Atiwaqmi mana creyente familiapi kusisqa kawsayta

“Qan esposa ¿qosayki qespichinaykita yachawaqchu? Qanpas qosa, ¿esposayki qespichinaykita yachawaqchu?” (1 COR. 7:16.)

¿KUTICHIWAQCHU?

¿Imatan ruwawaq mana creyente familiaykiwan thakpi kawsanaykipaq?

¿Imatan ruwawaq familiayki cheqaq kaqpi interesakunanpaq?

¿Imaynatan yanapasunman mana creyente familiayoq iñiqmasikunata?

1. Reinomanta willakuyta huk runa chaskiqtin, ¿imaynatan familian chayta qhawarinman?

JESUSMI qatikuqninkunata kacharqan khaynata predicamunankupaq: “Hanaq pacha qhapaqsuyun sispaykamun”, nispa (Mat. 10:1, 7). Chay allin willakuykunan uyarikuq runakunaman thak-kayta sumaq kawsayta apamunan karqan. Ichaqa, apostolninkunamanmi Jesús willallarqantaq predicasqankuta askha runakuna hark’akunankuta (Mat. 10:16-23). Mayninpin chayqa kikin familiamanta hamunan karqan, chayqa sinchi llakikunapaqmi kanman (leey Mateo 10:34-36).

2. ¿Imaraykun kusisqa kawsasunman familianchis huk iñiyniyoq kaqtinpas?

² Ichaqa, Jehová Diospa testigonkunaqa atinkumanmi kusisqa kawsayta, manaña familianku kaqllatachu iñinku chaypas. Mayninpin wakin Testigokunata familianku sinchita hark’anku, ichaqa manan llapankuwanchu chhayna suceden. Hinaspapas, chhaynapi tarikuyqa manan tukuy tiempochu kanan. Chhaynaqa, ¿imamantan kanqa familiaq hark’asqanña tarikuspapas kusisqalla kanapaq? Astawanqa kikinchismantan kanqa, tratawasqanchisman imayna kutichisqanchismanta. Hark’akuwasunña chaypas, sichus hunt’aq sonqo kasun chayqa, Jehová Diosmi bendeciwasun, q’ochukuytataq qowasun. Iskay ruwaymi huk cristianotaqa yanapanman kusisqa kananpaq: 1) kallpachakunanmi wasinpi thak kawsay kananpaq, 2) familiantan yanapashanallan cheqaq religionman haykunanpaq.

THAK KAWSAY WASIPI KANAN

3. ¿Imaraykun tukuy atisqanchista ruwana wasipi thak kawsay kananpaq?

³ Familianchiskunaq sonqonpi cheqaq kaymanta muhu wiñananpaqqa, thak kawsaymi wasipi kanan  (leey Santiago 3:18). Manaraq familianchis cheqaq yupaychaypichu kashan chaypas, kallpachakunanchismi thakpi kawsanapaq. ¿Imaynatan chayta ruwasunman?

4. ¿Imatan ruwana ñoqanchispi thak-kay kananpaq?

⁴ Cristianokunaqa kallpachakunanchismi thak-kay ñoqanchispi kananpaq. Chaypaqmi sonqomanta mañakunanchis ‘Diospa thak-kayninta’ chaskinapaq (Fili. 4:6, 7). Chaymantapas, Jehová Diosta reqsispaqa thakmi sientekunchis kusisqataq kanpas, kaqllataq kamachikuyninkunaman hina kawsaspapas (Isa. 54:13). Chhaynallataqmi sientekunchis tukuy sonqowan huñunakuykunaman rispa, predicacionman lloqsispapas. Mana creyente familiayoq kaqkunaqa paykunamantañan allichakunku cristiano ruwayninkuwan hunt’anankupaq. Enzaq * qosanqa sinchi hark’akuqmi. Payqa wasipi ruwanankunata tukuspañan Bibliamanta hukkunaman yachachin. Ninmi: “Jehová Taytanchispa yanapayninwanmi predicanaypaq kallpachakusqay allinpipuni tukun”, nispa. Chayrayku sonqonpiqa kusikuy thak-kay ima kashan.

5. ¿Ima sasachakuypin mana Testigo familiayoqkuna tarikunku, maypin yanapayta tarinqaku?

⁵ Mana cristiano familianchiswan thakpi kawsanapaqqa anchatan kallpachakuna. Chay ruwayqa manan facilchu, yaqapaschá mayninpiqa Bibliapi kamachikuy contra ruwananchista munanqaku; mana ruwaqtinchistaq phiñakunkuman, tiempowanmi ichaqa creencianchiskuna respetachisqanchis yanapawasun thakpi kawsanapaq. Mayninpiqa imapas mañawasqanchisqa manan Biblia contrachu kanqa, chaypin ichaqa kasukusunman, ahinapi mana yanqa phiñachinapaq (leey Proverbios 16:7). Sasachakuypi tarikuspaqa umallikunaq yanapaynintan maskhananchis, “allin yuyayniyoq hunt’aq kamachi” qowasqanchis qelqakunatapas t’aqwinanchis (Pro. 11:14).

6, 7. a) ¿Imaraykun wakin runakuna mana munankuchu familianku Testigokunawan estudianankuta? b) ¿Imatan Bibliata estudiaq ruwanman familian hark’akuqtin?

⁶ Wasipi thak-kawsay kananpaqqa, Diospin confiananchis allin yuyaywantaqmi imatapas qhawarinanchis (Pro. 16:20). Chaytan ruwanallankutaq pisi tiempollaraq Testigokunawan estudiashaqkunapas. Wakin runakunaqa allinpaqmi qhawarinku parejanku Biblia estudiasqanta, familiankuq allin kawsananpaq kasqanrayku. Wakintaq ichaqa sinchita hark’akunku. Esthermi Testigo kapurqan, paymi willakun Bibliamanta estudiota chaskiqtin qosan nishuta phiñakusqanta. Khaynatan reconocen: “Wakin qelqakunatan basuraman wikch’umurqani, wakintataq kanarqani”, nispa. Howardpas manan munarqanchu esposan Biblia estudiananta. Paymi nin: “Askha qharikunan piensanku esposankuta huk secta engañashananpaq, chaymi cuidayta munaspa sinchita phiñakunku”, nispa.

⁷ Sichus huk estudiante qosanpa otaq esposanpa hark’asqan tarikunman chayqa, ¿imaynatan yanapasunman? Willasunmanmi ama chay hawa Biblia estudiay saqenanta. Yaqapaschá llamp’u sonqowan respetowan ima trataqtinqa cambianman (1 Ped. 3:15). Howard nin: “Agradecekunin esposay pacienciakuspa chaywan mana phiñakusqanmanta”, nispa. Esposan willan: “Kamachiwarqanmi Biblia estudiayta saqenaypaq. Nisqanman hinaqa, cambiachiwasharqankus imayna yuyaykusqayta. Kallpachakurqanin mana phiñakunaypaq, nirqanitaq: ‘Yaqapaschá razonta nishanki, ichaqa manan chhaynatachu ñoqaqa qhawarini’, nispa. Hinan nirqani estudiasqay librota leenanpaq, leespataq  mana imaniytapas atirqanchu, anchatan chaywan admirakurqan”, nispa. Chaymantapas, mana cristiano qosa otaq esposaqa wikch’usqa hinan sientekunman otaq celoso churakunman parejan espiritual ruwaykunapi puriqtin. Sumaq simikunawan rimapayaspan iñiqmasinchisqa llakipakuyninkunata pisiyachinman.

YANAPAY CHEQAQ RELIGIONPI KANANPAQ

8. ¿Imatan Pablo nin mana creyentewan casarasqa cristianokunata?

⁸ Apóstol Pablon cristianokunata nirqan ama mana iñiq kasqanraykuqa parejanta saqenanpaq (leey 1 Corintios 7:12-16). * Chaymantapas, yuyarichirqanmi esposa otaq qosapas qhepamanqa iñiqmasinchisman tukupuy atisqanta, chaymi yanapanqa kusisqa kawsashanallanpaq. Allintaña ruwanchis Bibliamanta parejanchisman rimapayaspa chaypas, allin yuyaywanmi ruwana. Chaypaq qhawarisun huk ejemplota.

9. ¿Imatan yuyarina mana creyente familianchisman Bibliamanta willaspa?

⁹ Cheqaq kaq tarisqankuta reparaspan wakin estudiantekunaqa kusikuywan yachasqankumanta rimashallanku, munankutaqmi Diospa Gobiernomanta familiankupas yachanankuta. Chaymi sucederqan Fred cristianota, paymi nin: “¡Lliw runamanmi willayta munarqani!” nispa. Mayninpin ichaqa mana munasqankuman hinapuni. Esposanmi willakun: “Umaytañan wasapawarqan”, nispa. Huk warmipas 18 wata qhepatañan cheqaq kaqta aceptarqan, nirqanmi: “Ñoqaqa pisi-pisimantan allinta yachayta munarqani”, nispa. Sichus cheqaq religionpi mana interesakuq runaq parejanman estudiota qoshanchis chayqa, sapa kutillan ensayasunman imakuna yachasqanmanta willananpaq. Moisés nirqan: “Yachachikuyniyqa para hinan chayanqa, simiykunaqa sulla hinan kanqa, q’achupi iphu para hinan kanqa, pastopi unu sut’uy hinan kanqa”, nispa (Deut. 32:2). Bibliamanta yachachikuykunaqa unu sut’uy hinan pisi-pisimanta sonqonta kicharinman, huk kutillapi imaymanata rimapayaymantaqa.

10-12. a) ¿Imatan Pablo aconsejarqan mana creyente parejayoq cristianokunata? b) ¿Imaynatan huk estudiante yacharqan 1 Pedro 3:1, 2 nisqanman hina ruwayta?

¹⁰ Diospa yuyaychasqanmi apóstol Pedro mana creyente qosayoq cristianakunata yuyaycharqan: “Qankunapas, casarasqa warmikuna, qosaykichista kasuychis. Ahinapin Diospa siminpi mana iñiq mayqen qosapas mana rimapayasqalla iñinqa warminpa allin purisqanta, ch’uya kawsasqanta  manchakuyniyoq kasqanta, sumaq respetowan kawsasqanta rikuspa ima”, nispa (1 Ped. 3:1, 2). Arí, huk warmiqa atinmanmi qosanta cheqaq iñiyman cambiachiyta, manaña munakuywan sumaqtachu tratashaqtinpas. Chhaynallataqmi cristianopas munakuywan wasinpi umallinan, esposanqa sinchi phiñasqaña kanman chaypas (1 Ped. 3:7-9).

¹¹ Askha cristianokunan Pedroq yuyaychasqan allinpuni kasqanta yacharqanku. Selma iñiqmasinchismanta qhawarisun. Steve sutiyoq qosanmi mana allinpaq qhawarirqan Testigokunawan Biblia estudiasqanta. Pay kikinmi nirqan phiñasqa, celoso churakusqanta, manataqmi thakchu karqan. Esposanmi nin: “Manaraq cheqaq kayta yachashaqtiypas, sasan paywan kawsayqa karqan, ratollan imawanpas phiñakuq, chaymi pacienciayoq kanay karqan. Biblia estudiayta qallariqtiyqa, astawanraqmi caracternin cambiarqan”, nispa. ¿Imaynatan Selma chayta atiparqan?

¹² Payqa uyarikurqanmi yachachiqnin cristianaq nisqanta. Khaynatan willan: “Huk p’unchaymi estudianaypaq pisikallpa kasharqani, ñawpaq ch’isin qosaywan discutirqayku, payqa sinchitan ñoqawan phiñakurqan, chaymi llakiq ñit’isqan kasharqani. Llapantan hermanaman willarqani, paytaq 1 Corintios 13:4-7 textota leeychiwarqan. Nirqanin: ‘Qosayqa manan hayk’aqpas kaypi nisqanman hinachu sumaqta tratawan’, nispa. Chaymi pay yuyaymanachiwarqan kay tapuywan: ‘Qanrí, ¿kaypi nisqanman hinachu munakuyniykita rikuchinki?’ nispa. Manan nirqanin, willarqanitaq chhayna caracterniyoq kasqanrayku ñoqapaq sasa kasqanta. Sumaqllatan niwarqan: ‘Selma, ¿pitaq cristiano kaytari yachashan? ¿Stevechu icha qanchu?’ nispa. Chaypin repararqani cambianay kasqanta. Jehová Diospa yanapaynintan mañakurqani aswan munakuywan qosayta tratanaypaq. Chhaynapin pisi-pisimanta allinta kawsarqayku”. 17 wata qhepatan Steve Testigo kapurqan.

¿IMATAN HUKKUNA RUWASUNMAN?

13, 14. ¿Imaynatan llapanchis yanapasunman mana creyente familiayoq cristianokunata?

¹³ Imaynan iphu para hallp’aman chayaspa tarpusqata wiñachin, chay hinatan iñiqmasikunapas allinkuna ruwasqankuwan mana creyente familiayoq cristianokunata yanapankuman kusisqa kawsanankupaq. Brasilmanta Elvina nin: “Iñiqmasikunaq yanapayninraykun iñiyniypi fuerte kashani”, nispa.

¹⁴ Ichaqa sumaq sonqo kasqanchista rikuchiyqa, mana iñiq familiakunatapas yanapanmi. Chaymi sucederqan Nigeria nacionmanta huk hermanota, payqa 13 wata  qhepatan cheqaq kaqta aceptarqan, paymi nin: “Huk testigowanmi viajasharqayku. Qonqayllan carron malograkurqan, chaymi payqa chay qayllapi tiyaq Testigokuna maskhaq rirqan. Paykunan alojawarqanku, reqsinakuykumanpas hinatataq chaskiwarqanku. Esposayqa, ¡chhayna munakuq cristianokunamantan rimapayawaqpuni!”, nispa. Inglaterra nacionpin huk warmi qosanmanta 18 wata qhepaman cristiana kapurqan. Yuyarinmi: “Testigokunaqa invitawaqkupunin iskayniykuta mikhuq rinaykupaq. Allin chaskisqan sientekuq kani”, nispa. * Yaqa chay hinan chay nacionllamantataq kaq huk runatapas sucederqan, paymi qhepaman Testigo kapurqan, ninmi: “Hermanokunaqa wasiytan hamuqku otaq wasinkuman invitawaqku, ñoqaykupi interesakusqankutan rikuchiqku, astawanqa hospitalpi kashaqtiymi askha visitamuwarqanku”, nispa. Arí, llapanchismi yanapakusunman iñiqmasinchiskunaq mana Testigo kaq familiankupi interesakuspa.

15, 16. ¿Imaynapin kusisqa kawsankuman mana cristiano familiayoq iñiqmasikuna?

¹⁵ Ichaqa kaytan reconocena: cristianokunaqa unay watakunaña allinta comportakunqaku, sumaqllata predicanqaku chaypas, manapaschá parejanku, wawanku, otaq tayta-mamankupas lliwchu cheqaq religionman haykuyta munanqaku. Yaqapaschá mana hayk’aqpas interesakunqakuchu otaq hark’akushallanqaku (Mat. 10:35-37). Chaywanpas, kaqllatan cristiano hina sumaqta tratananchis. Huk runan esposanpa qhepanmanña Testigo kapurqan, paymi nin: “Manan yachanchischu sumaqta tratasqanchiswan imatachus mana creyente parejanchis yuyaykunanta, imaynatachus sonqonman chayanantapas. Chayta ruwaspaqa manan hayk’aqpas pisipanachu”, nispa.

¹⁶ Hinaña familianchis manapuni cheqaq kayta aceptanmanchu chaypas, atisunmanmi kusisqa kawsayta. Huk hermana 21 wataña kallpachakushan Reinomanta willakuyta qosan aceptananpaq, ichaqa manan cambianchu. ¿Imaynan sientekun? “Kusisqallapunin kashani Diospaq hinapuni kawsasqayrayku, hunt’aq sonqo kasqayrayku, espiritualpi kallpachakusqayrayku ima. Chay ruwaytan hunt’ani Bibliata estudiaspa, huñunakuykunaman rispa, predicaspa iñiqmasiykunata ima yanapaspa. Chhaynapin sonqoyta cuidani, Diospa qayllanpitaq sientekuni”, nispa (Pro. 4:23).

¡AMA SAYK’UYCHU!

17, 18. ¿Iman huk cristianota yanapanqa kallpachakusqanpi ama sayk’unanpaq?

¹⁷ Sichus Jehová Diosta servishanki mana familiaykiq yanapayninwan chayqa, ama sayk’uychu. Yuyariy: payqa manan llaqtanta “saqerparinqachu qhapaq sutin ama sarunchasqa kananpaq” (1 Sam. 12:22). Diosman hap’ipakuqtiykiqa qanwanmi kashanqa (leey 2 Crónicas 15:2). Bibliapi kay yuyaychayta kasukuy: “Dioswan anchata kusikuy [...] Señor Diosman kawsayniykita hap’iykachikuy, payman hap’ipaykukuy, paytaqmi yanapaykusunki” (Sal. 37:4, 5). Diosmanta mañakushallaypuni, imaña hayk’aña kaqtinpas payqa yanapanasunkin, chaymantaqa amapuni iskayaychu (Rom. 12:12).

¹⁸ Diosmanta santo espiritunta mañakuy wasiykipi thak kawsay kananpaq (Heb. 12:14). Yaqapaschá qhepaman familiaykikunaq sonqonta kuyurichiwaq. “Diosta hatunchanapaq” lliwta ruwaspaqa ancha kusisqan kanki, thaktaq sientekunki (1 Cor. 10:31). Amapuni hayk’aqpas kayta qonqaychu: pachantinpi iñiqmasiykikunan munakusunkiku.

[Uranpi willakuykuna]

[Tapuykuna]

[28 paginapi foto]

Huk allin oportunidadta maskhay Bibliamanta rimapayanaykipaq

[29 paginapi foto]

Sumaqta chaskiy iñiqmasikunaq mana creyente parejankuta