kabili naleumfwa umwenso wa kuti akambutuka.” Ba Selma nabo batile: “Nangu fye ilyo nshilasambilila icine, icupo cesu na ba Steve cali ca kutentemba fye. Balefulwa bwangu. Ilyo natampile ukusambilila Baibolo e lyo caciliileko.” Cinshi cabafwile?
12 Ba Selma balebukisha icintu cimo ico basambilile kuli Nte. Batile, “Bushiku bumo nshalefwaya ukusambilila Baibolo. Ubushiku bwafumineko ba Steve balingumine ilyo nale-esha ukubeba icishinka, kabili nalyumfwile ubulanda no kuyumfwila uluse. Ilyo naebeleko nkashi ifyacitike ne fyo naleumfwa, anjebele ukubelenga 1 Abena Korinti 13:4-7. Ilyo nabelengele, natampile ukutontonkanya ukuti, ‘ba Steve tabancitilapo nangu cimo pali fi nabelenga.’ Lelo nkashi alinjafwile ukutontonkanya bwino ilyo anjipwishe ati, ‘Ni finga pali ifi wabelenga ifyo ucitila abena mobe?’ Nayaswike nati, ‘tapali nangu cimo pantu balyafya sana.’ Lyena nkashi alinjipwishe ati, ‘Selma, bushe uulefwaya ukuba Umwina Kristu nani pali iwe na ba Steve?’ Ilyo nailwike ukuti ningile ukwaluka, nalipepele kuli Yehova ukungafwa pa kuti ndelanga ba Steve ukutemwa. Panono panono, ifintu fyatampile ukwaluka.” Pa numa ya myaka 17, ba Steve balisambilile icine.
IFYO BAMBI BENGAFWA
13, 14. Bushe aba mu cilonganino kuti bayafwa shani bamunyinefwe mu mayanda umwaba abashatetekela?
13 Nga filya fine imfula iloka panono panono no kubomfya umushili e lyo no kulenga ifimenwa ukukula, e fyo na babwananyina abengi mu cilonganino baafwa Abena Kristu abo abena mwabo tabatetekela. Ba Elvina aba ku Brazil batile, “Ababwananyina balananga sana ukutemwa kabili uku kutemwa kwalinenga ukukosa ndi mu cine.”
14 Abashatetekela kuti basambilila icine nga ca kuti aba mu cilonganino balebalanga icikuku no kubabikako amano. Munyinefwe mu Nigeria uwasambilile icine pa numa ya myaka 13 ukutula apo umwina mwakwe asambilile icine, atile: “Ilyo nali pa lwendo na Nte, motoka yakwe yalifwile. Afwaile baNte abali mupepi kabili balitulangile no mwa kulala ubo bushiku. Balitusungile bwino sana kwati bantu twaishibe fye ukufuma ku bwaice. Ilyo line fye, nalimwene ukuti baNte balitemwana nga filya fine umwina mwandi lyonse alanda.” Nkashi mu England uwasambilile icine pa numa ya myaka 18 ukutula apo abena mwakwe basambilile icine, na o atile: “BaNte baletwita na bena mwandi ku fya kulya. Baletupokelela bwino sana.” * Umwaume umbi mu England uwaishileba Nte atile: “Bamunyinefwe baletutandalila e lyo inshita shimo baletwita ku mayanda yabo, kanshi nasangile ukuti balasakamana sana abantu. Nalishininkishe sana ukuti balasakamana pantu ilyo nali mu cipatala abengi balishile mu kumpempula.” Bushe na imwe te kuti mufwaye inshila shimbi isho mwingalangilamo abashatetekela mu lupwa lwenu ukuti mwalibabiko amano?
15, 16. Cinshi cingafwa Umwina Kristu ukutwalilila ukuba ne nsansa nangu ca kuti aba mu lupwa lwakwe bakaninina fye icine?
15 Nangu cibe fyo, te bonse abo abena mwabo, abana, abafyashi nelyo balupwa abashatetekela abengasambilila icine nangu ca kuti muli ba cishinka e lyo mwalyesha ne nshila ishisuma isha ku bashimikilamo pa myaka iingi. Bamo kuti baikala fye ukwabula ukusambilila e lyo bambi nabo kuti batwalilila fye ukulamulwisha. (Mat. 10:35-37) Lelo nga tulelanga imibele iisuma iya Bwina Kristu, kuti mwafuma ifisuma. Umwaume umo ilyo talasambilila icine atile: “Ilyo umuntu uwatetekela atendeka ukulanga imibele iisuma, tatwishiba ificitika mu mitima ya bashatetekela. Kanshi tamulingile ukuleka ukucitila ifisuma abena mwenu abashatetekela.”
16 Nangu ca kuti uwa mu lupwa tasambilile icine, Abena Kristu kuti batwalilila ukuba ne nsansa. Nkashi umo alyeseshe pa myaka 21 ukushimikila umwina mwakwe lelo tasumine icine. Atile: “Ndeesha ukuba ne nsansa pa kutwalilila ukucita ico Yehova afwaya, ukuba uwa cishinka kuli ena e lyo no kubombesha pa kuti naba na bucibusa bwakosa na Yehova. Ukulacitako ifya ku mupashi pamo nga ukuisambilisha, ukulongana, ukushimikila no kula-afwako bambi mu cilonganino kwalilenga napalama sana kuli Yehova kabili fyalingafwa ukusunga umutima wandi.”—Amapi. 4:23.
TAMUFWILE UKUNENUKA!
17, 18. Bushe Umwina Kristu kuti alanga shani ukuti wa citetekelo nangu ca kuti ekala na bashatetekela?
17 Nga muli Bena Kristu ba cine abekela mu ng’anda umwaba abashatetekela, tamufwile ukunenuka. Ibukisheni ukuti “Yehova takaleke abantu bakwe pa mulandu we shina lyakwe ilikulu.” (1 Sam. 12:22) Akulaba nenu lyonse kulila fye mwalambatila kuli ena. (Belengeni 2 Imilandu 15:2.) Kanshi ‘sekeleleni nga nshi muli Yehova.’ E ico ‘Lekeni Yehova aletungulule inshila shenu, kabili mutetekeleni.’ (Amalu. 37:4, 5). E co “beni no mute wa kupepa,” kabili tetekeleni ukuti Shifwe wa ku muulu uwakwata ukutemwa akatwafwa ukushipikisha amesho yonse.—Rom. 12:12.
18 Lombeni umupashi wa mushilo kuli Yehova pa kuti ulemwafwa ukuba no mutende mu ng’anda yenu. (Heb. 12:14) Ca cine, kuti mwaba aba mutende ku ba mu ng’anda yenu kabili kuti calenga abashatetekela basambilila icine. Mukakwata insansa no mutende ilyo ‘mulecita fyonse ku kucindika Lesa.’ (1 Kor. 10:31) Kanshi mulingile ukwishiba ukuti bamunyinenwe aba mu cilonganino ba kulamwafwa!
[Amafutunoti]
^ para. 4 Amashina te yabo.
^ para. 8 Ukufunda kwa kwa Paulo takukaanya ukupatukana ukwa mwi funde nga cayafya sana. Uyu mulandu uo umuntu umwine afwile ukuipingwila. Moneni icitabo ca “Ikalilileni mu Kutemwa kwa kwa Lesa,” amabula 220-221.
^ para. 14 Baibolo tayakaanya ukulya na bashatetekela.—1 Kor. 10:27.
[Ifipusho]
[Icikope pe bula 28]
Saleni inshita iisuma iya kulondolola ifyo mwasambilila mu Baibolo
[Icikope pe bula 29]
Mulebika amano ku bena mwenu abashatetekela
