O Muiji ua Diuane mu Ubhezelu, u Tena ku Zediua
O Muiji ua Diuane mu Ubhezelu, u Tena ku Zediua
“Ua k’ijiia kiebhi se [kaza diê] u mu bhulula?”—1 KOL. 7:16.
U TENA KU SANGA O ITAMBUIJILU?
Ihi i tena ku bhanga o jikidistá ala ni muiji ua diuane mu ubhezelu, phala ku tululuka kubhata?
Kiebhi o Kidistá kia tena ku kuatekesa ndandu iê ku xikina o ubhezelu ua kidi?
Ihi i tena ku bhanga o jiphange phala ku kuatekesa phange uala ni muiji ki uala mu ubhezelu?
1. Mabesá ahi a tena ku tambula o muiji u xikana o njimbu ia Utuminu?
SAÍ kizuua, kioso Jezú kia tumikisa o jipoxolo jê, muéne uambe: ‘O ki muia, muenda ni ku boka, kuila: ‘O utuminu ua Diulu ua zukama.’’ (Mat. 10:1, 7) O njimbu íii, ieji zediuisa ió eji ku i xikana. Maji Jezú ua dimuna o jipoxolo jê kuila, athu avulu keji mesena kuívua o njimbu ia Utuminu. (Mat. 10:16-23) Ki bhonza kiavulu se o jindandu jetu ka xikina o njimbu ia Utuminu.—Tanga Matesu 10:34-36.
2. Mukonda diahi o kidistá ua diuane ni muiji mu ubhezelu, u u tena ku zediua?
2 O kuila kiki kilombolola kuila o akaiedi a Kristu, ala ni muiji ua diuane mu ubhezelu, ka tena ku zediua? Kana! Sumbala o muiji u tena ku tu zukutisa kiavulu, maji kiki ki kiene mu bhita ku miji ioso. O izukutisu iene mu moneka ku muiji ki iene mu nangenena. Maji o ukexilu ua jikidistá ku dibhana ni kizukutisu, kiene kia-nda londekesa se o kizukutisu ki nangenena, mba kana. Jihova u besoala oso a mu bheza ni kidi, u a zediuisa, sumbala ni jiphaxi. O jikidistá a tena ku sanguluka (1) mu ku sota o ku tululuka mu dibhata (2) mu ku a kuatekesa ku xikina o ubhezelu ua kidi.
SOTA O KU TULULUKA KU DIBHATA
3. Mukonda diahi o kidistá ua diuane ni muiji mu ubhezelu ua tokala ku sota o ku tululuka?
3 O ima iambote i tu bhanga i tena ku bheka ku tululuka ku muiji. (Tanga Tiiaku 3:18.) Né muene se o muiji ua kidistá ki uala kumoxi mu ubhezelu muéne ua tokala ku suína phala ku kala ni ku tululuka kubhata. Kiebhi kia tena ku bhanga kiki?
4. O Jikidistá a tena kiebhi ku kala ni ku tululuka ku muxima?
4 O Jikidistá a tokala ku kala ni ku tululuka kua muxima. Ku bhinga ku samba ni muxima uoso, phala ku tu bhana “o kutululuka kua Nzambi.” (Fil. 4:6, 7) O ku zediua kuijila mu kuijiia Jihova, ni ku kumbidila o itumu ia Bibidia ku muenhu uetu. (Iza. 54:13) O kuia mu iônge, ni mu sidivisu ia kuboka, kima kia bhingi, se tua mesena ku zediua ni ku tululuka. O Kidistá ua diuane ni muiji mu ubhezelu, u tena ku bhanga ikalakalu mu kilunga. Xinganeka o phangu ia Enza, * o muadi uê, uene mu ku mu zukutisa. Muéne uia mu boka kioso kia zubha ku bhanga o ikalakalu kubhata. Enza uambe: “Jihova ua ngi besoala kiavulu, ni ima iambote, ithangana ioso ki ngi di suínisa phala ku bokela akuetu o njimbu iambote.” O mabesá enhá a bheka ku zediua, ni ku tululuka.
5. Ibhidi iahi i bhita na-iu o kidistá, dia diuane ni muiji mu ubhezelu, ni kikuatekesu kiahi kia tena ku tambula?
5 Tua bhingi tu suína phala ku kala ni ku tululuka ni muiji uetu ua diuane mu ubhezelu. Kiki ki bhonza, mukonda saí ima ia mesena kuila tu i bhanga, i tena ku tu bhangesa ku bhukumukina o itumu ia Bibidia. O ku kolokota mu ku belesela o itumu, ku tena ku bhekela njinda ku muiji uetu, maji se tu belesela o itumu, ku bheka ku tululuka ku hádia. Tuejiia kuila se tu jijila ku dituna ku bhanga kima ka ki fidisa mu Bibidia, ki tena ku bhekela maka ku muiji. (Tanga Jisabhu 16:7.) Kioso ki tu dibhana ni maka a bhonzo, kima kiambote ku sota milongi ia Bibidia, mu madivulu a kibuka kia kimbadi kia fiiele, ni ku tufunga mu kilunga.—Jisa. 11:14.
6, 7. (a) Mukonda diahi saí athu ka uabhela kuila o muiji uê a di longa ni Jimbangi ja Jihova? (b) Ihi ia tokala o ku bhanga o dixibulu ua mu di longa o Bibidia, mba Kidistá, se a mu zukutisa ku muiji uê?
6 Phala ku tululuka kubhata ku bhinga, ku dielela kua Jihova ni ku tongolola o ibanzelu ia ndandu ietu ki mubhezi ua Jihova. (Jisa. 16:20) Né muene o maxibulu a mu di longa kindala a tena ué ku kala ni unjimu mu maka enhá. Saí mala, mba ahatu ka bheza Jihova, kene mu zukutisa o makaz’â a mu di longa o Bibidia. Ene a xikina kuila kima kiambote phala o muiji uâ. Maji saí iá a a zukutisa. Ester, mbangi ia Jihova, u tanga kuila ua kexile “ni njinda” kioso muadi uê kia mateka ku di longa o Bibidia, ni Jimbangi ja Jihova. Muéne uambe; “Eme nga texi o madivulu mê, nga oha.” Howard ua mateka ué ku zukutisa o muhatu uê ua kexile mu di longa, uambe: “Saí mala a kala ni uôma, a banza kuila o ahatu’â, a mu ku a nganala, mu ku di ta ni ibuka ia ngeleja. O diiala nange kejiia kiebhi kia dibhana ni maka enhá, mukonda dia kiki muéne u mesena ku fidisa o muhatu.”
7 O dixibulu u kala ni dikaza di mu zukutisa a tokala ku mu kuatekesa kuijiia kuila, muéne ka tokala kueha o ku di longa o Bibidia. Muéne u tena ku batula o maka, se muéne u tululuka, ni ku xila kaza diê. (1 Phe. 3:15) Howard uambe: “Nga sakidila o muhatu’ami mukonda dia ku tululuka kuê, ni ku kamba kueha o ku di longa!” O muhatu uambe: “Howard ua ngi tumina kueha o ku di longa o Bibidia. Muéne uambe kuila akexile mu ngi nganala. Eme ki ngi zoko nê, nga mu ambela kuila, nange muéne ua lungu, nga mu ambela ué kuila, eme ki ngejiia kiebhi kia mu ngi nganala. Kienhiki nga mu bhingi phala muéne ku tanga o divulu di nga kexile mu tanga. Muéne ua di tange, kia zubha ku tanga ua mono kuila, ki iene ia kexile mu banza. Kiki kia mu bhangesa ku lungulula o ibanzelu iê.” Tua tokala kuijiia kuila, o dikaza ki mubhezi ua Jihova, u divua kuila o kaza diê ua mu mu xisa ubheka, mba u kala ni uôma kioso o kaza diê kiaia mu bhanga ikalakalu mu kilunga, maji o henda ia kaza diê, i tena ku mu tululukisa.
MU A KUATEKESA KU XIKINA O UBHEZELU UA KIDI
8. Kitendelesu kiahi kia bhana poxolo Phaulu ku Jikidistá ala ni makaza ki abhezi a Jihova?
8 O poxolo Phaulu ua tendelesa o Jikidistá kuila ka tokala ku di xisa ni makaza mâ, mukonda ki abhezi a Jihova. * (Tanga 1 Kolindo 7:12-16.) O kuijiia kuila o dikaza ki kidistá, u tena ku kala kidistá, ku tena ku kuatekesa o kidistá ku zediua sumbala o kaza diê ki mubhezi ua Jihova. O ku kuatekesa kaza dietu ki mubhezi ua Jihova, ku bhinga ku dilanga, o misoso ia jiphange jetu ja londekesa kiebhi ki tu tena ku bhanga kiki.
9. Kioso ki tu longa muthu ua diuane ni muiji mu ubhezelu, mukonda diahi tua tokala ku di langa?
9 Mu ku xinganeka ihi ia bhange kioso kia mateka o ku di longa o Bibidia, Jason uambe: “Eme nga mesenene ku tangela athu enioso!” O dixibulu kioso kia mateka ku uabhela o milongi ia Bibidia, muéne u sanguluka kiavulu u mesena ku zuela ia di longo ithangana ioso. Muéne u mesena kuila athu ku muiji uê a xikina kiá o njimbu ia Utuminu, maji saí iá a xikina, a mukuá kana. Ihi ia bhange o muhatu ua Jason kioso kia mono o kisangusangu kiê? Muéne uambe: “Eme nga diuanene.” O muhatu ua mukuá ua kituka mubhezi ua Jihova, mu ku bhita 18 dia mivu, tundé kia mateka muadi uê ku di longa, uambe: “Nga bhingile ku di longa bhofele-bhofele.” Se ua mu longa muthu, o kaza diê ka mesena ku di longa, mukonda diahi ku mu kuatekesa bhu kaxi ka jimbandu jene mu moneka mu mulangidi, phala ki mu kuatekesa kuzuela ni kaza diê? Mozé uambe: “Ulongelu uami-ème mvula i noka, mbundu isuma, mbambe ni masumi-sumi ma mvula ku thandu a mafe.” (Mate. 32:2) O mabebe a njimbu iambote, i tena ku bhangesa kuila o muthu u xikina, o mvula iavulu mu nzumbi ndenge.
10-12. (a) Kitendelesu kiahi kia bhana poxolo Phetele ku Jikidistá ala ni makaza a diuane mu ubhezelu? (b) Kiebhi ki tena o dixibulu ku belesela o kitendelesu mu divulu dia 1 Phetele 3:1, 2?
10 O poxolo Phetele ua tendelesa o ahatu ala ni muiji uâ ua diuane mu ubhezelu. Muéne uambe: “Enu ahatu beleselenu anume enu, phala né-mbe bhu kala ni iá a kamba kutumaka o maka ma Nzambi, ki bhekela ku a nganhala mu uendelu ua mbote ua ahatu â. Ene ki kua-ndù bhinga ngó ku a zuelela kima, kioso kia mi mona o uendelu uenu ua ujitu ni uoma.” (1 Phe. 3:1, 2) O muhatu u tena ku kala ni muadi uê mu ubhezelu, se muéne u mu belesela, u mu xila, né muene se uene ku mu zukutisa. Kiene kimoxi ué ni diiala kidistá, a tena ku tumina o muiji ni henda, sumbala ni kizukutisu kia muhatu uê ki kidistá.—1 Phe. 3:7-9.
11 Kuene phangu iavulu ilondekesa o valolo ia ku belesela o kitendelesu kia Phetele. Xinganeka mu phangu ia Selma. Kioso muéne kia mateka o ku di longa o Bibidia ni Jimbangi ja Jihova, muadi uê Xitevá ka ki uabhele. Muéne uambe: “Nga kexile ni njinda, ki nga mesenene ku muehela, nga kexile ni uôma.” Selma uambe: “Né muéne ande dia ku kala mbangi ia Jihova, o ku tunga ni Xitevá, kiexile kala kuendela mu itetu ia maiaki. Muéne uexile diiala dia temene kiavulu. Kioso ki nga mateka o ku di longa o Bibidia, muéne ua bandekesa-ku dingi mu ku tema kuê.” Ihi ia mu kuatekesa?
12 Selma u lembalala o disá dia di longo ni mbangi ia Jihova ua kexile ku mu longa. Selma uambe: “Saí kizuua ki ngi mesenene ku di longa o Bibidia. Mukonda o usuku ua bhitile, Xitevá ua ngi betele, mukonda nga mesenene ku mu londekesa milongi ia Bibidia, nga luualele kiavulu. Kioso ki nga ki tangela o phangi ua kexile mu ngi longa, ni kiebhi ki nga kexile mu divua, muéne ua ngi bhingi ku tanga o divulu dia 1 Kolindo 13:4-7. Kioso ki nga zubha o ku tanga, eme nga xinganeka, ‘Xitevá nuka ua ngi bhangele ima íii ia henda.’ Maji o phange ua ngi kuatekesa ku banza kiéngi, ua ngi ebhula, ‘ima iahi iambote i uene mu bhangela muadi uê?’ Nga tambuijila, ‘se-ku, mukonda muéne muthu ua bhonzo ku dibhana né.’ O phange ua ngi ibhula, ‘Selma, nanhi ua mesena ku kala Kidistá? Eie anga Xitevá?’ Mu kuijiia kuila nga tokalele ku lungulula o ibanzelu iami, nga sambe kua Jihova phala ku ngi kuatekesa ku zola dingi Xitevá. Mu ku bhita kithangana o ima ia lunguluka.” Kua bhiti 17 dia mivu, Xitevá ua xikina ku kala mbangi ia Jihova.
KIEBHI O JIPHANGE KIA TENA KU KUATEKESA
13, 14. Kiebhi o jiphange mu kilunga kia tena kulondekesa o henda iâ kua ió kala kumoxi ni muiji uâ mu ubhezelu?
13 Kála o mabebe a mvula a kuatekesa o idima ku kula, o jiphange mu kilunga a bhanga ioso phala ku zediuisa o jiphange kala kumoxi ni muiji mu ubhezelu. Elvina ua tungu ku Brasil, uambe: “O henda ia jiphange jami iene ia ngi kuatekesa ku kolokota mu kilunga.”
14 O henda ia jiphange mu kilunga, i tena ku kuatekesa o muthu ki mbangi ia Jihova. Saí diiala mu ixi ia Nigéria ua xikina ngó ku di longa kioso kia bhiti 13 dia mivu tundé kia mateka muhatu uê ku di longa o Bibidia, muéne uambe: “Kioso ki nga kexile mu kuenda njila ni mbangi ia Jihova, o dikalu dia zangiua. Muéne ua soto o jimbangi ja Jihova mu sanzala ia zukamene, ene a tu zalela kididi phala ku zeka. Ene a tu tambulula kála tua d’ijidile kiá ukulu. Mu kizuu’okio nga mono o henda iâ, iene mu zuela muhatu uami.” Mu ixi ia Inglaterra, o muhatu ua di longo o Bibidia kioso kia bhiti 18 dia mivu, tundé kia mateka muadi uê ku di longa, uambe: “O Jimbangi ja Jihova, a tu ixana phala kudia n’â. A ngi tambulula kiambote.” * Mu ixi muenhomo, saí diiala ua kituka mbangi ia Jihova, kiene ué kiambe: “O Jiphange a kexile muia mu tu kunda, mba ku tu ixana ku mabhata mâ, nga mono kuila ene a uabhela o ku bhana. Nga ki mono bhenge-bhenge kia kexile múia mu ngi menekena mu inzo ia ku saka, kioso ki nga kexile mu kata.” U tena kulondekesa o henda íii ku jiphange ala ni muiji ua diuane mu ubhezelu?
15, 16. Ihi i tena ku kuatekesa o kidistá ku sanguluka, sumbala o muiji uê ki uala kumoxi mu ubhezelu?
15 Tuejiia kuila ki athu oso a xikina o ubhezelu ua kidi, ki kala mona, jitata, mba jindandu, né muene se o mbangi u kala ni ukexilu uambote, u a bhana umbangi. Saí iá ka xikina, a mukuá a kala mu zukutisa. (Mat. 10:35-37) Maji se o Kidistá u bhanga ima iambote u tena ku a kuatekesa ku xikina. Saí diiala ki kidistá uambe: “Se o dikaza Kidistá ulondekesa o ukexilu uê uambote, ki uejiia ihi i tena ku bhanga ku muxima ua kaza diê ki Kidistá. Kienhiki, kana ku bhuila mu ku kuatekesa kaza diê ki Kidistá.”
16 Né muéne se ku muiji uê saí muthu ki mubhezi ua Jihova o kidistá u tena ku zediua. Sumbala muadi uê ka tambuijila o ngunzu ia bhange mu 21 a mivu, o phang’etu uambe: “Eme ngi tena ku sanguluka mu ku di suínisa ku sidivila Jihova, ni kixikanu kiami kua muéne, ni ku bhanga ioso phala ku kolokota ku kula mu nzumbi. O ku di longa ubheka uami, kuia mu iônge, kuia mu boka, ni ku kuatekesa akuetu mu kilunga, kuene mu ngi kuatekesa ku langa o muxima uami.”—Jisa. 4:23.
KANA KU BHUILA!
17, 18. Kiebhi o Kidista kia tena ku zediua sumbala o muiji uê ki di lungu kumoxi mu ubhezelu?
17 Se eie u Kidistá ia fiiele, o muiji uê ki u lungu kumoxi ni eie mu ubhezelu, kana ku bhuila. Ijiia kuila “Jihova ka xikina ku ambudisa mundu uê, mukonda dia dijina diê dikôla.” (1 Sam. 12:22) Muéne ua-nda ku kuatekesa se u dikola kua muéne. (Tanga 2 Malunda 15:2.) Kienhiki, “ngalasa ié i tunde mu ku di tuma ni Jihova.” “Njila ié i uenda bhakula-iu kua Jihova. U mu dielele muéne.” (Jisá. 37:4, 5) “Kolokotenu mu ku samba,” o kixikinu kietu, ni henda ietu kua Tata ietu ia diulu, i tena ku tu kuatekesa ku kolokota mu ibhidi ioso.—Lom. 12:12.
18 Bhinga kua Jihova phala ku kuatekesa ku tululuka kubhata. (Jihe. 12:14) Kienhiki u tena ku dibhana kiambote ni ndandu iê ki mubhezi ua Jihova. Ua-nda zediua, uanda tululuka ku muxima, se “mu kubhanga kima kioso-kioso, iene ioso i kale ia ku ximanesa Nzambi.” (1 Kol. 10:31) Kima kiambote kuijiia kuila ua mu kuatekesa o jiphange jê mu kilunga!
[Tanga mu luji]
^ kax. 4 O majina a a lungulula.
^ kax. 8 O kitendelesu kia Phaulu ki kia mu londekesa kuila o makaza a tokala ku di xisa. Enhá maka a dikota, a tokala ngó kua ene. Tanga o divulu, ‘Kala mu Henda ia Nzambi’ mu jimbandu ja 220-221.
^ kax. 14 O Bibidia ki ifidisa o kidistá kudia ni athu ki Jimbangi ja Jihova.—1 Kol. 10:27
[Ibhuidisu ia ku dilonga]
[Kilombuelelu ku mbandu 30]
Sola kithangana kia tokala phala ku jimbulula o kixikanu kiê
[Kilombuelelu ku mbandu 31]
Londekesa kuila ua mesena o mbote ia kaza diê, ki kidistá
