Inoqutigiinni upperisaqaqatigiinngitsuni nuannaartoqarsinnaavoq

“Qanoq ilillutit ilisimasinnaaviuk [aappat] annaassinnaanerit?” — 1 KORINTHIMIUT 7:16.

UKU AKISINNAAVIGIT?

Kristumiut inoqutigiinni upperisaqaqatigiinngitsuni eqqissinermik ineriartortitsiumallutik susinnaappat?

Kristumiup ilaquttani sallusuissummiileqqullugit qanoq ikiorsinnaavai?

Inoqutigiinni upperisaqaqatigiinngitsuniittut ikiorniarlugit susarsinnaavugut?

1. Jehovamut kiffartortunngortup kiffartulernera ilaqutaasut qanoq sunnerneqaatigisinnaavaat?

ILAANNI Jiisusip ajoqersukkani oqaluussiartortikkamigit ima oqarfigai: “Oqaluussiartoritsi ima: Qilaap Naalagaaffia qanillivoq!” (Matthæusi 10:1, 7) Nutaarsiassaq nuannersoq tamanna eqqississutaallunilu nuannaalissutaassaaq tamatuminnga qujamasullutik ilassinnittunut. Jiisusilli ajoqersukkani mianersoqquai oqaluussisarnertik pillugu akerlilersuisorpassuaqarumaarneranik. (Matthæusi 10:16-23) Pingaartumik ilaquttat akerlilersuinerat naalliunnarsinnaavoq. — Atuakkit Matthæusi 10:34-36.

2. Sooq ilaquttavut sallusuissummiinngikkaluartut nuannaarsinnaavugut?

² Taava imaappa ilaquttavut sallusuissummiinngippata nuannaarsinnaanngitsugut? Naamerluinnaq! Kristumiut ilaat ilaquttaminnit sakkortuumik akerlilersorneqartaraluartut tamarmiunngitsoq taamatut akerlilersorneqartarput. Aamma ilaat ilaquttaminnit akerlilersorneqarunnaarsinnaapput. Pissutsit atukkat qanorluunniit ikkaluarpata nuannaartoqarsinnaavoq ilaquttat akerlilersuinerat sallusuissummilluunniit soqutiginninnginnerat eqqortumik periarfigigaanni. Aammattaaq Jehovap imminik ilumoorfiginnittut pissutsini ilungersunaraluartuniluunniit nuannaarnissaannut ikiortarpai. Kristumiut nuannaarnerusinnaapput (1) angerlarsimaffimmik eqqissisimanartuutitsiniarnermikkut aammalu (2) ilaquttatik ilumoortumik pallorfiginnilernissaannut ikiorniarsarisarunikkit.

ILAQUTARIINNI EQQISSINERMIK INERIARTORTITSIGIT

3. Sooq nalunaajaasoq ilaqutariinni eqqissinermik ineriartortitsisariaqarpa?

³ Ilaquttat Jehovamut kiffartortunngornissaat ilimanaateqarnerussaaq ilaqutariinni pissutsit eqqissinartuuppata. (Atuaruk Jaaku 3:18). Ilaquttat Jehovamut suli kiffartulinngikkaluarpataluunniit  kristumiuusup ilaqutariinni eqqissinermik ineriartortitsinissani sulissutigisariaqarpaa. Qanoq ililluni taamaaliorsinnaava?

4. Qanoq ililluta qamuuna eqqissisimajuarsinnaavugut?

⁴ Qamuuna eqqissisimasuunissarput pingaaruteqarpoq. Taamaammat ‘eqqissineq Guutimit pisoq siuneqassusernit tamanit annerungaartoq’ qinnutigisariaqarparput. (Filippimiut 4:6, 7) Nuannaarlunilu ‘eqqissisimangaarluni inuusoqartarpoq’ Jehova pillugu ilinniaraanni najoqqutassianullu Biibilimiittunut naapertuuttumik inuugaanni. (Esaja 54:13, 1990) Aamma eqqissisimallutalu nuannaarusukkutta ilagiit ataatsimiinnerini peqataasariaqarpugut oqaluussinermilu aallussilluartariaqarluta. Inoqutigiinni upperisaqaqatigiinngitsuniittut amerlanertigut taakkua iliuuserinissaannut periarfissarsisarput. Assersuutigalugu qatanngut arnaq Enzamik * atilik ueqarpoq akerliusorujussuarmik. Enza illumi suliassaminik suliarinnereeraangami oqaluussiartortarpoq. Ima oqarpoq: “Jehovap pilluaqqungaartarpaanga nutaarsiassaq nuannersoq oqaluussissutigiumallugu iliuuseqaraangama nuannersunik misigisaqartittaraminga.” Taamatut pilluaqquneqartarnini eqqississutigisarlugulu nalerisimaalissutigisarlugulu nuannaalissutigisarpaa.

5. Sallusuissummiinngitsunik ilaqutallit sunik unamminiagaqarsinnaappat, suullu iluaqutigisinnaavaat?

⁵ Ilaquttatta sallusuissummiinngitsut eqqisseqatiginissaat ilungersorluta suliniutigisariaqarparput. Tamanna unamminiarnartuusinnaavoq taakkua Biibilimut naapertuutinngitsumik iliuuseqartikkusuttarsinnaammatigut. Ilaquttatta sallusuissummiinngitsut ilaasa ilumoorfiginnilluta Biibilimik maleruaanerput kamaatigisarsinnaavaat. Tamannali eqqortumik iliorunnaassutigissanngilarput. Ilungersorlutami suliniartuarnerput naggataatigut ilaquttatsinnik eqqisseqateqarnitsinnik kinguneqarsinnaavoq. Soorunami najoqqutassianut Biibilimiittunut akerliunngitsunut tunngatillugu ilaquttavut suleqatigiumallugit sapinngisatsinnik iliuuseqartarpugut taamaalilluta pisariaqanngitsumik isumaqatigiinnginnissaraluit pinngitsoortittaratsigit. (Atuaruk Ussatit 16:7). Ajornartorsiuteqartilluni pingaaruteqarpoq utoqqaanertanut Biibili tunngavigalugu siunnersoqqunissaq ajornartorsiutigisanullu tunngasut pillugit Biibililersaarutini inussiaqatigiinneersuni misissuinissaq. — Ussatit 11:14.

6, 7. (a) Sooq inuit ilaat ilaquttaminnik Jehovap Nalunaajaasuinit atuaqqissaaqatigineqartalersunik akerlilersuisarpat? (b) Biibilimik atuaqqissaaqatigineqartartoq nalunaajaasorluunniit ilaquttaminit akerlilersorneqaraangami qanoq pisassava?

⁶ Ilaquttavut eqqisseqatigisinnaavavut Jehova tatigigutsigu ilaquttattalu misigissusiinik paasinninniarsarigutta. (Ussatit 16:20) Biibilimik atuaqqissaartalerlaagaluilluunniit taamaaliorsinnaapput. Imaassinnaavoq aappaasut ilaat aapparmik Biibilimik atuaqqissaartarneranik ajorinninngitsut immaqalu allaat iluaqutaasorinnittut, allalli akeqqersimaartuusinnaapput. Esther, maanna Jehovamut nalunaajaasuusoq, uini Jehovap Nalunaajaasuinit atuaqqissaaqatigineqartalermat kamattorujussuusimanerarpoq. Ima oqaluttuarpoq: “Atuagaatai iginngikkaangakkit ikuallattarpakka.” Howardi nuliani Biibilimik atuaqqissaartalermat akerliusimavoq. Oqarpoq uiusut ilarpassui nuliamik upperusiortunut salloqittaasunut ilanngussimasoralugit annilaangasartut. Aamma oqarpoq uiusoq nuliani navianartorsiorsoralugu peqqarniittarsinnaallunilu oqaatsimigut sakkortusaartarsinnaasoq.

⁷ Atuaqqissaaqatigineqartartoq akerliusumik aappalik paasitittariaqarparput Biibilimik atuaqqissaartarunnaartariaqanngitsoq. Atuaqqissaaqatigineqartartut pissutsinik pitsanngorsaasinnaasarput ‘saamasuunermikkut’ aapparminnillu ‘ataqqinninnermikkut’. (1 Petrusi 3:15, NV) Howard ima oqarpoq: “Nuliama eqqissisimasarsimanera ingasattumillu qisuariartarsimannginnera qujamasuutigeqaara!”  Taassuma nulia oqaluttuarpoq Howardip Biibilimik atuaqqissaartarunnaaqqusimagaani Jehovap Nalunaajaasui salloqittaasorigamigit. Ima oqaluttuarpoq: “Oqqateqatiginagu oqarfigaara imaassinnaasoq salloqittaasorinninnera ilumoortoq, aammali oqarfigaara ilumoorlunga oqassaguma tamatuma ilumoornera takusinnaanagu. Taava qinnuigaara atuagaq atuaqqissaagara atuaqqullugu. Atuarpaa tassanilu allassimasunut akerliliisinnaanani. Tamanna killinneqaatigeqaa.” Pingaaruteqarpoq eqqaamassallugu aappaasut aappatik ataatsimiigiaraangata oqaluussiartoraangataluunniit kiserliulersinnaasartut imaluunniit isumaqalersinnaasartut aappariinnertik navianartorsiortoq. Biibilimilli atuaqqissaaqatigineqartup nalunaajaasuusulluunniit aappani inussiarnersumik asannippaluttumillu oqaluuttarpagu aappaa isumakulunnginnerussaaq.

SALLUSUISSUMMIILEQQULLUGIT IKIUKKIT

8. Apustilip Paulusip kristumiuunngitsunik aappallit qanoq siunnersorpai?

⁸ Apustilip Paulusip kristumiut siunnersorpai aapparmik kristumiuunnginnera pissutigiinnarlugu aapparminnik qimatsisaqqunagit. * (Atuakkit 1 Korinthimiut 7:12-16). Kristumiu nuannaarnerussaaq eqqaamaguniuk ullut arlaanni aappani Jehovamut kiffartortunngoratarsinnaasoq. Pitsaassaarli aappani sallusuissut pillugu oqaluussiffiginiaraangamiuk mianersortaruni, soorlu immikkoortuni tulliuttuni tamanna ersertoq.

9. Kristumiup sallusuissutit Biibilimiittut ilaquttaminut oqaluttuarigaangamigit suna mianersuutigisariaqartassavaa?

⁹ Jason sallusuissummik paasinneqqaarami angorniortupilussuuvoq. Ima oqarpoq: “Kikkut tamaasa oqaluttuukkusukkaluarpakka!” Atuaqqissaaqatigineqartartoq ilikkakkami Biibilimeersut sallusuissutaanerannik paasinnikkaangami ima nuannaartigisinnaasarpoq ilikkakkani nipangiusimasinnaanngingajattarlugit. Imaassinnaavoq taassuma ilaquttami ingerlaannaq Jehovamut kiffartorusulernissaat naatsorsuutigigaa, ilaqutaali isumaqataanngissinnaapput. Jasonip angorniornera nulianut aallaqqaammut qanoq sunniuteqarpa? Nulia oqarpoq misigisarluni allamik eqqartugaqarneq ajortoq. Arnaq alla ukiut 18-it uimi nalunaajaasunngornerata kingorna nalunaajaasunngortoq oqarpoq kigaatsumik sallusuissut pillugu ilinniartariaqarsimalluni. Illit sallusuissummik soqutiginninngitsumik aappalimmik atuaqqissaaqatigisartagaqaruit, pitsaassaaq taanna sungiusaqatigisarukku sallusuissut pillugu periaaserilluni aapparminut nassuiaasarsinnaaqqullugu. Mosesi ima oqarpoq: “Ajoqersuussutikka nakkaalit sialuttut; oqaatsikka siammaallit kanertut, . . . sialuit kuseriarnerisut ivikkani.” (5 Mosesi 32:2) Soorlu kuseriarninnguit sialussuarminngarnit sallaannerusartut, taamatuttaaq sallusuissut pillugu oqaatsit ikittunnguit piffissaq eqqorlugu oqaatigineqartut oqaaserpassuarninngarnit sunniuteqarnerusarput.

10-12. (a) Apustilip Petrusip Jehovamut kiffartunngitsunik aappallit qanoq siunnersorpai? (b) Biibilimik atuaqqissaaqatigineqartartup Petrusip allagaasa aappaanni 3:1, 2-mi siunnersuutigineqartut qanoq ililluni malittalerpai?

 ¹⁰ Apustili Petrusi isumassarsisitaalluni nuliaasunik kristumiunik allamik upperisalinnik aappalinnik siunnersuivoq. Ima allappoq: “Uissinnut naalatsigitissaasi, uiusut ilaat oqaatsimut naalasseriikkaluartut oqaluffigineqanngikkaluarlutik nuliamilli inuusaasiatigut ilanngussinnaaqqullugit Guutimik mianerinnillusi inuunersi minguitsoq takulerunikku.” (1 Petrusi 3:1, 2) Nuliaasup uiminit sakkortuumik pineqartaraluarluni maniguunnermigut uiminillu ataqqinningaarnermigut uini ilataarisinnaavaa. Aamma uiusoq nuliaminit sallusuissummut tunngatillugu akerlilersorneqartoq Guutip piumasaatut pissusilersortariaqarpoq ilaqutariinnilu ittuusutut asannittuusariaqarluni. — 1 Petrusi 3:7-9.

¹¹ Ullumikkut kristumiorpassuit Petrusip siunnersuutaanik malinninnertik iluaqutigisimavaat. Selmap misigisimasai eqqarsaatigeriakkit. Taanna Jehovap Nalunaajaasuinit atuaqqissaaqatigineqartalermat uiata, Stevep, tamanna iluarinngilaa. Steve oqaluttuarpoq kamalertarlunilu sinngalertarlunilu annilaangalertarluni. Selma oqaluttuarpoq sallusuissummik paasinninngikkallarlunili uini inooqatigiuminaassimasoq. Ima oqaluttuarpoq: “Uiga puffajasuuvoq, Biibilimillu atuaqqissaaqatigineqartalerama suli kamaammianerulerpoq.” Suut pissutsinik iluaallatsitsippat?

¹² Selmap nalunaajaasumit imminik atuaqqissaaqatiginnittartumit ilikkakkani eqqaamavai. Ima oqarpoq: “Ullut ilaanni Biibilimik atuaqqissaartarunnaarusulerpunga. Ippassaammat oqqakkatta Steve kamattorujussuanngorpoq, aliasulerpungalu imminullu nalligalunga. Susoqarsimaneranik qanorlu misigisimaninnik oqaluttuutereeranni qatanngutip arnap qinnuigaanga Korinthimiunut allakkat siulliit 13:4-7-imi allassimasut atuaqqullugit. Atuareerakkit akerliliivunga oqarlunga Stevep uanga taamatut asannittuliorfigineq ajoraanga. Qatanngutilli arnap allatut eqqarsartilerpaanga aperalunga tassani allassimasutut uiga asannittuliorfigisarneriga. Inooqatigiuminaammat taamaaliortannginnerarpunga. Taava qatanngutip arnap saamasumik ima aperaanga: ‘Selma, kina arlarsi kristumiuuniarsariva? Illit Steveluunniit?’” Selmap paasilerpaa eqqarsartaatsini allanngortittariaqarlugu. Ima oqarpoq: “Jehova qinnuigaara Stevemut asanninnerusinnaanissannut ikioqqullunga. Taava pissutsit allanngoriartorusaalerput.” Ukiut 17-it qaangiummata Steve Jehovamut kiffartortunngorpoq.

ALLAT QANOQ IKIUISINNAASUT

13, 14. Inoqutigiit upperisaqaqatigiinngitsut ikiorniarlugit susinnaavugut?

¹³ Soorlu sialuit kuseriarneri sallaatsut issumik isugutsertitsisartut naasunillu naalersitsisartut, taamatuttaaq ilagiinniittugut tamatta  immikkut inoqutigiinni upperisaqaqatigiinngitsuniittut nuannaarnissaannut ikiorsinnaavavut. Elvina Brasiliamiittoq ima oqarpoq: “Qatanngutit asanninnerat sallusuissummi aalajaattuarnissannut iluaqutigaara.”

¹⁴ Jehovamut kiffartunngitsut qatanngutinit ilagiinniittunit inussiarnisaarfigineqarlutillu soqutigineqarnertik uummatimikkut killinneqaatigisinnaavaat. Qatanngut angut Nigeriamiittoq ukiut 13-it nuliami nalunaajaasunngornerata kingorna nalunaajaasunngortoq ima oqarpoq: “Nalunaajaasorlu angalaqatigiitsilluta biilia ajortippoq. Taassuma uppeqatini nunaqarfimmi qanittumiittut attavigai, taakkualu unnuiffissarsivaatigut. Ilisarisimalluakkamittut pilluta isumagaatigut. Kristumiutut asaqatigiinneq nuliama eqqartortuaannarsimasaa ingerlaannaq misigaara.” Tuluit Nunaanni qatanngut arnaq ukiut 18-it uimi nalunaajaasunngornerata kingorna nalunaajaasunngortoq ima oqaluttuarpoq: “Nalunaajaasut marluutilluta neriartoqqusarpaatigut. Tikilluaqqusaasutut misigiuaannarpunga.” Angut aamma Tuluit Nunaanneersoq naggataatigut nalunaajaasunngortoq ima oqarpoq: “Qatanngutit pulaarlutaluunniit qaaqqusarpaatigut, paasivaralu isumassuisuusut. Tamanna ingammik misigaara napparsimmavimmiikkama pulaartorpassuaqarama.” Illit ilaqutaasut Jehovamut kiffartortuunngitsut soqutiginninnermik ersersitsivigisinnaavigit?

15, 16. Ilaquttat sallusuissummik soqutiginnilinngippata nuannaartuarnissamut suut iluaqutaasinnaappat?

¹⁵ Soorunami ukiorpassuarni eqqortumik ilioraluartugut periaaserillutalu nalunaajaagaluartugut ilaqutaasut tamarmiunngitsoq Jehovamut kiffartortunngortarput. Ilaat soqutiginninngittuartarput sakkortuumilluunniit akerlilersuiuarlutik. (Matthæusi 10:35-37) Kristumiutulli pissuserineqartussanik ersersitsisarnerput kinguneqarluartupilussuusinnaavoq. Uiusoq naggataatigut aatsaat nalunaajaasunngortoq oqarpoq aappaasup kristumiutut pissuserineqartussanik nuannersunik ersersitsisarnera taassuma aappaata isumaanut uummataanullu qanoq sunniuteqarsinnaanersoq nalunartaqisoq. Taamaammat Jehovamut kiffartortuunngitsunik aappallit ima kajumissaarpai: “Neriuutaaruteqinasi.”

¹⁶ Jehovamut kiffartunngitsunik ilaqutaqaraluaraanniluunniit nuannaartuartoqarsinnaavoq. Qatanngut arnaq ukiuni 21-ni uiminut nalunaajaaniartuaraluarsimasoq oqarpoq nuannaartuarsinnaasimalluni Jehovamit iluarisaaniartarnermigut taassumunngalu attaveqarluarnissaminik sulissuteqartarnermigut. Anersaakkut sammisassanik — nammineq atuaqqissaarnermik, ataatsimiigiartarnermik, oqaluussinermik ilagiinniittunillu ikiuinermik — ulapputeqartarnerarpoq, tamannalu Jehovamut qaninnerusutut misigilissutigisimavaa aalajaattuarnissaminullu iluaqutigisimallugu. — Ussatit 4:23.

NERIUUTAARUTEQINAK!

17, 18. Kristumiup inoqutigiinni upperisaqaqatigiinngitsuniittup neriuutaarutinnginnissaminut suna iluaqutigisinnaavaa?

¹⁷ Kristumiuuguit aalajaatsoq inoqutigiinnilu upperisaqaqatigiinngitsuniillutit, taava neriuutaaruteqinak. Eqqaamajuk Jehovap innuttani qimaannarnavianngikkai. (1 Samueli 12:22) Taassuma najortuassavaatit qaninniartuarunni. (Atuaruk 2 Nalunaarsuutit 15:2). Taamaammat Jehova pillugu misissuisarneq nuannaarutigisaruk, taannalu “tatigiuk”. (Tussiaat 37:4, 5) ‘Qinuninni qasusuigit’, aamma upperiuk Ataatatta qilammiusup asannittup ajornartorsiutit suulluunniit naammagalugit atornissaannut ikiorsinnaagaatit. — Romamiut 12:12.

¹⁸ Jehova qinnuigisaruk anersaaminik illernartumik ikioqqullutit ilaquttannik eqqisseqateqarnissannut. (Hebræerit 12:14) Taama iliortaruit ilaquttannut sallusuissummiinngitsunut sunniuteqarluarsinnaassaatit. Nuannaassaatit qamuunalu eqqissisimallutit ‘qanorluunniit ilioraangavit taamaaliortaruit Guutip ataqqinaatissaanik’. (1 Korinthimiut 10:31) Aamma qularutiginngilluinnarsinnaavat qatanngutit ilagiinniittut asannittumik ilinnik tapersersuinissaat.

[Quppernerup ataani ilanngussat]

[Atuaqqissaarnermi apeqqutit]

[Qupp. 30-mi assiliartaq]

Piffissakkut naleqquttukkut upperisannik nassuiaasarit

[Qupp. 31-mi assiliartaq]

Aappaasunik Jehovamut kiffartortuunngitsunik isumassuisarit