“Kif taf jekk issalvax lil [martek jew żewġek]?”—1 KOR. 7:16.

TISTAʼ SSIB IT-​TWEĠIBIET?

X’jistgħu jagħmlu l-​Kristjani biex ikollhom il-​paċi f’dar maqsuma?

Kristjan kif jistaʼ jgħin membri tal-​familja li ma jemmnux biex iħaddnu l-​qima vera?

X’jistgħu jagħmlu oħrajn biex jgħinu lil sħabhom fit-​twemmin li jgħixu fi djar maqsumin?

1. Meta xi ħadd jaċċetta l-​verità, x’jistaʼ jkun l-​effett fuq familtu?

 META darba minnhom Ġesù bagħat lill-​appostli tiegħu jippritkaw, hu qal: “Intom u sejrin, ippritkaw u għidu, ‘Qorbot is-​saltna tas-​smewwiet.’” (Mt. 10:1, 7) Din l-​aħbar tajba kienet se ġġib il-​paċi u l-​ferħ lil dawk li jaċċettawha b’apprezzament veru. Però, Ġesù wissa lill-​appostli tiegħu li ħafna kienu se jopponu x-​xogħol tal-​ippritkar tagħhom. (Mt. 10:16-​23) Forma t’oppożizzjoni taʼ wġigħ partikulari hi meta membri tal-​familja ma jaċċettawx il-​messaġġ tas-​Saltna.—Aqra Mattew 10:34-​36.

2. Għala hu possibbli għalina li nkunu ferħanin anke jekk il-​familja tagħna mhix fil-​verità?

² Ifisser dan li ma nistgħux inkunu ferħanin jekk il-​familja tagħna mhix fil-​verità? Lanqas xejn! Għalkemm xi drabi l-​oppożizzjoni mill-​familja tistaʼ tkun ħarxa, dan mhux dejjem il-​każ. Ukoll, l-​oppożizzjoni mill-​familja mhix dejjem permanenti. Ħafna jiddependi minn kif dawk li jemmnu jirreaġixxu għall-​oppożizzjoni jew l-​indifferenza. Iktar minn hekk, Ġeħova jbierek lil dawk li huma leali lejh u jferraħhom minkejja ċirkustanzi diffiċli. Il-​Kristjani jistgħu jkunu iktar ferħanin jekk (1) jaħdmu iebes biex ikollhom il-​paċi fid-​dar u (2) jipprovaw bis-​sinċerità jgħinu lil membri tal-​familja li ma jemmnux biex iħaddnu l-​qima vera.

AĦDEM IEBES BIEX IKOLLOK IL-​PAĊI FIL-​FAMILJA

3. Kristjan għala għandu jaħdem iebes biex ikollu l-​paċi fil-​familja?

³ Il-​familja tkun iktar lesta li taċċetta l-​verità jekk ikun hemm il-​paċi fid-​dar. (Aqra Ġakbu 3:18.) Anke  jekk il-​familja taʼ Kristjan għadha mhix magħquda fil-​qima pura, dan għandu jagħmel sforz ħerqan biex ikabbar il-​paċi fil-​familja. Dan kif jistaʼ jsir?

4. Kif nistgħu nżommu l-​paċi ġewwinija tagħna?

⁴ Jeħtieġ li l-​Kristjani jżommu l-​paċi ġewwinija tagħhom. Dan jirrikjedi talb mill-​qalb, li jistaʼ jagħtina “l-​paċi t’Alla” li ma tistaʼ titqabbel maʼ xejn. (Flp. 4:6, 7) Il-​ferħ u l-​paċi jiġu milli nieħdu għarfien dwar Ġeħova u milli napplikaw prinċipji Skritturali fil-​ħajja. (Is. 54:13) Il-​parteċipazzjoni fil-​laqgħat tal-​kongregazzjoni u l-​attività żeluża fil-​ministeru tal-​għalqa huma vitali wkoll jekk irridu ngawdu l-​paċi u l-​ferħ. Dawk li jgħixu f’familja maqsuma ġeneralment jistgħu jsibu mod kif jagħmlu dawn l-​affarijiet importanti. Pereżempju, ikkunsidra lil Enza, a li għandha żewġha jopponilha bil-​qawwi. Hi tieħu sehem fix-​xogħol taʼ li tagħmel dixxipli wara li tlesti l-​faċendi tad-​dar. Enza tgħid, “Ġeħova tassew iberikni b’riżultati tajbin kull darba li nagħmel sforz biex naqsam l-​aħbar tajba m’oħrajn.” Barkiet bħal dawn bla dubju jissarrfu f’paċi, sodisfazzjon, u ferħ.

5. Liema sfida spiss jiffaċċjaw uħud li jgħixu fi djar maqsumin, u x’għajnuna hemm għalihom?

⁵ Jeħtieġ li naħdmu iebes biex ikollna l-​paċi mal-​membri tal-​familja li mhumiex fil-​verità. Dan jistaʼ jkun taʼ sfida għax kultant ikunu jriduna nagħmlu affarijiet li jmorru kontra l-​prinċipji Bibliċi. Xi membri tal-​familja li ma jemmnux għandhom mnejn jirrabjaw meta nżommu sod maʼ prinċipji tajbin, però waqfa bħal din fl-​aħħar mill-​aħħar twassal għall-​paċi. M’għandniex xi ngħidu, irridu nagħmlu l-​almu tagħna biex nikkooperaw mal-​familja meta xi ħaġa ma tmurx kontra l-​prinċipji tal-​Bibbja. B’hekk nevitaw nuqqas taʼ qbil bla bżonn. (Aqra Proverbji 16:7.) Meta tiffaċċja sfida, hu importanti li tfittex pariri Skritturali minn pubblikazzjonijiet tal-​klassi tal-​ilsir leali u għaqli u mingħand l-​anzjani.—Prov. 11:14.

6, 7. (a) Għala xi wħud jopponu lill-​membri tal-​familja li jibdew jistudjaw max-​Xhieda taʼ Ġeħova? (b) Kif għandu student tal-​Bibbja jew Xhud jirreaġixxi għall-​oppożizzjoni mill-​familja?

⁶ Jistaʼ jkollna l-​paċi fil-​familja jekk nafdaw f’Ġeħova u nipprovaw nifhmu s-​sentimenti tal-​familja tagħna. (Prov. 16:20) Anke studenti tal-​Bibbja ġodda jistgħu jużaw id-​dixxerniment f’dan ir-​rigward. Xi rġiel jew nisa miżżewġin li ma jemmnux forsi ma joġġezzjonawx li s-​sieħeb tagħhom jistudja l-​Bibbja. Għandhom mnejn saħansitra jammettu li dan jistaʼ jkun taʼ ġid għall-​familja. Oħrajn għandhom mnejn jopponu bil-​qawwi. Esther, li issa hi Xhud, tammetti li hi rreaġixxiet “b’xejn ħlief rabja” meta żewġha beda jistudja l-​Bibbja max-​Xhieda taʼ Ġeħova. Hi tgħid, “Kont narmilu jew naħraqlu l-​letteratura.” Howard, li għall-​ewwel oppona għal li martu tistudja l-​Bibbja, qal: “Ħafna rġiel miżżewġin jibżgħu li n-​nisa tagħhom qed jiġu mqarrqin f’li jingħaqdu maʼ xi setta reliġjuża. Ir-​raġel jistaʼ ma jkunx jaf kif għandu jirreaġixxi għal din it-​theddida fittizja u dan jistaʼ jwassal biex jitkellem u jaġixxi bl-​aħrax.”

⁷ Student li martu topponi għandu jiġi megħjun jirrealizza li m’għandux iwaqqaf l-​istudju tiegħu tal-​Bibbja. Ħafna drabi jkun jistaʼ jsolvi l-​problemi billi jkun ġwejjed u billi juri rispett lil seħbitu li ma temminx. (1 Pt. 3:15) Howard jgħid, “Jien tant grat li marti baqgħet kalma u ma qagħditx tagħmilha bi kbira!” Martu tispjega: “Howard riedni bilfors nieqaf nistudja l-​Bibbja. Hu qal li jien  kont qed niġi mqarrqa. Minflok ma llitikajt miegħu, jien għedt li setaʼ kellu raġun, imma għedtlu wkoll li onestament ma stajtx nara kif. Għalhekk, staqsejtu biex jaqra l-​ktieb li kont qed nistudja. Hu aċċetta u ma setax ma jaqbilx maʼ dak li qara. Dan tant effettwah.” Tajjeb li żżomm f’moħħok li dawk li ma jemmnux jistgħu jħossuhom abbandunati jew mheddin meta s-​sieħeb jew is-​sieħba tagħhom titlaq biex tipparteċipa f’attivitajiet Kristjani. Imma jekk din tfiehem bl-​imħabba lis-​sieħeb li ma jemminx, tistaʼ tgħinu ma jinkwetax.

GĦINHOM IĦADDNU L-​QIMA VERA

8. L-​appostlu Pawlu x’parir ta lil dawk li l-​imseħbin tagħhom mhumiex Kristjani?

⁸ L-​appostlu Pawlu jagħti parir lill-​Kristjani biex ma jitilqux lill-​imseħbin fiż-​żwieġ minħabba s-​sempliċi fatt li dawn mhumiex Kristjani. b (Aqra l-​1 Korintin 7:12-​16.) Kristjan jistaʼ jiġi megħjun iżomm il-​ferħ jekk jiftakar li s-​sieħba fiż-​żwieġ għandha mnejn taċċetta l-​verità. Imma jkun tajjeb li joqgħod attent kif jipprova jgħinha tifhem il-​verità, bħalma juru l-​esperjenzi li ġejjin.

9. Meta tintroduċi l-​verità tal-​Bibbja lill-​familja, minn xiex trid toqgħod attent?

⁹ Meta ftakar x’reazzjoni kellu meta tgħallem il-​verità mill-​Bibbja, Jason qal, “Ridt ngħid lil kulħadd!” Meta student tal-​Bibbja jasal biex japprezza l-​verità taʼ dak li ġie mgħallem mill-​Iskrittura, tant jistaʼ jkun ferħan li jibda jitkellem dwarha kważi l-​ħin kollu. Forsi jippretendi li membri tal-​familja li ma jemmnux jaċċettaw il-​messaġġ tas-​Saltna mill-​ewwel, imma dawn jistgħu ma jaqblux miegħu. L-​entużjażmu li kellu fil-​bidu Jason, x’effett ħalla fuq martu? Hi tiftakar, “Ħassejt rasi ddur bija.” Mara li aċċettat il-​verità 18-​il sena wara żewġha tgħid, “Jien, ngħid għalija, kelli nitgħallimha bil-​mod il-​mod.” Forsi bħalissa int qiegħed tikkonduċi studju tal-​Bibbja maʼ student li s-​sieħba tiegħu m’għandha l-​ebda xewqa li tieħu sehem fil-​qima vera. Għala ma turix lill-​istudent kif jistaʼ jispjega l-​verità b’qalb tajba u b’tali mod li ma jirrabjax lil martu? Mosè qal: “L-​istruzzjoni tiegħi traxxax bħax-​xita, dak li ngħid jien joqtor bħan-​nida, bħal irxiex fuq il-​ħaxix.” (Dt. 32:2) Ftit qtar taʼ verità mitkellma f’waqthom ħafna drabi huma effettivi iktar minn ħalba spiritwali.

10-12. (a) L-​appostlu Pietru x’parir ta lill-​Kristjani li żewġhom jew marthom mhumiex fil-​verità? (b) Studenta tal-​Bibbja kif tgħallmet tapplika l-​parir imniżżel fl-​1 Pietru 3:1, 2?

¹⁰ L-​appostlu Pietru pprovda parir ispirat lin-​nisa Kristjani li jgħixu fi djar  maqsumin reliġjożament. Hu kiteb: “Kunu sottomessi lejn żwieġkom, sabiex, jekk xi wħud ma jkunux ubbidjenti lejn il-​kelma, dawn jintrebħu mingħajr ebda kelma permezz tal-​kondotta tan-​nisa tagħhom, għax ikunu raw b’għajnejhom stess il-​kondotta safja tagħkom flimkien mar-​rispett profond.” (1 Pt. 3:1, 2) Mara għandha mnejn tkun tistaʼ tgħin lil żewġha jaċċetta l-​verità billi tkun sottomessa u turi rispett profond lejh, anke jekk ikun aħrax magħha. B’mod simili, raġel miżżewweġ li jemmen għandu jaġixxi bħalma jridu Alla u jkun kap tal-​familja li juri mħabba minkejja kwalunkwe oppożizzjoni li jistaʼ jħabbat wiċċu magħha min-​naħa tal-​mara li ma temminx.—1 Pt. 3:7-​9.

¹¹ Ħafna eżempji taʼ żmienna juru l-​valur taʼ li napplikaw il-​parir taʼ Pietru. Ikkunsidra l-​każ taʼ Selma. Meta bdiet tistudja l-​Bibbja max-​Xhieda taʼ Ġeħova, żewġha, Steve, ma ħax pjaċir. Hu jammetti, “Jien sirt irrabjat, għajjur, pussessiv, u beżgħan.” Selma tosserva: “Anke qabel ma sibt il-​verità, kelli noqgħod b’sebaʼ għajnejn maʼ Steve f’dak li ngħid u nagħmel. Kienu jitilgħulu malajr. Meta bdejt nistudja l-​Bibbja, din il-​karatteristika żdiedet.” X’għenha?

¹² Selma tiftakar lezzjoni li tgħallmet mingħand ix-​Xhud li studjat magħha. Selma tgħid, “Darba minnhom, ma ridtx nagħmlu l-​istudju tal-​Bibbja. Il-​ġurnata taʼ qabel, Steve kien fajjarli daqqa meta pprovajt nirraġuna miegħu, u kont qed inħossni mdejqa u nitħassar lili nnifsi. Wara li għedt lill-​oħt x’kien ġara u kif ħassejtni, qaltli naqra l-​1 Korintin 13:4-​7. Waqt li għamilt dan, bdejt nirraġuna, ‘Steve ma jagħmel xejn minn dawn l-​affarijiet taʼ mħabba għalija.’ Imma l-​oħt ġegħlitni naħseb mod ieħor billi staqsiet, ‘Kemm minn dawn l-​atti taʼ mħabba turi int lejn żewġek?’ It-​tweġiba kienet, ‘Xejn, għax diffiċli wisq tgħix miegħu.’ L-​oħt qalet bil-​mogħdrija, ‘Selma, min qed jipprova jkun Kristjan? Int jew Steve?’ Irrealizzajt li kelli bżonn naġġusta l-​ħsib tiegħi, u għalhekk tlabt lil Ġeħova jgħinni nuri iktar imħabba lejn Steve. Bil-​mod il-​mod, l-​affarijiet bdew jinbidlu.” Wara 17-​il sena, Steve aċċetta l-​verità.

KIF OĦRAJN JISTGĦU JGĦINU

13, 14. X’jistgħu jagħmlu oħrajn fil-​kongregazzjoni biex jgħinu lil dawk li jgħixu fi djar maqsumin reliġjożament?

¹³ Bħal qtar tax-​xita li jinżel ħelu ħelu u jxarrab l-​art u jgħin il-​pjanti jikbru, ħafna individwi fil-​kongregazzjoni jikkontribwixxu għall-​ferħ tal-​Kristjani fi djar maqsumin. Elvina, mill-​Brażil, tgħid, “Kienet l-​imħabba li wrew ħuti li għenitni nżomm soda fil-​verità.”

¹⁴ Il-​qalb tajba u l-​interess muri minn  oħrajn fil-​kongregazzjoni jistgħu jagħmlu ħafna biex imissu l-​qalb taʼ membru tal-​familja li ma jemminx. Fin-​Niġerja, raġel miżżewweġ li aċċetta l-​verità 13-​il sena wara martu jgħid: “Waqt li kont qed nivvjaġġa maʼ Xhud, waqfitlu l-​karozza. Hu fittex lil Xhieda sħabu f’raħal fil-​viċin u huma tawna fejn noqogħdu għal-​lejl. Ħadu ħsiebna bħallikieku konna ilna nafuhom mit-​tfulija. Mill-​ewwel ħassejt l-​imħabba Kristjana li marti dejjem tkellmet dwarha.” Fl-​Ingilterra, mara li ġiet fil-​verità 18-​il sena wara żewġha tiftakar: “Ix-​Xhieda stiednu lit-​tnejn li aħna għall-​ikel. Dejjem ħassejtni milqugħa.” c Raġel fl-​istess pajjiż li eventwalment sar Xhud jgħid: “L-​aħwa kienu jżuruna, jew kienu jistidnuna fi djarhom, u ħassejt li kien jimpurtahom minna. Dan stajt ninnotah speċjalment meta kont l-​isptar u ħafna minnhom ġew iżuruni.” Tistaʼ ssib modi kif turi interess simili f’membri tal-​familja li ma jemmnux?

15, 16. X’jistaʼ jgħin lil wieħed li jemmen biex jibqaʼ ferħan meta oħrajn fil-​familja jibqgħu ma jaċċettawx il-​verità?

¹⁵ M’għandniex xi ngħidu, mhux dawk l-​imseħbin fiż-​żwieġ, it-​tfal, il-​ġenituri, jew il-​qraba kollha oħra li ma jemmnux se jiġu fil-​verità, anke wara snin taʼ kondotta tajba u għoti taʼ xhieda bit-​tattika min-​naħa taʼ dak li jemmen. Xi wħud jibqgħu indifferenti jew jibdew jopponu ħafna. (Mt. 10:35-​37) Madankollu, meta l-​Kristjani juru kwalitajiet li jogħġbu lil Alla, dan jistaʼ jħalli effett tajjeb ħafna. Raġel miżżewweġ li qabel ma kienx Kristjan jistqarr: “Meta s-​sieħeb jew is-​sieħba li temmen tibda turi dawn il-​kwalitajiet sbieħ, ma tkunx taf xi jkun għaddej fil-​moħħ u fil-​qalb taʼ dak li ma jemminx. Għalhekk, qatt taqtaʼ qalbek mis-​sieħeb tiegħek li ma jemminx.”

¹⁶ Anke jekk membru tal-​familja ma jaċċettax il-​verità, xorta waħda jistaʼ jkun ferħan dak li hu fil-​verità. Għalkemm ir-​raġel taʼ oħt m’aċċettax il-​messaġġ tas-​Saltna wara 21 sena taʼ sforzi min-​naħa tagħha, hi tgħid: “Jien inkun nistaʼ nibqaʼ ferħana billi nistinka biex nogħġob lil Ġeħova, billi nibqaʼ leali lejh, u billi naħdem biex insaħħaħ l-​ispiritwalità tiegħi. Li nkun mitfugħa b’ruħi u ġismi f’attivitajiet spiritwali—l-​istudju personali, l-​attendenza għal-​laqgħat, il-​ministeru tal-​għalqa, u li ngħin oħrajn fil-​kongregazzjoni—iressaqni eqreb lejn Ġeħova u jħarisli lil qalbi.”—Prov. 4:23.

TAQTAX QALBEK!

17, 18. Kristjan kif jistaʼ jibqaʼ jittama anke f’dar maqsuma reliġjożament?

¹⁷ Jekk inti Kristjan leali li tgħix f’dar maqsuma reliġjożament, taqtax qalbek. Ftakar li “Ġeħova ma jabbandunax lill-​poplu tiegħu minħabba ismu l-​kbir.” (1 Sam. 12:22) Hu miegħek dment li inti tkun imqabbad miegħu. (Aqra t-​2 Kronaki 15:2.) Għalhekk, “tgħaxxaq b’Ġeħova.” Tabilħaqq, “erħi triqtek f’idejn Ġeħova, strieħ fuqu.” (Salm 37:4, 5) ‘Ippersevera fit-​talb,’ u kun fiduċjuż li Missierna tas-​sema kollu mħabba jistaʼ jgħinek tissaporti kull tip taʼ diffikultà.—Rum. 12:12.

¹⁸ Itlob bil-​ħerqa lil Ġeħova għall-​ispirtu qaddis tiegħu biex tippromwovi l-​paċi fid-​dar. (Ebr. 12:14) Iva, huwa possibbli li tinfluwenza għat-​tajjeb dawk tal-​familja tiegħek li mhumiex fil-​verità. Int se tesperjenza l-​ferħ u l-​paċi tal-​qalb u l-​moħħ waqt li ‘tagħmel kollox għall-​glorja t’Alla.’ (1 Kor. 10:31) Ukoll, kemm iqawwi l-​qalb li tkun taf li għandek l-​appoġġ kollu mħabba taʼ ħutek fil-​kongregazzjoni Kristjana!

[Noti taʼ taħt]

[Mistoqsijiet taʼ Studju]

[Stampa f’paġna 28]

Agħżel il-​ħin it-​tajjeb biex tispjega t-​twemmin tiegħek

[Stampa f’paġna 29]

Uri tħassib għal imseħbin li ma jemmnux