Posiblin Nagamoray Liket Anggaman Agmananisiay Kapamilyaan

“Panon mon amta no nilaban moy asawam?”​—1 COR. 7:16.

KASIN NAROMOG MOY EBAT?

Antoy gawaen na Kristianon agmananisiay pamilya to pian niwalay deen?

Panon a tulongan na sakey a Kristiano iray agmananisian kapamilyaan to a mangawat ed tuan panagdayew?

Antoy nagawaan na arum pian natulongan iray agagin agmananisiay kapamilyaan da?

1. No awaten na sakey so mensahe na Panarian, antoy nayarin epekto na satan ed pamilya to?

SANEN aminsan ya imbaki nen Jesus iray apostol to, oniay inkuan to: “Sano onla kayo et ipulong yon, ‘Say panarian na katawenan [et] asingsingger la.’” (Mat. 10:1, 7) Sayan maong a balita et mamawalay deen tan liket ed saramay mabulos a mangawat ed satan. Balet, pinasakbayan nen Jesus iray apostol ton dakel so onsumpad panagpulong na Panarian. (Mat. 10:16-23) Tan mas lalon mairap no say isusumpa et manlapud pamilya.​—Basaen so Mateo 10:34-36.

2. Akin et sarag tayoy magmaliw a maliket anggaman agmananisiay kapamilyaan tayo?

² Labay kasin ibaga na saya ya agtayo la magmaliw a maliket lapud agmananisiay kapamilyaan tayo? Andi. Anggaman wala ray Kristianon susumpaen na pamilya ra, wala ra met so andi. Sakey ni, agmet permanente so isusumpa. Antokaman so situasyon, sarag tayoy magmaliw a maliket no dugay ikiwas tayod saray isusumpa, odino sano ipanengneng dan ag-ira interesadod katuaan. Ontan met, tutulongan nen Jehova a magmaliw ya maliket iramay matoor ed sikato anggaman wala ray isusumpa. Mas magmaliw a maliket iray Kristiano no (1) panseetan dan napawalay deen ed pamilya ra tan (2) maaron tulongay kapamilyaan dan mangawat ed tuan panagdayew.

PANSEETAN A NAPAWALAY DEEN ED PAMILYA

3. Akin a kaukolan a panseetan na sakey a Kristiano ya napawalay deen anggaman agmananisiay kapamilyaan to?

³ Mas mainomay ya awaten na saray kapamilyaan so katuaan no walay deen ed pamilya. (Basaen so Santiago 3:18.) Anggano agni mandadayew ed si Jehova so pamilya na sakey a Kristiano, kaukolan a panseetan  ton niwalay deen ed ayaman. Panon a nagawaan itan?

4. Panon a napansiansia na saray Kristiano so deen?

⁴ Nepeg a pansiansiaen na saray Kristiano so deen. Kaukolan so masimoon a pikakasi pian niwalay agnaparaan a “deen na Dios.” (Fil. 4:6, 7) Say liket tan deen et resulta na pikabat ed si Jehova tan pangiyaplikad saray Makasulatan a prinsipyo. (Isa. 54:13) Kaukolan met so iyatendid saray miting tan magmaliw a maseseg ed ministeryo no labay tayon napansiansiay deen tan liket. Wala ray paraan pian makapibiang ed sarayan importantin kimey iray Kristianon agmananisiay pamilya ra. Imanoen ti’ pay situasyon nen Enza, * a maruksan susumpaen na asawa to. Sikatoy onlan manpulong sano asumpal to la ray kimey tod abung. Oniay inkuan nen Enza, “kada manpupulong ak et talagan bebendisyonan nen Jehova iray sagpot ko.” Sarayan bendisyon et nanresultad deen, inkakontento, tan liket.

5. Anton subok so nasasagmak na saray Kristianon agmananisiay kapamilyaan da, tan antoy makatulong ed sikara?

⁵ Nepeg a panseetan tayoy mikareenan ed saray agmananisian kapamilyaan tayo. Aliwan mainomay iya lapud no maminsan et walay ipagawa rad sikatayon sumlang ed saray prinsipyo na Biblia. Nayarin onsanok so arum ed sikara lapud panguunor tayod ibabagay Kasulatan. Balet, agtayo iya aabuloyan a mamatunda ed sikatayon manggawa na duga, ta onsabi panaon et makapikareenan tayo met lanlamang ed sikara. Siempre uunoren tayoy ibabaga na saray kapamilyaan tayo no ag-itan sumlang ed Biblia. Diad ontan et napaliisan tayoy agpantatalosan. (Basaen so Uliran 16:7.) No walay onlesan problema, maabig no imanoen tayo ray Makasulatan a simbawa diad saray publikasyon ya itatarya na matoor tan makabat ya aripen a klase tan na saray elder.​—Uli. 11:14.

6, 7. (a) Akin ya sumpaen na arum so membro na pamilya ran iyaaralan na saray Tasi nen Jehova? (b) Antoy nepeg a gawaen na sakey ya agi odino iyaaralan na Biblia no sikatoy susumpaen na pamilya to?

⁶ Niwalay deen ed pamilya no manmatalek tayod si Jehova tan panggunaetan tayon talosay liknaan na saray kapamilyaan tayo. (Uli. 16:20) Nagawaan iya na anggan saray agano ni labat ya manaaral na Biblia. Nayarin wala ray agmananisian kaasawaan ya abuloyan day asawa ran manaral na Biblia tan isipen da ni ingen ya makatulong itan ed pamilya ra. Balet ta wala ray arum a talagan onsumpa. Inamin nen Esther, a natan et Tasi la, ya sikatoy nampasnok a maong sanen naamtaan ton iyaaralan na saray Tasi nen Jehova so asawa to. Inkuan ton, “imbabantak tan pinopoolan ko ray libro tan magasin to.” Onia met so inkuan nen Howard, a diad gapo et kontra ed panaaral na asawa to: “Natatakot iray kaasawaan a lalaki ya onloob iray kaasawaan da ed sektan posiblin manloko labat ed sikara. Ompan ag-amta na asawan laki no antoy gawaen tod sayan ipapasen ton peligro, kanian kontraen to lay asawa to.”

⁷ Nepeg tayon tulongan so iyaaralan na Biblia a walaan na onsusumpan asawa ya namorian agto kaukolan ya itunday panaaral to. Natalonaan toy isusumpa no ipatnag toy inkauyamo tan respeto. (1 Ped. 3:15) Oniay imbaga nen Howard: “Misalsalamat ak ta nansiansian kalmado tan agmisasanok si asawak.” Oniay impaliwawa nen asawa to: “Labay ton ontunda ak lan manaral ta ibabaga ton a-brainwash ak la kuno. Imbes a mirasonan, imbagak a nayarin sikatoy duga, balet ta agko amta no panon. Kanian impabasak ed sikato imay aaralen  kon libro. Sikatoy inmabobon ed abasa to, tan baleg so epekto na satan ed sikato.” Tandaan a say liknaan na saray agmananisian kaasawaan et singa ra tinaynan odino imbaliwala no onlan manpulong so kaasawaan da. Balet napaliisan itan a liknaan no ipaseguro yoy panangaro yod sikara.

TULONGAN IRAN MANGAWAT ED TUAN PANAGDAYEW

8. Anton simbawa so inter nen apostol Pablo ed saramay Kristianon walaay agmananisian asawa?

⁸ Sinimbawa nen apostol Pablo iray Kristiano ya agda tataynan iray kaasawaan dan agmananisia. * (Basaen so 1 Corinto 7:12-16.) Magmaliw a maliket so sakey a Kristiano no isipen ton onsabi panaon et awaten met lanlamang na asawa to so katuaan. Balet sano inanabang tayoy mensahe na katuaan ed sikara, kaukolan a manalwar itayo, a singa idadanet na onggendan iran eksperiensya.

9. Sano inabang tayoy katuaan ed saray agmananisian kapamilyaan tayo, antoy nepeg tayon alwaran?

⁹ Eksayted a maong si Jason sanen naaralan toy katuaan. Inkuan to: “Labay kon ibaga iya ed amin!” Sano kombinsido lay iyaaralan na Biblia a say aaralen to et katuaan, nayarin agaylay liket to tan satan ya lanang so bungay sangi to. Nayarin iilaloan ton awaten a tampol na saray kapamilyaan to so mensahe na Panarian, balet ta ompan ag-ira interesado. Antoy reaksion na asawa nen Jason ed inkaseseg to? Inkuan na asawa to: “Onsasawa ak lad ibabaga to.” Sakey a biin angawat ed katuaan kayari na 18 taon manlapud impangawat na asawa tod katuaan so angibagan: “Kaukolan a kalkanak itan ya aralen.” No walay iyaaralan yon say asawa to et ag-interesado ed tuan panagdayew, agta maabig no sikatoy naynay yon ipasal pian mataktikan nipaliwawa toy katuaan? Oniay inkuan nen Moises: “Mantedter naani a singa uran so panangibangat ko, Say panangipaliwawak napelag naani a singa linaew; Singa melag ya uran ed tapew na malangwer a dika.” (Deu. 32:2) Say sandaraiset a panginabang ed katuaan diad dugan panaon et mas maabig nen say pangibunton na dakel a salita.

10-12. (a) Antoy insimbawa nen apostol Pedro ed saray Kristiano ya agmananisiay kaasawaan da? (b) Panon ya inyaplika na sakey ya iyaaralan na Biblia imay simbawan walad 1 Pedro 3:1, 2?

¹⁰ Oniay apuyanan ya simbawa nen apostol Pedro ed saray Kristianon asawan bibii a say kaasawaan da et agmananisia: “Manpasakop kayo ed kaasawaan yon dili, ta no bilang walaray ag-ontutulok ed salita, magmaliw iran matulok lapud ugali yo anggano agkayo mansalita, ta nanenengneng da so masimpit ya ugali yo ya atekepan  na aralem a panagrespeto.” (1 Ped. 3:1, 2) No mapasakop tan marespeto so asawan bii anggaman aliwan marakep so panagtrato na asawa to, natulongan to iyan mangawat ed katuaan. Ontan met ed kaasawaan a lalaki, kaukolan ya ipatnag day maridios iran kualidad tan nepeg dan aroen so pamilya ra anggaman susumpaen ira na agmananisian asawa ra.​—1 Ped. 3:7-9.

¹¹ Diad panaon tayo, dakel so agunggonaan diad pangiyaaplika rad simbawa nen Pedro. Sakey lad satan si Selma. Sanen sikatoy inyaralan na saray Tasi nen Jehova, ag-itan agustoan na asawa ton si Steve. Inamin nen Steve: “Nagmaliw ak ya mapasnok, seloso, tan mapaga.” Inkuan nen Selma ya, “Dati lan mairap a pidenengan si Steve, anggan sanen agak ni manaaral. Sikatoy mapaspasnok, tan lalon linmoor itan sanen nanaral ak na Biblia.” Antoy akatulong ed si Selma?

¹² Anonotan nen Selma so naaralan tod samay Tasi ya angiyaral ed sikato. Inkuan to: “Sakey ya agew et agko labay so manaral na Biblia, ta diad samay labi antis na satan et amasnok a maong si Steve sanen walay ibabagak ed sikato. Kanian aliwliway liknaan ko tan kaskasian koy sarilik. Kayarik ya inistoryad samay mangiyaaral ed siak so agawa tan no antoy naliliknak, impabasa tod siak so 1 Corinto 13:4-7. Kabasak et kuan kon, ‘Ag-ira ’ya gagawaen nen Steve ed siak.’ Balet nauman so panmoriak sanen tinepet ton, ‘Sika ey, pigarad sarayan kualidad so ipapanengneng mod si Steve?’ Say ebat ko et, ‘Anggapo, ta agaylay irap ton piulopan.’ Oniay mauyamon imbaga to ’may agi, ‘Selma, siopay manaaral pian magmaliw a Kristiano a, sika odino si Steve?’” Naisip nen Selma ya kaukolan ton umaney panmoria to. Inkuan ton: “Impikasik ed si Jehova ya tulongan to ak pian mas naarok si Steve. Kalkalnan anguman so situasyon.” Kayari 17 a taon, inawat nen Steve so katuaan.

NO PANON A MAKATULONG SO ARUM

13, 14. Panon a makatulong so kongregasyon ed saray agagin agmananisiay kapamilyaan da?

¹³ Singa ed sandaraiset a tedter na uran ya ontutulong ed ibaleg na tanaman, makatulong met so balang sakey ed kongregasyon pian magmaliw a maliket iray agagin agmananisiay kapamilyaan da. Oniay inkuan nen Elvina ya taga Brazil: “Say panangaro na saray agagi so akatulong ed siak a makapansiansian matoor.”

¹⁴ No ipatnag na kongregasyon so kaabigan tan panangiyansakit ed saray agmananisian kapamilyaan na agagi, baleg so epekto na satan ed sikara. Sakey ya asawan laki a taga Nigeria ya angawat ed katuaan kayari na 13 taon manlapud  impangawat na asawa to so angibagan: “Legan kon manbiabiahe a kaibay sakey a Tasi, aderalan kami. Sikatoy kinmerew na tulong ed saray kaagian tod asingger a baryo, tan sinangkaili da kami ed saman a labi. Inasikaso da kamin singa no abayag da kami lan kabat. Diad saman et aliknak a tampol imay panangaro na saray Kristiano a lanang ya ibabaga nen asawak.” Sakey ya asawan bii a taga England ya angawat ed katuaan kayari na 18 taon manlapud impangawat na asawa to so angibagan: “Sikamin sanasawa et mabetbet ya iimbitaan na saray Tasi ya mangan. Aliknak ya welcome ak.” Onia met so inkuan na sakey ya asawan laki a taga England ya nagmaliw a Tasi: “Bibisitaen kami na saray agagi odino iimbitaan da kamid abung da, tan anengneng kon maasikaso ra. Lalon apaneknekan ko itan sanen dakel so binmisitad siak nen naospital ak.” Kasin nipanengneng mo met so ontan a panangiyansakit ed saray agmananisian kapamilyaan na agagi tayo?

15, 16. Panon a napansiansia na sakey so liket anggaman ag-awaten na kapamilyaan to so katuaan?

¹⁵ Siempre, anggano maabig so ipapanengneng tayo tan mataktikay panginanabang tayoy katuaan ed saray agmananisian kapamilyaan tayo, nayarin aliwan amin ed sikara et mangawat na katuaan. Arum ed sikara et mansiansian ag-interesado odino talagan sumpa. (Mat. 10:35-37) Balet, walay maabig a resulta no ipatnag na saray Kristiano iray maridios a kualidad. Sakey a datin agmananisian asawan laki so angibagan: “Sano ipapatnag na mananisian asawa iratan ya mararakep a kualidad, agtayo amta no antoy epekto na satan ed isip tan puso na agmananisian asawa. Kanian itultuloy mo labat a tulongay agmananisian asawam.”

¹⁶ Anggaman ag-awaten na pamilya na sakey ya agi so katuaan, nayarian to nin siansiay magmaliw a maliket. Ag-inawat na sakey ya asawan laki so katuaan anggaman 21 a taon lan mansasagpot so asawa to. Oniay imbaga na asawan bii: “Apansiansiak so liket ko lapud panseseetan kon paliketey Jehova, manmamatoor ak ed sikato, tan pankikimeyan kon pabiskegey espiritualidad ko. Mas apaapit ak ed si Jehova tan asalimbengan koy pusok lapud regular a personal a panagaral, iyaatendid saray miting, panagpulong, tan panutulong ed saray kakongregasyon ko.”​—Uli. 4:23.

AG-ONSUSUKO!

17, 18. Panon a mansiansian maliket so sakey a Kristiano anggaman agmananisiay kapamilyaan to?

¹⁷ No matoor kan Kristiano a walaan na agmananisian kapamilyaan, itultuloy mo ran tulongan. Tandaan ya “si Jehova agto ikaindan so baley to nipaakar ed baleg a ngaran to.” (1 Sam. 12:22) Agka ikaindan nen Jehova basta manmatoor kad sikato. (Basaen so 2 Awaran 15:2.) Kanian “manliket kan maong ed si Jehova.” On, “ipiam ed si Jehova so dalan mo, tan manmatalek kad sikato.” (Sal. 37:4, 5, NW) ‘Mantultuloy kad pikakasi,’ tan manmatalek kan tulongan ka na maaron Ama tayod tawen ya sungdoay amin a kairapan.​—Roma 12:12.

¹⁸ Kerewen ed si Jehova so tulong na masanton espiritu to pian niwalay deen ed pamilya. (Heb. 12:14) On, posiblin niwalay deen ya manresultad ikiwas na saray agmananisian kapamilyaan yo. Niwalad sikayo so liket tan deen na nonot, no ‘gawaen yo so amin a bengatla parad kigloriaan na Dios.’ (1 Cor. 10:31) No panggunaetan mon gawaen iraya, makaseguro kan suportaan tan aroen ka na saray agagi.

[Saray paimano ed leksab]

[Tepetepet Parad Panagaral]

[Litrato ed pahina 28]

Mananap na dugan panaon pian ipaliwaway pananisiam

[Litrato ed pahina 29]

Ipanengneng so panangiyansakit ed saray agmananisian kaasawaan