Familiachö llapantsik diosta mana sirwirpis kushishqa këta puëdentsikmi

“¿Imanötaq musyanki [majëkita] mana salvanëkipaq kaqta?” (1 COR. 7:16, NM.)

RESPUESTANTA ASHI:

¿Imanötaq familiëki mana Testigo këkaptimpis wayikichö alli pasakï kanampaq yanapakunkiman?

¿Imataraq rurankiman familiëki Diospita yachakïta munarinampaq?

¿Imanötaq yanapëta puëdentsik mana Testigo familiayoq cristiano mayintsikkunata?

1. Pipis Diospa yachatsikïninta chaskikuptinqa, ¿imataq familiachö pasakunan karqan?

“DOSNINTSIC mandacoq cananpaq tiempu chäramunnam” nir yachatsikuyänampaqmi Jesus qateqninkunata mandarqan (Mat. 10:1, 7). Kë alli willakïkunata chaskikoq nunakunaqa yamë këta y kushishqa këtam tariyänan karqan. Tsënö kaptimpis Jesusqa qateqninkunata willarqanmi yachatsikuyanqanta wakin nunakuna chikiyänampaq kaqta (Mat. 10:16-23). Höraqa kikinkunapa familiankunallapitam tsë chikikoqkuna kayänan karqan, y tsëqa alläpa llakikïpaqmi kanan karqan (lei Mateo 10:34-36).

2. ¿Imanirtaq kushishqa këta puëdentsik familiantsikchö Jehoväta llapankuna mana kuyëkäyaptimpis?

² ¿Këqa rikätsikun familiantsikkuna Jehoväta mana sirwiyaptin kushishqa këta mana tarinapaq kaqtatsuraq? ¡Manam! Rasumpa kaqchöqa, wakinkuna alläpa chikishqa kayaptimpis, wakinkunaqa manam chikishqatsu kayan. Hinamampis, chikishqa kaqkunaqa manam tsënöllatsu imëyaqpis kakuyanqa. Tsëqa, ¿imanötaq kushishqa këta tarishwan familiantsik chikikämashqa o mana alli rikëkämashqapis? Kikintsik imanöpis kanqantsikpita y chikimaqnintsikkunata imanöpis rikanqantsikpitam. Imëkata rurëkämashqapis Diosllapaq kashqaqa, bendecimäshunmi y kushishqam kashun. Kananmi yachakurishun mana Testigo familiayoq cristiänokuna kushishqa kayänampaq ishkë yanapakïkunata: 1) wayichö shumaq pasakï kanampaq kallpachakuyanqan y 2) Jehoväta sirwiyänampaq imëkanöpa yanapayanqan.

WAYICHÖ ALLI PASAKÏ KANAMPAQ YANAPAKÏ

3. ¿Imanirtaq tukïnöpa yanapakïta tïrashwan familiantsikchö alli pasakï kanampaq?

³ Familiantsikkuna Diospita yachakïta munariyänampaqqa, alläpam precisan wayichö alli pasakïchö kawakunantsik (lei Santiagu 3:18). Tsëmi familiantsik Diospita manaraq yachakushqa kayaptinqa, wayichö alli pasakï kanampaq yanapakunantsik. ¿Imanötaq tsëta lograshwan?

4. ¿Imanötaq chikishqa këkarpis shonquntsikchö yamë këta tarishwan?

 ⁴ Cristiänokunaqa mana ras piñakoqmi kanantsik. Tsëpaqqa llapan shonquntsikwanmi Diosta mañakunantsik, tsënöpam “allapa espantepaq juclaya shonquta” qoykamäshun (Fili. 4:6, 7). Hinamampis yamë këta y kushishqa këtaqa tarishun Jehoväpita yachakur y kawënintsikchö yachakunqantsiknölla rurarmi (Isa. 54:13). Hina reunionkunaman ëwar y Diospita yachatsikoq yarqurmi, tsë yamë y kushishqa këta tarishun. Tsëmi Jehoväman mana creeq familiayoqkunaqa imëkanöpis tiempota horqayan Diospa kaqta rurayänampaq. Enza * shutiyoq cristiänapa nunanqa paqwëmi chikikun warmin Jehoväpa testïgon kananta, tsëmi Enzaqa wayinchö llapankunata rurapakurïkur-raq Diospita yachatsikoq yarqun. Y kënömi nin: “Jehová bendecimaptinmi cada yachatsikoq yarqurqa alli yarqapakö”. Këmi rikätsikun yamë këta tarinqanta y kushishqa kawakunqanta.

5. ¿Ima problëmakunapataq pasayan mana Testigo familiayoqkuna, y mëchötaq yanapakïta tariyanman?

⁵ Alläpam precisan mana Testigo kaq familiantsikkunawan yamë këta tïranantsik. Sasaran kanqa, pëkunaqa Bibliapa contran imatapis ruranatam höraqa munayanqa. Itsa wakinkunaqa munayanqankunata mana rurashqa piñakuyanqa, tsënö kaptimpis, tiempowanqa familiantsikwan alli pasakïchö kawakunapaqmi yanapamäshun. Pero Bibliapa contran mana kaptinqa allim rurarishwan, tsënöpam piñatsinakïman ardëpaqa chäshuntsu (lei Proverbios 16:7 *). Mana allikunapa pasarqa, anciänokunapa yanapakïninta y ‘mäcoq, mäcoq, cumplidu sirweq’ horqamunqan publicacionkunachö yanapakïta imëpis ashishun (Pro. 11:14).

6, 7. a) ¿Imanirtaq wakinkunaqa munayantsu familiankuna testïgokunawan Bibliata estudiayänanta? b) ¿Imataraq ruranman Bibliata estudiëkaq o huk Testigo yachakïkanqampita familiankuna chikikuyaptin?

⁶ Wayichö mana Testigo familiantsikwan alli pasakïchö kawakunapaqqa, Jehovämanmi markäkunantsik y pëkuna creiyanqantam respetanantsik (Pro. 16:20). Hina tsënöllam rurayanman Bibliata tsëraq estudiëkaqkunapis. Wakinkunaqa allitanömi rikäyan majankuna Bibliata estudiayanqanta, hasta familianta yanapanampaqtanömi rikäyan. Tsënö kaptimpis wakinqa alläpam piñakuyan. Testïgona tikrashqa Esthermi, Jehoväpa testïgonkunawan nunan estudiar qallëkuptin “paqwë piñakurqan”. Pëmi kënö willakun: “Wakin publicacionninkunatam basüraman hitarapurqä y wakintanam kayëkapurqä”. Y qallananchö warmin Bibliata estudiananta mana munaq Howardnam kënö nin: “Pï më nunakunam pensayan mana alli religionkunaman warminkuna ëwëkäyanqanta. Tsënö kanqanta pensarmi wakinkunaqa pasëpa piñakuyan”.

⁷ Bibliata estudiëkaqpa majan chikikuptinqa, ¿imanöraq yanapashwan? Estudiëta mana haqirinampaqmi shumaq entiendetsinantsik. Itsa shumaq kuyëpa y respëtowan majanta rikaptinqa hukläyana pensanqa (1 Ped. 3:15). Howardmi kënö willakun: “Alläpam agradecikö mana alli pensanqäpita warmï mana piñakunqanta”. Y warminnam kënö willakun: “Bibliata estudiëta haqirinäpaqmi nimarqan. Y mana rasun kaqta yachëkätsiyämanqantam nimarqan. Pleitokïta mana munarmi nimanqan rasumpanö kanqanta nirir, mana tsënö pensanqäta rikäratsirqä. Estudiëkanqä librota kikin leinampaqmi nirirqä. Y leirirnam ni imatapis nimarqannatsu y paqwë espantakurqan”. Hina allim yarpashwan huk cristiano Diospa kaq rurëkunaman ëwaptin majan hapallanlla sientekunqanman o celoso kanqanman. Kuyëllapa y mana piñatsipa parlapaptinqa, más yamëmi majan sientekunqa.

RASUMPA KAQ RELIGIONMAN YËKUYÄNAMPAQ YANAPË

8. ¿Imatataq Pablu yarpätsin mana Testigo majayoq cristiänokunata?

⁸ Apóstol Pabluqa cristiänokunata consejan mana Testigo majankunata mana  haqiriyänampaqmi (lei 1 Corintios 7:12-16). * Hina imëllapis tsë majan Diospita yachakur qallanampaq kaqtam yarpätsin, tsëmi yanapanqa imëpis kushishqalla kanampaq. Pero majantsik Biblia ninqanta wiyakunanta munarpis, shumaqllam parlapänantsik. Tsënö ruranan imanir precisanqanta rikärishun.

9. ¿Imatataq yarpänantsik mana Testigo familiantsikta Bibliapita parlapëta munarqa?

⁹ Bibliata estudiëkaqkuna rasun kaqta yachakïkäyanqanta cuentata qokurirqa, alläpa kushikurmi më tsëchöpis yachakuyanqampita parlayan y familiankuna Diospita yachatsikïkunata raslla yachakuriyänantam shuyaräyan. Tsëmi pasarqan Fred shutiyoq cristiänota. “¡Pï mëtam willëta munëkoq kä!” nirmi yarpan. Tsënö kaptimpis, höraqa manam yachakïta munayanllatsu. Fredpa warminmi kënö nin: “Tsëllapaqmi imëpis parlapäkëkämaq”. Hina parlarishun nunan bautizakunqampita chunka puwaq watakuna pasanqanchöraq huk warmi Bibliata estudiar qallanqampaq. Pëmi kënö nin: “Noqaqa ichikllapa ichikllapa yachakïtam munarqä”. Diospita yachakïta mana munaqpa nunanta o warminta yachëkätsirqa, allim kanman yachakïkanqampita majanta imanöpis parlapänampaq kaqta yacharatsishqaqa. Moisesmi kënö nirqan: “Imëka tamyanömi yachatsikïnïqa shutumunqa, shullya shoqukaqnömi ninqäqa kanqa, qewakuna hananman shumaq tamyamoqnö y qorakunaman [jachakunaman] chirapämoqnömi kanqa” (Deu. 32:2). Lloqllatsikoq tamyatanöraq Bibliapita mëtsikata yachatsinapa rantinqa, chirapa tamya patsata uqütseqnö wallka wallkalla yachatsinqantsikmi masqa shonqunman charkunqa.

10-12. a) ¿Ima consëjotataq qorqan apóstol Pedru mana Testigo majayoq cristiänokunata? b) ¿Imanötaq yachakurqan Bibliata estudiëkaq warmi 1 Pedru 3:1, 2 texto ninqannö rurëta?

¹⁰ Diosnintsikmi santo espïritunwan apóstol Pëdruta qellqatsirqan Diosman mana creikoq nunayoq warmikunapaq kënö nir: “Casadu warmicuna, Diosnintsicpa alli willaquininman qowequicuna mana creyiyaptinpis, pecunapa mandaduncho cawacuyë. Tsemi respetosa y alli cawacuyanqequita ricarnin, qowequicunapis Diosnintsicmanna paqwepa creyicuyanqa, Diosnintsicpaq mana parlapëcaptiquipis” (1 Ped. 3:1, 2). Awmi, huk cristiänaqa shumaq y kuyëpa nunan mana tratëkaptimpis, Diospita yachakunampaq yanapëta puëdenmi shonqumpita patsë respëtowan tratarqa. Tsënöllam hina mana Testigo warmiyoq cristiänopis shumaq kuyakïpa warminta tratanman warmin mana alli trataptimpis (1 Ped. 3:7-9).

¹¹ Kanan witsan atskaq cristiänokunam apóstol Pëdrupa consëjon alli kanqanta cuentata qokuyashqa. Selma shutiyoq cristiana pasanqanta rikärishun. Testïgokunawan Bibliata estudiar qallëkuptinmi Steve shutiyoq nunan alläpa piñakurqan. Kikin Stevemi kënö nin: “Alläpam piñakurqä, celösom sientekurqä y desconfiarqämi”. Warminnam kënö nin: “Manaraq Bibliata estudiaptïpis pëwan kawëqa sasam karqan. Raslla piñakoq kaptinmi imata ruranäpaq  o ninäpaq kaqtapis alliraq pensaq kä. Bibliata estudiar qallëkuptïnäqa más feyum tikrakurirqan”. ¿Imataraq Selma rurarqan?

¹² Bibliapita yachatseqnin cristiana yachatsinqantam imëpis yarparqan. Selmam kënö nin: “Huk kutim Bibliata estudianäpaq gänasnï karqantsu. Paqaspam Stevewan pleitoshqa kayarqä, pëqa paqwëmi noqawan piñakurqan, tsëmi llakishqa y pasëpa mana alli sientekurqä. Y tsë llapantam Bibliapita yachatsimaqnï nanata willarqä, y pënam 1 Corintios 13:4-7 texto ninqanta leinäpaq nimarqan. Kënö ninqätam yarpä: ‘Steveqa manam imëpis këchö ninqannöqa kuyakïpa tratamashqatsu’. Tsëmi kënö nimarnï consejamarqan: ‘Y qamqa, ¿këchö ninqannöku imëllapis nunëkita kuyakïwan tratashqanki?’. Aksë o yaqa kaptin noqapis shumaq tratanä sasaraq kanqantam nirqä. Tsënam shumaqllapa kënö nimarqan: ‘Selma, ¿pitaq Jehoväpita yachakïkan? ¿Steveku o qamku?’. Tsëran cuentata qokurirqä noqapis cambianäpaq kaqta. Jehovätam alläpa mañakurqä shumaq kuyakïpa nunäta tratanäpaq. Ichikllapa ichikllapam alliyäyarqä”. Chunka qanchis wata pasariptinran Steveqa Bibliapita yachakur qallëkurqan.

¿IMANÖTAQ WAKINNINTSIKQA YANAPAKUSHWAN?

13, 14. ¿Imanötaq llapantsik yanapashwan mana Testigo familiayoq cristiano mayintsikkunata?

¹³ Imanömi chirapa tamya chakrakunata shumaq oqütsin y plantakunata kawëkaqta katsin, tsënöllam congregacionchö kaqkuna kuyakoq kayanqanwan kushishqata katsiyanqa mana Testigo familiayoq cristiänokunata. Brasil nacionpita Elvïnam kënö nin: “Diospa kaqchöqa alli tsarakïkä cristiano mayïkuna kuyakoq kayanqampitam”.

¹⁴ Pero kuyakoq y qarakoq kanqantsikqa, mana Testigo familiakunatapis yanapanqam. Tsëtam rikätsikun Nigeria nacionpita huk wawqita pasanqan, pëqa warmin Testigo tikranqampita chunka kima watataran Bibliapita estudiëta qallarqan. Pëmi kënö willakun: “Noqaqa viajëkarqä huk Testïgowanmi. Illaqpitam cärron perdirirqan, tsëmi pëqa más amänun markaman Testigo mayinkunata asheq ëwarqan. Pëkunam posadatsiyämarqan y unëpita reqiyämaqnömi atiendïkayämarqan. ¡Tsënö cristiänopura kuyanakuyanqampaqmi warmïqa imëpis parlapämashqa karqan!”. Inglaterra nacionchö chunka puwaq watana nunan bautizakunqanchöraq pëpis cristiana këman tikraq warminam këta yarpan: “Testïgokunaqa imëpis ishkätam mikoq invitayämaq. Kushikuyaqmi pëkunawan tsëchö kanqäta”. Hina tsë nacionllachömi huk nunapis warminnö Testigo tikrarqan, y kënömi nin: “Testïgokunaqa wayïkunamanmi shayämoq o wayinkunamanmi invitayämaq. Noqakunapaq alläpa yarpachakuyanqantam rikätsiyämarqan, y hospitalchö këkaptïnäqa mëtsikaqmi watukamaqnï shayämurqan”. Rikärinqantsiknöpis, llapantsikmi cristiano mayintsikkunata yanapëta puëdentsik mana Testigo kaq familiankuna cristiano këman chäyänampaq.

15, 16. ¿Imanötaq mana Testigo familiayoqkunaqa imëpis kushishqa kayanman?

 ¹⁵ Tsënö kaptimpis, mëtsika watapa cristiano mayintsikkuna shumaq portakuyaptin y Diospita mëläya yachëkätsiyaptimpis, manam llapan majakunatsu, wamrakunatsu, teytakunatsu y wakin familiakunatsu Testigo tikrayanqa. Itsa Diospita yachakïta munayanqatsu o imëpis chikikïkäyanqalla (Mat. 10:35-37). Tsënö kayaptimpis, shumaq respetowanmi imëpis tratëkänantsik. Warmin bautizakunqanchöna Testigo tikraq nunam kënö nin: “Cristiänonö shumaq portakunqantsikta rikar mana Testigo maja pensëninchö y shonqunchö ima ninqantaqa manam musyantsiktsu. Tsëmi ni imëpis pensashwantsu manana cambiayänampaq kaqtaqa”.

¹⁶ Familiantsik Bibliapita yachakïta mana munaptimpis, kushishqa kawakïta puëdentsikmi. Huk panim ishkë chunka huk watana nunanta Diospita yachatsita tïran, pero nunanqa kananyaqpis manam munantsu. ¿Imanötaq sientekun? Kënömi nin: “Jehoväta imëpis kushitsita tïrar, pëta mana haqir y pëpa kaqchö más sinchi kanäpaq kallpachakurmi imëpis kushishqa kä. Diospita más yachakur, llapan reunionkunaman ëwar, yachatsikoq yarqur y cristiano mayïkunata yanaparmi Diospa kaqta más rurä. Tsënöpam shonqöta tsapä y Jehoväpa lädonchö sientekö.” (Pro. 4:23.)

MANA CAMBIAYÄNAMPAQ KAQTA PENSËTSU

17, 18. ¿Imataq huk cristiänota yanapanqa familiankuna imëllapis cristiano tikrayänampaq kaqta shuyaränampaq?

¹⁷ Familiëki Jehoväpita yachakïta mana munaptimpis, ama llakikur qelanëtsu. Yarpë, “shutinrëkurmi Jehoväqa markanta haqirinqatsu” (1 Sam. 12:22). Pëman markäkuptikiqa manam lädïkipita witikurinqatsu (lei 2 Crónicas 15:2 *). Biblia kënö consejakunqanta wiyakï: “Jehovärëkur imëpis kushishqa kë [...]. Llapan kawënikita Jehoväpa makinchö haqiri y pëman markäkï [yärakuy]” (Sal. 37:4, 5). Imëpis Diosman mañakï y imëkapa pasaptikipis Jehová yanapashunëkipaq kaqman markäkï (Rom. 12:12).

¹⁸ Wayikichö alli pasakïchö kawakunëkipaq santo espïritunta qoshunëkipaq Jehoväta mañakï (Heb. 12:14). Itsa imëllapis familiëkipa shonqunman Diospa yachatsikïnin charkunqa. “Dios cushicunanpaq caqta yarpacachar” imatapis rurarqa, kushishqa këta y shonqïkichö yamë këtam tarinki (1 Cor. 10:31). Ama imëpis qonqëtsu hinantin Patsachö cristiano mayikikuna kuyayäshunqëkita y yanapayäshunëkipaq kaqta.

[Päginapa ura kuchunchö willakïkuna]

[Yachakunapaq kaqpa tapukïninkuna]

[30 kaq päginachö dibüju]

Imë hora Diospita parlapänëkipaq kaqta alleqraq rikë

[31 kaq päginachö dibüju]

Mana Testigo majakunata yanapëta tïrashun