“Con bo por sa cu lo bo no salba bo [casa]?”​—1 COR. 7:16.

1. Ora un hende acepta e mensahe di Reino, con otro miembronan di su famia por reacciona?

NA UN ocasion cu Hesus a manda su discipelnan bay predica, el a bisa nan: “Segun cu boso ta bay, predica y bisa: ‘E Reino di cielo a yega cerca.’ ” (Mat. 10:1, 7) E bon noticia aki lo a trece paz y felicidad pa esnan cu a acept’e di curason. No obstante, Hesus a spierta su apostelnan cu hopi hende lo a opone e obra di predica e Reino. (Mat. 10:16-23) Anto ora e oposicion aki ta bini di miembronan di famia cu ta rechasa e mensahe di Reino, e ta mas dificil pa soporta.​—Lesa Mateo 10:34-36.

2. Dicon un cristian por ta feliz aunke su famia ta dividi pa motibo di religion?

² Acaso esaki ta nifica cu cristiannan cu ta biba den un cas dividi pa motibo di religion no por ta feliz? Claro cu no! Aunke tin biaha oposicion di famia por ta severo, no ta tur ora esey ta asina. Ademas, no necesariamente nos famianan lo sigui opone nos pa semper. Pero sea cual sea e caso, hopi ta depende di e manera cu e cristian ta reacciona na oposicion y apatia. Y no lubida, Jehova ta bendiciona esnan cu ta leal na dje; pues, nos por ta feliz asta den situacionnan desfaborabel. Un cristian por ta mas feliz si e ta: (1) haci esfuerso pa por tin paz den su famia y (2) haci esfuerso sincero pa yuda miembronan di su famia acepta adoracion berdadero.

HACI ESFUERSO PA CULTIVA PAZ DEN BO FAMIA

3. Dicon un cristian mester haci esfuerso pa tin paz na cas?

³ Pa e simia di husticia produci fruta den un famia, cu otro palabra, pa un famia acepta e berdad, mester tin paz den cas. (Lesa Santiago 3:18.) Pues, aunke no  ta tur hende den cas ta Testigo, esun cu ta Testigo mester haci esfuerso sincero pa crea un ambiente di paz na cas. Con e por logra esey?

4. Con cristiannan por mantene nan paz mental?

⁴ Como cristian, nos mester mantene nos paz mental. Kico por yuda nos? Oracion sincero, pasobra esaki por duna nos e “paz di Dios cu ta surpasa tur comprondemento.” (Flp. 4:6, 7) Estudio di Bijbel tambe ta contribui na paz y felicidad. Pero pa esey por ta e caso, nos tin cu aplica loke nos ta siña den nos bida. (Isa. 54:13) Participacion na reunionnan di congregacion y den sirbishi di veld tambe ta esencial si nos kier tin paz y felicidad. Generalmente, e rumannan cu tin famia cu no ta den e berdad semper ta haya un manera pa haci e cosnan importante ey. Enza, * por ehempel, kende su casa ta opon’e severamente, ta bay predica despues cu e ta cla cu su quehaceres di cas. Enza a bisa: “Cada bes cu mi haci esfuerso pa comparti e bon noticia cu otro hende, Jehova ta bendiciona mi. Mi ta haya bon resultado.” E bendicionnan ey ta dun’e paz, felicidad y satisfaccion.

5. Ki situacion dificil cristiannan cu ta nan so den e berdad ta enfrenta hopi biaha, y unda nan por haya yudansa?

⁵ Como cristian, nos tin cu haci esfuerso pa cultiva un relacion pacifico cu miembronan di famia cu no ta Testigo. Pero no ta tur ora esaki ta facil. Pasobra tin biaha, nan kier pa nos haci cosnan cu ta bay contra principionan biblico. Y si nos no haci manera nan kier, algun miembro di famia por asta rabia. Pero ora nos para firme, a largo plaso, nos lo por tin paz den famia. Ma si e asunto no ta bay contra principio biblico, nos no tin nodo di keda para riba nos punto ya cu esaki por causa friccion innecesario. (Lesa Proverbionan 16:7.) Pues, ki ora cu nos haya nos cu un problema, ta importante pa busca conseho biblico den e publicacionnan di e esclavo fiel y prudente y cerca e ancianonan.​—Pro. 11:14.

6, 7. (a) Dicon algun hende ta opone miembronan di famia cu cuminsa studia Bijbel cu Testigonan di Jehova? (b) Con un Testigo of un studiante di Bijbel mester reacciona ora e hay’e cu oposicion di famia?

⁶ Pa nos por tin paz den cas, nos mester confia den Jehova y haci esfuerso pa compronde e miembronan di famia cu no ta den e berdad. (Pro. 16:20; 24:3) Asta personanan cu a caba di cuminsa studia Bijbel por haci esaki. Tin hende no tin problema cu nan casa ta studia Bijbel cu Testigonan di Jehova. Podise nan ta asta admiti cu esey ta bon pa nan famia. Toch, otronan sa opone nan casa severamente. Esther, kende awor ta un Testigo, a admiti cu el a rabia masha hopi mes ora su esposo a cuminsa studia Bijbel cu Testigonan di Jehova. Esther a bisa: “Mi tabata tira su bukinan afo of kima nan.” Howard, kende na prome instante tabata contra pa su esposa studia Bijbel cu Testigonan di Jehova, a remarca: ‘Hopi homber tin miedo pa nan casa no ta cayendo den un trampa di secta religioso. Y debi cu nan ta kere cu nan esposa ta den peliger, nan por cuminsa opon’e.’

⁷ Ta importante pa yuda un studiante compronde cu, a pesar cu su casa ta opon’e, e no mester stop di studia Bijbel. Pasobra hopi biaha, e por resolve un asunto si e trata su casa cu suavidad y respet. (1 Ped. 3:15) Howard a bisa: “Mi ta masha contento cu mi esposa a keda calmo y no a perde cabes!” Anto su esposa a splica: “Howard a exigi pa mi stop cu mi estudio di Bijbel. Segun e, nan tabata brainwash mi. En bes di discuti cu ne, mi a bis’e cu por ta e tin rason, pero honestamente ami no a ripara esey. Pesey mi a pidie lesa e buki cu mi  tabata studiando. Anto el a haci esey, pero e no por a bay contra di loke e buki ta bisa. Loke el a lesa a haci un impacto profundo riba dje.” Ta bon pa tene na mente cu un hende cu no ta Testigo por sintie bandona y pensa cu su matrimonio ta na peliger ora su casa ta participa den actividadnan cristian. Pero si e studiante di Bijbel of e Testigo sigui papia y trata su casa cu suavidad y amor, e casa lo por stop di preocupa.

YUDA NAN ACEPTA ADORACION BERDADERO

8. Ki conseho apostel Pablo a duna cristiannan cu nan casa no ta den e berdad?

⁸ Apostel Pablo a conseha cristiannan pa no bandona nan casa djis pasobra e no ta un Testigo. * (Lesa 1 Corintionan 7:12-16.) Mas bien, un cristian mester tene na mente cu su casa lo por bin acepta e berdad algun dia. E punto di bista aki lo por yud’e mantene su goso a pesar cu su famia ta dividi pa motibo di religion. No obstante, e mester ta cauteloso ora e kier comparti e mensahe di Bijbel cu su casa, manera e siguiente experencianan lo mustra.

9. Kico bo mester tene cuenta cu ne ora bo kier comparti e berdad cu otro miembronan di famia?

⁹ Cordando con emociona e tabata ora el a haya e berdad, Jason a bisa: “Mi kier a conta tur hende loke mi a siña.” Si, ora un studiante di Bijbel compronde cu loke e ta siñando ta e berdad, e por bira asina contento cu tur ora bay e kier papia di Bijbel. Anto kisas e ta spera cu su famia ta acepta e mensahe di Reino di biaha, pero nan lo por reacciona completamente diferente. Con e casa di Jason a reacciona ora Jason a cuminsa predica na dje cu entusiasmo? E casa ta corda: ‘Jason tabata papia asina tanto di e berdad, cu e tabata fada mi.’ Un otro señora, kende a bin acepta e berdad 18 aña despues di su casa, a bisa: “Ami tabatin mester di tempo pa acepta e berdad.” Pues, si bo ta studiando Bijbel cu un persona kende su casa no ta interesa den e berdad, ta bon pa tene algun sesion di practica cu e studiante pa mustr’e con e por splica su casa e berdad cu tacto. Moises a bisa: “Laga mi siñansa cay manera awasero, mi discurso gotia manera serena, manera gota di awa riba yerba fresco.” (Deu. 32:2) Si, algun palabra apropia na e momento corecto ta logra mas cu inunda e persona cu palabra.

10-12. (a) Ki conseho apostel Pedro a duna cristiannan kende nan casa no ta sirbidor di Jehova? (b) Con un studiante di Bijbel a siña aplica e conseho na 1 Pedro 3:1 y 2?

¹⁰ Apostel Pedro tambe a duna conseho na esposanan cristian kende nan casa no ta  den e berdad. El a skirbi: “Sea sumiso na boso esposo, ya cu si tin algun cu no ta obedece e palabra, boso por gana nan na e fe pa medio di boso conducta sin papia ni un pia di palabra, como cu nan ta testigo di boso conducta puro acompaña pa respet profundo.” (1 Ped. 3:1, 2) Si un esposa ta sumiso y tin respet profundo pa su casa asta si su esposo ta trat’e malo, e por yuda su esposo acepta e berdad. Di mes manera, un esposo cristian mester comporta su mes na un manera cu ta agrada Dios y sigui eherce su hefatura cu amor aunke su casa ta opon’e.​—1 Ped. 3:7-9.

¹¹ Hopi cristian tabatin bon resultado ora nan a sigui e conseho di Pedro. Tuma por ehempel e caso di Selma. Ora Selma a cuminsa studia Bijbel cu Testigonan di Jehova, su casa, Steve, no a keda contento. Steve a admiti, “Mi a rabia; mi tabata insigur, jaloers y dominante.” Selma a bisa: ‘Asta prome cu mi a haya e berdad, mi mester a wak bon kico mi ta papia of haci pa Steve no rabia, pasobra e tabata rabia masha lihe. Pero ora mi a cuminsa studia Bijbel, el a bira pio.’ Kico a yuda mehora e situacion?

¹² Selma ta corda un les masha valioso cu el a siña for di e Testigo cu a studia Bijbel cu ne. Selma a conta: “Tabatin un dia cu mi no kier a studia. E anochi prome, ami cu Steve tabatin un desacuerdo, y el a dal mi. Mi tabata tristo y a sinti duele di mi mes. Anto mi a conta e ruman muher kico a pasa y con mi tabata sinti mi, y e ruman a pidi mi lesa 1 Corintionan 13:4-7. Segun cu mi tabata lesa e versiculonan, mi a cuminsa rasona, ‘Steve no ta amoroso manera e textonan aki ta bisa.’ Pero e ruman a yuda mi cambia mi manera di pensa. El a puntra mi, ‘Cuanto biaha abo ta demostra amor na bo casa manera e textonan aki ta mustra?’ Mi a contest’e, ‘Niun biaha, pasobra e ta un persona dificil pa biba cu ne.’ Cu un stem suave, e ruman a bisa mi, ‘Selma, ta ken kier bira cristian? Abo of Steve?’ E ora ey, mi a realisa cu mi mester a cambia mi manera di pensa; mi a haci oracion y a pidi Jehova yuda mi mustra mas amor na Steve. Pocopoco nos relacion a cuminsa mehora.” Despues di 17 aña, Steve a acepta e berdad.

OTRONAN TAMBE POR YUDA

13, 14. Con otronan den congregacion por yuda rumannan cu tin famia cu no ta den e berdad?

¹³ Mescos cu cada gota di awasero cu muha tera ta yuda mata crece, asina cada un di nos den congregacion por contribui na e felicidad di nos rumannan cu ta biba den un cas dividi pa motibo di religion. Elvina di Brazil a bisa: “Amor di mi rumannan a yuda mi para firme den e berdad.”

 ¹⁴ Ora rumannan den congregacion ta bondadoso y ta mustra interes den miembronan di famia cu no ta Testigo, esey por touch nan curason. Un homber na Nigeria kende a acepta e berdad 13 aña despues di su casa a bisa: “Un biaha cu mi tabata den auto hunto cu un Testigo, su auto a daña. Mesora el a busca contacto cu Testigonan cu tabata biba den bisindario, y nan a hospeda nos e anochi ey. Nan a percura pa nos comosifuera nan tabata conoce nos fo’i chikito. Mi a sinti e amor cristian cu mi casa semper a papia di dje.” Un señora na Inglatera cu a bini den e berdad 18 aña despues di su casa a bisa: “E Testigonan tabata invita ami cu mi casa pa bin come. Y semper mi a sinti mi na cas cerca nan.” * Un homber di Inglatera kende cu tempo tambe a bira Testigo a bisa: “E rumannan tabata invita ami cu mi casa na nan cas of nan tabata bin bishita nos. Nan tabata kier nos bon. Y mi a nota esey specialmente tempo mi tabata den hospital, pasobra hopi di nan a bin bishita mi.” Tin manera cu abo tambe por mustra interes den miembro di famia di e rumannan cu ta nan so den e berdad?

15, 16. Kico por yuda un sirbidor di Jehova keda feliz aunke otro miembronan di su famia no acepta e berdad?

¹⁵ Asta si un ruman semper a comporta su mes fiel y a predica cu tacto na su famia pa añanan largo, no ta sigur cu su casa, yiu, mayor of otro miembro di su famia lo acepta adoracion berdadero. Si, algun miembro di famia ta keda indiferente of asta ta cuminsa opone e ruman severamente. (Mat. 10:35-37) Ma ora nos ta desplega cualidadnan cristian, esey por tin bon efecto riba nos famia. Un esposo cu a bira Testigo despues a bisa: “Hende no por imagina nan cuanto impresion e bunita cualidadnan di un casa por haci riba e mente y curason di esun cu no ta Testigo. Pues no entrega, sigui haci esfuerso.”

¹⁶ Asta si miembronan di famia di un sirbidor di Jehova no bira Testigo, e por ta feliz. Un ruman muher cu no tabatin exito despues cu el a haci esfuerso 21 aña largo pa yuda su casa acepta e berdad, a bisa: “Mi ta mantene mi goso pasobra mi ta haci esfuerso pa agrada Jehova, keda leal na dje y ta haci mi best pa fortalece mi relacion cu ne. Mi ta tuma tempo pa studia Bijbel, asisti na reunion, participa den sirbishi di veld y yuda otronan den congregacion. E actividadnan spiritual aki ta yuda mi hala mas cerca Jehova y di e manera ey proteha mi curason.”​—Pro. 4:23.

NO ENTREGA!

17, 18. Con un cristian por mantene su goso aunke su famia ta dividi pa motibo di religion?

¹⁷ Si bo ta un cristian fiel y otro miembronan di bo famia no ta Testigo, no entrega. Corda cu “[Jehova] lo no bandona su pueblo pa motibo di su gran nomber.” (1 Sam. 12:22) Tanten cu bo ta leal na dje, e ta cu bo. (Lesa 2 Cronicanan 15:2.) Pues, ‘busca bo goso den Jehova.’ Si, “pone bo bida den man di SEÑOR, konfia den djE.” (Sal. 37:4, 5, BPK) “Persevera den oracion” y confia cu nos amoroso Tata selestial por yuda bo soporta tur clase di dificultad.​—Rom. 12:12.

¹⁸ Pidi Jehova yuda bo mediante su spirito santo pa crea un ambiente pacifico den bo famia. (Heb. 12:14) Y cu tempo esaki lo por conmove curason di esnan cu no ta Testigo. Anto segun cu bo ta “haci tur cos pa e gloria di Dios”, lo bo ta feliz y lo bo tin paz mental. (1 Cor. 10:31) Bo por ta sigur tambe cu bo rumannan den congregacion lo duna bo nan sosten y amor.

[Nota]

[Preguntanan di Estudio]

[Plachi na pagina 30]

Scoge e momento apropia pa splica bo creencianan

[Plachi na pagina 31]

Mustra interes den casanan cu no ta Testigo