A Tongeni wor Pwapwa lon eü Famili mi Sokkofesen ar Lükü

“Ifa usun om kopwe silei pwe kopwe tongeni amanaua pwülüom we?”​—1 KOR. 7:16.

KA TONGENI KÜNA PÖLÜWER?

Met ekkewe Chon Kraist repwe föri pwe epwe wor kinamwe lon ar famili mi sokkofesen ar lükü?

Ifa usun emön Chon Kraist epwe älisi an famili le etiwa ewe enlet?

Ifa usun sipwe älisi pwiich kewe ar famili ese fiti ewe enlet?

1. Lupwen emön a etiwa ewe enlet, epwe tongeni ifa meefien chon an famili?

 LON eü fansoun lupwen Jises a tiinaalo nöün kewe aposel, iei met a ereniir: “Oupwe feila o afalafala ei kapas, ‘Ewe Mwün Läng a arapoto.’” (Mt. 10:1, 7) Ei kapas allim a tongeni atoto kinamwe me pwapwa ngeni chokkewe mi etiwa eti kilisou. Nge Jises a pwal öüröürer pwe chommong repwe ü ngeni ar angangen afalafal. (Mt. 10:16-23) A mmen äweires ika emön a küna koput seni pwisin chon an famili pokiten an etiwa ewe kapas allim.​—Älleani Mattu 10:34-36.

2. Pwata sia tongeni pwapwa inaamwo ika ach famili ese fiti ewe enlet?

² Iwe met, itä sise tongeni pwapwa ika ach famili ese fiti ewe enlet? Aapwi. Pwüngün pwe ekkoch a watte koputer seni chon ar famili, nge sap meinisin a ina usun. Pwal och, än ewe famili ü ngeni ewe Chon Kraist eli esap nomofochelo. Ina popun ese lifilifil met nonnomuch, nge sia tongeni chüen küna pwapwa ika sia föfföröch ngeni chon ach famili mi oput are rese kon pwapwaiti ewe enlet. Jiowa epwe pwal älisi chokkewe mi tüppwöl ngeni ar repwe pwapwa pwal mwo nge fän weires. Chon Kraist ra tongeni chüen pwapwa ika ra (1) achocho le efisi kinamwe lon ar famili me (2) älisi ar famili pwe repwe etiwa ewe enlet.

ACHOCHO LE EFISI KINAMWE LON FAMILI

3. Pwata a lamot emön Chon Kraist epwe achocho le efisi kinamwe lon ewe famili?

³ Ika pwe a wor kinamwe lon ewe famili, iwe, epwe ämecheresi än ewe famili etiwa ewe enlet. (Älleani Jemes 3:18.) Inaamwo ika chon ewe famili resaamwo chon fel ngeni Jiowa, nge a lamot emön Chon Kraist  epwe achocho le efisi kinamwe lon ewe famili. Ifa usun epwe föri ena?

4. Ifa usun sipwe akkamwöchü kinamween letipach?

⁴ Mi lamot sipwe akkamwöchü kinamween letipach. Ach sipwe föri ena, a lamot sipwe tingor “än Kot kinamwe mi tekia seni ach tongeni weweiti.” (Fil. 4:6, 7) Pwapwa me kinamwe a feito seni ach käkkäeö usun Jiowa me etipeeüfengeni manauach ngeni än Paipel kewe kapasen emmwen. (Ais. 54:13) A pwal lamot sipwe uwawu meefiach lon ach kewe mwich me tinikken lon ewe angangen afalafal ika sia mochen kinamwe me pwapwa. Mi tufich ngeni chokkewe ar famili ese fitiir lon ewe enlet ar repwe pwal föri ekkena mettoch mi lamot. Äwewe chök, emön fin Kraist itan Enza, pwülüwan we a fokkun ü ngeni an lükü. * (Ppi ewe pworaus fan.) Mwirin an äwesi an angangen leimw, a lo afalafal. Enza a erä, “Jiowa a fokkun efeiöchüei pun ua uwaöch lon ai angangen afalafal iteiten fansoun ua achocho le esilei ngeni aramas ewe kapas allim.” Ekkeei feiöch a atoto kinamwe, menemenöch me pwapwa.

5. Met sokkun weires ekkewe Chon Kraist ar famili ese fiti ewe enlet repwe tongeni küna? Ia repwe tongeni küna älillis me ie?

⁵ A lamot sipwe achocho le efisi kinamwe ngeni chon ach famili rese fiti ewe enlet. Neman epwe weires pokiten repwe mochen ach sipwe föri och mettoch mi ü ngeni än Paipel kapasen emmwen me ach akkamwöchü minne mi pwüng epwe tongeni asonger. Nge ika sia achocho, eli eü rän epwe wor kinamwe lon ach famili. Pwüngün, kich sia achocho le fiti tipen chon ach famili ika pwe ese ü ngeni än Paipel kapasen emmwen pwe ete piitä tipefesen ese wor lamotan. (Älleani Än Salomon Fos 16:7.) Lupwen a wor osukosuk, a lamot sipwe kütta än Paipel emmwen seni nöüch kewe puk mi kawor me ren ewe mwichen chon angang mi alükülük o tipächem, me pwal seni ekkewe elter.​—SalF. 11:14.

6, 7. (a) Pwata ekkoch ra ü ngeni chon ar famili mi poputä käeö ren Chon Pwäraatä Jiowa? (b) Epwe ifa föfförün emön chon käeö are Chon Pwäraatä lupwen chon an famili ra ü ngeni?

⁶ A tongeni wor kinamwe lon ach famili ika sia lükülük woon Jiowa me achocho le weweiti meefien chon ach famili. (SalF. 16:20; 24:3) Pwal mwo nge chokkewe ra kerän käeö Paipel ra tongeni föri ena. Eli ekkoch resap ü ngeni än pwülüwer käeö ewe Paipel pokiten repwe fen ekieki pwe a öch fän iten ar famili. Nge ren ekkoch repwe fokkun ü ngeni. Esther, iei a emön Chon Pwäraatä, a erä pwe a fokkun song lupwen pwülüwan we a poputä käeö ren Chon Pwäraatä Jiowa. A apasa, “Ua kan manewu nöün kewe puk are fen keniirelo.” Howard a pwal ü ngeni pwülüwan we lupwen a poputä käeö Paipel. A erä pwe chommong mwän pwüpwülü ra lolilen ika pwe pwülüwer ra tupulo le fiti eü lamalam. A pwal erä pwe eli ren än mwän ekieki pwe pwülüwan epwe feiengaw, iwe, eli epwe arochongaw me pöchökkül ngeni.

⁷ A lamot sipwe älisi ewe chon käeö le weweiti pwe sap weween nge epwe ükütiw le käeö pokiten än pwülüwan we ü ngeni. Fän chommong a tongeni aöchüelo nonnomur ren an mosonoson me süföliti pwülüwan we. (1 Pit. 3:15, TF) Howard a apasa, “Ua fokkun kilisou pwe pwülüwei we a chök mosonoson me ese ösüngawa ai fos.” Pwülüwan we a äweweei pwe Howard a allükü ngeni an esap chüen käeö Paipel pun a ekieki Chon Pwäraatä Jiowa ra chök otupu i. A pwal apasa: “Use fen änini ngeni nge ua ereni pwe eli i a pwüng, nge ua pwal ereni pwe ren enletin use fen küna ifa usun ra otupuwei. Iwe ua tingorei an  epwe älleani ewe puk ua käkkäeö. A älleani me a tipeeü ngeni minne a älleani. A pwal fokkun kküü letipan.” A lamot sipwe chechchemeni pwe eli aramas repwe meefi tipitipingaw are ekieki pwe epwe ta ar ririin pwüpwülü ika pwülüwer kewe ra likitiirelo me lo fiti mwich are afalafal. Nge emön chon käeö Paipel are Chon Pwäraatä epwe tongeni eäni kapas mi kirekiröch fiti tong ngeni pwülüwan pwe epwe älisi an esap kon lolilen.

ÄLISIIR LE ETIWA EWE ENLET

8. Ifa än Paul we kapasen fön ngeni ekkewe Chon Kraist pwülüwer ese fitiir lon ar lükü?

⁸ Ewe aposel Paul a fönöü ekkewe Chon Kraist ar resap pöütaalo pwülüwer pokiten chök ar rese fiti ewe enlet. * (Ppi ewe pworaus fan.) (Älleani 1 Korint 7:12-16.) Emön Chon Kraist epwe tongeni pwapwa ika a chechchemeni pwe eli lon mwach pwülüwan epwe etiwa ewe enlet. Nge a och an epwe tümünü napanapen an älisi pwülüwan we le weweiti ewe enlet, usun met ekkeei pworaus mwirin epwap äiti ngenikich.

9. Met emön Chon Kraist epwe tümünü an esap föri atun a afalafala ewe enlet ngeni chon an famili?

⁹ Jason a fokkun pwapwa lupwen a kerän silei ewe enlet. A erä: “Ua mochen ereni aramas meinisin!” Lupwen emön chon käeö a mirititi pwe minne a käeö seni Paipel mi enlet, iwe, neman epwe fokkun meseik le pwoppworaus usun fansoun meinisin. Eli epwe ekieki pwe an famili repwe pwal mwittir etiwa ewe enlet, nge neman resap tipeeü ngeni. Ifa meefien pwülüwen Jason ren an mwasangasang usun ewe enlet? A meefi pwe Jason ese tongeni kaülo le fos usun ewe enlet. Emön fin Kraist, pwülüwan we a etiwa ewe enlet 18 ier mwan, a erä pwe a öch ngeni an epwe käeö ewe enlet ekis me ekis. Eli ka käkkäeö ngeni emön nge pwülüwan ese pwapwaiti ewe enlet. A öch kopwe äiti ngeni ifa usun epwe äweweei ewe enlet ngeni pwülüwan we fän tong pwe esap song. Ewe soufos Moses a erä: “Amwo ai kapasen kait epwe püngütiu usun üt, ai kapas epwe wüch usun amurenipwin, epwe usun chimwo won ewe fetil mi pwüküfö.” (Tut. 32:2) A fen öch ach sipwe apasa fitu chök kapas usun ewe enlet lon fansoun mi fich lap seni ach kapas chommong.

10-12. (a) Ifa än Piter we kapasen fön ngeni ekkewe Chon Kraist pwülüwer ese fiti ar lükü? (b) Ifa usun emön chon käeö Paipel a käeö le apwönüetä ewe kapasen fön mi mak lon 1 Piter 3:1, 2?

¹⁰ Fän emmwenien Kot, aposel Piter a awora ei kapasen fön fän iten fin Kraist pwülüwer ese fitiir lon ar lükü. A erä:  “Oupwe fokun aleasochisi pwülüemi kana, pun ika ekoch me leir resap lükü än Kot kapas, repwe tongeni lükü Jesus ren ämi föför. Ousap wisen apasata och kapas, pun repwe chök soulängila ren ar küna ämi föför mi limöch me ämi sile menin.” (1 Pit. 3:1, 2) Än ewe fin pwüpwülü tipetekison me enletin süföliti pwülüwan inaamwo ika a kirikiringaw ngeni, epwe älisi i le etiwa ewe enlet. Ewe mwän pwüpwülü Chon Kraist epwe pwal föfföröch me emmweni an famili fän tong, inaamwo ika pwülüwan we a ü ngeni an lükü.​—1 Pit. 3:7-9.

¹¹ Chommong Chon Kraist ikenäi ra küna feiöch seni ar apwönüetä än Piter we kapasen fön. Äwewe chök, lupwen Selma a poputä le käeö Paipel ren Chon Pwäraatä Jiowa, pwülüwan we Steve a oput. Steve a erä pwe a fokkun song, lolowo me lolilen. Neminna a erä pwe pwal mwo nge me mwen an silei ewe enlet, a weires an epwe nonnom ren pwülüwan na. A lamot ngeni Selma an epwe tümünüöchü meinisin minne a apasa me föri. A pwal apasa pwe Steve a kan mwittir song, nge ei osukosuk a fen lapolo lupwen a poputä le käeö ewe Paipel. Iwe, met a älisiir?

¹² Selma a chechchemeni eü lesen a käeö seni ewe Chon Pwäraatä mi käeö ngeni. A erä: “Lon eü rän, use mochen käeö ewe Paipel. Pokiten lon ewe pwinin mwan aua änini me Steve me a awataei, iwe ua letipengaw me meefi pwe ua attong. Ua ereni nei we sense met a fis me meefiei, iwe a ereniei pwe upwe älleani 1 Korint 13:4-7. Iwe atun ua älleani, ua ekieki, ‘Esap mwo fän eü än Steve epwe föri ekkeei mettoch mi pwäraatä an tong ngeniei.’ Nge, ewe chon afalafal a älisiei le siwili ai ekiek ren an eisiniei ika menni lein ekkewe napanap mi tong lon ewe wokisin ua pwäraatä ngeni pwülüwei we. Ua ereni, ‘Esor, pwe a fokkun weires ai upwe nonnom ren.’ Iwe, a mwöngününgün ngeniei, ‘Selma, iö me leimi a achocho le wiliti emön Chon Kraist? En are Steve?’” Selma a mirititi pwe a lamot an epwe siwili an ekiek. A apasa: “Ua iotek ngeni Jiowa an epwe älisiei le alapaalo ai pwäraatä tong ngeni Steve. Iwe, ekis me ekis a öchülo nonnomum.” Mwirin 17 ier, Steve a etiwa ewe enlet.

IFA USUN EKKEWE EKKOCH REPWE ÄLILLIS

13, 14. Met sipwe tongeni föri pwe sipwe älisi pwiich kewe ar famili rese fiti ewe enlet?

¹³ Usun chök chiin rän mi achöchönü ewe pwül me älisi ekkewe irä ar repwe määr, emön me emön lon ewe mwichefel ra tongeni älisi pwiir kewe ar famili esap Chon Kraist ar repwe pwapwa. Iei alon Elvina seni Brazil, “Än pwii kewe lon ewe mwichefel pwäraatä tong a älisiei le üppos lon ewe enlet.”

 ¹⁴ Än ewe mwichefel pwäraatä kirekiröch me tong a tongeni siwili letipen emön chon lükün. Iei alon emön pwiich lon Nigeria, pwülüwan a akkomw etiwa ewe enlet 13 ier me mwan: “Lupwen ua fiti emön Chon Pwäraatä le säi, waan we a ta. A kütta chienan kewe Chon Pwäraatä lon ewe sopw mi kan ngeni me ra eleeniakem lon ena pwinin. Ra tümünükem usun itä ra sissilekem seni le kükkünüm. Mwittir chök, ua meefi ewe tongen Chon Kraist pwülüwei we a kan fos usun.” Lon England, emön pwiich mi etiwa ewe enlet 18 ier mwirin pwülüwan we, a chechchemeni: “Ekkewe Chon Pwäraatä Jiowa ra kan etiwakem me rüüemön le möngö rer. Iteitan ua meefi ar awasölaöchükem.” * (Ppii ewe pworaus fan.) Emön mwan seni England, a pwal wiliti emön Chon Pwäraatä mwirin och fansoun a erä: “Pwiich kewe ra kan chuurikem lon imwem, are etiwakem lon imwer. Me ua küna pwe ra tongei aramas. Äkkäeüin a pwä ena lupwen ua lüing nge chommong ra etto chuuriei.” Ka tongeni pwäraatä ena esin tong ngeni familien chokkewe ra chök äläemön lon ewe enlet?

15, 16. Met epwe älisi chokkewe mi chök äläemön lon ewe enlet ar repwe chüen pwapwa?

¹⁵ Pwüngün, inaamwo ika sipwe föri minne mi pwüng me afalafal fän ewe napanap mi pwäraatä tong lon fite fite ier, nge sap meinisin chon ach famili repwe etiwa ewe enlet. Ekkoch repwe chüen ü ngeni are resap pwapwaiti ewe enlet. (Mt. 10:35-37) Nge ika sia pwäraatä napanapen Chon Kraist epwe tongeni fokkun uwaöch. Emön mwän a wiliti Chon Pwäraatä Jiowa mwirin pwülüwan we, a erä pwe neman sise silei ifa usun napanapöchün ekkewe Chon Kraist epwe achüngü ekiekin me letipen pwülüwen pwich kewe rese fiti ewe enlet. A pwal erä, “Kosap fokkun fangetä woon pwülüwom we ese lükü.”

¹⁶ Chokkewe ar famili ese etiwa ewe enlet ra chüen tongeni pwapwa. Emön fin Kraist a achocho le afalafal ngeni pwülüwan we ükükün 21 ier, nge ese mochen etiwa. A erä pwe a tongeni amwöchü an pwapwa ren an achocho le apwapwaai Jiowa, tüppwöl ngeni, me angang woon an apöchökküla an riri ngeni I. A pwal erä pwe a kan tinikken lon an pwisin käeö Paipel, fiti mwich, afalafal, me älisi ekkewe ekkoch lon ewe mwichefel. Ei mettoch a älisi le akkarap ngeni Jiowa me amwöchü an tüppwöl ngeni.​—SalF. 4:23.

KOSAP FANGETÄ!

17, 18. Ifa usun emön Chon Kraist epwe tongeni äpilükülüköch inaamwo ika an famili ese fiti ewe enlet?

¹⁷ Ika en emön Chon Kraist mi tüppwöl nge om famili ese fiti ewe enlet, kosap fangetä. Chechchemeni pwe Jiowa ese likitalo nöün kewe aramas. (1 Sam. 12:22) I esap pöütukolo ika ka fitipach ngeni. (Älleani 2 Kronika 15:2.) Iwe, kopwe pwapwaiti om käkkäeö usun Jiowa, me “apilükülük ngeni.” (Kölf. 37:4, 5) “Iotek fansoun meinisin,” me eäni lükülük pwe Semach we mi tong a tongeni älisuk le likiitü fän sokkopaten weires.​—Rom 12:12.

¹⁸ Iotek ngeni Jiowa me tingor an we manaman mi fel pwe epwe älisuk an epwe wor kinamwe lon ewe famili. (Ipru 12:14) Om föri ena, ka tongeni älisi chon om famili rese nonnom lon ewe enlet. Kopwe pwapwa me epwe kinamwe letipom lupwen ka “föri meinisin pwe Kot epwe ling ren.” (1 Kor. 10:31) Pwal och, ka tongeni lükülük pwe pwiim kewe Chon Kraist repwe tongeok me älisuk.

[Sasing lon pekin taropwe 30]

Filatä ewe fansoun mi fich pwe kopwe äweweei minne ka lükü

[Sasing lon pekin taropwe 31]

Äfänni pwülüwen pwiich kewe rese fiti ewe enlet