Sakhaw Thuhmun Lo Chhûngkuaah Pawh Hlimna Neih Theih A Ni

“I [kawppui] i chhandam dâwn leh dâwn loh engtin nge i hriat ni?”—1 KOR. 7:16.

A CHHANNA KAN HMU THEI EM?

Ringtute chuan sakhaw thuhmun lo chhûngkuaa remna awmtîr tûrin eng nge an tih theih?

Engtin nge Kristian chuan chhûngkuaa ring lotute chu biakna dik pawm tûra a ṭanpui theih?

Sakhaw thuhmun lo chhûngkuaa awm an Kristian unaute ṭanpui tûrin mi dangte’n eng nge an tih theih?

1. Lalram thuchah pawmna chuan chhûngkuaah nghawng eng nge a neih theih?

ISUA’N a tirhkohte a tirh chhuah lai ṭum khat chu: “In kalin, ‘Van ram chu a lo hnai ta,’ tiin, hril zêl ang che u,” tiin a hrilh a. (Mt. 10:1, 7) Chu chanchin ṭha chuan lâwm taka lo dawngsawngtute tân remna leh hlimna a thlen dâwn a ni. Mahse, Isua chuan a tirhkohte chu mi tam takin an Lalram thu hrilh rawngbâwlna an dodâl tûr thu a vaukhân a. (Mt. 10:16-23) Chhûngkaw zînga mite’n Lalram thuchah an hnâwl a, an dodâl hian tawrh a hrehawm bîk a ni.—Matthaia 10:34-36 chhiar rawh.

2. Engvângin nge sakhaw thuhmun lo chhûngkuaa awm Kristiante tân hlimna chu neih theih loh a nih loh?

² Chu chu sakhaw thuhmun lo chhûngkuaa Krista zuitute tân hlimna neih theih loh tihna a ni em? Ni lo ve! Chhûngkua aṭanga dodâlna chu nasat hle châng awm mah se, chutiang chu a ni vek lo. Chu bâkah chhûngkuate chuan an dodâl reng kher lo bawk. Ringtuin dodâlna emaw, ngaihsak lohna emaw a chhân lêt dânah a innghat thui hle a ni. Chu bâkah Jehova chuan a chunga rinawmte chu mal a sâwmin, dinhmun hrehawm hnuaiah pawh a tihlim a ni. Ringtute chuan an hlimna chu (1) chhûngkuaa remna awmtîr tum tlatna hmangin leh (2) ring lotu an chhûngte biakna dik pawm tûra ṭanpui tum tlatna hmangin an belhchhah thei a ni.

CHHUNGKUAAH REMNA AWMTIR RAWH

3. Engvângin nge sakhaw thuhmun lo chhûngkuaa awm Kristian chuan remna a awmtîr ang?

³ Chhûngkuaa felnain rah a chhuah theih nân in chhûng khura remna awmtîr a pawimawh hle a. (Jakoba 3:18 chhiar rawh.) Chhûngkua chu biakna dika inpumkhat la  ni lo mah se, Kristian chu chhûngkuaa remna awmtîr tûrin a thawkrim tûr a ni. Engtin nge chu chu tih theih a nih?

4. Engtin nge Kristiante chuan chhûngrila remna an neih chu an vawn theih?

⁴ Kristiante chuan chhûngrîla remna an neih chu an vawng reng tûr a ni a. Chutianga ti tûr chuan tih tak zeta ṭawngṭai a ngai a, chu chuan tlukpui nei lo “Pathian thlamuanna,” a nih loh leh Pathian remna min pe thei a ni. (Phil. 4:6, 7) Remna leh hlimna chu Pathian Jehova hriatna neih leh Bible thu bulte nunpuina aṭanga neih a ni a. (Is. 54:13) Remna leh hlimna nei tûr chuan, kohhran inkhâwmna leh thlawhhma rawngbâwlnaa ṭhahnemngai taka tel pawh a pawimawh hle bawk. Sakhaw thuhmun lo chhûngkuaa ringtute tân Kristian thiltiha tel dân kawng dap theih a ni tlângpui a. Entîr nân, a pasalin nasa taka a dodâl Enza-i * chungchâng hi han ngaihtuah teh. Ani chu in lam hna a thawh zawh hnuah zirtîr siamnaah a tel ṭhîn a. Heti hian a sawi: “Mi dangte hnêna chanchin ṭha hril tûra ka thawhrim apiangin, Jehova chuan nasa takin mal min sâwm ṭhîn,” tiin. Chutiang malsâwmna chuan remna, lungawina, leh hlimna a pe a ni.

5. Sakhaw thuhmun lo chhûngkuaa awm Kristiante’n eng harsatna nge an tawn ṭhîn a, eng ṭanpuina nge hmuh theih awm?

⁵ Ring lotu chhûngte nêna inlaichînna muanawm tak nei tûr chuan kan thawhrim a ngai a. Chu chuan a châng chuan harsatna a thlen thei a ni, ti tûra min duh thilte chuan Bible thu bul nêna inkalh châng a neih theih avângin. Thu bulte kan vawn nghehna chuan ring lotu kan chhûngte ṭhenkhat chu a tilungawi lo thei a; mahse, chutianga dinnghehna chuan khua reiah remna a awmtîr thei a ni. Bible thu bulte kalh lo thila tlâwm duh lohna chuan ṭûl lo taka innghirnghona a awmtîr thei a. (Thufingte 16:7 chhiar rawh.) Harsatna kan hmachhawn hunah bawih rinawm leh fing tak pâwl tihchhuah thu leh hlate leh upate hnên aṭanga Bible ṭanchhan fuihna kan zawn a pawimawh a ni.—Thuf. 11:14.

6, 7. (a) Engvângin ṭhenkhatin Jehova Thuhretute nêna Bible zir ṭan an chhûngte chu an dodâl? (b) Engtin nge Bible zirlai emaw, ringtu emaw chuan chhûngkua aṭanga dodâlna chu a chhân lêt ang?

⁶ Chhûngkuaa remna awmtîr tûr chuan Jehova kan rinchhan a, ring lotu chhûngte rilru tûr kan hmuh thiam a ṭûl a ni. (Thuf. 16:20) Bible zir ṭantîrte pawhin chu mi chungchângah hriatthiamna an lantîr thei a ni. Ring lotu pasal emaw, nupui emaw chuan an kawppuite Bible zir chu an pawi ti lo mai thei a. Chu chu chhûngkaw tâna ṭha tûr a ni tih an pawm hial pawh a ni thei. Mahse, ṭhenkhat chuan an huatzia an lantîr mai thei a. Tûna Thuhretu ni tâ, Esther-i chuan a pasalin Jehova Thuhretute nêna Bible an zir ṭan lai chuan “thinrim takin” a chhâng lêt tih a pawm a. “Thu leh hla chhuah a kawlte chu ka paih loh leh ka hâlsak ṭhîn,” tiin a sawi. A nupuiin Bible a zir tirha dodâltu Howard-a chuan: “Pasal tam tak chuan an nupuite chu pâwl hlauhawm tak zâwm tûra bum an nih an hlau va. Pasal chuan chu thil hlauhawm nia a ngaih chu chhân lêt dân hre lovin, a dodâl ta mai pawh a ni thei,” a ti.

⁷ A kawppuiin a dodâl Bible zirlai chu a zir lai chawlhsan lo tûra ṭanpui tûr a ni a. Ani chuan ring lotu a kawppui chunga thuhnuairawlhna leh zahna lantîrna hmangin buaina ṭhenkhat chu a chingfel thei ang. (1 Pet. 3:15) Howard-a chuan, “Ka nupuiin thinrim lo leh a lutuka min chhân lêt loh avângin kan lâwm hle!” a ti. A nupui chuan: “Howard-a’n ka Bible zirna chawlhsan tûrin min ti a. Ka thluak sûksak niin a sawi a ni. Hnial buai ai chuan, a tih dik mai theih thu ka hrilh a; mahse, chutiang a nih theih dân ka hmuh thiam theih loh thu ka hrilh fiah bawk a ni. Tichuan, ka zir lai mêk lehkhabu chu chhiar ve tûrin ka ti a. A chhiar  ta a, a chhûng thute chu pawm loh a nei lo. Chu chuan nasa takin a nghawng ta a ni,” a ti. Ring lotu kawppuite chuan an kawppuite’n Kristian thiltihtea tel tûra an kalsan hian ngaihsak lo niin an inhre thei a, an inlaichînnain a tawrh phah an hlau a ni thei bawk tih hriat reng chu a ṭha a; mahse, hmangaih taka tiamkamna chuan chutiang ngaih dân nei lo tûrin a siam thei a ni.

BIAKNA DIK PAWM TURIN ṬANPUI RAWH

8. Ring lotu kawppui nei Kristiante hnênah tirhkoh Paula’n eng fuihna nge a pêk?

⁸ Tirhkoh Paula chuan Kristiante chu an khawppuite ring lotu an nih avâng maia ṭhen lo tûrin a fuih a. * (1 Korinth 7:12-16 chhiar rawh.) Ring lotu an kawppuite chu ringtu an lo ni ve thei tih rilrua vawn tlatna chuan ringtu chu sakhaw thuhmun lo chhûngkuaah pawh hlimna nei tûrin a ṭanpui thei a ni. Mahse, ring lotu thinlunga thutak thlentîr tumnaah fîmkhur a ngaihna lai a awm a, a hnuaia thil tawn hian a târ ang a ni.

9. Ring lotu chhûngkaw mite hnêna Bible thutak kan hmêlhriattîr hunah engtin nge kan fîmkhur ang?

⁹ Bible thutak a zir laia a chhân lêt dân chu ngaihtuah lêtin, Jason-a chuan, “Mi zawng zawng hnêna hrilh mai chu ka duh a,” a ti. Bible zirlaiin Bible aṭanga a thu zirte dikzia a han hriat hian, a lâwm êm avângin englai pawhin a sawi deuh reng mai thei a. Ani chuan ring lotu a chhûngte’n Lalram thuchah an pawm nghâl pawh a beisei mai thei; mahse, chanchin ṭha chu chutiang lo zâwng daiha chhân lêt a ni thei a ni. Engtin nge a tîra Jason-a phûrna chuan a nupui chungah nghawng a neih? A nupui chuan “Ka rilru a tibuai hle a ni,” a ti. A pasalin thutak a hmuh hnu kum 18-naa thutak pawm ve chauh nu pakhat pawhin: “Muang chânga thil zir mi ka ni,” a ti. A kawppuiin biakna dika tel ve duhna nei lo tuemaw Bible i zirpui mêk a nih chuan, engvângin nge zirlai chu a kawppui hnêna thiam taka thutak hrilh tûrin i ṭanpui lo vang? Mosia chuan: “Ruahtui angin ka thu chu a sûr ang, dai angin ka thusawi chu a far ang; hlobet no dep chunga ruah . . . angin,” tiin a sawi a ni. (Deut. 32:2) A hun taka ṭha taka sawi chhuah thutak thu tlêm tê chu thlarau lam thu sawi ṭeuh aiin a ṭangkai zâwk fo.

10-12. (a) Tirhkoh Petera chuan sakhaw thuhmun lo chhûngkuaa nupuite hnênah eng fuihna nge a pêk? (b) Engtin nge Bible zirlai pakhatin 1 Petera 3:1, 2 chhinchhiah zilhna chu a nunpui?

¹⁰ Tirhkoh Petera chuan sakhaw thuhmun lo chhûngkuaa nupuite hnênah thlarauva thâwk khum fuihna a pe a. Heti hian a ziak a ni: “Mahni pasalte thu thuin awm rawh u; chutichuan an zînga tupawhin thu chu âwih lo mah sela, thu lovin an nupuite chêtziaa hnehin an awm thei ang, ṭih dêk chunga in chêtze thianghlim  enin,” tiin. (1 Pet. 3:1, 2) Nupui chuan a pasalin ṭha lo taka a cheibâwl pawhin, ṭih dêk chung leh a thu thua awmna hmangin thutak pawm tûrin a ṭanpui thei a ni. Chutiang bawkin, ringtu pasal pawhin Pathian ngaihsak taka awmin, ring lotu a nupui laka dodâlna engpawh tâwk mah se hmangaihna nei tak chhûngkaw lû nih a tum tlat tûr a ni.—1 Pet. 3:7-9.

¹¹ Tûn laia entîrna tam tak chuan Petera fuihna nunpui a hlutzia a târ lang a. Selma-i chungchâng hi han ngaihtuah teh. Jehova Thuhretute nêna Bible an zir ṭan chuan a pasal Steve-a chu a lâwm lo va. A pasal chuan heti hian a sawi a ni: “Ka thin a rim a, ka thîkthu a chhia a, a hmangaihna leh a ngaihsakna lâk reng ka duhin, him lo riau niin ka inhria a,” tiin. Selma-i chuan: “Thutak ka hmuh hma pawhin, Steve-a nêna chên dun chu a harsa hle a. A thinchhe hle a, Bible ka zir ṭanna chuan a thinchhiat a tizual a ni,” a ti. Dinhmun tihmasâwn tûrin engin nge ṭanpui?

¹² Selma-i chuan amah zirpuitu Thuhretu hnên aṭanga a thil zir chu a ngaihtuah lêt a. Heti hian a sawi: “Ni khat chu Bible zirna neih ka duh lo va. Chu mi hma zân chuan, thiam thu sawi ka tum avângin Steve-a’n min hnek a, ka lungchhiain, ka inkhawngaih hle a ni. Unaunu hnêna thil awm dân leh ka rilru ka hrilh hnu chuan, ani chuan 1 Korinth 13:4-7 min chhiartîr a. Ka han chhiar chuan, ‘Steve-a chuan hêng thil duhawm tak engmah hi ka chungah a ti ngai lo,’ ka ti a. Mahse, unaunu zawhna min zawh chuan ka thil ngaihtuah dân a thlâk danglam daih mai, ani chuan, ‘Hêng hmangaihna thiltih zînga eng zât hi nge i pasal chungah i lantîr?’ tiin min zâwt a, ‘Engmah ka lantîr lo, chênpui a harsa êm a lâwm,’ tiin ka chhâng a. Unaunu chuan aw dam takin, ‘Selma, tunge Kristian nih tum zâwk? Nangmah nge, Steve-a?’ min ti a. Ka ngaihtuahna ka thlâk a ngai tih ka hre ta a, Steve-a ka hmangaih lehzual theih nâna min ṭanpui tûrin Jehova hnênah ka ṭawngṭai a ni. Zawi zawiin, thil awm dân chu a lo inthlâk thleng ta,” tiin. Kum 17 hnuah Steve-a chuan thutak a pawm ve ta a ni.

MI DANGTEN AN ṬANPUI THEIH DAN

13, 14. Engtin nge kohhrana mi dangte chuan sakhaw thuhmun lo chhûngkuaa mite chu an ṭanpui theih?

¹³ Ruah sûr seng sengin lei a tihhnâwn a, thlai a ṭhantîr ang chiahin, kohhrana mi tam tak chuan sakhaw thuhmun lo chhûngkuaa awm Kristiante chu hlimna an pe thei a ni. “Unaute min hmangaihna chuan thutaka nghet tûrin min ṭanpui a ni,” tiin Brazil rama Elvina-i chuan a sawi.

¹⁴ Kohhran chhûnga mi dangte ngilneihna leh ngaihsakna chuan chhûngkuaa ring lotute rilru a hneh thei hle a. A nupuiin thutak a pawm hnu kum 13-a pawm ve Nigeria  rama pa pakhat chuan: “Thuhretu pakhatin min zinpui ṭum chuan, a motor chu a chhe hloh mai a. A bul hnai khuaa Thuhretute chu a zawng chhuak a, anni chuan an inah min lo riahtîr a. Têttê aṭanga inhre ṭhang ang maiin min enkawl a. Ka nupuiin a sawi fo ṭhin Kristian hmangaihna chu ka tawng ve ta a ni,” a ti. A pasalin thutak a hmuh hnu kum 18-naa hmu ve England rama nu pakhat chuan heti hian a sawi a: “Thuhretute chuan kan nupain chaw eiah min sâwm a. Min lâwm tak zet tih ka hria a ni,” tiin. * A tâwpa Thuhretu rawn ni ta, chu mi rama mi bawk pa pakhat pawhin: “Unaute chuan min tlawhin, an ina lêng tûrtein min sâwm bawk a, min ngaihsak hle tih ka hmu chhuak a ni. Chu chu damdawi ina ka awm laiin ka hre chiang leh zual a, unaute tam takin min rawn kan a ni,” tiin a sawi bawk. Chhûngkuaa ring lotute chungah chutiang bawka ngaihsakna lantîr theih dân kawngte i hre thei em?

15, 16. Chhûngkuaa mi dangte chu ringtu rawn ni lo mah se, engin nge ringtu chu hlimna nei reng tûra ṭanpui thei?

¹⁵ Chhûngkuaa ringtuin kum tam tak chhûng rinawm taka nung a, thiam taka thu a hrilh hnuah pawh an kawppuite, fate, nu leh pate, a nih loh leh chhûngkhat dang zawng zawngte chuan biakna dik an pawm vek kher lo ngei mai. Ṭhenkhat chuan an ngaihsak lo zawm zêl emaw, an dodâl zawm zêl emaw a. (Mt. 10:35-37) Mahse, Kristiante’n Pathian ngaihsakna mizia an lantîrna chuan rah ṭha tak a chhuah thei a ni. Tûn hmaa ring lotu ni ṭhîn pa pakhat chuan heti hian a sawi: “Mize ṭha tak tak in lan chhuahtîr hian in kawppui ring lotute rilru leh thinlung a khawih dân in hre lo. Chuvângin, in kawppui ring lotute chunga ṭhatna lantîr chu bânsan ngai suh u,” tiin.

¹⁶ Chhûngkuaa mi tuemaw chu ringtu rawn ni lo mah se, a ringtu zâwk tân hlimna neih theih a ni. Kum 21 chuang rim taka a thawh hnuah pawh a pasalin Lalram thutak chhâng lêt lo mah se, unaunu pakhat chuan heti hian a sawi a ni: “Jehova tihlâwm tumna te, a laka rinawmna vawn tlatna te, leh ka thlarau lam tichak tûra thawhrimnate hmangin hlimna ka nei reng thei a. Mahnia inzirna neih te, inkhâwmna leh thlawhhma rawngbâwlnaa tel te, leh kohhrana mi dangte ṭanpui ang chi thlarau lam thil tihte chuan Jehova min hnaih zualtîr a, ka thinlung a vênghim a ni,” tiin.—Thuf. 4:23.

BEIDAWNG MAI SUH!

17, 18. Engtin nge Kristian chu sakhaw thuhmun lo chhûngkuaah pawh beisei bo lova a awm reng theih?

¹⁷ Sakhaw thuhmun lo chhûngkuaa chêng Kristian rinawm i nih pawhin, beidawng mai suh. “A hming ropui tak avâng hian LALPA chuan a mite chu a hawisan dâwn si lo,” tih hi hre reng ang che. (1 Sam. 12:22) Amah i vawn tlat chhûng chuan ani chu i hnênah a awm zêl ang. (2 Chronicles 15:2 chhiar rawh.) Chuvângin, “LALPA chungah chuan lâwm . . . rawh.” “I awm dân tûr chu LALPA chungah nghat la; amah chu ring” ang che. (Sâm 37:4, 5) “Ṭawngṭai fan fan” la, hmangaihna ngah tak kan Pa vâna mi chuan harsatna engpawh tuar chhuak thei tûrin a ṭanpui thei che tih ring tlat ang che.—Rom 12:12.

¹⁸ In chhûng khura remna i awmtîr theih nâna ṭanpui tûr chein Jehova hnênah a thlarau thianghlim dîl rawh. (Heb. 12:14) Ni e, chutiang boruak muanawm tak chu awmtîr theih a ni, chu chuan a tâwp a tâwpah chhûngkuaa ring lotu rilru chu a khawih mial mahna. ‘Pathian ropuina tûr hlîra’ thil i tih chuan hlimna i neiin, rilru leh thinlunga thlamuanna i nei ang. (1 Kor. 10:31) Hêng thil tih i tumna kawngah hian, Kristian kohhrana unaute ṭanpuina duhawm tak i nei tih hriat chu thil duhawm a va ni tak êm! (w12-E 02/15)

[Footnote-te]

[Zirlai Atâna Zawhnate]

[Phêk 30-naa milem]

I rinna chungchâng sawi chhuah nân hun dik thlang rawh

[Phêk 31-naa milem]

Ring lotu kawppuite chungah ngaihsakna lantîr rawh