Ingaba Khona Injabulo Nasemndenini Lowehlukene Ngekwenkholo

‘Wati ngani kutsi angeke umsindzise [umuntfu loshade naye]?’—1 KHOR. 7:16.

UNGAPHENDVULA YINI?

․․․․․

Yini emaKhristu langayenta kute atfutfukise kuthula emndenini lowehlukene ngekwenkholo?

․․․․․

UmKhristu angawasita njani emalunga emndeni langakholwa kutsi emukele inkholo yeliciniso?

․․․․․

Yini labanye labangayenta kute basite emakholwa labakanye nawo lahlala emindenini leyehlukene ngekwenkholo?

1. Kwemukelwa kwemlayeto weMbuso kungaba namuphi umphumela emndenini?

 NGALELINYE LILANGA Jesu watfuma baphostoli bakhe kutsi bayewushumayela, watsi: “Hambani nishumayele nitsi: ‘Umbuso welizulu sewusondzele.’” (Mat. 10:1, 7) Letindzaba letinhle betitawuletsa kuthula kanye nenjabulo kulabo labebatemukela ngeliciniso. Nanobe kunjalo, Jesu wecwayisa baphostoli bakhe kutsi bantfu labanyenti bebatawumelana nemsebenti wabo wekushumayela ngeMbuso. (Mat. 10:16-23) Kuphikiswa lokubuhlungu kakhulu kuvela lapho emalunga emndeni angawemukeli umlayeto weMbuso.—Fundza Matewu 10:34-36.

2. Kungani emaKhristu lahlala emindenini leyehlukene ngekwenkholo angajabula?

² Loku kusho kutsi emaKhristu lahlala emakhaya lehlukene ngekwenkholo angeke ayitfole yini injabulo? Cha, akusinjalo! Nanobe kuphikiswa ngumndeni kungase kube matima ngaletinye tikhatsi, akuhlali kunjalo. Kantsi futsi kuphikiswa ngumndeni angeke kuhlale kukhona. Lokunyenti kuya ngendlela emaKhristu lasabela ngayo nawaphikiswa nobe asolwa. Ngetulu kwaloko, Jehova uyababusisa labo labetsembekile kuye, futsi ubenta bajabule nangetulu kwetimo letimatima. EmaKhristu angandzisa injabulo yawo (1) ngekutsi atimisele kutfutfukisa kuthula emakhaya awo kanye nekutsi (2) etame kamatima kusita emalunga emndeni langakholwa kutsi emukele liciniso.

TFUTFUKISA KUTHULA EMNDENINI

3. Kungani umKhristu lohlala emndenini lowehlukene ngekwenkholo kufanele atfutfukise kuthula?

³ Kute imbewu yekulunga itsele titselo emndenini, kufanele kube nekuthula ekhaya. (Fundza Jakobe 3:18.) Ngisho nalapho umndeni wemKhristu ungakahlanganyeli naye ekukhonteni lokuhlantekile, kufanele atimisele kute atfutfukise kuthula emndenini. Kungentiwa njani loku?

4. EmaKhristu angakulondvolota njani kuthula lanako ngekhatsi?

 ⁴ EmaKhristu kufanele alondvolote kuthula lanako ngekhatsi kuwo. Kute sente njalo, kudzingeka sithandaze ngalokusuka enhlitiyweni, futsi kwenta njalo kungasiletsela “kuthula kwaNkulunkulu” lokukhulu. (Fil. 4:6, 7) Injabulo nekuthula kuvela ngekufundza ngaJehova kanye nangekuphila ngekuvumelana netimiso letisemiBhalweni. (Isa. 54:13) Kuba nencenye emihlanganweni yelibandla kanye nekuhlanganyela ngekutimisela ensimini, nako kubalulekile kute sibe nekuthula nenjabulo. EmaKhristu lahlala emindenini leyehlukene ngekwenkholo angakhona kuhlanganyela emisebentini yebuKhristu. Nasi sibonelo: Cabanga nga-Enza, a lonendvodza lemphikisa ngekusebentisa budlova. Uhlanganyela emsebentini wekwenta bafundzi ngemuva kwekwenta imisebenti yakhe yasekhaya. Enza utsi: “Jehova ungibusisa ngemiphumela lemihle ngaso sonkhe sikhatsi nangenta imetamo yekucocela labanye ngetindzaba letinhle.” Tibusiso letinjalo timenta abe nekuthula, kwenetiseka kanye nenjabulo.

5. EmaKhristu lahlala emindenini leyehlukene ngekwenkholo avame kuhlangabetana nabuphi bumatima, futsi nguluphi lusito langalutfola?

⁵ Kufanele sente imetamo lemikhulu kute sikwati kutfutfukisa kuthula lokukhona emkhatsini wetfu nemalunga emndeni langakholwa. Loku kungaba matima ngesizatfu sekutsi bangase bafune kutsi sente tintfo letishayisana netimiso teliBhayibheli. Kubambelela kwetfu ngalokucinile kuleto timiso kungase kuwaphatse kabi lamanye emalunga emndeni, kodvwa kwenta njalo kungagcine kutfutfukise kuthula. Kuliciniso kutsi kwala kuvumelana naleminye imibono yabo lengashayisani nemiBhalo kungase kubangele kungevani lokungadzingeki. (Fundza Taga 16:7.) Nasihlangabetana nebumatima, kubalulekile kutsi sifune seluleko semBhalo lesitfolakala etincwadzini tesisebenti lesetsembekile nalesihlakaniphile, kanye naleso lesitfolakala kulabadzala belibandla.—Taga 11:14.

6, 7. (a) Kungani labanye bawaphikisa emalunga emndeni wabo lafundza naboFakazi BaJehova? (b) UmKhristu nobe umuntfu lofundzelwa liBhayibheli angasabela njani ekuphikisweni ngumndeni?

⁶ Kute sitfutfukise kuthula emndenini wetfu, kufanele setsembele kuJehova futsi siyicondze imiva yemalunga emndeni wetfu langakholwa. (Taga 16:20) Ngisho nebantfu labasandza kucala kufundzelwa liBhayibheli bangetama kukwenta loku. Lamanye emadvodza nobe bafati, bangase bangabavimbeli bantfu labashade nabo kutsi bafundze liBhayibheli. Bangase bavume kutsi kwenta njalo kungaba lusito emndenini wabo. Nanobe kunjalo, labanye babaphikisa ngalokucinile bantfu labashade nabo. Esther, nyalo losanguFakazi, uyavuma kutsi watfukutsela kakhulu ngesikhatsi indvodza yakhe icala kutadisha liBhayibheli naboFakazi BaJehova. Utsi: “Bengivame kulahla tincwadzi takhe nobe ngitishise.” Howard lowacale wamelana nekutsi umfati wakhe atadishe liBhayibheli, utsi: “Emadvodza lamanyenti asuke esaba kutsi bafati bawo bayayengwa kute bajoyine luhlelo lolutsite lenkholo. Indvodza ingase ingati kutsi isabele njani kuloku, futsi ingase icale kuphikisa kamatima.”

⁷ Lotsite lofundzelwa liBhayibheli loshade nemuntfu lophikisako kufanele asitwe kute abone kutsi akukafaneli ayekele kutadisha liBhayibheli. Ngalokuvamile, angakwati kulungisa tinkinga takhe ngekutsi abemnene futsi ahloniphe lomuntfu lashade naye longakholwa. (1 Phet. 3:15) Howard utsi: “Ngiyajabula ngekutsi umkami bekahlala anemoya lophansi futsi angahlutfuki.” Umfati wakhe utsi: “Umyeni wami bekafuna ngikuyekele ngenkhani kufundza liBhayibheli. Bekatsi kudlalwa ngami. Kunekutsi ngiphikisane naye, bengimtjela kutsi kungenteka ucinisile, kodvwa bengiphindze ngimtjele kutsi angikucondzisisi kahle lakushoko. Ngako-ke, ngamcela kutsi afundze lencwadzi lebengifundzelwa yona. Wayifundza, futsi wavumelana naloko  bekakufundza kuyo. Loko kwamtsintsa kakhulu.” Kuhle kukhumbula kutsi umuntfu longakholwa angase ative alahliwe nangabe lashade naye amshiya kute ayohlanganyela emisebentini yebuKhristu, kodvwa kumcinisekisa ngelutsandvo lwakho kungayicedza imiva lenjalo.

BASITE KUTSI BEMUKELE INKHOLO YELICINISO

8. Ngusiphi seluleko umphostoli Pawula lasiniketa emaKhristu lashade nebantfu labangakholwa?

⁸ Umphostoli Pawula weluleka emaKhristu kutsi angabashiyi bantfu lashade nabo ngesizatfu sekutsi nje abasiwo emakholwa. b (Fundza 1 Khorinte 7:12-16.) Kucabanga ngekutsi umuntfu lashade naye longakholwa angase abe ngumKhristu, kungamsita umKhristu kutsi alondvolote injabulo yakhe ngisho ahlala emndenini lowehlukene ngekwenkholo. Nanobe kunjalo, kute umKhristu asite umuntfu lashade naye kutsi acondze liciniso kufanele acaphele indlela lakwenta ngayo loko, njengobe nje kuvetiwe etibonelweni letilandzelako.

9. Yini lokufanele siyicaphele nasichazela emalunga emndeni langakholwa emaciniso latsite eliBhayibheli?

⁹ Nakakhumbula indlela lasabela ngayo ngesikhatsi afundza emaciniso eliBhayibheli, Jason, utsi: “Bengifuna kutjela wonkhe umuntfu ngalengikufundzako.” Ngesikhatsi umuntfu lofundzelwa liBhayibheli acala kujabulela emaciniso lafundzelwa wona emiBhalweni, angase ajabule kangangekutsi akhulume ngawo ngaso sonkhe sikhatsi. Angase alindzele kutsi emalunga emndeni wakhe langakholwa emukele emaciniso ngekushesha, kodvwa kungenteka angavumelani naye. Kujabula kakhulu kwaJason kwamtsintsa njani umkakhe? Naku lakushoko: “Ngamangala kakhulu.” Lomunye wesifazane lowemukela emaciniso ngemuva kweminyaka lengu-18 emukelwa yindvodza yakhe, utsi: “Bekudzingeka ngiwafundze kancane kancane.” Nangabe uchubela lotsite sifundvo seliBhayibheli loshade nemuntfu lote sifiso sekukhonta Nkulunkulu, kungani ungenti imetamo yekuphrakthiza naye tikhatsi letinyenti kute umsite ngemasu langawasebentisa kute aphumelele kulesimo lakuso? Mosi watsi: “Imfundziso yami ayehle njengemvula, emavi ami ahhohloke njengematolo; yebo, njengemabhudlo etjanini lobuluhlata.” (Dut. 32:2) Emavi lambalwa eliciniso lashiwo ngendlela lekahle futsi nangesikhatsi lesifanele ancono kunemavi lamanyenti.

10-12. (a) Ngusiphi seluleko umphostoli Phetro lasiniketa emaKhristu lashade nebantfu labangakholwa? (b) Lomunye umuntfu lobekafundzelwa liBhayibheli wafundza njani kusebentisa seluleko lesibhalwe ku-1 Phetro 3:1, 2?

¹⁰ Umphostoli Phetro weluleka bafati labangemaKhristu labahlala emindenini leyehlukene ngekwenkholo. Wabhala: “Tfobelani emadvodza enu, kuze kutsi nakukhona emadvodza langalikholwa livi, nawo azuzeke ngaphandle kwenkhulumo, azuzwe yintfobeko  yebafati bawo, nakabona similo senu lesimsulwa lesinekwesaba Nkulunkulu.” (1 Phet. 3:1, 2) Umfati angakwati kusita indvodza yakhe kutsi yemukele inkholo yeliciniso ngekutsi ayitfobele futsi ayihloniphe kakhulu, ngisho nalapho imphatsa kabi. Ngendlela lefananako, indvodza lengumKhristu kufanele itiphatse ngekuvumelana nemitsetfo yaNkulunkulu futsi ibe yinhloko lenelutsandvo, ngisho nangetulu kwekuphikiswa ngumfati wayo.—1 Phet. 3:7-9.

¹¹ Tibonelo letinyenti talamuhla tiveta inzuzo letfolakala ngekusebentisa leseluleko saPhetro. Cabanga ngesibonelo sa-Selma. Ngesikhatsi acala kufundza liBhayibheli naboFakazi BaJehova, Steve, loyindvodza yakhe, akazange ajabule. Steve utsi: “Ngatfukutsela, ngaba nesikhwele, ngaba ngundlovukayiphikiswa futsi ngativa ngishaywa luvalo.” Selma utsi: “Ngisho nangembikwekutsi ngitfole liciniso, kuhlala na-Steve bekumatima kakhulu. Bekasheshe atfukutsele. Ngesikhatsi ngicala kufundza liBhayibheli, simo saba sibi kakhulu.” Yini leyamsita?

¹² Selma ukhumbula sifundvo lasifundziswa ngulomunye Fakazi lobekamfundzela liBhayibheli. Utsi: “Ngalelinye lilanga, bengingafuni kufundza. Sizatfu saloko kutsi ngayitolo, indvodza yami beyingishayile ngesikhatsi ngetama kuchaza lokutsite, futsi bengiva buhlungu lobukhulu. Ngemuva kwekucocela lodzadze ngalobekwentekile kanye nekutsi bengitiva njani, watsi angifundze 1 Khorinte 13:4-7. Njengobe ngifundza, ngatsi: ‘Steve akakwenti loku kimi.’ Nanobe kunjalo, lodzadze wangenta kutsi ngishintje umbono wami, wangibuta: ‘Tingakhi tento telutsandvo kuleto lotifundzile wena lotivetela indvodza yakho?’ Ngaphendvula ngatsi: ‘Kute lengitivetako, phela kumatima kuhlala nalomuntfu.’ Ngemusa, lodzadze watsi: ‘YeSelma, kantsi ngubani lofuna kuba ngumKhristu emkhatsini wenu nobabili? Nguwe yini nobe yindvodza yakho?’ Njengobe besengicaphela kutsi bekufanele ngishintje indlela lengicabanga ngayo, ngathandaza kuJehova ngamcela kutsi angisite ngimtsandze kakhulu umyeni wami. Kancane kancane, simo sacala kushintja.” Ngemuva kweminyaka lengu-17, Steve walemukela liciniso.

INDLELA LABANYE LABANGASITA NGAYO

13, 14. Labanye ebandleni bangawasita njani emaKhristu lahlala emindenini leyehlukene ngekwenkholo?

¹³ Njengematfonsi emvula lamantisa umhlabatsi futsi lasita titjalo kutsi tikhule, linyenti lebantfu ebandleni lingafaka sandla ekutfutfukiseni injabulo yemaKhristu lahlala emindenini leyehlukene ngekwenkholo. Elvina, lohlala e-Brazil utsi: “Lutsandvo lebengiluvetelwa bazalwane kanye nabodzadzewetfu, ngilo lelangisita kutsi ngime ngicine ecinisweni.”

¹⁴ Umusa kanye nekukhatsalela kwalabanye ebandleni, kungayitsintsa inhlitiyo yelilunga lemndeni lelingakholwa. Lenye indvodza lehlala e-Nigeria, futsi leyemukela  liciniso ngemuva kweminyaka lengu-13 umkayo alemukele, itsi: “Ngalelinye lilanga ngihamba nalomunye Fakazi, imoto yakhe yafa. Wafuna labanye boFakazi labebahlala kuleyo ndzawo, futsi basiniketa indzawo yekulala ngalobo busuku. Basinakekela, kwaba shengatsi besibati kusukela kadzeni. Ngekushesha, ngatibonela mine lutsandvo lwemaKhristu umkami labehlale angitjela ngalo.” ENgilandi, umfati lowemukela liciniso ngemuva kweminyaka lengu-18 indvodza yakhe ilemukele, utsi: “BoFakazi bebasimema sobabili kute sitewujabulela kudla kanye nabo. Bengitiva ngemukelekile ngaso sonkhe sikhatsi.” c Lenye indvodza lehlala eveni lelifananako, futsi leyagcine seyinguFakazi, itsi: “Bazalwane kanye nabodzadze bebasivakashela, ngaletinye tikhatsi bebasimema emakhaya abo, futsi bengibona kutsi banemoya lomuhle wekunakekela tivakashi. Loku ngakucaphela kakhulu ngesikhatsi ngilaliswe esibhedlela, futsi linyenti labo lefika litongihlola.” Ungatitfola yini tindlela tekuveta kukhatsalela lokufananako ngemalunga emndeni langakholwa?

15, 16. Yini lengasita umKhristu kutsi alondvolote injabulo nangabe lamanye emalunga emndeni wakhe angalemukeli liciniso?

¹⁵ Kuliciniso kutsi akusibo bonkhe bantfu labangakholwa labashade nemaKhristu, bantfwana bawo, batali nobe letinye tihlobo labatawemukela inkholo yeliciniso, ngisho nangemuva kweminyaka leminyenti yekutiphatsa kahle kanye nekufakaza ngelikhono. Labanye kubo bachubeka banganaki nobe baphikise kamatima. (Mat. 10:35-37) Nanobe kunjalo, nangabe umKhristu aveta timfanelo letifanana netaNkulunkulu, kungaba nemiphumela lemihle. Lenye indvodza lebeyingakholwa itsi: “Ngesikhatsi umuntfu loshade naye longumKhristu agcamisa timfanelo takhe letinhle, kunyenti lokwenteka engcondvweni kanye nasenhlitiyweni yemuntfu longakholwa. Ngako-ke, ungalahli litsemba lekutsi umuntfu loshade naye longakholwa angagucuka.”

¹⁶ Ngisho nalapho lilunga lemndeni lingagucuki, umKhristu angakhona kujabula. Nanobe indvodza yakhe ingasabeli emlayetweni weMbuso nangemuva kweminyaka lengu-21 enta imetamo, lomunye dzadze utsi: “Ngiyakhona kulondvolota injabulo yami ngekutsi ngetame kujabulisa Jehova, kwetsembeka kuye kanye nekulwela kucinisa buhlobo bami naye. Ngekutimisela emisebentini yebuKhristu lenjengekuba nesifundvo lengitichubela sona, kuba khona emihlanganweni, kuya ensimini kanye nekusita labanye ebandleni, kungente ngasondzelana kakhulu naJehova futsi kwalondvolota inhlitiyo yami.”—Taga 4:23.

UNGAPHELI EMANDLA!

17, 18. UmKhristu angahlala njani anelitsemba ngisho nobe ahlala emndenini lowehlukene ngekwenkholo?

¹⁷ Nangabe ungumKhristu lotsembekile lohlala emndenini lowehlukene ngekwenkholo, ungapheli emandla. Khumbula kutsi ‘ngenca yelibito lakhe lelikhulu Jehova angeke abalahle bantfu bakhe.’ (1 Sam. 12:22) Jehova utawuhlale anawe nangabe uchubeka ubambelele kuye. (Fundza 2 Tikhronike 15:2.) Ngako-ke, ‘yenta Simakadze abe yinjabulo yakho . . . nikela indlela yakho kuSimakadze, umetsembe.’ (Hla. 37:4, 5) ‘Cinisela njalo emthandazweni,’ futsi bani nekukholwa kutsi Babe wetfu wasezulwini lonelutsandvo angakusita kutsi ubeketelele nobe ngabe ngubuphi bumatima.—Rom. 12:12.

¹⁸ Ncusa Jehova kutsi akuphe umoya wakhe longcwele kute ukusite utfutfukise kuthula emndenini wakho. (Heb. 12:14) Ungakwati kwakha kuthula lokungagcine kutsintse tinhlitiyo temalunga emndeni wakho langakholwa. Utawutfola injabulo nekuthula kwengcondvo kanye nekwenhlitiyo njengobe ‘konkhe ukwentela ludvumo lwaNkulunkulu.’ (1 Khor. 10:31) Kuko konkhe loku, kungakucinisa kakhulu kwati kutsi ungasekelwa bazalwane kanye nabodzadzewenu labasebandleni lebuKhristu.

[Imibhalo lengentansi]

[Imibuto Yesihloko Lesifundvwako]

[Sitfombe ekhasini 28]

Khetsa sikhatsi lesikahle kute uchaze tinkholelo takho

[Sitfombe ekhasini 29]

Asimcabangele umuntfu longakholwa loshade nemKhristu