Ẹkeme Ndikop Inemesịt ke Ubon Oro Ẹkade Nsio Nsio Ido Ukpono

“Asan̄a didie ọfiọk m̀mê afo edinyan̄a [nsan̄a ndọ fo]?”—1 COR. 7:16.

NDI EMEKEME NDIFIỌK IBỌRỌ?

․․․․․

Nso ke mbon oro ẹnịmde ke akpanikọ ẹkeme ndinam man ẹnyene emem ke ubon oro ẹkade nsio nsio ido ukpono?

․․․․․

Didie ke Christian ekeme ndin̄wam mbonubon esie oro mînịmke ke akpanikọ ẹdụk utuakibuot akpanikọ?

․․․․․

Nso ke mbon en̄wen ẹkeme ndinam man ẹn̄wam mbon oro ẹdude ke ubon oro ẹkade nsio nsio ido ukpono?

1. Nso ikeme nditịbe ke ini owo ọbọde etop Obio Ubọn̄?

 ISAN̄ kiet, ke ini Jesus okosiode mme apostle esie ọdọn̄ ẹkekwọrọ ikọ, enye ama ọdọhọ mmọ ete: “Nte mbufo ẹkade, ẹkwọrọ ẹte, ‘Obio ubọn̄ heaven ke asan̄a ekpere.’” (Matt. 10:1, 7) Eti mbụk emi ayanam mbon oro ẹbọde enye ke ofụri esịt ẹnyene emem ẹnyụn̄ ẹkop inemesịt. Edi Jesus ama ọtọt mme mbet esie ete ke ediwak owo ẹyebiọn̄ọ utom edikwọrọ Obio Ubọn̄ oro mmọ ẹdinamde. (Matt. 10:16-23) Ubiọn̄ọ emi esibiakde owo akan edi eke Ubon.—Kot Matthew 10:34-36.

2. Ntak emi mme Christian emi ẹdude ke ubon oro ẹkade nsio nsio ido ukpono ẹkemede ndikop inemesịt?

² Ndi emi ọwọrọ ke mme anditiene Christ ke ubon oro ẹkade nsio nsio ido ukpono ikemeke ndikop inemesịt? Iwọrọke! Okposụkedi oro ubiọn̄ọ ubon ekemede ndinen̄ede nsọn̄ ubọk, isidịghe ntre kpukpru ini. Ke adianade do, ubiọn̄ọ ubon isidịghe ke nsinsi. Ata ediwak ini, emi esitiene nte mme andinịm ke akpanikọ ẹnamde n̄kpọ ẹban̄a ubiọn̄ọ m̀mê unana udọn̄ ubon mmọ. Efen n̄ko, Jehovah esidiọn̄ mbon oro ẹsọn̄ọde ẹda ye enye onyụn̄ anam mmọ ẹkop inemesịt kpa ye oro ẹsobode ubiọn̄ọ. Mme andinịm ke akpanikọ ẹkeme ndikop inemesịt (1) ke ndidomo ndinam emem odu ke ufọk ye (2) ke ndisịn ofụri ukeme n̄n̄wam mbonubon mmọ ẹdụk utuakibuot akpanikọ.

DOMO NDINAM EMEM ODU KE UFỌK

3. Ntak emi akpanade Christian emi odude ke ubon oro ẹkade nsio nsio ido ukpono odomo ndinam emem?

³ Ana emem odu ke ufọk edieke anade n̄kpasịp edinen ido on̄wụm mfri ke ufọk oro. (Kot James 3:18.) Idem edieke mîdịghe kpukpru owo ke ubon ẹtuak ibuot ẹnọ Jehovah, ana andinịm ke akpanikọ esịn ukeme odomo ndinam emem odu ke ufọk mmọ. Didie ke ẹkeme ndinam emi?

4. Didie ke mme Christian ẹkeme ndika iso nnyene emem ke idemmọ?

 ⁴ Ana mme Christian ẹka iso ẹnyene emem ke idemmọ. Emi oyom mmọ ẹsibọn̄ akam ke ofụri esịt sia akam ekeme ndinam mmọ ẹnyene “emem Abasi.” (Phil. 4:6, 7) Ndikpep mban̄a Jehovah nnyụn̄ nda mme edumbet N̄wed Abasi nsịn ke edinam ẹsinam owo enyene emem onyụn̄ okop inemesịt. (Isa. 54:13) Ndibuana ke mme mbono esop nnyụn̄ nsịn ifịk ke utom ukwọrọikọ n̄ko ẹsinam owo enyene emem onyụn̄ okop inemesịt. Andinịm ke akpanikọ emi odude ke ubon oro ẹkade nsio nsio ido ukpono ekeme nditiene nnam mme n̄kpọ emi. Da Enza * ke uwụtn̄kpọ; ebe esie esinen̄ede ọbiọn̄ọ enye. Enye esiwọrọ an̄wautom ke ama akanam n̄kpọ okụre ke ufọk. Enye ọdọhọ ete, “Jehovah esidiọn̄ mi etieti ini ekededi oro nsịnde ukeme ndikwọrọ eti mbụk nnọ mme owo.” Ke akpanikọ, mme utọ edidiọn̄ oro ẹsinam owo enyene emem onyụn̄ okop uyụhọ ye inemesịt.

5. Nso mfịna ke nditọete ke ubon oro ẹkade nsio nsio ido ukpono ẹsisobo, ndien m̀mọ̀n̄ ke mmọ ẹkeme ndibọ un̄wam?

⁵ Oyom inen̄ede isịn ukeme ndidu ke emem ye mbonufọk nnyịn oro mînịmke ke akpanikọ. Emi ekeme ndisọn̄ ndusụk ini sia mmọ ẹkeme ndidọhọ nnyịn inam n̄kpọ oro edumbet Bible akpande. Nnyịn ndisọn̄ọ nda nnam se inende ekeme ndibiak ndusụk mbonufọk nnyịn oro mînịmke ke akpanikọ, edi ndinam oro ayada emem edi nte ini akade. Nte ededi, ndisọn̄ọ nyịre ke mme n̄kpọ oro mîbiatke mme edumbet Bible ekeme ndida utọk ndi. (Kot Mme N̄ke 16:7.) Ke ini mfịna odude, ọfọn oyom item N̄wed Abasi oto mbiowo onyụn̄ oyom ke mme n̄wed ofụn emi anamde akpanikọ onyụn̄ enyenede ọniọn̄.—N̄ke 11:14.

6, 7. (a) Ntak emi ndusụk owo ẹsibiọn̄ọde mbonubon mmọ oro ẹtọn̄ọde ndikpep n̄kpọ ye Mme Ntiense Jehovah? (b) Nso ke eyen ukpepn̄kpọ Bible m̀mê eyenete akpanam ke ini mbonubon ẹbiọn̄ọde enye?

⁶ Edieke ibuọtde idem ye Jehovah inyụn̄ ifiọkde nte etiede mbonufọk nnyịn ke idem, nnyịn imekeme ndinam emem odu ke ufọk. (N̄ke 16:20) Idem mbufa nditọ ukpepn̄kpọ Bible ẹkeme ndiwụt ikike ke n̄kpọ emi. Ndusụk ebe m̀mê iban oro mînịmke ke akpanikọ inyeneke mfịna ye nsan̄a ndọ mmọ ndikpep Bible. Mmọ ẹkam ẹkeme ndinyịme nte ke emi ekeme ndifọn ye ubon mmimọ. Edi ndusụk ẹkeme ndinen̄ede mbiọn̄ọ. Esther, emi edide Ntiense idahaemi, ọdọhọ ke “esịt ama enen̄ede ayat” imọ ke ini ebe imọ ọkọtọn̄ọde ndikpep Bible ye Mme Ntiense Jehovah. Enye ọdọhọ ete: “Mma nsitomo n̄wed esie nduọn̄ọ mîdịghe mfọfọp.” Howard, emi ke akpa mîkayakke n̄wan esie esikpep Bible, ọdọhọ ete: “Ediwak mme ebe ẹsikere ke ẹtatab iban mmimọ ẹsịn ke idiọk n̄ka ido ukpono. Ekeme ndidi ebe ifiọkke se akpanamde aban̄a oro, ndien enye ekeme nditọn̄ọ utọk.”

⁷ Akpana ẹn̄wam eyen ukpepn̄kpọ emi ebe m̀mê n̄wan esie ọbiọn̄ọde enye ọfiọk ke inaha enye etre ukpepn̄kpọ Bible esie. Enye ekeme ndikọk mfịna emi edieke enye enyenede ifụre ifụre ido onyụn̄ okponode ebe m̀mê n̄wan esie oro mînịmke ke akpanikọ. (1 Pet. 3:15) Howard ọdọhọ ete, “Mmọkọm Abasi sia n̄wan mi ama enyene ime, ikonyụn̄ iyatke esịt!” N̄wan esie ọdọhọ ete: “Howard ama ọdọhọ mi ntre ndikpep Bible. Enye ọkọdọhọ ke ẹtetụn mi usụn̄. N̄kafan̄ake ye enye, mma ndọhọ ke ekeme ndidi enye enen, edi ke ami n̄kwe nte ẹtụnde mi usụn̄. Ntem mma ndọhọ enye okot n̄wed oro n̄kekpepde. Enye ama okot onyụn̄ okụt ke se n̄wed oro etịn̄de edi akpanikọ. Emi ama enen̄ede otụk enye.” Ọfọn ẹti ke ebe  m̀mê n̄wan oro mînịmke ke akpanikọ ekeme ndikere ke nsan̄a ndọ imọ ọkpọn̄ imọ ke ini enye akade mbono esop m̀mê ọwọrọde an̄wautom, edi edieke enye adade ima etịn̄ se enye akade, emi ekeme ndinam esịt ana ebe m̀mê n̄wan esie sụn̄.

ẸN̄WAM MMỌ ẸDỤK UTUAKIBUOT AKPANIKỌ

8. Nso item ke apostle Paul ọkọnọ mme Christian oro mme ebe m̀mê iban mmọ mîdịghe andinịm ke akpanikọ?

⁸ Apostle Paul eteme mme Christian ete ẹkûdian̄ade ẹkpọn̄ ebe m̀mê n̄wan mmọ oro mîdịghe andinịm ke akpanikọ. * (Kot 1 Corinth 7:12-16.) Edieke andinịm ke akpanikọ etide ke ebe m̀mê n̄wan oro mînịmke ke akpanikọ ekeme ndibọ akpanikọ nte ini akade, emi ekeme ndin̄wam enye aka iso okop inemesịt kpa ye oro odude ke ubon emi ẹkade nsio nsio ido ukpono. Oyom ẹdu ke ukpeme ke ini ẹdomode ndikwọrọ ikọ nnọ nsan̄a oro mînịmke ke akpanikọ, nte mme ifiọkutom oro ẹtienede mi ẹwụtde.

9. Nso ke owo ekpeti ke ini enye enemede akpanikọ Bible ye mbonubon esie?

⁹ Jason etịn̄ nte eketiede enye ke idem ke ini enye ekekpepde akpanikọ ete, “Ama ọdọn̄ mi ndikwọrọ ikọ nnọ kpukpru owo!” Ke ini eyen ukpepn̄kpọ Bible edide edifiọk ke se enye ekpepde ke N̄wed Abasi edi akpanikọ, esịt ekeme ndinem enye tutu enye etịn̄ aban̄a emi kpukpru ini. Enye ekeme ndiyom mbonubon esie oro mînịmke ke akpanikọ ẹsọsọp ẹnyịme etop Obio Ubọn̄, edi mmọ ẹkam ẹkeme ndisasua. Nte Jason akanamde n̄kpọ ke ntọn̄ọ ntọn̄ọ okotụk n̄wan esie didie? N̄wan esie ọdọhọ ete: “Nkọduọkke odudu nnọ ukwọrọikọ esie.” N̄wan kiet emi ọkọbọde akpanikọ ke isua 18 ẹma ẹkebe tọn̄ọ ebe esie ekedi Ntiense, ọdọhọ ete: “Ami n̄koyom ndikpep sụn̄sụn̄.” Edieke afo ekpepde Bible ye owo emi n̄wan m̀mê ebe esie mînyeneke udọn̄ ndidụk ido ukpono akpanikọ, nam ndomonse ediwak ini ye enye man ekpep enye nte ekpenemede akpanikọ usọ usọ ye nsan̄a ndọ esie. Moses ọkọdọhọ ete: “Item mi eyedep nte edịm, ikọ mi ọyọtọi nte mbara, nte n̄ken̄e ukot edịm ke mbiet.” (Deut. 32:2) Ikọ ifan̄ emi ẹtịn̄de ẹban̄a akpanikọ ọyọfọn akan ndin̄wan̄a ofụri ikọ akpanikọ nduọk owo.

10-12. (a) Nso item ke apostle Peter ọkọnọ mbon emi ebe m̀mê n̄wan mmọ mînịmke ke akpanikọ? (b) Didie ke eyen ukpepn̄kpọ Bible kiet ekekpep ndinam item oro ẹnọde ke 1 Peter 3:1, 2?

¹⁰ Apostle Peter ama ada edisana spirit eteme nditọete iban oro ẹdude ke ubon oro ẹkade nsio nsio ido ukpono ete: “Ẹsụk ibuot ẹnọ mme ebe mbufo, man, edieke ndusụk mmọ mîsụkke ibuot  inọ ikọ Abasi, ẹkpedụri mmọ ẹda itoho ke editịn̄ ikọ edi oto ke edu uwem iban mmọ, koro mmọ ẹkụtde edisana edu uwem mbufo ọkọrọ ye ntotụn̄ọ ukpono.” (1 Pet. 3:1, 2) Edieke n̄wan osụkde ibuot onyụn̄ enen̄erede okpono ebe esie, idem edieke ebe ọsọn̄de ido ye enye, enye ekeme ndidụri ebe esie nsịn ke utuakibuot akpanikọ. Kpasụk ntre, ebe oro enịmde ke akpanikọ enyene ndidu uwem nte owo Abasi onyụn̄ edi eti ibuot ufọk kpa ye oro n̄wan esie ọbiọn̄ọde enye.—1 Pet. 3:7-9.

¹¹ Ediwak Christian ẹbọ ufọn ẹto edida item Peter oro nsịn ke edinam. Da Selma ke uwụtn̄kpọ. Ke ini enye ọkọtọn̄ọde ndikpep Bible ye Mme Ntiense Jehovah, Steve ebe esie ikenemke esịt. Steve ọdọhọ ete, “Esịt ama ayat mi, mfịbe ufụp, nyomke ndiyak enye ikpat kiet, nnyụn̄ n̄kere ke ẹkeme ndibọ mi n̄wan.” Selma ọdọhọ ete: “Idem mbemiso n̄kọbọde akpanikọ, n̄kesidu uwem ndịk ndịk ye ebe mi. Enye ama esisọp iyatesịt. Ke ini n̄kọtọn̄ọde ndikpep Bible, esịt ama esiyat enye etieti.” Nso ikan̄wam Selma?

¹² Enye eti se Ntiense oro ekekpepde n̄kpọ ye enye eketịn̄de. Selma ọdọhọ ete: “Usen kiet, n̄koyomke ndikpep n̄kpọ. Okoneyo emi ekesierede usen oro, Steve ama amia mi ke ini n̄kodomode ndiwụt ke se n̄ketịn̄de ama enen, mma mfụhọ, mbọm idemmi onyụn̄ anam mi. Ke mma n̄kasian eyenete an̄wan oro se iketịbede ye nte eketiede mi ke idem, enye ama ọdọhọ mi n̄kot 1 Corinth 13:4-7. Ke mma n̄kokot itie oro, mma ntọn̄ọ ndikere nte, ‘Akananam ebe mi inamke ndomokiet ke otu nti n̄kpọ emi inọ mi.’ Edi eyenete oro ama anam mi ntịm n̄kere n̄kpọ ke ndibụp mi ete, ‘Ifan̄ ke otu nti n̄kpọ emi ke afo anam ọnọ ebe fo?’ Mma mbọrọ ke nnamke ndomokiet, sia enye ọsọn̄ ido akaha. Eyenete oro ama etịn̄ sụn̄sụn̄ ete, ‘Selma, anie ke otu mbufo odomo ndidi Christian? Afo m̀mê ebe fo?’ Sia n̄kokụtde ke oyom n̄kpụhọde nte nsikerede n̄kpọ, mma mbọn̄ akam nte Jehovah an̄wam mi nnen̄ede mma ebe mi. N̄kpọ ama ọtọn̄ọ ndikpụhọde sụn̄sụn̄.” Ke isua 17 ẹma ẹkebe, ebe esie ama ọbọ akpanikọ.

NTE MBON EN̄WEN ẸKEMEDE NDIN̄WAM

13, 14. Didie ke mbon eken ke esop ẹkeme ndin̄wam mbon oro ẹdude ke ubon oro ẹkade nsio nsio ido ukpono?

¹³ Ukem nte n̄ken̄e ukot edịm esibịtde isọn̄ onyụn̄ anamde se ẹtọde ẹkọri, ediwak owo ke esop ẹkeme nditiene nnam mme Christian emi ẹdude ke ubon oro ẹkade nsio nsio ido ukpono ẹkop inemesịt. Elvina emi odude ke Brazil ọdọhọ ete: “Ima emi nditọete ẹkewụtde mi akan̄wam mi nsọn̄ọ nda ke akpanikọ.”

¹⁴ Nditọete eken ke esop ndifọn ido nnyụn̄ n̄kere mban̄a ekeme nditụk owo oro mînịmke kan̄a ke akpanikọ esịt. Ete kiet mi ke Nigeria emi ọkọbọde akpanikọ  isua 13 ke n̄wan esie ama ekedi Ntiense, ọdọhọ ete: “Ke ini n̄kasan̄ade ye Ntiense kiet n̄ka isan̄, ubomisọn̄ esie ama abiara ke usụn̄. Enye ama oyom Mme Ntiense ke obio oro, ndien mmọ ẹma ẹnọ nnyịn itie ina okoneyo oro. Mmọ ẹma ẹnen̄ede ẹse ẹban̄a nnyịn nte n̄kpọ emi ẹkediọn̄ọde nnyịn toto ke uyen. Oro ama anam mi n̄kụt ima Christian emi n̄wan mi ekesitịn̄de aban̄a kpukpru ini.” Ke England, n̄wan kiet emi okodụkde esop isua 18 ke ebe esie ama okodụk, ọdọhọ ete: “Mme Ntiense ẹma ẹsikot mi ye ebe mi ufọk. Ẹma ẹsinen̄ede ẹdara mi.” * Ebe kiet emi ekedide Ntiense nte ini akakade kpa ke idụt oro, ọdọhọ ete: “Nditọete ẹma ẹsidi ẹdise nnyịn, mîdịghe ẹkot nnyịn ufọk, ndien mma n̄kụt ke mmọ ẹnen̄ede ẹkere ẹban̄a owo. Emi ama ana ata in̄wan̄-in̄wan̄ ke ini n̄kodude ke ufọkibọk ndien ediwak mmọ ẹdi ẹdise mi.” Ndi afo emekeme ndiyom usụn̄ ndikere mban̄a mbonubon oro mîdụhe ke esop?

15, 16. Nso ikeme ndin̄wam eyenete osụk aka iso okop inemesịt kpa ye oro mbon eken ke ubon mînyịmeke ndibọ akpanikọ?

¹⁵ Edi akpanikọ ke idem edieke andinịm ke akpanikọ odude eti uwem onyụn̄ adade usọ ọnọ ikọ ntiense, ke idịghe kpukpru ebe, iban, nditọ, ete ye eka, m̀mê iman eken oro mînịmke ke akpanikọ ẹdibọ akpanikọ. Ndusụk isisụk inyeneke udọn̄ mîdịghe ẹsụk ẹka iso ẹnen̄ede ẹbiọn̄ọ. (Matt. 10:35-37) Edi ke ini mme Christian ẹnyenede nti edu, emi ekeme ndinen̄ede nnyene ufọn. Ebe emi mîkenịmke ke akpanikọ ini kiet ko ọdọhọ ete: “Ke ini Christian enen̄erede owụt nti edu, afo udufiọkke se owo oro mînịmke ke akpanikọ do ekerede. Ntre kûdedei usion̄o idem ukpọn̄ ukere ke ufọn idụhe.”

¹⁶ Idem ke ini mbonubon eyenete mîsụk inyịmeke ndibọ akpanikọ, enye osụk ekekeme ndikop inemesịt. Okposụkedi emi ebe eyenete an̄wan kiet mînyịmeke etop Obio Ubọn̄ ke ofụri isua 21 emi enye esịnde ifịk ọnọ ikọ ntiense, eyenete an̄wan oro ọdọhọ ete: “Nsụk n̄kokop idatesịt ke ndidomo ndinam se inemde Jehovah esịt, ke ndisọn̄ọ nda ye enye, ye ke nditetịm nsọn̄ọ itie ufan mi ye enye. Ndisịn idem ke mme edinam eke spirit—utọ nte ukpepn̄kpọ idemowo, edidụk mbono esop, utom an̄wautom, ye edin̄wam mbon en̄wen ke esop—esinam mi ntetịm nsan̄a n̄kpere Jehovah nnyụn̄ n̄kpeme esịt mi.”—N̄ke 4:23.

KÛDUỌK IDOTENYỊN!

17, 18. Didie ke Christian ekeme ndika iso nnyene idotenyịn idem ke ubon oro ẹkade nsio nsio ido ukpono?

¹⁷ Edieke afo edide anam-akpanikọ Christian oro odude ke ubon oro ẹkade nsio nsio ido ukpono, kûduọk idotenyịn. Ti ete ke “Jehovah [idikpọn̄ke] ikọt esie ke ntak akwa enyịn̄ esie.” (1 Sam. 12:22) Enye odu ye afo adan̄a nte afo ọsọn̄ọde eyịre ye enye. (Kot 2 Chronicle 15:2.) Ntem, “nen̄ede dat esịt ke Jehovah.” Ke nditịm ntịn̄, “kpat usụn̄ fo nọ Jehovah, nyụn̄ beri edem ke enye.” (Ps. 37:4, 5) ‘Kọbọ ke akam’ nyụn̄ nyene mbuọtidem nte ke Ete nnyịn eke heaven ekeme ndin̄wam fi ọyọ kpukpru orụk nsọn̄ọn̄kpọ.—Rome 12:12.

¹⁸ Ben̄e Jehovah ọnọ fi edisana spirit esie man an̄wam fi anam emem odu ke ubon mbufo. (Heb. 12:14) Ke akpanikọ, ẹkeme ndinam emem odu ndien emi ekeme ndinen̄ede ntụk mbonubon oro mînịmke ke akpanikọ nte ini akade. Afo eyenem esịt onyụn̄ enyene emem nte afo ‘anamde kpukpru n̄kpọ ọnọ Abasi ubọn̄.’ (1 Cor. 10:31) Nte esịnde ukeme anam mme n̄kpọ emi, esịt eyenem fi ndifiọk nte ke nditọete fo ke esop Christian ẹyen̄wam fi.

[Mme Ikọ Idakisọn̄]

[Mme Mbụme Ukpepn̄kpọ]

[Ndise ke page 28]

Fiọk nnennen ini emi ekpenemede se enịmde ke akpanikọ

[Ndise ke page 29]

Ẹwụt ke imekere iban̄a mme nsan̄a ndọ oro mînịmke ke akpanikọ