Wan Kresten kan de koloku awinsi sma na ini en osofamiri no de na bribi

„Yu sabi efu yu o man frulusu yu [patna]?”​—1 KOR. 7:16.

YU KAN FENI DEN PIKI?

Efu den sma fu wan Kresten en osofamiri no de na bribi, dan san a kan du fu meki freide de na ini na osofamiri?

Fa wan Kresten kan yepi den sma fu en osofamiri fu teki a tru bribi?

San Kresten brada nanga sisa kan du fu yepi wan Kresten di de na ini wan osofamiri di no de na bribi?

1. Te wan sma gi yesi na a Kownukondre boskopu, dan sortu krakti dati kan abi tapu en osofamiri?

WAN leisi di Yesus seni den apostel fu en fu go preiki, a taki: „Te unu e go preiki, dan un musu taki: ’A Kownukondre fu hemel kon krosibei kaba’” (Mat. 10:1, 7). A bun nyunsu disi ben o tyari freide nanga koloku kon gi den wan di ben e arki èn di ben frustan o prenspari a de. Ma Yesus ben warskow den apostel fu en taki furu sma ben o gens a Kownukondre preikiwroko (Mat. 10:16-23). Wan sani di ben o hati trutru na te den gensman fu a Kownukondre boskopu ben o de na ini wan sma en eigi osofamiri.​—Leisi Mateyus 10:34-36.

2. Fu san ede wan Kresten kan de koloku awinsi den sma na ini en osofamiri no de na bribi?

² Ma yu denki taki wan bakaman fu Krestes kan de koloku te den sma na ini en osofamiri no de na bribi? Iya, seiker! Son leisi den sma na ini na osofamiri fu wan Kresten kan gens en srefisrefi, ma a no ala ten disi de so. A kan tu taki bakaten den no o gens en moro. Ma awinsi na ini sortu situwâsi wi de, wi kan de koloku efu wi e tyari wisrefi na wan reti fasi te den sma na ini wi osofamiri e gens wi, noso te den no wani sabi noti fu Bijbel. Boiti dati, Yehovah e blesi den wan di e tai hori na en èn a e meki den firi koloku awinsi den abi problema. Kresten kan de moro koloku (1) te den e sorgu taki freide de na ini na osofamiri èn (2) te den e du ala muiti fu yepi den sma na ini na osofamiri fu teki a tru bribi.

SORGU TAKI FREIDE DE NA INI NA OSOFAMIRI

3. Fu san ede wan Kresten abi fu meki muiti fu tyari freide kon na ini na osofamiri?

³ Te freide de na ini wan osofamiri, dan nofo tron a moro makriki gi den fu teki a tru bribi. (Leisi Yakobus  3:18.) Awinsi den sma fu wan Kresten en osofamiri no teki a tru bribi, toku a Kresten abi fu meki muiti fu tyari freide kon na ini na osofamiri. Fa a kan du disi?

4. Fa Kresten kan sorgu taki den no e broko den ede tumusi nanga sani?

⁴ Kresten musu sorgu taki den de korostu èn taki den no e broko den ede tumusi nanga sani. Fu man du disi, den musu begi Gado nanga den heri ati, so taki a gi den „a freide fu Gado di bigi moro iniwan sani” (Fil. 4:6, 7). Wi o de koloku èn wi no o broko wi ede tumusi te wi e teki leri fu Yehovah èn te wi e du san Bijbel e taki na ini wi aladei libi (Yes. 54:13). Tra sani di prenspari tu fu man de koloku èn fu no broko wi ede tumusi, na te wi e teki prati na den gemeente konmakandra èn te wi e du wi preikiwroko fayafaya. Nofo tron wan Kresten kan feni wan fasi fu du ala den sani disi, awinsi den sma fu en osofamiri no de na bribi. Luku fu eksempre san Enza * e du. Fu di en masra e gens en na wan ogri-ati fasi, meki a e sorgu taki a du ala en wroko na oso, fosi a e go na ini a preikiwroko. Enza taki: „Ibri leisi te mi e du wan muiti fu prati a bun nyunsu gi tra sma, mi e kisi bun bakapisi. Sobun, Yehovah e blesi mi trutru.” Den sortu blesi disi e meki taki a e firi korostu, a e firi taki a abi wan bun libi èn a de koloku.

5. Sortu problema wan Kresten kan kisi te den sma fu en osofamiri no de na bribi, èn sortu yepi a kan kisi?

⁵ Wi musu du ala muiti fu libi bun nanga den sma na ini wi osofamiri di no de na bribi. A no ala ten disi o de wan makriki sani fu du, fu di son leisi a kan taki den wani wi fu du sani di de teige Bijbel. Te wi e gi yesi na Bijbel ala ten, dan sonwan fu den kan kisi atibron. Ma disi no musu tapu wi fu du san bun. Efu wi e du furu muiti, dan a kan taki freide o de na ini wi osofamiri bakaten. Ma te wan sani no de teige Bijbel, dan wi musu du muiti tu fu wroko makandra nanga den. Na so wi e sorgu taki dyugudyugu no e kon fu soso na ini na osofamiri. (Leisi Odo 16:7.) Te wi e kisi problema, a prenspari fu suku Bijbel rai na ini den buku di a koni srafu di de fu frutrow tyari kon na doro èn wi kan suku rai tu na den owruman.​—Odo 11:14.

6, 7. (a) Fu san ede wan sma en osofamiri kan gens en te a bigin studeri nanga Yehovah Kotoigi? (b) San wan Kresten noso wan Bijbelstudie kan du te en osofamiri e gens en?

⁶ Wi kan meki freide de na ini na osofamiri tu te wi e frutrow tapu Yehovah èn te wi e pruberi fu frustan fa den trawan na ini na osofamiri e firi (Odo 16:20). Srefi den nyun Bijbelstudie kan pruberi fu du disi. Kande son masra noso wefi di no de na bribi, no abi trobi te a patna fu den e studeri Bijbel. Kande den feni srefi taki disi bun gi a heri osofamiri. Ma yu abi trawan tu di no lobi disi srefisrefi. Esther di de wan Kotoigi now, taki dati a ben e „ati bron srefisrefi” di en masra bigin studeri Bijbel nanga Yehovah Kotoigi. A taki: „Ala ten mi ben e trowe den buku fu en gowe noso mi ben e bron den.” Fosi, Howard no ben wani taki en wefi studeri Bijbel. A taki: „Furu masra e frede taki sma o kori den wefi fu den fu go na ini wan kerki. Son leisi wan masra no sabi fa fu du nanga a sani disi èn dati meki a o gens en wefi fu tapu skreki gi en.”

⁷ Te wan sma en patna no wani taki a e studeri Bijbel, wi musu sori en taki toku a no abi fu tapu nanga a studie. Nofo tron a kan lusu a tori disi efu a e sori safri-ati nanga lespeki gi en patna di no de na bribi (1 Petr. 3:15). Howard taki: „Mi breiti taki mi wefi no rigeri èn taki a no bruya!” A wefi fu Howard taki: „Howard ben wani dwengi mi fu no studeri Bijbel moro. A taki dati na drai den sma ben e drai mi frustan. Na  presi fu haritaki nanga en, mi taigi en taki a ben sa abi leti kande, ma misrefi no ben man si fa. Ne mi aksi en fu leisi a buku di mi ben e studeri. Di a du dati a no ben man sori mi san fowtu. Disi ben abi furu krakti na en tapu.” A bun fu hori na prakseri taki son leisi te wan Kresten noso wan Bijbelstudie e go na den konmakandra èn na ini a preikiwroko, a patna fu en kan firi taki a no e poti prakseri na en moro noso taki a o gowe libi en srefi. Ma te disi pasa, dan a Kresten noso a Bijbelstudie musu taki nanga en fu a tori disi na wan switi èn lobi-ati fasi, so taki a no e broko en ede moro.

YEPI DEN FU TEKI A TRU BRIBI

8. Sortu rai di abi fu du nanga patna di no de na bribi, na apostel Paulus gi Kresten?

⁸ Na apostel Paulus gi Kresten a rai taki den no musu gowe libi den patna soso fu di a no de na bribi. * (Leisi 1 Korentesma 7:12-16.) Te wan Kresten e hori na prakseri taki a patna fu en kan tron wan Kresten tu, dan dati kan yepi en fu tan koloku awinsi en patna no de na bribi. Ma te a e pruberi fu taki nanga en patna fu a tru bribi, dan a musu luku bun nanga wan sani soleki fa wi o si na ini den ondrofenitori di e kon now.

9. San wi musu hori na prakseri te wi wani fruteri tra famiriman san wi leri fu Bijbel?

⁹ Jason e memre fa a ben firi di a kon sabi den tru tori fu Bijbel. A taki: „Mi ben wani fruteri ala sma san mi leri!” Te wan Bijbelstudie kon frustan taki den sani na ini Bijbel tru, dan son tron a kan breiti so te taki a e taki fu den sani disi ala ten. Kande a e denki taki den sma na ini en osofamiri o teki a Kownukondre boskopu wantewante, ma dan a e si taki disi no de so. Jason ben breiti srefisrefi fu den sani di a ben e leri, ma fa en wefi ben feni dati? A ben feni taki na soso fu den sani dati Jason ben e taki. Wan uma di teki a tru bribi 18 yari baka en masra, taki: „Mi ben abi moro ten fanowdu fu frustan san Bijbel e leri.” Efu yu e studeri Bijbel nanga wan sma di abi wan patna di no wani teki a tru bribi, dan a bun fu sori en fa a kan taki fu Bijbel na wan fasi di no o fruferi en patna. Moses ben taki: „Den leri fu mi o dropu leki alen. Den sani di mi taki o saka kon leki dow, leki alen di e fadon safri na tapu a grasi” (Deut. 32:2). Nofo tron a moro bun fu taki fu Bijbel pikinsopikinso neleki watra di e dropu, na presi fu taki bun furu wantronso neleki wan sibibusi.

10-12. (a) Sortu rai na apostel Petrus gi Kresten di abi wan patna di no de na bribi? (b) Fa wan Bijbelstudie leri fu gi yesi na a rai fu 1 Petrus 3:1, 2?

¹⁰ Gado ben meki na apostel Petrus gi wan moi rai na Kresten wefi di abi masra di no de na bribi. A ben skrifi: „Saka unsrefi na ondro un eigi masra, so taki te  sonwan fu den no wani du san Gado wortu e taki, dan a fasi fa unu e tyari unsrefi kan meki den teki a bribi sondro fu unu taigi den wan sani, bika den si nanga den eigi ai fa unu e tyari unsrefi na wan krin fasi èn nanga bigi lespeki” (1 Petr. 3:1, 2). Wan wefi kan meki taki en masra teki a tru bribi, te a e saka ensrefi na en masra ondro èn te a e sori bigi lespeki gi en, awinsi en masra no e libi bun nanga en. Na so a de tu taki wan masra di abi wan wefi di no de na bribi, musu tyari ensrefi soleki fa Gado wani. A musu de wan lobi-ati osofamiri-edeman, awinsi en wefi e du son sani fu gens en.​—1 Petr. 3:7-9.

¹¹ Furu Kresten na ini a ten disi si taki a bun fu gi yesi na a rai di Petrus gi. Luku na eksempre fu Selma. Di a bigin studeri Bijbel nanga Yehovah Kotoigi, en masra Steve no ben lobi dati. Steve taki: „Mi ati ben bron, mi ben dyarusu èn mi ben frede.” Selma taki dati srefi bifo a bigin teki leri fu Bijbel, a no ben makriki fu libi nanga Steve. A ben musu luku bun san a ben e taki èn san a ben e du. A taki tu dati Steve ben gwenti kisi atibron esi-esi, ma a sani disi kon moro ogri di a bigin studeri Bijbel. San yepi en?

¹² Selma memre sortu moi sani a Kotoigi di ben e studeri nanga en leri en wan dei. Selma taki: „Wan dei mi no ben wani studeri Bijbel. A neti na fesi Steve ben naki mi di mi ben wani meki a frustan wan sani èn mi ben e sari trutru. Baka di mi taigi a sisa san pasa èn fa mi ben e firi, a aksi mi fu leisi 1 Korentesma 13:4-7. Di mi ben e leisi en, mi ben e prakseri: ’Noiti Steve du wan fu den sani disi fu sori taki a lobi mi.’ Ma a sisa meki mi kenki prakseri di a aksi mi: ’Omeni fu den sani disi yu du fu sori taki yu lobi yu masra?’ Mi piki: ’Nowan. A muilek fu libi nanga so wan man.’ Nanga wan safri sten a sisa taki: ’Selma, suma na a sma di wani tron Kresten dyaso? Yu noso Steve?’ Ne mi kon frustan taki mi ben musu kenki mi denki. Mi begi Yehovah meki a yepi mi fu sori moro lobi gi Steve èn safrisafri sani bigin kenki.” Baka 17 yari Steve teki a tru bribi.

FA TRA SMA KAN YEPI

13, 14. Fa brada nanga sisa na ini a gemeente kan yepi den wan di de na ini osofamiri di no de na bribi?

¹³ Neleki fa furu dropu alen e nati a gron so taki den bon kan gro, na so furu Kresten na ini a gemeente kan yepi wan Kresten di de na ini wan osofamiri di no de na bribi, so taki a kan abi moro koloku na ini en osofamiri. Elvina fu Brasyonkondre taki: „A sani di yepi mi trutru fu tai hori na a tru bribi, na a lobi di mi brada nanga sisa sori.”

¹⁴ Te den brada nanga sisa na ini a gemeente e sori switifasi èn te den e poti prakseri na den sma di no de na bribi na ini  na osofamiri fu wan Kresten, dan disi kan naki na ati fu den sma dati trutru. Na ini Nigeria wan masra di teki a tru bribi 13 yari baka en wefi, taki: „Wan leisi mi ben e rèi nanga wan Kotoigi na ini en wagi, dan a wagi broko. Ne a go suku Kotoigi na ini wan foto di de krosibei èn den gi wi sribipresi. Den sorgu wi neleki wi ben sabi makandra sensi di wi ben pikin. Wantewante mi firi taki Kresten lobi makandra trutru, wan sani di mi wefi ben e taigi mi ala ten.” Na ini Ingrisikondre wan wefi di teki a tru bribi 18 yari baka en masra, taki: „Den Kotoigi ben lobi fu kari wi fu kon nyan nanga den. Ala ten den meki mi firi so switi.” * Na ini a srefi kondre wan masra di tron wan Kotoigi bakaten, taki: „Den brada nanga sisa ben e kon na wi oso èn den ben e kari wi kon na den oso tu. Ne mi kon si taki den e broko den ede trutru nanga trawan. Spesrutu di mi ben de na ati-oso mi si disi, bika furu fu den ben kon luku mi.” Yu kan feni fasi tu fu poti prakseri na den sma di no de na bribi na ini na osofamiri fu wan brada noso sisa fu yu?

15, 16. San kan yepi wan Kresten fu de koloku awinsi den sma na ini en osofamiri no wani teki a tru bribi?

¹⁵ Wi e frustan taki awinsi wi e tyari wisrefi soleki fa Gado wani èn awinsi wi e fruteri wi famiriman fu Gado na wan switi fasi, toku a kan taki son masra, wefi, pikin, papa, mama, noso tra famiriman no o teki a tru bribi. Awinsi san wi e du, toku sonwan fu den no o wani sabi noti èn sonwan fu den o tan gens wi (Mat. 10:35-37). Ma toku a kan abi bun bakapisi te wan Kresten e tyari ensrefi soleki fa Gado wani. Wan masra di no ben de na bribi fosi, taki: „Te wan sma di de na bribi e sori den moi fasi di wan Kresten musu abi, dan disi kan abi furu krakti tapu a frustan nanga na ati fu en patna di no de na bribi. Sobun, no denki taki a no man kenki.”

¹⁶ Srefi efu wan sma na ini na osofamiri no teki a tru bribi, toku a wan di de na bribi kan de koloku. Wan sisa e pruberi 21 yari kaba fu yepi en masra fu bribi a Kownukondre boskopu. A taki: „Mi e tan koloku fu di mi e tan du muiti fu plisi Yehovah, fu tai hori na en, èn fu tron wan moro bun mati fu en. Mi e teki ten fu studeri Bijbel, mi e go na den konmakandra èn na ini a preikiwroko doronomo, èn mi e pruberi fu yepi trawan na ini a gemeente. Na so mi e sorgu taki ala ten mi abi furu fu du na ini a diniwroko. Disi yepi mi fu kon moro krosibei na Yehovah èn fu tan dini en.”​—Odo 4:23.

NO LASI-ATI!

17, 18. San wan Kresten kan du fu no lasi-ati te den sma fu en osofamiri no de na bribi?

¹⁷ Efu yu na wan Kresten di e dini Gado fayafaya èn den sma fu yu osofamiri no de na bribi, yu no musu lasi-ati. Memre taki „Yehovah no o gowe libi en pipel, fu di a e prakseri a bigi nen fu en” (1 Sam. 12:22). A de nanga yu solanga yu e tai hori na en. (Leisi 2 Kroniki 15:2.) Sobun, „prisiri pasa marki nanga Yehovah”. Iya, „meki Yehovah tiri yu te yu de na pasi, frutrow tapu en” (Ps. 37:4, 5). „Tan begi” èn tan bribi taki yu lobi-ati Tata kan yepi yu fu horidoro awinsi sortu problema e kon.​—Rom. 12:12.

¹⁸ Begi Yehovah meki a gi yu en santa yeye fu yepi yu fu tyari freide kon na ini yu osofamiri (Hebr. 12:14). Efu yu sorgu taki freide de na ini yu osofamiri, dan disi kan naki na ati fu den sma na ini yu osofamiri di no de na bribi. Yu o de koloku èn yu no o broko yu ede tumusi te yu e „du ala sani fu gi Gado glori” (1 Kor. 10:31). Boiti dati, yu kan de seiker taki yu Kresten brada nanga sisa o horibaka gi yu na wan lobi-ati fasi.

[Futuwortu]

[Aksi fu a tori disi]

[Prenki na tapu bladzijde 28]

Suku wan bun ten fu taki fu a bribi fu yu

[Prenki na tapu bladzijde 29]

Poti prakseri na patna di no de na bribi