“Mamo piko reikuaa nde [...] ndaikatuichénepa resalva ne [rembiayhúpe].” (1 COR. 7:16, BNP)

EMBOHOVÁI KOʼÃ PORANDU:

Mbaʼéichapa ikatu reiko pyʼaguapýpe nde rogayguakuéra ndive ndahaʼéiramo jepe ne rrelihiongua?

Mbaʼépa rejapovaʼerã ne hentekuéra oservise hag̃ua avei Jehovápe?

Mbaʼéichapa ikatu ñaipytyvõ umi ermánope ihénte ndahaʼéiva Testígo?

1. Peteĩ tapicha ohendúramo pe marandu porã ha ojerovia hese, mbaʼépa ikatu ojapo hogayguakuéra?

 JESÚS omondovaʼekue hemimboʼekuérape omombeʼu hag̃ua ko marandu: “Pe Rréino yvagapegua hiʼag̃uimbaitéma” (Mat. 10:1, 7, NM). Umi tapicha oguerovia ha oguerohorýva ko marandu porã, ikatúta ovyʼa ha ipyʼaguapy. Péro Jesús heʼi avei ijapostolkuérape oĩtaha heta oñemoĩva hesekuéra opredika haguére (Mat. 10:16-23). Sapyʼánte hogayguakuéra voi ndaijaʼemoʼãi hesekuéra, ha upéva katuete hasyetereíta (elee Mateo 10:34-36).

2. Mbaʼéichapa jaikokuaa pyʼaguapýpe ñande rogayguakuéra ndahaʼéiramo jepe ñane rrelihiongua?

² Heʼisépa upéva peteĩ testígo de Jehová ndaikatumoʼãiha ovyʼa ha oiko pyʼaguapýpe hogayguakuéra ndahaʼéiramo irrelihiongua? Nahániri. Añetehápe oĩ heta ohasa asýva ihentekuéra opuʼãgui hese, péro ndaopavavéi rehe oiko upéva. Ikatu avei haʼekuéra ñepyrũrãnte ojopyeterei chupe, péro upéi okambia. Upéicharõ, mbaʼépa jajapovaʼerã jaiko hag̃ua vyʼápe oĩramo jepe ñane hénte ndoguerohorýiva ñane rrelihión térã oñemoĩva ñanderehe? Upearã ñambohovaivaʼerã umi mbaʼe hekópe porã. Ñaneñeʼẽrendúramo Jehovápe koʼã situasiónpe, haʼe katuete ñanevendesíta ha ñañeñandu porãitereíta. Ko artíkulope jahecháta mokõi mbaʼe oipytyvõtava peteĩ kristiánope ovyʼave hag̃ua hogapýpe: 1) oñehaʼãvaʼerã oiko pyʼaguapýpe ha 2) ojapo ikatúva ihentekuéra oservi hag̃ua avei Jehovápe.

ÑAÑEHAʼÃ JAIKO PYʼAGUAPÝPE ÑANDE ROGAYGUAKUÉRA NDIVE

3. Mbaʼérepa jajapovaʼerã ikatúva guive jaiko hag̃ua pyʼaguapýpe ñande rógape?

³ Jaikóramo pyʼaguapýpe ñande rógape, ñane hentekuéra  oñepyrũta oguerohory ñane rrelihión (elee Santiago 3:18). Upévare, ñande rogayguakuéra ndoservíriramo Jehovápe, jajapovaʼerã ikatúva guive jaiko hag̃ua pyʼaguapýpe hendivekuéra. Mbaʼéichapa jahupytykuaa upéva?

4. Mbaʼépa ñanepytyvõta akóinte ñandepyʼaguapy hag̃ua?

⁴ Enterove jaservíva Jehovápe ñañehaʼã meme vaʼerã ñandepyʼaguapy. Upearã tekotevẽ ñañemboʼe ñande pyʼaite guive, ha ‘Ñandejára omeʼẽta ñandéve ipyʼaguapy’ (Fili. 4:6, 7). Katuete ningo ñandepyʼaguapy ha javyʼavéta jaikuaávo Jehovápe ha jajapóramo la Biblia heʼíva (Isa. 54:13). Avei tuichaiterei ñanepytyvõ jaha meméramo rreunionhápe ha ñanekyreʼỹramo japredika hag̃ua. Umi ermáno ihentekuéra ndahaʼéiva Testígo, omohenda porã itiémpo okumplipaite hag̃ua koʼã mbaʼe. Pór ehémplo Luisa, a iména oñemoĩ mbaretéramo jepe hese, haʼe ojapopa hembiapo ogapypegua ha upéi osẽ opredika. Luisa heʼi: “Jehová chepytyvõ rupi, asẽ jave apredika katuete ajuhu umi hénte cherendu porãva”. Ndareíri ko ermána ipyʼaguapy, ovyʼa ha oñeñandu porã.

5. Mbaʼépa ohasa jepi umi ermáno ihénte ndahaʼéiva Testígo, ha mbaʼépa oipytyvõkuaa chupekuéra?

⁵ Tekotevẽ jajapo ikatúva guive jaiko porã hag̃ua ñane hénte ndahaʼéiva ndive Testígo. Ha upéva ijetuʼu sapyʼánte haʼekuéra oipota jave jajapo umi mbaʼe ndogustáiva Jehovápe, ha ikatu voi ipochy ohechávo ndajagueviriha. Péro nañanekangýiramo, ikatu amo gotyomie haʼekuéra ñanentende ha ndaipochyvéi ñanendive. Oĩ avei heta mbaʼe noĩvaíriva ha ikatúva jajapo hendivekuéra. Upéicha jave iporãvéta ñambojerovia chupekuéra ha ani jaiko vai vyroreíre (elee Proverbios 16:7). Ñambohovái jave umi mbaʼe ijetuʼúva katu jajerurevaʼerã umi ansiánope tañanepytyvõ ha avei jahecha mbaʼépa heʼi tembiguái jeroviaha ha iñarandúva umi puvlikasión rupive (Pro. 11:14).

6, 7. a) Mbaʼérepa heta tapicha ndoipotái ihénte ostudia testígo de Jehová ndive? b) Mbaʼépa ojapovaʼerã peteĩ ermáno téra estudiánte oñemoĩramo hese ihénte?

⁶ Jaiko porã hag̃ua umi ñane hénte ndahaʼéiva ndive Testígo, tekotevẽ ñañehaʼã ñantende chupekuéra ha avei jajeroviavaʼerã Jehováre (Pro. 16:20). Umi ostudia ramóva jepe oñehaʼãvaʼerã ojapo péicha. Oĩ ningo ndaipochýiva iména térã hembireko ostudia haguére la Biblia, ha ikatu voi opensa ideprovechotaha hogayguakuérape. Péro oĩ avei umi oñemoĩ mbaretéva hembiayhúre ostudia haguére. Pór ehémplo, Ester heʼi “otimbopa hague pochýgui” iména oñepyrũrõ guare ostudia umi Testígondi. Haʼe omombeʼu: “Oĩ puvlikasión amombovaʼekue chugui ha ótro katu ahapy”. Koʼág̃a ko kuñakarai oservíma Jehovápe. Gerardo avei ñepyrũrã ndoipotaivaʼekue hembireko ostudia la Biblia. Haʼe heʼi: “Heta karai okyhyje hembireko oikérõ g̃uarã peteĩ sékta ivaívape, ha ndoikuaáigui mbaʼéichapa odefendéta chupe, ipochyeterei ha ojahéi hese”.

⁷ Mbaʼéichapa ikatu ñaipytyvõ umi estudiántepe, iména térã hembireko oñemoĩramo hese? Jahechaukavaʼerã chupekuéra mbaʼérepa ndovaléi oheja ijestúdio. Haʼe ipyʼaporã ha omombaʼéramo chupe, ikatu hína pe hembiayhu okambia ha noñemoĩvéi hese (1 Ped. 3:15). Gerardo omombeʼu: “Avyʼaite ningo che rembireko pyʼaguapýpe ogueropuʼaka haguére añemoĩrõ guare hese, ndaipochýi ni ndojahéiri cherehe”. Hembireko katu heʼi: “Haʼe ndoipotavéi astudia ha chejopy voi aheja hag̃ua, heʼi chéve chembotavyraitaha hikuái. Añehaʼãmbaite ani hag̃ua ajediskuti hendive ha haʼe chupe ikatuha añete pe heʼíva, péro che ndahechaiha mbaʼérepa ojapo vaíta cherehe. Upéi ajerure Gerárdope olee hag̃ua pe lívro che  astudiáva. Ojapo rire upéva, haʼe ndoikuaavéima mbaʼépa heʼíta chéve ha oponderaiterei pe oleévare”. Jahechakuaavaʼerã avei ñane ména térã ñane rembireko ndahaʼéiva Testígo ikatuha opensa ñamboykemaha chupe, térã iselóso ñasẽ jave japredika ha jaha rreunionhápe. Upévare ñañehaʼãvaʼerã ñañeʼẽ chupe mborayhúpe ani hag̃ua oñeñandu vai térã okyhyje.

EIPYTYVÕ CHUPEKUÉRA OSERVI HAG̃UA AVEI JEHOVÁPE

8. Mbaʼe konséhopa omeʼẽ Pablo umi iména térã hembireko ndahaʼéivape irrelihiongua?

⁸ Apóstol Pablo heʼi opavave kristiánope ndovaleiha oheja iména térã hembirekópe ndahaʼéi haguére irrelihiongua b (elee 1 Corintios 7:12-16). Omomanduʼa chupekuéra hembiayhu ikatuha amo gotyove oservi avei Jehovápe, ha upéva oipytyvõta umi ermánope oiko hag̃ua vyʼápe hogapýpe. Iporã ningo jajapo ikatúva guive ñane rembiayhu oikuaa hag̃ua avei Jehovápe, péro upearã tekotevẽ jaikekuaa chupe. Jahechamína ñane ermanokuéra rembiasakue.

9. Mbaʼérepa jaikekuaavaʼerã japredika jave ñane hentekuérape?

⁹ Heta tapicha ohesaʼỹijóva Ñandejára Ñeʼẽ ohechakuaa otopa hague Jehová rape, ha ovyʼaitereígui umi mbaʼe porãita oaprendévare, oñepyrũ omombeʼu opa otopávape. Ikatu voi ohaʼarõ ihentekuéra oguerohorýma avei pe marandu porã, péro jaikuaaháicha, upéva ndoikomeméi. Peteĩ karai hérava Fredi imanduʼa: “Amombeʼuseterei voi enterovévape umi mbaʼe aaprendéva!”. Hembireko katu heʼi hese: “Koʼẽ guive opredika chéve, chemonguerairo”. Ambue kuñakarai katu oñepyrũ ostudia 18 áño iménagui oiko rire Testígo. Haʼe omombeʼu: “Che ningo aikotevẽ tiémpo aaprende hag̃ua, ndaipotái avave chemboapura”. Oiméramo ñamboʼe la Biblia peteĩ tapichápe, ha iména téra hembireko ndoikuaaséirõ mbaʼeve ñane rrelihióngui, iporã vaʼerã ñañensaja jepi hendive mbaʼéichapa ikatu omombeʼu hembiayhúpe umi mbaʼe oaprende ramóva omongueraiʼỹ hag̃uáicha chupe. Moisés ohai: ‘Toky amáicha umi mbaʼe amboʼéva, tokukúi ysapýicha che ñeʼẽ, ku amandayvi hoʼaháicha kapiʼipe ári ha aguaséroicha ñemitỹnguéra ári’ (Deu. 32:2, ÑÑB). Ñambojahoga rangue ñane rembiayhúpe umi mbaʼe jaikuaávape, iporãvéta ñamombeʼu michĩ mimínte chupe jahávo pe marandu porã, ku ama otyky tykyháicha, upéva opokovéta ikorasõre.

10-12. a) Mbaʼépa heʼi Pedro umi kristiánope hembiayhu ndahaʼéiva irrelihiongua? b) Mbaʼéichapa oipytyvõ peteĩ estudiántepe 1 Pedro 3:1, 2 heʼíva?

¹⁰ Espíritu sánto rupive, apóstol Pedro  oñemoñeʼẽ umi ermánape iména ndahaʼéiva kristiáno: ‘Peñemoĩ pene ména poguýpe, oiméramo ogueroviaʼỹva Ñandejára ñeʼẽ, ikatu hag̃uáicha oguerovia ñeʼẽʼỹ rehe hembireko hekoporã rupi, ohechávo heko joheipyre ha opororrespetaha’ (1 Ped. 3:1, 2, BNP). Upéicharõ, jahechakuaa peteĩ karai ipyʼahatã ha ndotrataporãiva hembirekópe ikatuha saʼi saʼípe oguerohory ñane rrelihión ohecháramo hembireko omombaʼeha chupe. Péicha avei, peteĩ ermáno omoakãvaʼerã hogapy mborayhúpe, hembireko omaltratáramo jepe chupe (1 Ped. 3:7-9).

¹¹ Heta kristiáno koʼag̃agua ohechakuaa mbaʼeichaitépa oipytyvõ chupekuéra Pedro heʼivaʼekue. Jahechamína mbaʼépa ohasa Selma. Iména Esteban ipochyeterei haʼe oñepyrũrõ guare ostudia umi Testígondi. Esteban omombeʼu ‘ndogustái hague chupe, iselóso ha ndoikuaaiha mbaʼépa ojapóta’. Selma katu heʼi: “Astudia mboyve voi la Biblia ijetuʼu vaʼekue chéve aiko hendive. Haʼe ningo ipochypa reími ha upévare añatendevaʼerã mbaʼépa haʼéta ha mbaʼéichapa añeʼẽta. Ha astudia rire Testigokuéra ndive, koʼýte ijarhél”. Mbaʼéichapa ko ermána ombohovái isituasión?

¹² Selma imanduʼa peteĩ mbaʼe omboʼevaʼekue chupe pe ermána ostudiáva hendive: “Peteĩ árape nachekyreʼỹiete astudia hag̃ua. Pe pyhare rojodiskutíkuri Esteban ndive ha haʼe ipochyeterei chendive ha chenupã, upévare chekoʼẽvai ha añembyasy. Amombeʼupaite pe ermánape upe oikovaʼekue ha upéi haʼe ojerure chéve alee hag̃ua 1 Corintios 13:4-7. Chemanduʼa porã haʼe hague chupe: ‘Péro Esteban ningo arakaʼeve ndachetratái koʼápe heʼiháicha’. Upépe haʼe oporandu chéve: ‘Ha nde, rehechaukápa rehayhuha chupe koʼápe heʼiháicha?’. Che haʼe chupe Esteban ijarhelha ha upévare ijetuʼu chéve ajapo hag̃ua upéicha. Pyʼaguapýpe heʼi jey chéve: ‘Selma, máva piko hína pe ostudiáva la Biblia? Esteban, térãpa nde?’. Upépe ahechakuaa tekotevẽha akambia. Upémarõ ajerure Jehovápe tachepytyvõmi atrata hag̃ua mborayhúpe che ménape. Upéicha rupi mbeguekatúpe okambia ohóvo ore situasión.” Diecisiete áño haguépe Estébangui oiko avei Testígo.

MBAʼÉPA IKATU JAJAPO OPAVAVE

13, 14. Mbaʼéichapa ikatu ñaipytyvõ umi ermáno ihénte ndahaʼéivape Testígo?

¹³ Pe amandayvi vevuimi ningo omoheʼõ asy pe yvy ha omongakuaa umi kaʼavo. Upéicha avei, opavave ermáno imbaʼeporãramo kongregasiónpe, ikatu oipytyvõ umi ihénte ndahaʼéivape Testígo ovyʼave hag̃ua. Peteĩ ermána Brasilgua, hérava Elvina ohechakuaa upéva ha heʼi: “Umi ermáno ha ermána cherayhu rupi, imbarete che jerovia”.

 ¹⁴ Jahayhu ha ñanembaʼeporãramo umichagua ermáno ndive, ikatu avei opoko hogayguakuéra korasõre. Upéva oikovaʼekue peteĩ karai Nigeriaygua rehe. Haʼe ostudia la Biblia 13 áño hembireko oñepyrũ rire oservi Jehovápe. Pe karai omombeʼu: “Aviaha jave peteĩ Testígondi, oñembyai chugui iveíkulo, upémarõ haʼe oho pe puévlo hiʼag̃uivévape oheka hag̃ua ambue Testígope. Haʼekuéra oreinvita hógape ha omeʼẽ oréve ropyta hag̃ua roke. Oretrata hikuái orekuaarõguáicha ymaite guive. Peichagua kristiánore ningo hetaitéma oñeʼẽ chéve che rembireko! Inglatérrape katu peteĩ kuñakarai oñepyrũ ostudia la Biblia 18 áño iménagui oiko rire Testígo, ha haʼe imanduʼa: “Umi ermáno katuete oreinvita mokõivévape rokaru hag̃ua, ha horyetereígui hikuái añeñandu porã hendivekuéra”. Upéicha avei oiko peteĩ karai upe tetãygua rehe. Haʼe heʼi: “Umi ermáno oúmi orevisita térã oreinvita roho hag̃ua hógape ha ohechauka ojepyʼapyha orerehe hikuái, koʼýte cherasýrõ guare, heta oĩ ohóva cherendápe ospitálpe”. Opavave ningo ikatu ñaipytyvõ ñane ermanokuérape jahechaukávo jajepyʼapyha avei ihentekuérare ndahaʼéiva Testígo.

15, 16. Mbaʼéicha rupípa ikatu ovyʼa umi ermáno ihénte ndahaʼéiva Testígo?

¹⁵ Heta ñane ermáno ha ermána ningo ojapo ikatúva guive oiko hag̃ua hekopete ha oñehaʼãmbaite opredika pyʼaguapýpe porãnte hogayguakuérape téra ambue ihénte ndahaʼéivape Testígo. Upéicharõ jepe, oĩ heta ndoikuaaséiva gueteri mbaʼeve la Bíbliagui, térã osegi oñemoĩ mbarete hesekuéra (Mat. 10:35-37). Péro upevére ñande jatratavaʼerã chupekuéra mborayhúpe Jehová oipotaháicha. Peteĩ ermána ména oikovaʼekue chugui Testígo heʼi: “Peteĩ kristiáno omombaʼe ha otrata porãva iména térã hembireko ndahaʼéivape Testígo, ndoikuaaihína mbaʼépa oiméne opensa ha oñandu pe hembiayhu, upévare nañanekaneʼõivaʼerã”.

¹⁶ Heta ermáno ha ermána ovyʼánte avei ihentekuéra ndahaʼéiramo jepe Testígo. Peteĩ ermána 21 áñorema oñehaʼã iména ostudia hag̃ua la Biblia ha koʼág̃a peve nokonsegíri. Mbaʼéichapa oñeñandu? Haʼe omombeʼu: “Che avyʼa añehaʼãmbaite rupi ajapo Jehová heʼíva, cheñeʼẽrendu chupe ha amombarete che jerovia. Avei asẽ meme apredika, astudia, aha rreunionhápe ha aipytyvõ ermanokuérape. Péicha añangareko che jeroviáre ha añandu cheag̃uiveha Jehováre” (Pro. 4:23).

ANI NEKANEʼÕ!

17, 18. Mbaʼépa oipytyvõta umi ermánope ani hag̃ua ikaneʼõ ihentekuéra ndahaʼéiramo jepe Testígo?

¹⁷ Oiméramo reservi Jehovápe ndepyʼaite guive, aníkena nekaneʼõ ne hentekuéra ndahaʼéiramo jepe Testígo. Nemanduʼáke, ‘héra marangatu rehehápe Ñandejára ndohejamoʼãiha ipuévlope’ (1 Sam. 12:22). Haʼe oĩta nde ykére nderehejáiramo chupe (elee 2 Crónicas 15:2). Ejapo ko téysto heʼíva: “Evyʼaite reservívo Jehovápe [...]. Emoĩ Jehová pópe nde rape ikatu hag̃uáicha nemboguata porã, ha hesénte ejerovia” (Sal. 37:4, 5, NM). Eñemboʼe memékena ha ejerovia ñande Ru yvagapegua katuete nepytyvõtaha tahaʼe haʼéva ne situasión (Rom. 12:12).

¹⁸ Ejerure Jehovápe tomeʼẽ ndéve ijespíritu sánto reiko hag̃ua pyʼaguapýpe ne hentekuéra ndive (Heb. 12:14). Upéicha retrata porãramo chupekuéra, ág̃ante ikatu repoko ikorasõrekuéra. Ha rejapóvo ‘opa mbaʼe remombaʼeguasu hag̃ua Ñandejárape’, rehecháta mbaʼéichapa revyʼa ha reiko pyʼaguapýpe (1 Cor. 10:31, BNP). Nemanduʼákena opavave ermáno ha ermána oĩva ko múndope nderayhuha ha akóinte nepytyvõtaha.

[Nóta]

[Porandu ñahesaʼỹijóva]

[Nóta oĩva taʼanga ndive páhina 28]

Rehechavaʼerã mbaʼéicha javépa opyta porãve reñeʼẽ hag̃ua nde jeroviáre

[Nóta oĩva taʼanga ndive páhina 29]

Ñamombaʼékena umi ermáno rembiayhúpe ndahaʼéiva Testígo