Posible ti Kinaragsak iti Pamilia a Saan nga Agkakarelihionan

“Kasano ti pannakaammom no maisalakanmonto ti asawam?”​—1 COR. 7:16.

MASUNGBATAM KADI?

Ania ti maaramidan dagiti Kristiano tapno maadda ti talna iti pagtaenganda uray dida karelihionan dagiti kapamiliada?

Kasano a matulongan ti maysa a Kristiano dagiti di manamati a kapamiliana nga umawat iti pudno a panagdayaw?

Ania ti maaramidantayo tapno matulongantayo dagiti kapammatiantayo a saan a manamati ti kapamiliada?

1. Ania ti mabalin nga epektona iti pamilia ti panangawat iti mensahe ti Pagarian?

IDI naminsan nga imbaon ni Jesus dagiti apostolna, kinunana: “Bayat a mapankayo, mangasabakayo, a kunkunayo, ‘Ti pagarian ti langlangit asidegen.’” (Mat. 10:1, 7) Dayta a naimbag a damag ket mangyeg iti talna ken ragsak kadagidiay umawat ken mangipateg iti dayta. Ngem pinakdaaran ni Jesus dagiti apostolna nga adu ti bumusor iti trabaho a panangasaba. (Mat. 10:16-23) Narigrigat a sanguen ti ibubusor no agtaud dayta iti pamilia.​—Basaen ti Mateo 10:34-36.

2. Apay a posible nga agbalin a naragsak dagiti Kristiano uray dida kapammatian ti kapamiliada?

² Kayat kadi a sawen dayta a saan a naragsak dagiti pasurot ni Kristo no dida kapammatian dagiti kapamiliada? Saan! Nupay nakaro no dadduma ti ibubusor ti pamilia, saan a kanayon a kasta. Ken nalabit agpatingganto met la dayta. Kaaduanna a nakadepende ti kinaragsak iti reaksion ti maysa a Kristiano iti ibubusor wenno kinaawan interes ti pamiliana. Maysa pay, bendisionan ni Jehova dagidiay nasungdo kenkuana tapno agbalinda a naragsak uray narigat ti kasasaad. Agbalin a naragsak dagiti Kristiano no (1) ikagumaanda a maadda ti talna iti pagtaenganda ken (2) sipapasnek a tulonganda dagiti miembro ti pamiliada nga umawat iti kinapudno.

IKAGUMAANYO A MAADDA TI TALNA

3. Apay a rumbeng nga ikagumaan ti maysa a Kristiano a maadda ti talna iti pamilia?

³ Tapno agbunga ti bin-i ti kinalinteg iti uneg ti pamilia, kasapulan ti talna iti pagtaengan. (Basaen ti Santiago 3:18.) Uray no saan nga agdaydayaw ken Jehova ti amin a miembro ti pamilia, ikagumaan ti maysa a Kristiano  a maadda ti talna iti pamilia. Kasanona a maaramid dayta?

4. Kasano a mataginayon dagiti Kristiano ti kinakalmadoda?

⁴ Masapul a taginayonen dagiti Kristiano ti makin-uneg a talna, wenno kinakalmado. Tapno maaramidtayo dayta, masapul a naimpusuan nga ikararagtayo ti di maartapan a “talna ti Dios.” (Fil. 4:6, 7) Mangyeg iti kinaragsak ken talna ti pananggun-od iti pannakaammo maipapan ken ni Jehova ken panangyaplikar kadagiti prinsipio ti Biblia. (Isa. 54:13) Nagpateg met ti pannakiraman kadagiti gimong ken ti kinaregta iti ministerio tapno maadda ti talna ken kinaragsak. Posible latta a makiraman ti maysa a Kristiano kadagita a Nakristianuan nga aktibidad uray no dina kapammatian dagiti kapamiliana. Alaentayo a pagarigan ni Enza, * a nakaro ti ibubusor ni lakayna. Mapan mangasaba no malpasna dagiti trabahona iti pagtaenganda. Kuna ni Enza: “Bembendisionan ni Jehova ti tunggal panagreggetko a mangiranud iti naimbag a damag.” Dagita a bendision ket sigurado a mangyeg iti talna, pannakapnek, ken kinaragsak.

5. Ania dagiti karit a masansan a pakaipasanguan dagiti saan a Saksi ti kapamiliada? Ania a tulong ti magun-odanda?

⁵ Masapul nga aramidentayo ti amin a kabaelantayo tapno maaddaantayo iti natalna a relasion kadagiti saan a Saksi a kapamiliatayo. Mabalin a narigat dayta gapu ta ti kayatda nga aramidentayo ket maikontra no dadduma kadagiti prinsipio ti Biblia. Mabalin a masuron ti dadduma kadakuada gapu ta determinadotayo a mangsalimetmet kadagiti umiso a prinsipio, ngem mangyeg dayta iti talna inton agangay. Siempre, mangpataud iti di panagkikinnaawatan no ditay pagustuan ida uray no awan met ti masalungasingtayo a prinsipio iti Biblia. (Basaen ti Proverbio 16:7.) No adda problema, nagpateg a sukimatentayo dagiti balakad ti Biblia kadagiti publikasion ti klase matalek ken masirib nga adipen ken dagiti panglakayen.​— Prov. 11:14.

6, 7. (a) Apay a bumusor ti dadduma a miembro ti pamilia no makipagadal kadagiti Saksi ni Jehova dagiti kapamiliada? (b) Kasano ti rumbeng a panangtaming ti maysa nga agad-adal iti Biblia wenno ti Kristiano iti ibubusor ti pamiliana?

⁶ Maadda ti talna iti uneg ti pamilia no agtalektayo ken ni Jehova ken ikagumaantayo a tarusan ti rikna dagiti kapamiliatayo. (Prov. 16:20) Maaramidan met dayta uray dagiti kabbaro nga agad-adal iti Biblia. Adda dagiti di manamati nga assawa a dida met paritan dagiti assawada nga agadal iti Biblia. Mabalin nga ibagada pay ketdi a pagsayaatan dayta ti pamiliada. Ngem dadduma ti nakaro ti ibubusorna. Kas pagarigan, ni Esther a maysa itan a Saksi inaminna a nakapungtot iti kasta unay idi nakipagadal ni lakayna iti Biblia kadagiti Saksi ni Jehova. Kunana: “Ibellengko wenno puorak dagiti literaturana.” Kastoy met ti kuna ni Howard a nangbusor idi iti panagadal ni baketna iti Biblia: “Amken ti adu a lallaki a maallilaw dagiti assawada a makimiembro iti narelihiosuan a sekta. Bumusor ti asawa a lalaki gapu ta ipagarupna nga agpegpeggad ni baketna.”

⁷ Ipaawattayo iti iyad-adalantayo a saanna a masapul nga isardeng ti agadal iti Biblia gapu laeng ta busbusoren ti asawana. Masansan a masolbar dagiti parikut no naalumamay ken mangipakita iti panagraem iti di manamati nga asawana. (1 Ped. 3:15) Kuna ni Howard: “Agyamanak unay ta kanayon idi a kalmado ni baketko imbes nga agpungtot!” Inlawlawag ni baketna: “Kayat ni Howard nga isardengkon ti agadal iti Biblia. Kunana a naallilawak. Imbes a makiapaak, imbagak a mabalin a husto isuna  ngem diak ammo no kasano a naallilawak. Isu a kiniddawko a basaenna ti libro nga ad-adalek. Inaramidna dayta ket saanna a makontra ti nabasana. Dayta ti namagpanunot kenkuana.” Nasayaat a laglagipen a mabalin a marikna dagiti di manamati nga assawa a nabaybay-anda wenno agpeggad ti panagassawada no mapan makigimong ken mangasaba dagiti assawada. Ngem mapukaw dayta a rikna no sidudungngo nga iparikna dagiti Kristiano nga assawa ti pammategda.

TULONGAN IDA A MANGAWAT ITI KINAPUDNO

8. Ania ti imbalakad ni apostol Pablo kadagiti Kristiano a saan a manamati ti assawada?

⁸ Imbalakad ni apostol Pablo kadagiti Kristiano a saanda a panawan dagiti assawada gapu laeng ta saan ida a kapammatian. * (Basaen ti 1 Corinto 7:12-16.) No panunoten ti maysa a posible nga agbalin a Kristiano ti di manamati nga asawana, mataginayonna ti kinaragsakna. Ngem masapul nga agannad bayat nga ikagumaanna nga ipaawat ti kinapudno iti asawana kas ipakita dagiti sumaganad a kapadasan.

9. Ania a panagannad ti kasapulan no iranud ti kinapudno iti Biblia iti di manamati a kapamilia?

⁹ Malagip ni Jason ti reaksionna idi naammuanna ti kinapudno iti Biblia: “Kayatko nga ibaga dayta iti amin!” No mabigbig ti mayad-adalan a kinapudno ti maad-adalna iti Biblia, mabalin a nakaragragsak isu a dayta la ti sangkaibagana. Mabalin nga ekspektarenna nga awaten dayta a dagus dagiti di manamati a kapamiliana, ngem mabalin a naiduma ti reaksionda. Ania ti reaksion ti asawa ni Jason iti kinagagarna? “Narengrenganak,” kunana. Kuna ti maysa a babai a nangawat iti kinapudno 18 a tawen kalpasan a nagbalin a Saksi ni lakayna: “In-inut ti panangawatko iti kinapudno.” No adda iyad-adalam iti Biblia a ti asawana ket saan nga interesado iti kinapudno, apay a dimo suruan no kasanona a sitataktika nga ilawlawag ti kinapudno? Kuna ni Moises: “Ti pammilinko agtedtedto a kas ti tudo, ti sasaok agaruyotto a kas ti linnaaw, kas arimukamok iti rabaw ti ruot.” (Deut. 32:2) Nasaysayaat ti sangkatedted a sasao maipapan iti kinapudno a nayebkas iti umiso a pamay-an ken tiempo ngem iti arig bayakabak a sasao.

10-12. (a) Ania ti imbalakad ni apostol Pedro kadagiti Kristiano a di manamati ti assawada? (b) Kasano a nasursuro ti maysa a mayad-adalan iti Biblia nga iyaplikar ti balakad iti 1 Pedro 3:1, 2?

¹⁰ Kastoy ti naipaltiing a balakad ni apostol Pedro kadagiti assawa a babbai a saan a Kristiano ti assawada: “Dakayo nga assawa a babbai, agpasakupkayo kadagiti bukodyo nga assawa, tapno iti kasta, no ti asinoman saan a natulnog iti sao, mabalin a magun-od  ida nga awan ti sao babaen iti kababalin dagiti assawada a babbai, agsipud ta nasaksianda ti nadalus a kababalinyo agraman ti nauneg a panagraem.” (1 Ped. 3:1, 2) Mabalin a ti asawa a babai matulonganna ni lakayna nga umawat iti kinapudno babaen ti panagpasakup ken nauneg a panagraemna, uray no saan a nasayaat ti pannakatratona. Umasping iti dayta, masapul a maitunos iti pagayatan ti Dios ti kondukta ti asawa a lalaki ken agbalin a nadungngo nga ulo ti pamilia, uray no busbusoren ti di manamati nga asawana.​—1 Ped. 3:7-9.

¹¹ Adu a Kristiano ita ti nagunggonaan iti panangsurotda iti balakad ni Pedro. Maysa kadakuada ni Selma. Idi nakipagadal iti Biblia kadagiti Saksi ni Jehova, saan a nagustuan ni lakay nga Steve. Inamin ni lakayna: “Nagbalinak a managpungpungtot, naimon, managimbubukodan, ken saan a natalged ti riknak.” Kuna ni Selma: “Uray idi saanak pay a Saksi, narigaten a pakibagayan ni Steve ta kontrolado dagiti garawko. Napudot ti panagul-ulona. Kimmaro dayta idi nangrugiak a nagadal iti Biblia.” Ania ti nakatulong ken Selma?

¹² Malagip ni Selma ti nasursurona iti Saksi a nangyadal kenkuana. Kunana: “Naminsan, diak kayat ti agadal iti Biblia. Iti rabii sakbayna, kinabilnak ni Steve idi adda kayatko nga ilawlawag kenkuana isu a maldaangan ken maasianak iti bagik. Idi imbagak iti kabsat ti napasamak ken ti marikriknak, impabasana ti 1 Corinto 13:4-7. Idi nabasakon, imbagak, ‘Awan man la kadagitoy ti ar-aramiden ni Steve.’ Ngem pinagpanunotnak babaen ti panangisaludsodna, ‘Mano kadagitoy nga ebkas ti ayat ti ipakpakitam ken lakaymo?’ Ti sungbatko ket, ‘Awan ta nagrigat a pakibagayan.’ Sidudungngo a kinuna ti kabsat, ‘Selma, asino ti mangikagkagumaan nga agbalin a Kristiano? Sika wenno ni Steve?’ Gapu ta naamirisko a kasapulak a balbaliwan ti panangmatmatko, inkararagko a tulongannak ni Jehova nga agbalin a nadungdungngo ken Steve. In-inut a nagbaliw ti bambanag.” Kalpasan ti 17 a tawen, inawat ni Steve ti kinapudno.

NO KASANOTAYO A MAKATULONG

13, 14. Ania ti maitulongtayo kadagiti kakabsat a di manamati ti kapamiliada?

¹³ Kas kadagiti arbis nga umagsep iti daga a tumulong a mangpatubo iti mulmula, adu a kakabsat iti kongregasion ti makatulong tapno agbalin a naragsak dagiti Kristiano a di manamati ti kapamiliada. “Ti panagayat dagiti kakabsat ti timmulong kaniak nga agtalinaed a natibker iti kinapudno,” kuna ni Elvina a taga-Brazil.

¹⁴ Dakkel ti maitulong ti kinaimbag ken pannakaseknan dagiti kakabsat tapno lumukneng ti puso dagiti di manamati a kapamilia. Kuna ti maysa a lalaki a taga-Nigeria  a nangawat iti kinapudno 13 a tawen kalpasan a nagbalin a Saksi ni baketna: “Idi nagkaduakami a nagbiahe iti maysa a Saksi, nadadael ti luganna. Nagsapul iti padana a Saksi iti asideg a purok ket pinadagusdakami iti nagpatnag. Inasikasodakami a kas man la agaammokamin manipud pay kinaubingmi. Dagus a nariknak ti Nakristianuan nga ayat a sangkaibaga ni baketko.” Malagip ti maysa a babai a taga-England a 18 a tawenen a Saksi ni lakayna idi inawatna ti kinapudno: “Aw-awisendakami dagiti Saksi kadagiti pannangan. Kanayon a mariknak a maragsakanda iti kaaddak.” * Iti dayta met la a pagilian, kuna ti maysa pay nga asawa a lalaki a nagbalin a Saksi idi agangay: “Bisbisitaendakami dagiti kakabsat, wenno aw-awisendakami kadagiti pagtaenganda, ket nariknak a maseknanda, nangruna idi nayospitalak ta adu ti bimmisita kaniak.” Ipakpakitam kadi ti kasta met la a pannakaseknan kadagiti di manamati a miembro ti pamilia?

15, 16. Ania ti makatulong iti maysa Kristiano nga agtalinaed a naragsak uray no saan nga agbalin a Saksi dagiti kapamiliana?

¹⁵ Siempre, saan nga amin a di manamati a kapamilia wenno kakabagian ket umawat iti kinapudno uray kalpasan ti adu a tawen a panangipakita iti nasayaat a kababalin ken nataktika a panangasaba. Saan nga interesado wenno bumusbusor latta ti dadduma. (Mat. 10:35-37) Ngem mabalin a nagsayaat ti epektona no mangipakitatayo latta kadagiti nasayaat a kababalin. Kuna ti dati a di manamati nga asawa a lalaki: “Dimo ammo ti epektona iti isip ken puso ti di manamati nga asawa no ipakita ti manamati nga asawa dagiti nagsayaat a kababalin. Isu nga an-anusam ti di manamati nga asawam.”

¹⁶ Posible latta a naragsak ti maysa a Kristiano uray saan nga agbalin a Saksi ti kapamiliana. Nupay 21 a tawen nga inkagumaan ti maysa a kabsat a kasabaan ni lakayna, saan latta a nagbalin a Saksi. Kunana: “Nataginayonko ti kinaragsakko babaen ti panangikagumaak a mangay-ayo ken Jehova, panagtalinaedko a nasungdo kenkuana, ken panangpabilegko iti espiritualidadko. Simmingedak ken ni Jehova ken nasaluadak ti pusok babaen ti panagbalinko nga okupado kadagiti naespirituan nga aktibidad kas iti personal a panagadal, pannakigimong, panangasaba, ken panangtulong kadagiti kakongregasionko.”​—Prov. 4:23.

DIKA MAAWANAN ITI NAMNAMA!

17, 18. Apay a saan a maawanan iti namnama ti maysa a Kristiano uray di manamati ti kapamiliana?

¹⁷ No saan a Saksi dagiti kapamiliam, dika maawanan iti namnama. Laglagipem a “saanto a panawan ni Jehova ti ilina maipagapu iti naindaklan a naganna.” (1 Sam. 12:22) Dinaka panawan basta agtalinaedka a nasinged kenkuana. (Basaen ti 2 Cronicas 15:2.) Gapuna, “agragsakka iti napalalo ken Jehova” ken ‘iyadanim kenkuana ti dalanmo, ket agkammatalekka kenkuana.’ (Sal. 37:4, 5) ‘Reggetam ti agkararag,’ ken agtalekka a ti naayat a nailangitan nga Amatayo matulongannaka a mangibtur iti amin a kita ti pakarigatan.​—Roma 12:12.

¹⁸ Kiddawem ken Jehova nga ipaayannaka iti nasantuan nga espirituna tapno maadda ti talna iti pagtaenganyo. (Heb. 12:14) Wen, posible ti natalna a kasasaad a mangtignayto iti puso dagiti di manamati a kapamilia. Maaddaanka iti ragsak ken talna iti puso ken isip no ‘aramidem ti amin a bambanag maipaay iti dayag ti Dios.’ (1 Cor. 10:31) Anian a makaliwliwa a maammuan a manamnamam ti tulong dagiti kakabsat iti kongregasion!

[Footnotes]

[Salsaludsod]

[Ladawan iti panid 28]

Mangbirokka iti umiso a tiempo a mangilawlawag kadagiti patpatiem

[Ladawan iti panid 29]

Ipariknayo ti pannakaseknanyo iti di manamati nga asawa