I posib pour trouv lazwa dan en fanmir divize

“Eski . . . ou konnen si ou pou arive sov ou [konzwen]?” ​—1 KOR. 7:16.

ESKI OU KAPAB REPONN?

Ki en Kretyen i kapab fer pour prezerv lape dan en fanmir kot i annan diferan krwayans relizye?

Ki en Kretyen i kapab fer pour ed bann manm fanmir aksepte laverite?

Ki lezot i kapab fer pour ed bann frer ek ser ki pe viv dan en fanmir kot i annan diferan krwayans relizye?

1. Ki lefe i kapab annan kan en dimoun i aksepte mesaz Rwayonm?

EN FWA ler Zezi ti anvoy son bann zapot pour al prese, i ti dir zot: “Ale, e prese ki, ‘Rwayonm lesyel i pros!’” (Mat. 10:1, 7) Pour bann ki ti pou aksepte sa bon nouvel avek lapresyasyon, zot ti pou santi zot anpe e ere. Par kont, Zezi ti osi dir son bann zapot ki bokou dimoun ti pou opoz zot predikasyon. (Mat. 10:16-23) En kalite lopozisyon ki vreman fermal se ler nou prop fanmir i rezet mesaz Rwayonm. ​—Lir Matye 10:34-36.

2. Akoz i pa enposib pour bann Kretyen ki pe viv dan en fanmir ki annan diferan larelizyon viv ere?

² Eski sa i vedir ki i enposib pour en disip Kris ki dan en fanmir kot i annan diferan larelizyon ere? Pa ditou! Menm si parfwa lopozisyon familyal i kapab vreman sever, i pa touzour le ka. Deplis, par ler sa lopozisyon i kapab pa dire. En kantite i depan lo lafason ki sa vre Kretyen i reazir anver lopozisyon ek lendiferans. Zeova i beni bann ki fidel avek li e zot kapab zwaye malgre bann sityasyon difisil. Bann vre Kretyen i kapab kontribye anver zot prop boner par (1) fer zefor pour prezerv lape kot lakour e (2) senserman ed zot fanmir ki pa Temwen aksepte vre ladorasyon.

PREZERV LAPE KOT LAKOUR

3. Akoz en Kretyen dan en fanmir kot i annan diferan larelizyon i devret prezerv lape?

³ Pour ki lagrenn lazistis i raport fri dan en fanmir, en lanvironnman anpe i vreman neseser. (Lir Zak 3:18.) Menm si fanmir en Kretyen pa ankor aksepte laverite, i bezwen fer zefor pour prezerv lape kot lakour. Ki mannyer i kapab fer sa?

4. Ki mannyer bann Kretyen i kapab gard zot lape lespri?

 ⁴ Bann Kretyen i devret gard zot lape lespri. I enportan ki zot fer lapriyer senser pour zot ganny sa “lape Bondye” ki napa son parey. (Fili. 4:6, 7) Nou trouv lape ek boner kan nou aprann konn Bondye e aplik bann prensip Labib dan nou lavi. (Iza. 54:13) Partisip dan bann renyon Kongregasyon e pres avek devouman i osi tre enportan pour ki nou santi nou anpe e ere. An zeneral, i posib pour bann vre Kretyen partisip dan bann aktivite Kretyen menm si zot pe viv dan en fanmir kot i annan diferan krwayans relizye. Pran legzanp Enza * ki son msye ti opoz li dan en fason vyolan. I al predikasyon apre ki i’n fini fer son louvraz lakour. Enza i dir: “Zeova i beni mwan en kantite avek bann bon rezilta sak fwa ki mon fer sa zefor pour anons sa bon nouvel avek lezot.” Bann benediksyon parey i anmenn satisfaksyon, lape ek boner.

5. Ki problenm serten Kretyen i fer fas avek kot lakour e ki led zot kapab gannyen?

⁵ Nou bezwen fer bann gran zefor pour nou kapab gard en bon relasyon avek bann manm nou fanmir ki pa Temwen. Sa pa toultan fasil, akoz parler zot anvi ki nou fer bann keksoz ki pa an armoni avek bann prensip Labib. Ler nou reste atase avek sa ki byen, nou fanmir ki pa Temwen i kapab dezapwente. Me si nou reste ferm, sa pou promouvwar lape finalman. Par kont, si nou pa pare pour fer bann pti azisteman kot bann prensip Labib pa enplike sa i kapab fer zot fristre kan i pa ti neseser. (Lir Proverb 16:7. *) Letan nou fer fas avek en sityasyon difisil, i enportan ki nou rod konsey dan Labib atraver bann piblikasyon sorti kot lesklav fidel e pridan ek bann ansyen. ​—Prov. 11:14.

6, 7. (a) Akoz serten i opoz bann manm zot fanmir ki konmans etidye avek bann Temwen Zeova? (b) Ki mannyer en dimoun ki pe etidye Labib oubyen en Kretyen i kapab fer fas avek lopozisyon?

⁶ Si nou oule gard lape kot lakour, nou bezwen met nou konfyans dan Zeova e esey konpran ki mannyer bann manm fanmir ki pa Temwen i kapab santi. (Prov. 16:20) Menm bann ki fek konmans etidye Labib i kapab esey konpran lezot. Bann msye oubyen madanm ki pa Temwen i kapab pa vwar li en problenm pour zot konzwen etidye Labib. Serten i kapab menm vwar ki i bon ki zot fanmir i etidye. Me lezot i kapab pa kontan menm. Ester ki aprezan en Temwen i rekonnet ki i ti vreman ankoler ler son msye ti konmans etidye Labib. I dir: “Mon ti zete oubyen bril son bann liv.” Howard ki ti opoz son madanm ler ti etidye i dir: “Bokou msye i per ki zot madanm i ganny anbete par en sekt. En msye i kapab pa konnen konman pour protez son madanm e pour sa rezon i kapab vin agresif.”

⁷ Menm si en dimoun i ganny lopozisyon dan son fanmir, i posib pour ed li vwar ki i pa neseser ki i aret son letid. Souvandfwa, i pou posib rezourd sa bann problenm si nou demontre labonte ek respe. (1 Pyer 3:15, 16) Howard i dir: “Mon kontan ki mon madanm ti reste kalm e i pa ti ankoler!” Son madanm i eksplike: “Howard ti demann mwan pour aret mon letid. I ti dir mwan ki mon ti pe ganny anbete. Olye argimante, mon ti dir li ki kekfwa i ti annan rezon, me mon ti osi dir li ki mon pa ti tro konnen ki mannyer sa ti kapab arive. Alors, mon ti dir li zis lir sa liv ki  mon pe etidye. I ti fer sanmenm e i ti aksepte sa ki i ti lir. Finalman, sa ti annan en gran lefe lo li.” I bon pour mazinen osi ki bann msye oubyen madanm ki pa Temwen i kapab santi zot tousel ouswa ki zot maryaz i an danze ler zot konzwen pe partisip dan bann aktivite Kretyen. Me si tanzantan sa konzwen ki Kretyen i reasir sa lot, sa i kapab fer li aret santi li koumsa.

ED ZOT POUR AKSEPTE VRE LADORASYON

8. Ki konsey zapot Pol i donn bann Kretyen ki zot konzwen pa dan laverite?

⁸ Zapot Pol ti ankouraz bann vre Kretyen pour pa kit zot konzwen zis akoz i pa Kretyen. * (Lir 1 Korentyen 7:12-16.) Si en Kretyen i gard antet ki i posib pour son konzwen vin en Temwen, sa i kapab ed li pour reste ere. Me kan nou pe esey ed en dimoun ki pa Temwen pour aksepte laverite i byen pour nou fer atansyon, parey sa bann leksperyans pou montre.

9. Akoz i enportan pour vey lafason ki nou koz lo Labib avek bann dimoun ki pa Temwen?

⁹ Jason i ankor rapel ler i ti pe aprann laverite dan Labib e i dir ki i ti anvi tou dimoun i konnen. Ler en etidyan Labib i apresye sa laverite ki i pe aprann dan Labib, i kapab ki i telman kontan ki i koz lo la preski toultan. I kapab ekspekte son fanmir ki pa Temwen aksepte sa mesaz Rwayonm deswit, me zot kapab reazir dan en fason negatif anver sa bon nouvel. Ki lefe lafason ki Jason ti reazir o konmansman ti annan lo son madanm? Son madanm i reponn: “Mon ti santi ki i ti tro bokou pour mwan.” En madanm ki’n aksepte laverite 18 an apre ki son msye ti’n vin en Temwen i dir: “Mwan mon ti bezwen aprann laverite dousman dousman.” Si ou pe etidye avek en dimoun ki son konzwen pour le moman pa oule aksepte laverite, akoz ou pa fer bann pti legzersis pour montre li konman pour koz avek son konzwen avek ladouser ek bon zizman? Moiz ti dir: “Mon lansennyman pou tonbe parey en pti lapli, mon parol pou degoute parey laroze, i pou parey bann pti grenas lo zerb.” (Det. 32:2) Detrwa pti gren lapli laverite i souvan fer plis dibyen ki en lavalas parol spirityel.

10-12. (a) Ki konsey zapot Pyer ti donn bann ki zot konzwen pa Kretyen? (b) Ki mannyer en etidyan Labib ti aplik konsey dan 1 Pyer 3:1, 2?

¹⁰ Zapot Pyer ti donn bann konsey avek bann madanm Kretyen ki zot msye pa ti dan menm larelizyon ki zot. I ti ekrir: “Soumet sakenn avek son msye, pour ki, par zot kondwit, si serten parmi zot msye pa obei parol  Bondye, zot a kapab kanmenm aksepte lafwa san laparol. Sa bann zonm i a war ki zot kondwi zot dan en fason drwat e avek respe.” (1 Pyer 3:1, 2) En madanm i kapab ed son msye aksepte lafwa si i soumet e demontre en gran respe pour li, menm si i tret li dan en fason brit. Pareyman, en msye i devret konport li dan en bon fason parey en Kretyen e vin en sef ki annan lanmour pour son lakour menm si son madanm i opoz li. ​—1 Pyer 3:7-9.

¹¹ Bokou leksperyans modern i montre ki i vo lapenn swiv konsey zapot Pyer. Annou vwar legzanp Selma. I ti konmans etidye Labib avek bann Temwen Zeova, me son msye Steve ti vreman pa kontan. I dir ki i ti ankoler, zalou e per. Selma i rakonte: “Menm avan ki mon ti konn laverite, viv avek Steve ti konmsi mon ti pe mars lo lakok dizef. I ti annan en move tanperaman. I ti pli pir ankor ler mon ti konmans etidye Labib.” Kwa ki ti ede?

¹² Selma i ankor rapel parol sa Temwen ki ti etidye Labib avek li. I rakonte: “En zour, mon pa ti anvi fer mon letid akoz son lavey, Steve ti’n tap mwan ler mon ti pe argimant avek li lo en serten pwen. Mon ti santi mwan tris e dezapwente. Apre ki mon ti’n rakont sa ser sa ki ti’n arive e mon santiman, i ti demann mwan pour lir 1 Korentyen 13: 4-7. Ler mon ti lir sa bann verse, mon ti mazinen ki Steve pa ti pe fer okenn sa bann bon keksoz pour mwan. Me sa ser ti esey fer mwan rezonnen. I ti demann mwan, ‘Be ou, eski ou fer okenn sa bann keksoz pour ou msye?’ Mon ti dir: ‘En en, i tro pa bon pour mwan fer sa.’ Me avek ladouser, i ti dir mwan, ‘Lekel ki pe sey vin en Kretyen la? Ou oubyen Steve?’ Alor, mon ti realize ki mon ti bezwen aziste mon fason panse. Mon ti priy Zeova pour ed mwan demontre plis lanmour anver Steve e dousman dousman keksoz ti konmans sanze.” Apre 17 an, Steve ti aksepte laverite.

KI MANNYER LEZOT I KAPAB EDE?

13, 14. Ki mannyer nou kapab ed sa bann ki zot msye ouswa madanm pa en Temwen?

¹³ Parey bann pti gren lapli ki aroz later e ed bann plant pouse, bokou dimoun dan kongregasyon i zwe en rol dan bann fanmir kot pa tou dimoun ki dan laverite. Elvina ki reste Brezil i dir: “Lanmour mon bann frer ek ser ti ed mwan pour reste solid dan laverite.”

¹⁴ Lentere ek labonte delapar serten dan kongregasyon i kapab annan en gro lefe lo bann ki pa Temwen. En msye Nizerya ki’n aksepte laverite 13 an apre son madanm i dir: “Mon ti pe vwayaze avek en Temwen kan son transpor ti  kase. I ti al rod led lezot Temwen dan en vilaz lanmenm la o bor, e zot ti fer nou reste lannwit avek zot. Zot ti pran swen avek nou konmsi zot ti konn nou depi ptipti. Deswit mon ti santi sa lanmour ki mon madanm ti’n toultan koz lo la.” Langleter, en madanm ki ti vin dan laverite 18 an apre son msye ti dir: “Bann Temwen ti envit nou tou le de pour repa. Zot ti toultan fer mwan santi mwan alez.” * Dan sa menm pei, en msye ki’n vin Temwen avek letan i osi dir: “Bann frer ek ser ti vizit nou, envit nou kot zot, e mon ti santi ki zot ti enterese avek mwan. Sa ti vreman remarkab ler mon ti lopital e bokou ti vizit mwan.” Eski ou osi ou kapab demontre sa menm lentere anver bann dimoun ki pa Temwen?

15, 16. Kwa ki kapab ed en Kretyen pour pa perdi lazwa si son fanmir pa aksepte laverite?

¹⁵ I vre, pa tou msye, madanm, zanfan, paran ek manm fanmir ki pou aksepte laverite, menm apre plizyer lannen ki bann vre Kretyen in annan en bon kondwit e donn temwannyaz avek labonte. Serten pa sanze oubyen menm serten i kontinyen opoz sa Temwen. (Mat. 10:35-37) Me, kan en Kretyen i demontre bann bon kalite sa i kapab annan en bon lefe. En msye ki konmela i en frer i dir: “Ler sa enn ki Temwen i demontre bann zoli kalite, ou pa zanmen konnen ki pe arive dan lespri ek leker sa lot dimoun. Alors, pa zanmen krwar ki ou konzwen pa pou aksepte laverite.”

¹⁶ Menm si en manm fanmir pa zanmen vin en Temwen, i posib pour sa Temwen viv ere. Menm si son msye pa’n zanmen aksepte sa mesaz Rwayonm apre 21 an ki i’n fer zefor, en ser ti dir: “Mon reisi gard mon lazwa par fer mon mye pour fer Zeova plezir, reste fidel anver li, e toultan esey vin pli for spirityelman. Par reste konsantre lo bann aktivite spirityel parey letid Labib, asiste renyon, predikasyon e ed lezot dan kongregasyon, sa in ed mwan vin pli pros avek Zeova e in protez mon leker.” ​—Prov. 4:23.

PA PERDI LESPWAR!

17, 18. Ki en Kretyen i kapab fer pour pa perdi lespwar menm dan en fanmir kot i annan diferan krwayans relizye?

¹⁷ Si ou en Kretyen fidel ki pe viv dan en lakour kot i annan diferan krwayans relizye, pa perdi lespwar. Mazinen ki “Zeova pa pou zanmen abandonn son pep akoz son gran non.” (1 Sam. 12:22) Zeova i avek ou, tan ki ou reste atase avek li. (Lir 2 Kronik 15:2. *) Alor, “pran bokou plezir dan Zeova.” Vreman, “met ou lavi ek son bann fardo dan lanmen Zeova e depan lo li.” (Ps. 37:4, 5) “Priye tou letan” e annan lafwa ki nou Papa ki dan lesyel, ki ranpli avek lanmour pour ed ou andir nenport ki leprev. ​—Rom. 12:12.

¹⁸ Demann Zeova son lespri sen pour ki i ava ed ou pour promouvwar lape kot lakour. (Ebr. 12:14) Wi, i posib pour nou kre en latmosfer anpe kot avek letan i kapab annan en lefe pozitif lo nou bann manm fanmir ki pa Temwen. Ou pou santi ou ere e ou pou annan en lape lespri anmezir ou “fer tou pour laglwar Bondye.” (1 Kor. 10:31) Pa i osi ankourazan pour konnen ki nou kapab kont lo nou bann frer ek ser dan kongregasyon pour zot sipor!

[Not anba lo paz]

[Kestyon]

[Portre lo paz 30]

Swazir en bon moman pour eksplik ou krwayans

[Portre lo paz 31]

Demontre lentere dan bann konzwen ki pa Temwen