មានសុភមង្គលទោះជាមិនមានជំនឿដូចគ្នានៅក្នុងគ្រួសារ
មានសុភមង្គលទោះជាមិនមានជំនឿដូចគ្នានៅក្នុងគ្រួសារ
«អ្នកប្រហែលជានឹងសង្គ្រោះ [ប្ដីឬប្រពន្ធរបស់អ្នក]ក៏មិនដឹង»។—១កូ. ៧:១៦
តើអ្នកអាចរកចម្លើយឃើញឬទេ?
តើអ្នកជឿអាចធ្វើយ៉ាងណាដើម្បីឲ្យមានសន្ដិភាពក្នុងរង្វង់គ្រួសារដែលមិនមានជំនឿដូចគ្នា?
តើគ្រិស្តសាសនិកម្នាក់អាចជួយសមាជិកគ្រួសារដែលមិនមែនជាអ្នកជឿឲ្យទទួលយកការគោរពប្រណិប័តន៍ពិតយ៉ាងដូចម្ដេច?
តើបងប្អូនឯទៀតអាចធ្វើអ្វីខ្លះដើម្បីជួយបងប្អូនរួមជំនឿដែលមានក្រុមគ្រួសារមិនមែនជាអ្នកជឿ?
១. ពេលមនុស្សម្នាក់ស្ដាប់តាមដំណឹងអំពីរាជាណាចក្រ តើនេះជះឥទ្ធិពលយ៉ាងណាទៅលើក្រុមគ្រួសាររបស់គាត់?
នៅពេលមួយ លោកយេស៊ូបានចាត់សាវ័ករបស់លោកឲ្យទៅដោយមានប្រសាសន៍ថា៖ «កាលដែលអ្នករាល់គ្នាធ្វើដំណើរទៅ ចូរផ្សព្វផ្សាយថា៖ ‹រាជាណាចក្រស្ថានសួគ៌គឺជិតដល់ហើយ›»។ (ម៉ាថ. ១០:១, ៧) ដំណឹងល្អនេះនឹងនាំឲ្យមានភាពសុខសាន្ត និងសុភមង្គលដល់អស់អ្នកដែលស្ដាប់តាមដោយឲ្យតម្លៃចំពោះដំណឹងល្អនោះ។ ទោះជាយ៉ាងនេះក៏ដោយ លោកយេស៊ូបានព្រមានពួកសាវ័ករបស់លោកថា មនុស្សជាច្រើននឹងប្រឆាំងចំពោះកិច្ចការផ្សព្វផ្សាយរបស់ពួកគេ។ (ម៉ាថ. ១០:១៦-២៣) ពេលសមាជិកគ្រួសារបដិសេធដំណឹងអំពីរាជាណាចក្រ នេះជាការប្រឆាំងមួយប្រភេទដែលធ្វើឲ្យយើងឈឺចាប់។—សូមអាន ម៉ាថាយ ១០:៣៤-៣៦
២. ហេតុអ្វីគ្រិស្តសាសនិកដែលនៅក្នុងក្រុមគ្រួសារដែលមិនមានជំនឿដូចគ្នាអាចមានសុភមង្គលបាន?
២ តើនេះមានន័យថាពួកអ្នកដែលកាន់តាមលោកយេស៊ូនឹងមិនអាចមានសុភមង្គលពេលដែលរស់នៅក្នុងរង្វង់គ្រួសារដែលមិនមានជំនឿដូចគ្នាឬ? មិនមែនទេ! ទោះជាក្រុមគ្រួសារអាចប្រឆាំងយើងខ្លាំងក៏ដោយ មិនមែនក្រុមគ្រួសារទាំងអស់ធ្វើដូច្នេះទេ ហើយការប្រឆាំងនោះក៏មិនតែងតែមានរហូតដែរ។ ភាគច្រើន នោះអាស្រ័យទៅលើប្រតិកម្មរបស់អ្នកជឿចំពោះការប្រឆាំងឬការមិនមានចំណាប់អារម្មណ៍របស់ក្រុមគ្រួសារ។ បន្ថែមទៅទៀត ព្រះយេហូវ៉ាឲ្យពរដល់ពួកអ្នកដែលនៅស្មោះត្រង់ចំពោះលោក ដោយធ្វើឲ្យពួកគេមានសុភមង្គលសូម្បីតែមានកាលៈទេសៈពិបាកក្ដី។ អ្នកជឿអាចធ្វើឲ្យខ្លួនមានសុភមង្គលច្រើនជាងដោយ (១) ព្យាយាមធ្វើឲ្យមានសេចក្ដីសុខសាន្តនៅក្នុងក្រុមគ្រួសារ និង(២) ខំអស់ពីចិត្តជួយសមាជិកគ្រួសារដែលមិនមែនជាអ្នកជឿឲ្យទទួលយកការគោរពប្រណិប័តន៍ពិត។
ព្យាយាមធ្វើឲ្យមានសន្ដិភាពនៅក្នុងក្រុមគ្រួសារ
៣. ហេតុអ្វីគ្រិស្តសាសនិកម្នាក់ដែលក្រុមគ្រួសារមិនមានជំនឿដូចគ្នាគួរព្យាយាមធ្វើឲ្យមានសន្ដិភាព?
៣ ដើម្បីឲ្យមានផលនៃសេចក្ដីសុចរិតនៅក្នុងក្រុមគ្រួសារ យើងត្រូវព្យាយាមធ្វើឲ្យមានស្ថានភាពដែលមានសន្ដិភាព។ (សូមអាន យ៉ាកុប ៣:១៨) ទោះជាក្រុមគ្រួសាររបស់គ្រិស្តសាសនិកម្នាក់មិនមានជំនឿដូចគ្នាក្នុងការគោរពប្រណិប័តន៍ពិតក៏ដោយ គាត់ត្រូវព្យាយាមយ៉ាងខ្លាំងដើម្បីធ្វើឲ្យមានសន្ដិភាពនៅក្នុងរង្វង់គ្រួសារ។ តើយើងអាចធ្វើដូច្នេះយ៉ាងដូចម្ដេច?
៤. តើគ្រិស្តសាសនិកអាចរក្សាឲ្យមានសេចក្ដីសុខសាន្តក្នុងចិត្តតាមវិធីណាខ្លះ?
៤ គ្រិស្តសាសនិកត្រូវរក្សាឲ្យមានសេចក្ដីសុខសាន្តនៅក្នុងចិត្ត។ នេះតម្រូវឲ្យយើងអធិដ្ឋានអស់ពីចិត្តដែលអាចនាំឲ្យយើងទទួល«សេចក្ដីសុខសាន្តរបស់ព្រះ»ដែលហួសពីការនឹកស្មាន។ (ភី. ៤:៦, ៧) ចំណេះអំពីព្រះយេហូវ៉ា និងការធ្វើតាមគោលការណ៍ក្នុងគម្ពីរនាំឲ្យមានសុភមង្គលនិងសេចក្ដីសុខសាន្ត។ (អេ. ៥៤:១៣) បើយើងចង់មានសេចក្ដីសុខសាន្តនិងសុភមង្គល យើងត្រូវចូលរួមកិច្ចប្រជុំរបស់ក្រុមជំនុំ និងផ្សព្វផ្សាយដោយចិត្តខ្នះខ្នែង។ តាមធម្មតា គ្រិស្តសាសនិកដែលមានក្រុមគ្រួសារមិនជឿនៅតែអាចចូលរួមក្នុងសកម្មភាពរបស់គ្រិស្តសាសនិកតាមវិធីណាមួយ។ ជាឧទាហរណ៍ បងស្រីអេនហ្សា *ដែលមានប្ដីប្រឆាំងដោយប្រើអំពើហិង្សា។ នាងចូលរួមក្នុងកិច្ចការបង្រៀនមនុស្សបានក្រោយពីបំពេញភារកិច្ចក្នុងផ្ទះហើយ។ អេនហ្សាបានពោលថា៖ «ព្រះយេហូវ៉ាឲ្យពរដល់ខ្ញុំយ៉ាងច្រើនដោយធ្វើឲ្យមានលទ្ធផលល្អរាល់ដង ពេលដែលខ្ញុំព្យាយាមផ្សព្វផ្សាយដំណឹងល្អដល់មនុស្សឯទៀត»។ ពរទាំងនោះប្រាកដជាធ្វើឲ្យមានសេចក្ដីសុខសាន្ត ការចេះស្កប់ចិត្ត និងសុភមង្គល។
៥. តើមានបញ្ហាអ្វីដែលគ្រិស្តសាសនិកច្រើនតែជួបប្រទះក្នុងក្រុមគ្រួសារដែលមិនមានជំនឿដូចគ្នា? ហើយតើអ្វីអាចជួយពួកគេបាន?
៥ យើងត្រូវព្យាយាមយ៉ាងខ្លាំងដើម្បីធ្វើឲ្យមានសន្ដិភាពជាមួយនឹងសមាជិកក្រុមគ្រួសារដែលមិនមានជំនឿដូចយើង។ ការធ្វើដូច្នេះអាចជាការពិបាកមួយ ពីព្រោះអ្វីដែលពួកគេចង់ឲ្យយើងធ្វើជួនកាលប្រឆាំងនឹងគោលការណ៍ក្នុងគម្ពីរ។ ការកាន់ជំហរដើម្បីធ្វើតាមគោលការណ៍ដ៏ត្រឹមត្រូវអាចធ្វើឲ្យសមាជិកគ្រួសារដែលមិនជឿខឹង ប៉ុន្តែការធ្វើដូច្នេះនាំឲ្យមានសន្ដិភាពនៅពេលខាងមុខ។ ពិតមែនហើយ យើងចង់ធ្វើអស់ពីសមត្ថភាពដើម្បីសហការគ្នាជាមួយក្រុមគ្រួសាររបស់យើង ពេលដែលអ្វីៗទាំងនោះមិនបំពានគោលការណ៍ក្នុងគម្ពីរ។ បើធ្វើដូច្នេះ នោះអាចការពារយើងកុំឲ្យមានរឿងល្អក់កករនឹងគ្នាដោយមិនចាំបាច់។ (សូមអាន សុភាសិត ១៦:៧) ពេលប្រឈមមុខនឹងបញ្ហា ជាការសំខាន់ឲ្យយើងស្វែងរកឱវាទគម្ពីរពីពួកអ្នកចាស់ទុំនិងពីសៀវភៅនានារបស់ក្រុមខ្ញុំបម្រើដ៏ស្មោះត្រង់ហើយចេះពិចារណា។—សុភ. ១១:១៤
៦, ៧. (ក) ហេតុអ្វីអ្នកខ្លះប្រឆាំងសមាជិកក្រុមគ្រួសារដែលចាប់ផ្ដើមរៀនគម្ពីរជាមួយនឹងសាក្សីព្រះយេហូវ៉ា? (ខ) តើសិស្សគម្ពីរឬសាក្សីម្នាក់គួរប្រព្រឹត្តយ៉ាងណាចំពោះគ្រួសារដែលប្រឆាំង?
៦ បើយើងចង់ព្យាយាមធ្វើឲ្យមានសន្ដិភាពក្នុងក្រុមគ្រួសារ យើងត្រូវទុកចិត្តទៅលើព្រះយេហូវ៉ា និងស្គាល់អារម្មណ៍របស់សមាជិកគ្រួសារដែលមិនជឿនោះឲ្យបានច្បាស់។ (សុភ. ១៦:២០) សូម្បីតែសិស្សគម្ពីរថ្មីក៏អាចបង្ហាញការយោគយល់ស្តីអំពីរឿងនេះដែរ។ ប្ដីឬប្រពន្ធដែលមិនជឿប្រហែលជាមិនជំទាស់ក្នុងការឲ្យគូរបស់ពួកគេរៀនគម្ពីរនោះទេ។ ពួកគេថែមទាំងអាចយល់ទៀតថា ការសិក្សានេះអាចផ្ដល់ផលល្អដល់ក្រុមគ្រួសារ។ ក៏ប៉ុន្តែ អ្នកឯទៀតប្រហែលជាបង្ហាញការមិនពេញចិត្ត។ អេសធើរ ឥឡូវនាងជាសាក្សីព្រះយេហូវ៉ាបានប្រាប់ថា ពេលប្ដីរបស់គាត់ចាប់ផ្ដើមរៀនគម្ពីរជាមួយសាក្សីព្រះយេហូវ៉ា នាងមានអារម្មណ៍«ខឹងតែមួយមុខគត់»។ នាងបានរៀបរាប់ថា៖ «ខ្ញុំបានបោះសៀវភៅរបស់គាត់ចោល ឬដុតវាចោល»។ ហាវ៉ដដែលពីមុនបានប្រឆាំងប្រពន្ធរបស់គាត់មិនឲ្យរៀនគម្ពីរបានបញ្ជាក់ថា៖ «ប្ដីជាច្រើនខ្លាចប្រពន្ធរបស់គាត់ត្រូវគេបោកឲ្យចូលរួមក្នុងនិកាយសាសនាមួយ។ ប្ដីខ្លាចប្រពន្ធមានគ្រោះថ្នាក់ ដូច្នេះគាត់អាចចាប់ផ្ដើមប្រឆាំង ដោយសារគាត់មិនដឹងថាត្រូវធ្វើយ៉ាងណាចំពោះរឿងនេះ»។
៧ យើងគួរជួយសិស្សគម្ពីរដែលមានប្ដីឬប្រពន្ធប្រឆាំងឲ្យឃើញថាគាត់មិនចាំបាច់ឈប់រៀនគម្ពីរនោះទេ។ ច្រើនដង គាត់នឹងអាចដោះស្រាយបញ្ហាបាន ដោយមានចិត្តស្លូតបូតនិងបង្ហាញការគោរពដ៏ជ្រាលជ្រៅចំពោះគូដែលមិនមែនជាអ្នកជឿ។ (១ពេ. ៣:១៥) ហាវ៉ដបានពោលថា៖ «ខ្ញុំមានអំណរគុណណាស់ដែលប្រពន្ធរបស់ខ្ញុំមានចិត្តស្ងប់ និងមិនច្រឡោតខឹង!»។ ប្រពន្ធរបស់គាត់បានរៀបរាប់ថា៖ «ហាវ៉ដបានបង្គាប់ខ្ញុំមិនឲ្យរៀនគម្ពីរទៀត។ គាត់បាននិយាយថា ខ្ញុំត្រូវគេបង្វិលខួរហើយ។ ជាជាងឈ្លោះគ្នា ខ្ញុំបាននិយាយថា អ្វីដែលគាត់និយាយអាចត្រូវដែរ ប៉ុន្តែខ្ញុំពិតជាមិនអាចយល់មូលហេតុដែលគាត់គិតដូច្នេះ។ ដូច្នេះ ខ្ញុំបានសុំគាត់ឲ្យអានសៀវភៅដែលខ្ញុំកំពុងសិក្សា។ គាត់បានធ្វើដូច្នេះមែន ហើយគាត់មិនអាចបដិសេធចំពោះអ្វីដែលខ្ញុំបានប្រាប់គាត់នោះទេ។ នេះបានមានឥទ្ធិពលយ៉ាងខ្លាំងទៅលើគាត់»។ ជាការល្អឲ្យយើងចាំថា ប្ដីឬប្រពន្ធដែលមិនជឿអាចមានអារម្មណ៍ឯកោ ឬក៏មានគំនិតថាចំណងអាពាហ៍ពិពាហ៍របស់ពួកគេកំពុងមានគ្រោះថ្នាក់ ពេលដែលគូរបស់ពួកគេទៅចូលរួមកិច្ចប្រជុំឬកិច្ចការផ្សព្វផ្សាយ។ ប៉ុន្តែ សិស្សគម្ពីរឬសាក្សីនោះអាចនិយាយដោយសប្បុរសនិងដោយបង្ហាញសេចក្ដីស្រឡាញ់ចំពោះគូរបស់ពួកគេ។ នេះនឹងជួយប្ដីឬប្រពន្ធនោះកុំឲ្យព្រួយបារម្ភ។
ជួយពួកគេឲ្យទទួលយកការគោរពប្រណិប័តន៍ពិត
៨. តើសាវ័កប៉ូលបានឲ្យឱវាទអ្វីចំពោះគ្រិស្តសាសនិកដែលមានគូមិនរួមជំនឿ?
៨ សាវ័កប៉ូលឲ្យឱវាទដល់គ្រិស្តសាសនិកថា កុំឲ្យពួកគេចុះចោលគូរបស់ខ្លួនដោយសារមិនមែនជាអ្នកជឿឡើយ។ * (សូមអាន កូរិនថូសទី១ ៧:១២-១៦) បើយើងចាំក្នុងចិត្តថាគូរបស់យើងដែលមិនមែនជាអ្នកជឿអាចមានលទ្ធភាពក្លាយទៅជាគ្រិស្តសាសនិកម្នាក់ នោះអាចជួយយើងឲ្យរក្សាសុភមង្គលបាន ទោះជាមិនមានជំនឿដូចគ្នាក្នុងរង្វង់គ្រួសារក៏ដោយ។ ប៉ុន្តែ ពេលដែលយើងចង់ប្រាប់សេចក្ដីពិតដល់គូដែលមិនជឿ យើងត្រូវប្រុងប្រយ័ត្នចំពោះចំណុចខ្លះៗដូចបទពិសោធន៍នៅខាងក្រោមនេះបានបង្ហាញ។
៩. ពេលយើងនិយាយអំពីសេចក្ដីពិតក្នុងគម្ពីរដល់សមាជិកគ្រួសារដែលមិនជឿ តើយើងត្រូវប្រុងប្រយ័ត្នអំពីអ្វី?
៩ ចេសិនបានប្រាប់អំពីអារម្មណ៍របស់គាត់ពេលគាត់រៀនសេចក្ដីពិតថា៖ «ខ្ញុំចង់ប្រាប់មនុស្សទាំងអស់ឲ្យបានដឹង!»។ ពេលសិស្សគម្ពីរម្នាក់ចាប់ផ្ដើមឲ្យតម្លៃចំពោះសេចក្ដីពិតដែលគាត់បានរៀនពីគម្ពីរ គាត់ប្រហែលជាសប្បាយចិត្តខ្លាំងរហូតដល់ចង់ប្រាប់អំពីសេចក្ដីពិតនោះស្ទើរតែគ្រប់ពេល។ គាត់ប្រហែលជាគិតថាសមាជិកគ្រួសារដែលមិនជឿទទួលយកដំណឹងអំពីរាជាណាចក្រភ្លាមៗ ប៉ុន្តែពួកគេអាចមិនពេញចិត្តចំពោះដំណឹងល្អនេះទេ។ តើការរំភើបចិត្តរបស់ចេសិនជះឥទ្ធិពលយ៉ាងណាទៅលើប្រពន្ធរបស់គាត់? នាងមានអារម្មណ៍ថាចេសិននិយាយអំពីសេចក្ដីពិតមិនចេះចប់មិនចេះហើយ។ ស្ត្រីម្នាក់ដែលបានទទួលសេចក្ដីពិត១៨ឆ្នាំក្រោយពីប្ដីរបស់នាងបានក្លាយទៅជាសាក្សីព្រះយេហូវ៉ា នាងបានពោលថា៖ «ខ្ញុំត្រូវរៀនគម្ពីរបន្ដិចម្ដងៗ»។ បើអ្នកកំពុងបង្រៀនសិស្សគម្ពីរម្នាក់ដែលមានប្ដីឬប្រពន្ធមិនមានបំណងចង់ចូលរួមក្នុងការគោរពប្រណិប័តន៍ពិត នោះជាការល្អឲ្យយើងហាត់របៀបនិយាយជាមួយសិស្សគម្ពីរ ដើម្បីឲ្យគាត់ចេះពន្យល់តាមរបៀបដែលមិនធ្វើឲ្យគូរបស់គាត់អន់ចិត្ត មែនទេ? ម៉ូសេបាននិយាយថា៖ «គោលលទ្ធិរបស់ខ្ញុំនឹងធ្លាក់មកដូចជាភ្លៀង ហើយពាក្យសំដីខ្ញុំនឹងចុះដូចជាទឹកសន្សើម គឺដូចជាភ្លៀងរលឹមមកលើស្មៅល្បាស់ខ្ចី»។ (ចោ. ៣២:២) ពាក្យខ្លះៗអំពីសេចក្ដីពិតដែលយើងនិយាយនៅពេលត្រឹមត្រូវដែលប្រៀបដូចជាភ្លៀងរលឹម ច្រើនតែមានប្រសិទ្ធភាពជាងការនិយាយច្រើនពេកដែលប្រៀបដូចជាទឹកជំនន់។
១០-១២. (ក) តើសាវ័កពេត្រុសបានឲ្យឱវាទអ្វីដល់គ្រិស្តសាសនិកដែលមានគូជាអ្នកមិនជឿ? (ខ) តើសិស្សគម្ពីរម្នាក់រៀនធ្វើតាមឱវាទដែលបានកត់ទុកនៅពេត្រុសទី១ ៣:១, ២យ៉ាងដូចម្ដេច?
១០ សាវ័កពេត្រុសបានឲ្យឱវាទចំពោះស្ត្រីគ្រិស្តសាសនិកដែលមានប្ដីជាអ្នកមិនជឿ។ គាត់បានសរសេរថា៖ «[ចូរ]ចុះចូលនឹងប្ដីខ្លួន ដើម្បីឲ្យប្ដីណាដែលមិនធ្វើតាមបណ្ដាំរបស់ព្រះ ក្លាយទៅជាអ្នកដែលធ្វើតាមវិញ តាមរយៈការប្រព្រឹត្តរបស់អ្នករាល់គ្នាដែលជាប្រពន្ធ ដោយមិនចាំបាច់ឲ្យអ្នករាល់គ្នាបញ្ចេញពាក្យសម្ដីមួយម៉ាត់ឡើយ ពីព្រោះពួកគេឃើញដោយផ្ទាល់ភ្នែកនូវការប្រព្រឹត្តដ៏បរិសុទ្ធរបស់អ្នករាល់គ្នា គួបផ្សំជាមួយនឹងការគោរពដ៏ជ្រាលជ្រៅ»។ (១ពេ. ៣:១, ២) ប្រពន្ធអាចធ្វើឲ្យប្ដីចូលរួមក្នុងការគោរពប្រណិប័តន៍ពិតដោយចុះចូលនិងបង្ហាញការគោរពដ៏ជ្រាលជ្រៅ ទោះជាគាត់ប្រព្រឹត្តយ៉ាងសាហាវមកលើនាងក៏ដោយ។ ស្រដៀងគ្នាដែរ ប្ដីដែលជាអ្នកជឿគួរប្រព្រឹត្តតាមរបៀបដែលព្រះពេញចិត្ត ហើយធ្វើជាមេគ្រួសារដែលបង្ហាញសេចក្ដីស្រឡាញ់ចំពោះក្រុមគ្រួសារ សូម្បីតែមានការប្រឆាំងពីប្រពន្ធដែលមិនជឿក៏ដោយ។—១ពេ. ៣:៧-៩
១១ សព្វថ្ងៃនេះ គំរូជាច្រើនបានបង្ហាញថាការធ្វើតាមឱវាទរបស់សាវ័កពេត្រុសពិតជាមានតម្លៃមែន។ សូមពិចារណាអំពីគំរូរបស់បងស្រីសេលម៉ា។ ពេលនាងចាប់ផ្ដើមរៀនគម្ពីរជាមួយនឹងសាក្សីព្រះយេហូវ៉ា ស្ទេវដែលជាប្ដីរបស់នាងមិនបានពេញចិត្តទេ។ គាត់បានរៀបរាប់ថា៖ «ខ្ញុំចាប់ផ្ដើមខឹង ប្រច័ណ្ឌ ចង់កាន់កាប់លើនាង ហើយក៏ព្រួយខ្លាចបាត់បង់នាងដែរ»។ សេលម៉ាបានបន្ថែមថា៖ «ទោះជាមុនខ្ញុំរៀនសេចក្ដីពិតក៏ដោយ ខ្ញុំត្រូវថ្នមចិត្តស្ទេវរហូត។ គាត់ឆាប់ខឹងណាស់។ ពេលដែលខ្ញុំចាប់ផ្ដើមរៀនគម្ពីរ គាត់ក៏រឹតតែឆាប់ខឹងជាងមុនទៅទៀត»។ តើអ្វីបានជួយនាង?
១២ សេលម៉ានឹកចាំអំពីមេរៀនមួយដែលនាងបានរៀនពីសាក្សីដែលបានបង្រៀននាង។ សេលម៉ាបាននិយាយថា៖ «នៅថ្ងៃមួយ ខ្ញុំមិនចង់រៀនគម្ពីរទៀតទេ។ នៅយប់មុននោះ ស្ទេវនិងខ្ញុំឈ្លោះគ្នា ហើយស្ទេវបានវាយខ្ញុំ។ ខ្ញុំមានអារម្មណ៍ក្រៀមក្រំហើយតូចចិត្តខ្លាំងណាស់។ ក្រោយពីខ្ញុំបានប្រាប់បងស្រីនោះអំពីអ្វីដែលបានកើតឡើង និងអំពីអារម្មណ៍របស់ខ្ញុំ គាត់ក៏សុំឲ្យខ្ញុំអានកូរិនថូសទី១ ១៣:៤-៧។ ពេលខ្ញុំអានហើយ ខ្ញុំចាប់ផ្ដើមគិតថា‹ស្ទេវមិនដែលបង្ហាញសេចក្ដីស្រឡាញ់បែបនេះចំពោះខ្ញុំទេ›។ ប៉ុន្តែបងស្រីនោះបានធ្វើឲ្យខ្ញុំផ្លាស់ប្ដូរគំនិតនោះដោយសួរខ្ញុំថា៖ ‹តើខ្ញុំបង្ហាញសេចក្ដីស្រឡាញ់ចំពោះប្ដីរបស់ខ្ញុំដោយការប្រព្រឹត្តអ្វីខ្លះ?›។ ចម្លើយរបស់ខ្ញុំគឺ‹គ្មានទេ ព្រោះគាត់ជាមនុស្សដែលពិបាករស់នៅជាមួយណាស់›។ បងស្រីនោះបាននិយាយដោយទន់ភ្លន់មកខ្ញុំថា៖ ‹សេលម៉ា ឥឡូវនេះ តើអ្នកណាកំពុងខំព្យាយាមធ្វើជាគ្រិស្តសាសនិក? អ្នកឬក៏ស្ទេវ?›។ ដោយខ្ញុំទទួលស្គាល់ថាខ្ញុំត្រូវកែប្រែរបៀបគិតគូររបស់ខ្ញុំ នោះខ្ញុំបានអធិដ្ឋានទៅព្រះយេហូវ៉ាដើម្បីជួយខ្ញុំឲ្យបង្ហាញសេចក្ដីស្រឡាញ់ច្រើនថែមទៀតចំពោះស្ទេវ។ បន្ដិចម្ដងៗ អ្វីៗចាប់ផ្ដើមផ្លាស់ប្ដូរ»។ ដប់ប្រាំពីរឆ្នាំក្រោយមក ស្ទេវបានទទួលយកសេចក្ដីពិត។
តើបងប្អូនឯទៀតក្នុងក្រុមជំនុំអាចជួយយ៉ាងដូចម្ដេច?
១៣, ១៤. តើបងប្អូនឯទៀតក្នុងក្រុមជំនុំអាចជួយពួកអ្នកដែលមានសមាជិកគ្រួសារដែលមិនមែនជាអ្នកជឿយ៉ាងដូចម្ដេច?
១៣ ដូចតំណក់ទឹកភ្លៀងតូចៗអាចធ្វើឲ្យដីសើម និងជួយឲ្យដំណាំដុះឡើង នោះបងប្អូនជាច្រើនក្នុងក្រុមជំនុំអាចជួយឲ្យគ្រិស្តសាសនិកមានសុភមង្គលទោះជាក្រុមគ្រួសារមិនមែនជាអ្នកជឿក៏ដោយ។ អេលវីណា ពីប្រទេសប្រេស៊ីលបានពោលថា៖ «សេចក្ដីស្រឡាញ់របស់បងប្អូនប្រុសស្រីបានជួយខ្ញុំឲ្យកាន់ជំហរមាំមួនក្នុងសេចក្ដីពិត»។
១៤ សេចក្ដីសប្បុរសនិងការយកចិត្តទុកដាក់របស់បងប្អូនក្នុងក្រុមជំនុំអាចមានឥទ្ធិពលទៅលើចិត្តរបស់សមាជិកគ្រួសារដែលមិនមានជំនឿដូចគ្នា។ នៅប្រទេសនីហ្សេរីយ៉ា បុរសម្នាក់ដែលបានទទួលយកសេចក្ដីពិត១៣ឆ្នាំក្រោយប្រពន្ធរបស់គាត់ជាសាក្សីព្រះយេហូវ៉ា គាត់បានរៀបរាប់ថា៖ «ពេលខ្ញុំធ្វើដំណើរជាមួយសាក្សីព្រះយេហូវ៉ាម្នាក់ យានជំនិះរបស់គាត់បានខូចតាមផ្លូវ។ គាត់បានស្វែងរកបងប្អូនដែលជាសាក្សីក្នុងភូមិមួយជិតនោះ ហើយពួកគេបានឲ្យកន្លែងដល់យើងស្នាក់នៅយប់នោះ។ ពួកគេថែរក្សាយើងដូចជាមនុស្សដែលបានស្គាល់គ្នាតាំងពីតូចមកម្ល៉េះ។ ភ្លាមៗនោះ ខ្ញុំមានអារម្មណ៍ថានេះជាសេចក្ដីស្រឡាញ់ដែលប្រពន្ធរបស់ខ្ញុំតែងតែនិយាយប្រាប់ខ្ញុំ»។ នៅប្រទេសអង់គ្លេស ស្ត្រីម្នាក់ដែលបានចូលសេចក្ដីពិត១៨ឆ្នាំក្រោយប្ដីរបស់នាងក្លាយជាសាក្សីព្រះយេហូវ៉ាបាននឹកចាំថា៖ «សាក្សីព្រះយេហូវ៉ាបានអញ្ជើញយើងទាំងពីរនាក់មកញ៉ាំបាយជាមួយគ្នា។ ខ្ញុំតែងតែមានអារម្មណ៍ថាពួកគេស្វាគមន៍ខ្ញុំជានិច្ច»។ * នៅប្រទេសនោះដែរ បុរសម្នាក់ដែលបានក្លាយទៅជាសាក្សីព្រះយេហូវ៉ាក្នុងពេលថ្មីៗនេះ បាននិយាយថា៖ «បងប្អូនប្រុសស្រីបានមកលេងយើង ឬក៏ពួកគេអញ្ជើញយើងទៅផ្ទះពួកគេ ហើយខ្ញុំមានអារម្មណ៍ថាពួកគេយកចិត្តទុកដាក់នឹងយើងណាស់។ ជាពិសេស នៅពេលដែលខ្ញុំចូលមន្ទីរពេទ្យ ហើយបងប្អូនជាច្រើនបានមកលេងសួរសុខទុក្ខខ្ញុំ»។ តើអ្នកអាចរកឱកាសដើម្បីបង្ហាញការយកចិត្តទុកដាក់ស្រដៀងគ្នានេះចំពោះសមាជិកគ្រួសារដែលមិនមែនជាអ្នកជឿឬទេ?
១៥, ១៦. ពេលសមាជិកឯទៀតក្នុងក្រុមគ្រួសារនៅតែមិនព្រមទទួលយកសេចក្ដីពិត តើអ្វីអាចជួយបុគ្គលដែលជាអ្នកជឿឲ្យនៅតែមានសុភមង្គល?
១៥ ពិតមែនហើយ មិនមែនប្ដីឬប្រពន្ធ កូនៗ ឪពុកម្ដាយ ឬញាតិសន្ដានទាំងអស់ដែលមិនមែនជាអ្នកជឿទទួលយកការគោរពប្រណិប័តន៍ពិតឡើយ ទោះជាអ្នកជឿនោះខំប្រព្រឹត្តយ៉ាងស្មោះត្រង់អស់ច្រើនឆ្នាំ ហើយផ្សព្វផ្សាយយ៉ាងប៉ិនប្រសប់ក៏ដោយ។ អ្នកខ្លះនៅតែគ្មានចំណាប់អារម្មណ៍ ឬនៅតែប្រឆាំងយ៉ាងខ្លាំងដដែល។ (ម៉ាថ. ១០:៣៥-៣៧) ក៏ប៉ុន្តែ ពេលគ្រិស្តសាសនិកបង្ហាញគុណសម្បត្ដិរបស់ព្រះ នេះអាចមានឥទ្ធិពលល្អណាស់។ បុរសម្នាក់ដែលធ្លាប់ជាអ្នកមិនជឿបានរៀបរាប់ថា៖ «ពេលគូដែលជាអ្នកជឿចាប់ផ្ដើមបណ្ដុះឲ្យមានគុណសម្បត្ដិដ៏គួរឲ្យស្រឡាញ់ អ្នកមិនដឹងថានឹងមានអ្វីកើតឡើងទៅលើចិត្តនិងគំនិតរបស់អ្នកដែលមិនជឿនោះទេ។ ដូច្នេះកុំចុះចាញ់និងកុំឈប់ព្យាយាមក្នុងការជួយគូរបស់អ្នកដែលមិនមែនជាអ្នកជឿ»។
១៦ ទោះជាសមាជិកក្រុមគ្រួសារនៅតែមិនព្រមទទួលយកសេចក្ដីពិត បុគ្គលដែលជាអ្នកជឿអាចមានសុភមង្គលបាន។ ទោះជាប្ដីរបស់បងស្រីម្នាក់មិនស្ដាប់តាមដំណឹងអំពីរាជាណាចក្រ ក្រោយពីនាងបានព្យាយាមអស់២១ឆ្នាំហើយក៏ដោយ បងស្រីនោះបាននិយាយថា៖ «ខ្ញុំអាចរក្សាឲ្យមានអំណរបាន ដោយព្យាយាមធ្វើឲ្យព្រះយេហូវ៉ាពេញចិត្ត ដោយរក្សាចិត្តស្មោះភក្ដីចំពោះលោក និងដោយព្យាយាមធ្វើឲ្យចំណងមិត្តភាពជាមួយនឹងព្រះយេហូវ៉ាកាន់តែរឹងមាំជាង។ ការជាប់រវល់ក្នុងសកម្មភាពផ្សេងៗ ដូចជាសិក្សាផ្ទាល់ខ្លួន ចូលរួមកិច្ចប្រជុំ ផ្សព្វផ្សាយ និងជួយអ្នកឯទៀតក្នុងក្រុមជំនុំ នេះបានជួយខ្ញុំឲ្យចូលទៅជិតព្រះយេហូវ៉ាជាងមុន ហើយបានរក្សាការពារចិត្តរបស់ខ្ញុំ»។—សុភ. ៤:២៣
កុំចុះចាញ់និងកុំឈប់ព្យាយាម!
១៧, ១៨. ទោះជាក្រុមគ្រួសារមិនមានជំនឿដូចគ្នា តើអ្នកជឿនៅតែមានសង្ឃឹមយ៉ាងដូចម្ដេច?
១៧ បើអ្នកជាគ្រិស្តសាសនិកស្មោះត្រង់ម្នាក់ដែលមានសមាជិកក្រុមគ្រួសារមិនមែនជាអ្នកជឿ សូមកុំចុះចាញ់និងកុំឈប់ព្យាយាម។ សូមចងចាំថា៖ «ព្រះយេហូវ៉ាទ្រង់មិនបោះបង់ចោលរាស្ត្រទ្រង់ឡើយ ដោយព្រោះទ្រង់យល់ដល់ព្រះនាមទ្រង់ដ៏ជាធំ»។ (១សាំ. ១២:២២) ព្រះយេហូវ៉ានៅជាមួយអ្នកដរាបណាអ្នកនៅជិតស្និទ្ធនឹងលោក។ (សូមអាន របាក្សត្រទី២ ១៥:២) ដូច្នេះ «ចូរយកព្រះយេហូវ៉ាជាសេចក្ដីអំណររបស់អ្នក»។ បន្ថែមទៅទៀត «ចូរទុកដាក់ផ្លូវអ្នកនឹងព្រះយេហូវ៉ាចុះ ថែមទាំងទុកចិត្តដល់ទ្រង់ផង»។ (ទំនុក. ៣៧:៤, ៥) ចូរឲ្យយើង«តស៊ូក្នុងការអធិដ្ឋាន» និងមានជំនឿថាបិតាជាទីស្រឡាញ់នៅស្ថានសួគ៌អាចជួយយើងឲ្យស៊ូទ្រាំនឹងទុក្ខលំបាកសព្វបែបយ៉ាង។—រ៉ូម ១២:១២
១៨ សូមសុំសកម្មពលបរិសុទ្ធរបស់ព្រះយេហូវ៉ាដើម្បីជួយយើងបង្កើតឲ្យមានសន្ដិភាពក្នុងរង្វង់គ្រួសារ។ (ហេ. ១២:១៤) ពិតមែនហើយ យើងអាចបណ្ដុះឲ្យមានស្ថានភាពសុខសាន្ត ដែលតាមមើលទៅនោះអាចមានឥទ្ធិពលទៅលើចិត្តរបស់សមាជិកគ្រួសារដែលមិនមែនជាអ្នកជឿ។ អ្នកនឹងមានសុភមង្គល និងសេចក្ដីសុខសាន្តក្នុងចិត្តនិងគំនិត កាលដែលអ្នក«ធ្វើអ្វីៗទាំងអស់ដើម្បីឲ្យព្រះទទួលការសរសើរតម្កើង»។ (១កូ. ១០:៣១) ស្តីអំពីការខំព្យាយាមនេះ ពេលដែលអ្នកដឹងថាអ្នកមានការគាំទ្រប្រកបដោយសេចក្ដីស្រឡាញ់ពីបងប្អូនប្រុសស្រីក្នុងក្រុមជំនុំគ្រិស្តសាសនិក នោះពិតជាធ្វើឲ្យអ្នកសប្បាយរីករាយមែន!
[កំណត់សម្គាល់]
^ វគ្គ 4 ឈ្មោះបានត្រូវផ្លាស់ប្ដូរ។
^ វគ្គ 8 ឱវាទរបស់ប៉ូលមិនសំដៅទៅលើការបែកលំនៅសង្វាសតាមច្បាប់ក្នុងស្ថានភាពដែលគូរបស់ខ្លួនធ្វើបាបយ៉ាងសាហាវនោះទេ។ នេះជាការសម្រេចចិត្តដ៏សំខាន់ដែលគ្រិស្តសាសនិកម្នាក់ត្រូវធ្វើដោយខ្លួនឯង។ សូមមើលសៀវភៅ«ចូររក្សាខ្លួនជាមនុស្សដែលព្រះស្រឡាញ់» ទំព័រ២២០-២២១ ជាភាសាអង់គ្លេស។
^ វគ្គ 14 បទគម្ពីរមិនបានហាមឃាត់ការបរិភោគអាហារជាមួយអ្នកដែលមិនជឿនោះទេ។—១កូ. ១០:២៧
[សំណួរសម្រាប់វគ្គនីមួយៗ]
[រូបភាពនៅទំព័រ២៨]
ជ្រើសរើសពេលដែលត្រឹមត្រូវដើម្បីពន្យល់អំពីជំនឿរបស់អ្នក
[រូបភាពនៅទំព័រ២៩]
ចូរបង្ហាញការយកចិត្តទុកដាក់ចំពោះប្ដីឬប្រពន្ធដែលមិនមែនជាអ្នកជឿ
